بص أو بصى على نفسك فى المراية يا غير مسجل .. وقولى شايف أو شايفه أيه؟

[O.S.A.M.A]

الصحف المصرية والعربية

اخوانا المطاريد ...

فيه حد فيكم جرب أنه يبص على نفسه فى المراية ويقول هو شايف أيه ؟

هو شايف شخص كويس ولا وحش ؟ طيب هو شايف عينيه وحواجبه ولا شايف ماهو أعمق ؟ شايف الجانب اللى مش حلو فيه ؟؟

طيب هو ممكن الواحد فينا يقف قدام المراية ويعترف ليها بالحاجات اللى مش كويسة فيه ؟ "ما تقلقش...سرك هيبقى فى بير"

كل واحد فينا وأنا أولكم فيه من الجوانب السيئة الكتير ... بس هل كلنا بنقف قدام نفسينا أو قدام مراياتنا وبنعترف بالبلاوى اللى فينا

ممكن حد فينا يقول .. طبعاً آه ... ما هو مافيش مشكلة مانا مش باعترف قدام حد غريب ...

هاتصدقونى لو قلتلكم أن نسبة كبيرة من الناس ما بتعترفش بده وبتكون مصدقة تماماً أنهم ملايكة وناس طيبين ...
طبعاً الناس دى هى بتخدع نفسها قبل ما بتخدع الآخرين ... وبتصدق نفسها عشان برضه تخدع الآخرين
طيب تخيلوا معايا الموقف ده .. لو فيه مراية بتعرف تقرا الشر فينا والمراية دى كل أما حد يقف قدامها تروح مهزأاه أو تروح ضارباه عشان الوحش أو اللى مش حلو اللى جواه

تعتقدوا هايفضل بعد كده فيه مرايات فى بيوتنا ؟؟؟ ماعتقدش...

قولولى كام واحد وقف قدام المراية وشاف حاجة أو حاجات مش عاجباه فيه ...وكام واحد ما ستناش المراية تنبهه للى جواه ؟
وكام واحد ما بيوقفش أصلاً قدام المراية اللى من النوع ده ؟

 

[nash]

يوووووووووووة يا ما وقفت قدام المرايه وياما أتكلمت معاها ..طب ده انا حاطه في كل مكان مرايه حتي في المطبخ

الحقيقه انا بشوف في المرايه إنسانه وحشه ..بس مش شريرة ....عمري ما أتمنيت الشر لأي مخلوق وعمري ماكرهت حد حتي ولو كان خصم لي ...لكن نو واي اسيب حقي أبدا طالما أستطيع أخذه ...

الحقيقه صعب جدا حد يعترف انه غلطان أو انه شرير ...أو أنه إنسان قاسي لا مشاعر لديه أو أنه ممكن يجرح حد أو يدبر مؤامرات ... دايما الأخرين هم السبب في اي مصايب تحدث لنا ونحن دائما الملائكه المغلوبين علي امرنا ...

لو كل واحد صارح نفسه ومرايته بحقيقته جايز حالنا ينصلح وبقول جايز لأنه مش اكيد ....

لإني انا شخصيا أحيانا ما اكتشفني متلبسه بالكذب علي نفسي ....

شكلي بوظت الدنيا

 

 

[O.S.A.M.A]

اقتباس المشاركة الأصلية كتبت بواسطة nash يوووووووووووة يا ما وقفت قدام المرايه وياما أتكلمت معاها

بتتكلمى مع المراية يا ناش ؟؟؟ ماشي..

اقتباس المشاركة الأصلية كتبت بواسطة nash الحقيقه انا بشوف في المرايه إنسانه وحشه ..بس مش شريرة ....عمري ما أتمنيت الشر لأي مخلوق وعمري ماكرهت حد حتي ولو كان خصم لي ...لكن نو واي اسيب حقي أبدا طالما أستطيع أخذه ...

بداية طبعاً مبشرة أنك لما بتشوفى نفسك فى المراية بتشوفى الجنب اللى مش عاجبك فى نفسك

مسألة انك ما تسيبيش حقك ده أمر المفروض أنه أمر طبيعى وأمر مطلوب لأنه فى الآخر حقك وبصراحة عكسه هو اللى هايكون مش مظبوط يعنى لما الواحد يواجه نفسه بأنه مش عارف ياخد حقه ده يعتبر انه بيكشف الشيء اللى مش كويس فيه

اقتباس المشاركة الأصلية كتبت بواسطة nash الحقيقه صعب جدا حد يعترف انه غلطان أو انه شرير ...أو أنه إنسان قاسي لا مشاعر لديه أو أنه ممكن يجرح حد أو يدبر مؤامرات ... دايما الأخرين هم السبب في اي مصايب تحدث لنا ونحن دائما الملائكه المغلوبين علي امرنا ...

لأ شرير مش بالضرورة.. لكن غلطان دى اللى لازم نعود نفسنا عليها وبدون حرج لأن فى الآخر أحنا قدام مراياتنا ...

المشكلة الحقيقية فعلاً ان لو احنا ماعترفناش بغلطنا قدام مراياتنا أو قدام نفسنا مش ممكن أبداً أن احنا هانعترف بيها قدام الآخرين وده اللى خلي أنه ينتشر بنا ثقافة عدم الإعتذار عن الخطاً، وللأسف فيه أسر كتيرة ما بتعلمش ولادها انهم يعتذروا لما يغلطوا فالبتالى واحدة واحدة اللى هايتربى على كده لما يروح يبص فى المراية مش هايشوف غير عينين وحواجب!!

اقتباس المشاركة الأصلية كتبت بواسطة nash لو كل واحد صارح نفسه ومرايته بحقيقته جايز حالنا ينصلح وبقول جايز لأنه مش اكيد .... لإني انا شخصيا أحيانا ما اكتشفني متلبسه بالكذب علي نفسي .... شكلي بوظت الدنيا

هو ده الهدف ...مصارحة النفس قبل ما نروح نصارح مراياتنا وساعتها مراياتنا هاتستريح من وجع القلب ده ومش هايكون شكلنا وحش قدامها

هايلة يا نوش مابوظتيش الدنيا ولا حاجة.. خدى دى

 

 

[sanaa]

اقتباس المشاركة الأصلية كتبت بواسطة Abu Youssef قولولى كام واحد وقف قدام المراية وشاف حاجة أو حاجات مش عاجباه فيه ...وكام واحد ما ستناش المراية تنبهه للى جواه ؟ وكام واحد ما بيوقفش أصلاً قدام المراية اللى من النوع ده ؟

لو بتتكلم علي المرايا مش بقف قدامها خالص الا وانا خارجه يعني اوضب الللبس ولا عمري كلمتها

انما فيه مراجعه للنفس

فيه كشف حساب داخلي معظمه بصرحه وانا رايحه انام وانا بقي وحظي اكمل نوم ولا يروح النوم من عيني

كتير بعتذر لو ينفع الاعتذار

وكتير بااوح وطنش والكرامه بتاخدني

وكتير براجع تصرفاتي واحاول اغيرها

مع السن الواحد كمان بيشوف حاجات من غير مرايا ولا حاجه

كل واحد بيعمل غلط بيبقي في معظم الاحيان عارفه كويس اوي هو بيعمل ايه

اما بيصر علي غلطه وبيكمل.............


او يتراجع ويحاول يصلح من نفسه ...............

 

 

[toota]

شايفاني بدون مراية...ودايما حاساني بدون مابص على وشي في المراية...المرايه دي مجرد استكمال لشكل ساعه ما تحب توضب شكلك الخارجي فقط...اما المراية الداخليه ف دي مش محتاجه ابص فيها ...لانها جوه عقلي وعايشه جوايا...ومجرد ما تشبر شويه....بعمل حملة نظافه وبخليها فلللللللللة من تاني....

 

 

[Farida]

مش بابص للمرايه تقريبا الا و انا وبالبس علشان المرايه موجوده فى دولاب الهدوم و حتى بعد ما البس مش بابص فيها تقريبا ..........مش باحب اشوف نفسى .....باحس انى جوايا غير مظهرى ........مش صفاتى لا سمح الله لأ لأنى لما بابص فى المرايه باكتشف انى كبرت فى السن شويه و انا حاسه انى لسه فيه حاجات كتير من اللى كنت باحلم بيها لسه ما عملتهاش ...
بس ده ما يمنعش انى ساعات لما اكون لوحدى باقف قدامها و اتكلم معايا .........لكن موضوع المحاسبه مع النفس ده موجود على طول و ضميرى من النوع اللى بيوجعنى جدا بس مش لاقيه علاقه بينه و بين المرايه المرايه دى عمر ما كان بينى و بينها عمار .
موضوع جميل بالمناسبه

 

 

[Doudy]

الاول عايزة اقولك يا ابو يوسف

انى اتخضيت لما لقيت اسمى فى العنوان

و سالت و باتمان فهمنى معلش اللى ما يعرفش يقول ايهههههه

انا ببص لمرايتى طبعا و عارفة عيوب شخصيتى كويس

غلطان طبعا اللى يتجاهل عيوبه و ما يحاولش يصلحه

مفيش حد ما عندوش عيب و لو كان حتى صغنن اد كدة

 

 

[Remooo]

ليه كده يا اوسامه ..انت حد زعلك فحاجة
والله بشوف كتير يا يابو يوسف..كتير قوى
المرايا لو بتتكلم كانت شتمتنى والله

احم احم ..نتكلم جد شوية
ساعات بشوف انى عبيطة
اه والله
محتاجة اكون اكتر وعى...شدة...شر
من الحالة الحالية
واندم انى كنت كويسة فى فترات سابقة
تفتكر فيه امل

 

 

[إكرام يوسف]

تخيناااااااااه قوي.. زدت إكرام تانية.. والموضوع ما كانش شاغلني..خصوصا انه كان على هوى أصحاب الشأن..لكن اكتشفت مؤخرا ان المسألة مرضية.. فبقيت مش عارفة آخد نفسي..بس الطب بيقول فيه أمل.. يبقى فيه أمل.. وحتى لو ما كانش بيقول أنا ما اقدرش أعيش من غير أمل

بحد بقى.. ماعنديش مشاكل مع نفسي .. أعيش بشعار "ماذا يفيد الإنسان لو ربح العالم كله وخسر نفسه".. حرصت دائما أن أكسب نفسي.. وألا أقدم اي تنازل مبدئي.. غير ذلك أتسامح من نفسي إذا أظهرت ضعفا.. المهم عندي ألا أظلم أحدا بقصد ـ ربنا يسامحني إذا كنت ظلمت أحدا من دون قصد ـ وأتمسك أيضا بكلام ناظم حكمت "وأنا لا أخجل من أمر فؤادي.. من رؤيته مكدو الرأس ضعيفًا وأنانيًا.. أعني إنسانيا ببساطة"

أتسامح مع عيوبي العادية اللي مش قادرة أتخلص منها.. وهي اني باعمل كل حاجة في آخر وقت.. لكنني لا أتأخر في انجازها والتزم بمواعيدي.. وهذا يضع على عاتقي ضغطا كبيرا.. لأنني انجز أعمالا كثيرة جدا في وقت ضيق للغاية.. مع ان كان عندي وقت كفاية ضيعته.. الخلاصة انني حتى الآن فاشلة في تنظيم الوقت.
كما أنني أضغط على نفسي كثيرا حتى لا أتعصب على غير القريبين مني. فتخرج عصبيتي دون قصد على القريبين.. رغم انني اعتذر بعد ذلك وهم يتفهمون

هناك عيوب أخرى يراها البعض مزايا أحيانا..لذلك لا أقف عندها كثيرا.. فأنا أتقبل نفسي كماهي مادمت لا أظلم أحدا.. بصراحة ماعنديش مشاكل مع نفسي.. وونفسي عجباني خالص رغم عيوبها الانسانية التي لا تضايق سواي.. وأتسامح معها عملا بقول ناظم حكمت"لا أخجل من أمر فؤادي..." المهم ألا أخسر نفسي.. أعلم إيه باحب إكرام بجد ومش باحبها تزعل.. وعشان كده بادور لمن يؤذيني على مبررات يمكن هو نفسه ماخطرتش على باله (واحدة صاحبتي قالت لي كده).. وافضل أبرر أخطاء الآخرين في حقي عشان ما أزعلش إكرام منهم.. لغاية لما ما تخلص المبررات ومالاقيش مبرر. أقوم ببساطة ألغي الشخص من حياتي مهما كان قريب الصلة.. وانساه تماما حتى لا أحمل في قلبي مرارة.. بصراحة باحب قلبي ومش باحب ألوثه بالمرارة.. فيه عدد قليل من الاشخاص لغيتهم خالص في حياتي لدرجة انني عندما التقي احدهم صدفة لا أراه أبدا.. ولا أتحدث عنه.. ولا أحمل لأحد ضغينة شخصية.. لذلك "فأنا لا أخجل من أمر فؤادي".. وأحرص على ألآ أخسر نفسي .. أعمل ايه ياخواتي باحبني

 

 

[إكرام يوسف]

اقتباس المشاركة الأصلية كتبت بواسطة Remooo احم احم ..نتكلم جد شوية ساعات بشوف انى عبيطة اه والله محتاجة اكون اكتر وعى...شدة...شر من الحالة الحالية واندم انى كنت كويسة فى فترات سابقة تفتكر فيه امل

أوعي تندمي انك كويسة يا ريمو.. أو طيبة أو حسنة النية.. وتذكري قول ناظم حكمت "وأنا لا أخجل من أمر فؤادي.. من رؤيته مكدود الرأس ضعيفا وأنانيا.. أعني إنسانيا ببساطة"
احنا بشر ياريمو.. ولازم تكون عندنا أخطاء.. ,إذا كان مطلوب مننا نسامح الآخرين.. فالأولى نسامح نفسنا على ضعفها الإنساني طالم لم نؤذ أحدا أو نظلم أحدا عن قصد.. الندم فقط يكون إذا تسببت لشخص بالضرر عن قصد