بعد الفرحه
وبعد النصر المبين
وبعد السعاده والانتشاء
دعونا نزيد وعينا السياسى ,, دعونا لا نكرر تجارب الماضى ,, دعونا نتعلم من اخطائنا
دعونا نحذر ... فاحذروهم !
__________________________________________________ _______________________________________
1- العسكر
كل من قدم من المؤسسه العسكريه لا يصلح للحكم !
ان كان وطنيا مخلصا شاعرا بشعبه و بفقرائه , ان كان لديه حلم ومشروع كعبد الناصر
او ان كان قزما متقزما متأمركا متصهينا كانور السادات
او ان كان لصا طاغيه غبيا متأمركا متصهينا كحسنى مبارك
العسكر لا يصلحون للحكم ,, فالعسكرى لا يعرف سوى طاعه الاوامر
لا يعرف سوى ان يقول نعم لقائده ,, وان كان قائدا فهو يعطى الاوامر ولا يناقش او يسمح لاحد ان يناقشه
لذلك جاء الحكم العسكرى بكوارث رهيبه لم تكن لتحدث لولا ان من يحكم الدوله عسكرى لا يناقشه احد
عبد الناصر الغى الحياه السياسيه و الغى مفهوم الحريه والحرمه للشعب و صدمنا فى 67 و كلفنا 14 الف شهيدا !!!
السادات كلفنا ثغره الدفرسوار و الاستعباط السياسى والديمقراطيه بالارانب و فتح باب للامركه والتصهين بلعنه كامب ديفد و طلع ميتين اللى جابونا بدستور 71 المهرتىء
مبارك افقرنا و ذلنا وجوعنا وعاث فينا فسادا , فقدنا كل شىء فى حكم مبارك , الامل والحلم و الكرامه و حقوق الانسان
لا مزيد من العسكر
لا للدوله العسكريه
العسكرى لا يناقش !! يرى وجه نظره فقط هى الصحيحه و بالتالى هيلبسنا فى حيط زى 67 وكامب ديفد
نريدها مدنيه - وان كان بمشاركه للعسكر فى البدايه فلا بأس
__________________________________________________ ______
2- السفليين ,,
المتسوعدين والمتخلجنين
بتوع فقه الحاكميه السياسيه !!
بتوع لا للخروج على الحاكم
بتوع الدعوه للحاكم بالهدايه والصلاح
هؤلاء المؤفينون ,
هؤلاء الضريبه !!
بيضربوا افيون وهابى معتبر , مسقى بفلوس البترودولار
لازم يفهموا ان مصر التى تتسول خبزها وقمحها من امريكا , وشرعيه نظام حكمها من تل ابيب و دينها من السعوديه
قد انتهت !!
قد ولت بلا رجعه !!
مصر الخرافيه الغنميه التى يحكمها راعى غنم قد ولت بلا رجعه !!
الحاكم موظف عند الشعب ليس الا
الحاكم يحكم لفتره رئاسيه وان اصلح يحكم اخرى و فقط !!
الحاكم لا يورث ابنه !!
عاوزينها مدنيه , حره , عزيزه و كريمه
يعيش اهلها زى ما البنى ادمين عايشين فى كل الدنيا
فى تركيا , فى السنغال , فى الهند , فى الباكستان ., فى ماليزيا .. فى اسرائيل ,, فى فرنسا والمانيا وايطاليا
اللى عاوز يعيش فيها كده اهلا وسهلا
مش هنسمح للى عاوز يعيش زى الخروف يدعى للى يحكمه و ميخرجش عليه انه يعيشنا كده
عاوز تعيش كده اتكل على الله
اطلع على السعوديه , على ايران , على غزه , على تورا بورا ., على افغانستان
توهبن و تسلفن و كفر واكفر و براحتك يعنى
لا للدوله الدينيه !!
وهنا مش قصدى على اى اخ ملتحى ومرتدى لجلباب قصير او اى اخت منتقبه
دى حريه شخصيه
كلنا شوفنا فى التحرير وفى المظاهرات اخوه ملتحين واخوات منتقبات
دول سلفيين .
انا بتكلم عن بتوع المظاهرات حرام والديمقراطيه حرام و الانتخابات حرام والاحزاب حرام
بتكلم عن اللى شالوا سلاح و قتلوا الناس زماااااان
بتكلم عن ارهابين امبارح
واللى انهرده لفوا 180 درجه و اللى كان اسمه جهاد بقى ارهاب
وبقم احذيه فى قدم حكامهم
مؤفينين , وضريبه
ومستنين يدخلوا الجنه على اساس ان الجنه دى غرزه بيدخلها ضريبه الافيون السياسى
بيعتمدوا على كتب و على فقه ما انزل الله به من سلطان
انما كتبه وخطه فقهاء السلطان
من يأكلون خبزه ومن يلعقون حذائه
هؤلاء الذين يأكلون
طعام الثريد
ويحبون امتطاء العبيد - زى ما بيقول عمنا امل دنقل !!
لا للسفليه
لا للخلجنه
لا للسعوده
حكايه الخروج عن الحاكم فدا لما يبقى حاكم !!
يعنى لما يبقى جاى للحكم ببيعه شرعيه !!
يعنى جاى للحكم بصندوق انتخابات شفاف ونزيه !!
انما غير كدا يبقى اسمه غاصب , قاهر , ظالم
ودا الناس مش بس تخرج عليه
دا الناس تديله بالجزمه على دماغ اللى جابووووووووووووووه
واللى يخرج عليه يبقى مجاهد فى سبيل الله و اللى يقتل فى الخروج دا يبقى اسمه شهيد !!
زى ما الحسين رضى االله عنه شهيد
و عبد الله بن الزبير رضى الله عنه شهيد
وزى شهداء الثوره فى مصر وتونس
الاسلام محطش اسس لطبيعه الحكم او طبيعه الدوله الاسلاميه
ربنا ما قالش فى القرآن الحكم يبقى ملكى ولا جمهورى رئاسى ولا جمهورى برلمانى
الاسلام بيحطط اساسات لطبيعه الحكم
اللى هى الشورى الملزمه ,, العدل الاجتماعى ,, تكافؤ الفرص ,, احترام الحريات
كل دا يتحقق ازاى ؟؟
انتم اعلم بشؤن دنياكم !
بس كده
الخلافه نظام ارتضاه الصحابه فى ذلك الوقت و ارتضاه الشعب لطبيعه الحكم
هتلاقيهم حتى بيجددوا فيه و يطوروا فيه
شوف كيف انتقلت السلطه من النبى صلى الله عليه وسلم الى ابى بكر ثم منه الى عمر ثم منه الى عثمان ثم منه الى على بن ابى طالب رضى الله عنهم اجمعين
مش هتلاقى (اصطمبه ) واحده وكله ماشى عليها !!
تانى , انتم اعلم بشؤن دنياكم !!
والدنيا دلوقتى و كل البشريه الا من رحم ربى
بتحقق العداله الاجتماعيه و تكافؤ الفرص و احترام الحريات - اللى هى اساسات الحكم الرشيد فى الاسلام
عن طريق حاجه اسمها الديمقراطيه
وعن طريق مفاهيم زى تداول السلطه وتحديد مدد الحكم - متبقاش مفتوحه على البحرى يعنى
ودستور وانتخابات و احترام الحريات ودوله مدنيه
واحنا مش هنخترع يعنى و لا نبدأ من اول وجديد
السياسه دى علم ,, والعلم دا احنا متخلفين فيه ولما نحب نتقدم فيه نشوف العالم وصل لفين ونحاول نقلد ونحاكى بما يتناسب مع ظروفنا
اخيرا فارجو يعنى ان ( الهرتله السياسيه ) للاخوه ( السفليين ) تنتهى فى مصر
الله يكرمهم يعنى احنا مش ناقصين
الدوله الدينيه هى دوله قمعيه فاسده شديده الفساد
دوله لا يناقش ولا يحاسب من يحكمها
لانك متقدرش تقوله كفايه كده
هيقلك بتقول لحكم الدين كفايه ؟؟؟
بتقول للشرع كفايه ؟؟
بتقول لربنا كفايه ؟؟؟ - دا طبعا على اساس انه واخد توكيل من ربنا وبيحكم بيه !
وشوفوا اى دوله دينيه زى ايران او غيرها
تزوير وقمع و سحل و كله بأمر الله !!
__________________________________________________ ______
3- الاخوان !!
احذروهم جدا جدا جدا
قاوموهم جدا جدا جدا
محترفى البراجماتيه
محترفى اللعب بالبيضه والحجر
محترفى خلط الاوراق
دين فى سياسه و سياسه فى دين وعلى كل لون يا باتستا !
وطنين ولا انكر
شرفاء ولا اجادل
ضحوا من اجل هدفهم ومعتقدهم ولا اناقش
لكن نقطه نظام !!
هم الفصيل الاقوى الان فى مصر
هم الاكثر تنظيما والاكثر جاهزيه لخوض اى انتخابات
لكنهم مرفوضين دوليا !!
لو وصلوا لسده الحكم فسيتحرك المجتمع الدولى و يؤجر جينرال ليقوم بانقلاب عسكرى يباركه الامريكان ونعود للمربع صفر !!
اولا لازم الشباب اللى فى التحرير ينضموا بكره الصبح لاحزاب سياسه
لازم كلنا ننضم لاحزاب سياسيه شريفه
مش الوفد العفن ولا التجمع الموالس والمهادن والناصرى المحتضر
بتكلم عن احزاب بجد !
الكرامه والوسط و الغد
مش بس ننضم ,, لازم نعمل احزاب و نمارس حياه سياسيه سليمه
اذا الاخوان مؤمنين بمدنيه الدوله وبالاحزاب وبالحياه السياسيه الديمقراطيه فاهلا بيهم
يتخلوا عن الاسم و عن الشعار وعن البيضه والحجر اللى بيلعبوا بيهم
ويعملوا حزب على غرار العداله والتنميه التركى ويشتغلوا سياسه
سياسه فقط
سياسه ولا غير
من غير الله غايتنا و الاسلام طريقنا والقرآن دستورنا
من غير كل هذا الاستجداء الدينى !!
الاخوان خطر داهم على الثوره فاحذروهم
ممكن يساعدوا ويبنوا البلدى دى لو قومناهم
لو سبناهم هياكلوا الثوره وياكلونا و يودوا البلد فى ستين داهيه !!
نفس فكره الخروج عن شرع الله بتاعه السفليين
كانهم برده معاهم توكيل ربنا و اللى يشوفوه يبقى هو شرع ربنا
ولو قولتهم غلط او كفايه
يبقى انت مش عاوز شرع ربنا و بتكره شرع ربنا !!
يتبع ...