أخى و أختى المصريين المهاجرين و اللى على وشك الهجرة

[Farida]

الصحف المصرية والعربية

متهيألى البعض فاكر دفاعاتى المستمرة عن مصر و المصريين و ايمانى بقدراتهم حتى وانا باعانى فى بلدى و بجد الموضوع ده كان ضاغط على اعصابى و بشده انى مؤمنه ان الوضع ده مش حايستمر و ان المصريين يستحقوا ما هو افضل و ان الشعوب تستحق حكامها و لما الشعب المصرى نضج و عرف انه عظيم و يستحق ماهو افضل ثار و استحق حريته و استحق ان يحكمه من هو جدير بان يحكم مصر .....
مصر بتتولد من جديد و اكيد الجميع و العالم كله ادرك قيمة المصريين و مدى عظمتهم ة اصرارهم و حبهم للسلم و نبذهم للعنف بجد انا باحلم بحاجات كتير ان شاء الله تتحقق بس كنت عايزه اعرف هل تغيرت فكرتكم عن المصريين و لو كانت الأجابه بنعم ناويين على ايه و هل فيه خطط معينه تحبوا نناقشها و هل بسقوط النظام سقطت اسباب هجرتكم او طلبكم للهجره هل فيه فرصه ترجعوا تعمروا و تفيدونا و تستفيدوا ولا محتاجين وقت اكتر لضمان الأستقرار و لا ايه ........انا عارفه ان الوضع الأن ليس فيه ضمانات للمستقبل لكن فيه روح جديده و بودار حريه و ديموقراطيه بس بجد احساسى ان فعلا الوقت الجاى هو الأصعب هو اللى محتاج قوة ايمان و صبر على اولا اجتذاب اكثر للمؤيدين للثورة لأن للأسف مازال هناك الكثيرون اللى مش مع اللى حصل ثانيا المساهمه فى بناء كيانات سياسيه و اجتماعيه لتصليح الخراب اللى حصل
لما روحت ميدان التحرير و شوفت عينه من كل المصريين السلفيين و الأخوان و الأقباط و شباب مارينا و شباب جمصه لأ بجد شوفت اللى جايين من القرى و شوفت اساتذد فى الجامعه الأمريكيه شوفت المنتقبات و اللى ضاربين شعرهم اصفر و شوفت رجال بدقون بيغنوا مع اللى بيغنى على العود الكل بيتكلم زى بعض الكل عايز يعيش بكرامه شوفت المعتصمين بأسرهم و اولادهم و شوفت الساسه و اتكلمت معاهم -من كلامى مع احدهم اعطانى الكارت بتاعه و قالى كلمينى لما الثورة تنجح علشان تبقى عضوة معانا فى الحزب المزمع انشاؤه- لأ بجد مصر بتتغير و عندى امال و طموحات كتير- حأعملا موضوع لوحده - كان نفسى اعرف رأيكم و نفسى اعرف ايه فى دماغكم انا عرفت رأى 3 او 4 كان نفسى اعرف رأى الباقى و بالمناسبه احنا فى بلد ديموقراطى قصدى على وشك ان يكون ديموقراطى فالكل يتكلم على راحته

 

[!! Lidooooo !!]

فريدة العزيزة

لازلت أذكر كيف كنا نخرج في الأيام الأولى كمن يخفي إيمانه ونلف العلم بالجريدة توفيرا للطاقة التى تستنزف في مناهدة المثبطين المرجفين .. وكيف كان موضوعك دفاعا عن الثورة : اسئله مشروعة و اجابات شافية -والذي طبعه ووزعه الكثيرون- مرجعا وافيا لقطع الطريق على هؤلاء .. فلك كل التحية

ما حدث كان رائعا جدا .. العالم كله وقف مشدوها أمام عظمة ودأب المصريين .. رأيت بعيني رجالا يهرولون في اتجاه رصاصات الغدر وحجارة الوحوش بإيمان ويقين كان يلقي الرعب في قلوبهم .. لحظات فاصلة تأملت فيها مصر التي طالما حلمت بها ومعدن المصريين الحقيقي حين ينفض عنه التراب

مصر تولد .. وليس أحوج من أبنائها المخلصين النابهين النابغين ليشهدوا الحلم يتحقق

سألت بايوباشا الحبيب فقال انه سينهي دراسته ويعود ولن يسع في طلب الجنسية الكندية

سألت موريال فلم تقطع رأيا بشأن قرار السفر وقالت انها تفكر في مشروع لتوعية البسطاء بحقوقهم وكيف أن دولتنا المدنية ستكون جسرنا للحلم

أريد أن أعرف آراءكم أيضا يا طيور مصر المهاجرة أو التى تنوي

ألم يغير المشهد في خططكم شيئا

 

 

[Farida]

اقتباس المشاركة الأصلية كتبت بواسطة !! Lidooooo !! فريدة العزيزة لازلت أذكر كيف كنا نخرج في الأيام الأولى كمن يخفي إيمانه ونلف العلم بالجريدة توفيرا للطاقة التى تستنزف في مناهدة المثبطين المرجفين .. وكيف كان موضوعك دفاعا عن الثورة : اسئله مشروعة و اجابات شافية -والذي طبعه ووزعه الكثيرون- مرجعا وافيا لقطع الطريق على هؤلاء .. فلك كل التحية

ليدو انت بتتكلم جد و الله العظيم كنت عايزه اعمل موضوع اقول فيه ياترى حد استفاد من اى كلمه انا قولتها او رأى او مشاركه او موضوع علشان احس انى بنيت طوبه فى الثورة دى بجد يا ليدو و الله العظيم ماتعرفش كلمتك دى عملت فيا ايه ................انا روحت الميدان و قابلت كثيرين و كنت باعطيهم لينك الموضوع ده علشان يطبعوه و يوزوعوه
ليدو مش عارفه اشكرك ازاى انا حسيت دلوقتى انى عملت حاجه ولو بسيطه فى الثورة كان نفسى اروح هناك و ابات مع اللى بيباتوا بس كنت لما باروح ساعات هناك كنت بالاقى الجميع ببقولى احنا مش محتاجين حد يبات هنا احنا محتاجين تصلحوا صورتنا للى قاعدين فى البيوت
شكرا مرة تانيه و تالته لك يا ليدو و ان شاء الله نتقابل وجها لوجه من غير خوف لما نعمل حزب المطاريد

 

 

[Eng A7m3d]

يا دكتورة فريد متنسيش أن محدش بيكرة بلده إنما بيعتب عليها
لما الناس لقت وبتلاقي مصر بتتصلح إيه اللي هيخليهم يوافقوا على سجن الغربة
هينزلوا ويساعدوا في مصر الجديدة.... مصر الحديثة... مصر الديمواقراطية ...مصر بلدنا

 

 

[MFaisal]

اقتباس المشاركة الأصلية كتبت بواسطة !! Lidooooo !! ألم يغير المشهد في خططكم شيئا

لا طبعا



























غير كتير جداا

 

 

[savary]

الموضوع دا صعب اوى على فكره ومحتاج قدر كبير من التصالح مع النفس و الصراحه والوضوح

لسه ببارك للبيت امبارح بعد خطاب التنحى , ووالدتى سألتنى نفس السؤال

لسه عاوز تهاجر ؟؟

بلمت شويه بس رديت
__________________________________________________ ___
كام نقطه مهمين الاول ,,,

اقتباس هل تغيرت فكرتكم عن المصريين

سؤال غريب !!
وكأنه موجه للشعب الفنلندى مثلا !!
او لشعوب حضاره المايا !!

هل تغيرت فكرتنا عن نفسنا ؟؟
غريب ان حد يسألك هل غيرت فكرتك عن نفسك ؟؟
وكأنك اصبحت من الناس التانين !!

الموضوع مكنش افكار
لو على الافكار فبالتأكيد الوضع اللى كان فى مصر يخلى اى حد يقول ان فى حاجه هتحصل ومستحيل الوضع هيستمر كدا
اختلفنا فى تخيلنا للى ممكن يحصل
انا اتوقعت ان الشراره هتكون بموت مبارك , اتوقعت ان القياده هتكون للعامه والدهماء
والحمد لله خابت توقعاتى
روايات كتيره وافلام كتيره و مقالات كتيره وتحليلات كتيره توقعت حدوث شىء ما فى مصر
وكنا بنقول ان 2011 سنه فارقه فى تاريخ مصر !!!

اشدنا برده بشباب 6 ابريل تحديدا وانهم انضف ما فى مصر واجمل ما فى مصر
وفعلا كانوا نواه الثوره المصريه .

يمكن جلد الذات اللى كان بيحصل على كافه المستويات كان له دور فى الثوره برده
لما يبقى فى كتاب اسمه مصر مش امى دى مرات ابويا
او قصيده زى جحا لهشام الجخ
او هذه بلاد لم تعد كبلادى لفاروق جويده
او مقالات نفخ الذات - مش بس جلدها - لابراهيم عيسى و بلال فضل

انا لما قلت ان 40% من المصريين عايشين عيشه تأنف منها الكلاب
مكنش النيه فى كل دا هو السب و التقريع - زى ما الناس فاهمه

هو فى الاول وفى الاخر جلد ذات و صرخه مظلوم
يمكن دا اللى خلى الناس تستبيع
يمكن دا كان له دور فى هتاف زى خلاص رايحين شهداء بالملايين

الناس حست بجد انها موته مش اكتر
وزى ما قلت للاخت فرح فرحنا فى موضوعها عن التغير
ضربوا الاعور على عينه !!
لا شىء عندى اخسره !!

الحاجه التانيه انها كانت صرخه
زى ما بو عزيزى صرخ وولع فى نفسه
نوع من انواع التنفيس لكل احاسيس الظلم والقهر اللى كانت جوا كل واحد مننا بشكل او بأخر

انما الترصد لهذه الصرخات
و محاوله تكتيمها و محاوله خنقها هو اللى كان بيحصل
فى قضايا حسبه يرفعها احدهم باسم المجتمع او يرفعها احدهم باسم مصر
تهمه فاشيه نازيه قمعيه اسمها تشويه سمعه مصر !!

وكأن مصر عملت لتوكيل لاحدهم فى الشهر العقارى فيرفع باسمها قضيه على واحد بيصرخ وبيفضفض لانه مظلوم ولانه مقهور ولانه قرفان !

لو سمحت لا تنفس !
لو سمحت لا تصرخ !
لو سمحت لا تعترض !!

لانك بتوجه سب جماعى للناس اللى عايشين فى مصر !

ووصلت لتصريح ان المفروض الناس دى تتسحب منها الجنسيه المصريه لانها خساره فيهم - بتعبير احدهم !!
__________________________________________________ ________________

اقتباس هل بسقوط النظام سقطت اسباب هجرتكم او طلبكم للهجره هل فيه فرصه ترجعوا تعمروا و تفيدونا و تستفيدوا ولا محتاجين وقت اكتر لضمان الأستقرار و لا اي

سؤال فردى جدا و شخصى جدا

بالنسبالى انا فقطعا لاء

لسه حلم الهجره هو الحلم الاول والاخير

انا عندى دلوقتى 28 سنه
معرفتش احقق اى حاجه فى مصر

مش هكدب واقول اصل عشان البلد كانت بايظه و عشان الظروف وعشان وعشان وعشان

اكيد فى حاجه متعلقه بيا
فى مشكله عندى انا
ملهاش دعوه بظروف او نظام او او او

فى ناس نجحت فى مصر و عرفت تعمل حاجه

عرفت تحقق ولو جزء بسيط من احلامها

الجزء دا يستاهل انها تكمل و الظروف ان شاء الله هتبقى احسن و النجاح دا يستمر وتحقيق الذات دا يستمر

انما انا معرفتش
حاولت كتير و جربت كتير
تعبت وذاكرت واجتهدت و قريت و اشتغلت باقصى طاقتى وروحت وجيت
والمحصله كانت صفر !!

فشل ذريع على كافه المستويات و لله الحمد من قبل و من بعد

عاوز اجرب فى وسط تانى
فى محيط تانى
مع ناس تانيه و بلد تانيه

معنديش استعداد يضيع عمرى فى البحث عن سراب

هو العمر فى كام 28 سنه ؟؟؟

معنديش استعداد يتخطف منى حلم قدام عينى و انا واقف عاجز مش عارف اعمل ايه

معنديش استعداد اعيش تجربه تانى زى اللى مريت بيهم
حيث ينتظرنى ذلك ( الصفر ) فى نهايه الطريق مخرجا لى لسانه

اعد المحاوله مره اخرى !!

يمكن معرفش اهاجر اساسا
ويمكن اهاجر و برده محققش حاجه هناك

فى احتمالات يعنى ,,,

انما فى مصر مكنش فى احتمالات اساسا يعنى !

وفى النهايه كله نصيب
وفى السماء رزقكم وما توعدون

اللهم دبر لى فانا لا احسن التدبير

 

 

[Matrix]

دعوه لموضوعي

أطلق العنان لمشاعرك ، كن إنسان.

كم جميلة هي الأحلام وكم تدمع العين شوقا وحباً لمصرنا كما نتمناها.

ولكن عندما يكون هناك طرف في المعادلة إسمه أطفال في مراحل تعليم مختلفة .

أي أنهم بدأوا طريقاً معيناً ولن يستطيعون إكماله إلا حيث هم

يصبح من الصعب بل من شبه المستحيل شد الرحال إلى مصر والمغامرة بمستقبل أطفال لتحقيق حلم أباء وأمهات في حياة كريمة في وطنهم...في حين لا نستطيع أن نضمن لهم الان مستوى التعليم الذين يحصلون عليه .

لن أتحدث عن الرفاهية ولا عن التفاصيل المادية التى يمكن التخلي عنها امام حلم كبير كهذا

ولكن الأطفال ومستقبلهم من يستطيع أن يغامر به .

إن المغترب عن مصر الان هو كشجرة تم نقلها لتربة أخرى فكبرت وأمتدت جذورها عميقة في هذه التربة الجديدة ومن الصعب وربما المتسحيل إعادة زراعتها مرة اخرى في تربتها الأصلية.

 

 

[mohsen]

شوفى يا أستاذتنا الفاضلة:

فكرة العالم كله (بما فيهم المصريين نفسهم) تغيرت عن المصريين.

أسباب هجرتى اللى هى الدولة الديكتاتورية اللى بيملكها شخص واحد سقطت. يعنى (زى ما سمعت جمال البنا و البرادعى بيقولوا) الجمهورية الأولى إنتهت.

فيه واحد كندى إقترح إن المصريين المقيمين فى كندا و الولايات المتحدة يقدموا خبرتهم للمصريين عن كيفية إنشاء أحزاب سياسية ناجحة تعبر فعلا عن الإتجاهات السياسية. هى فكرة كويسة فى رأيى بس للأسف أنا مافهمش فى النواحى السياسية و الإدارية. فالحاجة الوحيدة اللى ممكن أقدمها هى خبرتى كاستشارى فى مجال القوى الكهربية و أعتبرها هدية ضئيلة جدا للشهداء اللى كانوا عايزين يشوفوا مصر فى حال أفضل.

يعنى ممكن أبدأ فى إجراءات الهجرة لمصر

 

 

[ELSOHAGY]

اقتباس المشاركة الأصلية كتبت بواسطة savary انما انا معرفتش حاولت كتير و جربت كتير تعبت وذاكرت واجتهدت و قريت و اشتغلت باقصى طاقتى وروحت وجيت والمحصله كانت صفر !! فشل ذريع على كافه المستويات و لله الحمد من قبل و من بعد عاوز اجرب فى وسط تانى فى محيط تانى مع ناس تانيه و بلد تانيه معنديش استعداد يضيع عمرى فى البحث عن سراب هو العمر فى كام 28 سنه ؟؟؟ معنديش استعداد يتخطف منى حلم قدام عينى و انا واقف عاجز مش عارف اعمل ايه معنديش استعداد اعيش تجربه تانى زى اللى مريت بيهم حيث ينتظرنى ذلك ( الصفر ) فى نهايه الطريق مخرجا لى لسانه اعد المحاوله مره اخرى !! يمكن معرفش اهاجر اساسا ويمكن اهاجر و برده محققش حاجه هناك فى احتمالات يعنى ,,, انما فى مصر مكنش فى احتمالات اساسا يعنى ! وفى النهايه كله نصيب وفى السماء رزقكم وما توعدون اللهم دبر لى فانا لا احسن التدبير

يا سافارى يا صديقى..
ربنا يوفقك للى فيه الخير فى اى حته تكون فيها...

 

 

[Farida]

اقتباس المشاركة الأصلية كتبت بواسطة mohsen شوفى يا أستاذتنا الفاضلة: فكرة العالم كله (بما فيهم المصريين نفسهم) تغيرت عن المصريين. أسباب هجرتى اللى هى الدولة الديكتاتورية اللى بيملكها شخص واحد سقطت. يعنى (زى ما سمعت جمال البنا و البرادعى بيقولوا) الجمهورية الأولى إنتهت. فيه واحد كندى إقترح إن المصريين المقيمين فى كندا و الولايات المتحدة يقدموا خبرتهم للمصريين عن كيفية إنشاء أحزاب سياسية ناجحة تعبر فعلا عن الإتجاهات السياسية. هى فكرة كويسة فى رأيى بس للأسف أنا مافهمش فى النواحى السياسية و الإدارية. فالحاجة الوحيدة اللى ممكن أقدمها هى خبرتى كاستشارى فى مجال القوى الكهربية و أعتبرها هدية ضئيلة جدا للشهداء اللى كانوا عايزين يشوفوا مصر فى حال أفضل. يعنى ممكن أبدأ فى إجراءات الهجرة لمصر

و الله لسه حأكتب اقول قولى نازل امتى وانا استقبلك ي ااستاذ مكسوف و بعدين اكتشفت ان اسم حضرتك بقى محسن .......-هو اتغير بعد الثورة يظهر-
المهم مصر محتاجه لنا و الله و خصوصا النهارده لما نزلت و لقيت ناس كتير مش حاسه بحاجه لسه