أنا جندى ليه فاكرينى ولية

[خالة عواصف]

الصحف المصرية والعربية

مصر شعبها لازم يفوق ... جيشنا سخرة مافيهوش جنود

عساكر سخرة ولا جنود ... بيحكم فينا كام لوا نمرود
سنوات تجنيد فى بيوت الباشا ... وتقولنا جيش ماتفوق ياعكاشة
خدامين فى بيوتهم من أولادنا ... هو ده جيش حيحمى بلادنا

جنود فى مزارع بط و وز ... وكمان فى حفلات هز الوسط
عساكر مراسلة وقولنا ماشى ... كمان حنربيلكوا مواشى
كام خدام من غير مليم ... هوا ده جيش مصر العظيم

قول للباشا قول للبيه ... جيبى أولى بكل جنيه
قولها قوية قول للباشا ... ببلاش نخدمكم وتاكلوا بغاشة
قولها قوية قول للسيسى ... جيبى أولى بكل فلوسى
إحنا جنود مش خدامين ...خدمة الباشا مش واخدين

الهانم عايزة خضار من السوق .. أقعد .. يجيب خدام اللوا ميسور
دفاع وحراسة دى شغلتنا ... مشاوير الهانم مش سكتنا
إبن الباشا طالب لحمة .. اقعد .. هو و أبوه عاملين لنا زحمة

بنت الباشا رايحة الكلية .. اقعد .. يجيبلها عربية بجمعية
البيه الصغير رايح النادى .. اقعد .. هو الجندى خدام أبوك ياشادى
ننوسة الباشا عايزة يزفوها .. اقعد .. قال ب 100 جندى ويفرحوا أبوها

كتكوت الباشا عايز يتمرجح .. اقعد .. قوله انا جندى ياكتكت ولا تتحرج
فيلا الباشا عايزة لها حراسة .. اقعد .. يجيب بواب أو كلب حراسة
مزرعة الباشا عايزة مزارعين .. اقعد .. ده جيش سخرة ولا مجندين

أم الباشا رايحة الدكتور .. اقعد .. عيب ياماما الجندى مش سواق حنطور
الباشا ابوه طالب قهوة .. اقعد .. اخدم ابوك هو الأولى
خال الباشا عايز سفرجى .. اقعد .. ده جندى ياخالو مش قهوجى
عم الباشا عايز عمال .. اقعد ..ده جيش ياعمو مش أنفار

أخو الباشا عايز نقاش .. اقعد .. قال بأجر رمزى او ببلاش
جد الباشا عايز له زقة .. اقعد .. ده جيش يا جدو مش مرتزقة
سمكرى ببلاش للباشا والبيه .. اقعد .. جيبك أولى بكل جنيه

اقعد .. انت جندى مش من العبيد ... ولا تخدم لواءات تنجيد
إحنا جنود مش خدامين ... خدمة الباشا من واخدين

 

[عالي مستواها]

من تأليفك؟

 

 

[خالة عواصف]

نعم عاليا ... كل اللى كتبته من تأليفى ... وحق نشره مكفول للجميع ... والهتاف به .. بل واجب للتوعية ... وشهادة على كل الاحداث التى عاصرناها وعايشناها

شكرا لك عالى مستواها

 

 

[خالة عواصف]

خدم فى نوادى ودور فنادق البشوات ... من غير أجرة وبالإتاوات
دار المشاه عايزة هاوس كيبر .. عيب يادار .. ده جيش يا دار يا اتباع كليبر
دار الدفاع عايزة جناينة .. إتلمى يا دار .. ما انتى غنية وعندك مالية

دار السلاح عايزلها سباكة .. من مين يا دار .. دى عساكر جيش لابسة بيادة
دار الإشارة بتبنى عمارة .. انكسفى يا دار .. ده جيش مش بنى ليه الإمارة
دار المؤنة عايزة معونة .. انضفى يا دار .. نضفى لواءاتك هاتلها صابونة

مصحات الجيش عايزة تمرجية .. جرى إيه يا مصحة .. يامصحة اعلنى فى جريدة يومية
شغالين فى فنادق وبنى عمارات ... ده جيش دفاع ولا مقاولات
جيشنا شغال فى طرق وشوارع ... ونسى المدافع وحدوده اللى عنها يدافع

قيادات شغالة فى مقاولات ... ولواءات حريفة فى الحسابات
قعدوا عمال بدون عمل ... وشغلوا جنود من غير أمل
أوجدوا البطالة والازمات ... واحتكروا مشاريع وماليات

شغلوا الجنود لحساب جيوبهم ... سخرة وعبيد لاجل مطامعهم
سرقوا سنين شبابنا وقواهم ... لاجل اطماعهم وهواهم

انت جندى .. ليه تكون من العبيد ... ليه تخدم لواءات تنجيد
إحنا جنود مش خدامين ... خدمة الباشا مش واخدين

 

 

[طارق السعد]

الزجل ده فكرنى بـكلام الابنودى لما كان بيكتب كلام محترم قبل ما ينضم لجوارى السيسي
“واحنا ولاد الكلب الشعب..
احنا بتوع الأجمل و طريق الصعب
و الضرب ببوز الجزمة و بسن الكعب
والموت في الحرب”

 

 

[خالة عواصف]

توصيف الواقع احيانا تبدوا كلماته قاسية ... لكن فى حقيقة الامر مهما كانت قسوة الكلمات فهى اهون كثيرا مما تستحقه الاحداث لتنقل الصورة كما رأيناها وعايشناها .. بكل ألوان أحداثها مانحب منها وما نكره

شكرا طارق لمرورك وتعليقك

 

 

[خالة عواصف]

فين العدالة الاجتماعية ... ٣ سنين خدمة و عبودية

ليه من عمرى ٣ سنين ... ذنبى إيه ماخدتش تعليم
ليه أنا اكتر من سنة ... حياتى كلها فقر وشقى
ليه الحكومة بتعاقبنى ... حاكموا الفقر هو اللى حرمنى
ليه مش سنة واكون أسرة ... ليه العبودية من غير أجرة

ذنبى إيه فاتنى التعليم ... بيتى مافيش زيادة مليم
ذنبى ايه ماتعلمتش ... ابويا مات وماكملتش
ذنبي إيه من صغرى باجرى ... على لقمة فى بقى وعلى قوت أهلى
ذنبى إيه حكومتى حرمتنى ... لا وإيه كمان بتعاقبنى

٣ سنين ذل وتأديب ... سخرة وخدم ولا العبيد

مش كفاية بلدى سايبانى ... أسعى لوحدى كل حياتى
مش كفاية واكلين حقى ... وسارقين مالى وكل خزينتى
مش كفاية ميزانية جيشنا ... فى كروش لواءات بتستعبدنا

مش كفاية سارقين أرضى ... ولاسايبين لى متر حتى أبنى قبرى
مش كفاية واكلين حقوقنا ... فى الجيش رامينا وسارقين قوتنا
مش كفاية قاعدين فى قصور ... ومسخرنا بدون أجور
مش كفاية قاعدين فى واسعة ... واحنا على بعضنا فى زحمة

لواءات من جيشنا شغالة هبش ... هو ده جيشنا علينا ياعوكش
احنا احرار .. ليه عايزينا نكون عبيد .. ليه نخدم لواءات تنجيد
إحنا جنود مش خدامين ... خدمة الباشا مش واخدين

 

 

[خالة عواصف]

مال ولاد الباشا بيا ... أنا جندى ليه فاكرينى ولية
مال مرات الباشا ومالى ... ليه بتعاقبنى على إهمالى
مال أهل الباشا فاكرينى ... أنا جندى ليه بيستعبدنى

هما فاكرين إيه الجندية ... الجندى عبد ماله دية
هما فاكرين إيه العسكر ... بفلوسنا علينا تتكبر
هما فاكرين قيادات أمنية ... تعربد زى ماهى عايزة
هما فاكرين بلطجية ... يستعبدوا أحرار بإسم الجندية

قعدى إبنك يا ام عبده ... اللوا فاكر الجندى عبده
قعدى إبنك يام عبيد ... اللواءات فاكرة جنودها عبيد
قعدى ابنك يا ام محمد ... اللواءات بتبرق وتهدد

قعدى ابنك يا ام هانى ... لواءات عايزة لها علاج نفسانى
قعدى ابنك يا ام شريف ... نكلم مين فى جيشنا شريف
قعدى ابنك يا ام حسام ... بيديروا بلادنا بالأحلام

قعدى إبنك يام أشرف ... لواءات بتسرب وبتقرف
قعدى ابنك يام حنا ... لواءات تقتل وبتتبلى
قعدى ابنك يام صلاح ... لواءات لتاتة عاملة لنا صداع

قعدى ابنك يام ياسين ... عمايلهم سودا ويقولوا آسفين
قعدى إبنك يا ام أمين ... جيشنا لواءاته تافهين
قعدى إبنك يا ام عطية ... ضاع شرف العسكرية
ضاع شرف العسكرية

ليه واخدينا للتجنيد ... ليه نخدم لواءات تنجيد
ليه عايزينا نكون عبيد ... ولانفرح حتى فى يوم عيد
إحنا جنود مش خدامين ... خدمة الباشا مش واخدين

 

 

[خالة عواصف]

جيش تطبيع ويا اعداءنا ... رايحين تعملوا إيه ياولادنا
لواءات بختم جيهان وسوزان ... مع الصهاينة على الإسلام
بالتطبيع دخلوا فى أمان ... و عربدوا ببلادنا فى كل مكان

بيمرنوا أعداءنا علينا ... بالنجم الساطع وعلى أراضينا
إحنا فئران تجارب ولا جنود ... بتتدرب علينا جيوش نمرود
لواءات صهاينة بتاكل لحمك ... بحياتك تهينك وتبيع دمك
بيتاجروا بولادنا وشبابنا ... فى مكايد وحروب خارج حدودنا

رايح تضيع سنوات عمرك ... لجيش نازل يسيح دمك
رايح تقضى سنوات شبابك ... للواءات باعت لاعداءنا حياتك
زينة شبابنا راحوا بلاش ... يا لواءات خونة كلاب أوباش

أوعوا تروحوا يا ولاد سينا ... لواءات ماسكة لنا السكينة
اوعوا تروحوا يا بورسعيدية ... لواءات جيشنا بلطجية
يا اسماعلية إوعى تروحى ... لجيش عميل بيطلع روحى
إوعوا تروحوا يا ساويسة ... مدرعاتنا علينا دايسة

أقعد اوعى تروح تجنيد ... ولاتخدم لواءات تنجيد
ليه عايزينا نكون عبيد ... ولا نفرح حتى فى يوم عيد
إحنا جنود مش خدامين ... خدمة الباشا مش واخدين

 

 

[خالة عواصف]

اقعد اوعى تروح يا سيوى ... لواءات جيشنا كلها سيسى
اوعوا تروحوا ياولاد مطروح ... لواءات مسطولة عايزة لها سطوح
اوعى تروح يا اسكندرانى ... جيشنا فتح لأعداءنا دارى

بيحكم جيشنا نسوان صهاينة ... رايحين تعملوا إيه يا دمايطة
لواءات بختم جيهان وسوزان ... مع الصهاينة على الإسلام
اوعى تروحى يا كفر الشيخ ... لواءات بتسرب وتشيخ

اوعى تروح يا دقهلاوى ... جيشنا فى سفك دمنا غاوى
اوعوا تروحوا يا شراقوة ... لواءات جيشنا تماثيل عجوة
اوعى تروحى يا غربية ... جيشنا لواءاته حرامية

اوعوا تروحوا يا اهل البحيرة ... جيشنا حالته حسرة وخيبة
اوعوا تروحوا يا مناوفة ... لواءات جيشنا كلها هايفة
دى لواءات بتسرب وتلت ... واخدة أوامرها من الست

أقعد اوعى تروح تجنيد ... ولا تخدم لواءات تنجيد
ليه عايزينا نكون عبيد ... ولا نفرح حتى فى يوم عيد
إحنا جنود مش خدامين ... خدمة الباشا مش واخدين