هل توافق على تفعيل التقييم السلبى؟

[حشيش]

الصحف المصرية والعربية

الأخوة والأخوات الأعزاء

عندما قمت بتفعيل خاصية إضافة تقييم بغرض بث روح من المنافسة الشريفة بين الأعضاء منذ حوالى عام مضى وكنت قد عطلتها فى البدايات الأولى للمنتدى لإساءة إستخدامها لدى البعض كانت تحتوى على خاصية إضافة تقييم سلبى وتقييم إيجابى ... بعدها قام البعض مرة أخرى بإساءة إستغلال القييم السلبى فقمت بإلغائه مع الإبقاء على التقييم الإيجابى فقط للأعضاء بعضهم البعض ... هذه الخاصية موجودة فى معظم المنتديات الأجنبية والعربية وبالديفولت فى سوفت وير في بوليتان يعنى مش من تأليفى وتلحينى ولا حاجة والغرض منها كما ذكرت أن يحرص كل عضو على أسلوب الحوار حتى مع الإختلاف مع الآخرين يمكنه الحصول على تقييم إيجابى إن كان الإختلاف ليس به إهانة أو تجاوز لفظى فى حق الآخر ... هل ترغبون فى إعادة خاصية التقييم السلبى بجانب التقييم الإيجابى ليكون الأعضاء هم أنفسهم من يُقَيمون بعضهم البعض بعيداً عن إدارة المنتدى؟ ... هل لكم مقترحات بشأن الضوابط الواجب إتخاذها قبل التفعيل لو وافقتم؟ ... برجاء المشاركة فى إستطلاع الرأى المرفق ... تحياتى

 

[only you]

مش كفايه التبليغ بمشاركات سيئه اللى مش خالصين منه؟دى هتبقى حرب للركب بلاش احسن انا مش موافقه

 

 

[Rapt]

انا موافق علية
هوة معمول اصلا عشان حرية التعبير
فى حدود المعقول وبدل الاعتراض الكلامى

 

 

[fatfouta]

صوتت بـ لا

انا عن نفسى مش بحب التقييم السالب ده ومش بحب أستخدمته مع حد واللى مش عجبه اى مداخلة يبقى يرد عليها ويتناقش لكن التقييم السالب بيخلق جو مش حلو بين الاعضاء
رأيى انا بلاش منه

 

 

[مزاياإنسانة]

حشيش أفندي كل سنة وإنت بخير ورمضان كريم
بقى ياراجل الناس عاوزة تصوم وتعمل خير وإنت عاوز تفعيل التصويت السلبي
إنت عاوزها تقوم حرب في رمضان مش كفاية الحرب والنار اللي حتولع في المطبخ
من وجهة نظري موضوع السلبي ده حيبقى تصفية حسابات ونقعد بقى نشغل نفسنا ده قيمني سلبي وده إيجابي ده بيحبني وده بيكرهني
وتعال بقى شوف محاولة إيجاد الأسباب اللي ممكن تنقلب طائفية وعرقية وكل اللي يخطر ببالك
إحنا كده حلوين اللي فيه حاجة تمسه بسوء فيه أيقونة تبليغ مشاركى سيئة
لكن أني أقيم المشاركات سلبي عشان مش عاجباني أو عشان أنا مابحبش صاحبها
أو رأيه مخالف لرأيي
فهنا حنقع كلنا في مشاكل المنتدى والأعضاء ذات أنفسهم في غنى عنها
لازم هناك كلنا نتقبل بعضنا بكل مزايانا وإختلافاتنا سواء إجتماعية أوجنسية أو دينية أوعرقية أو أي أختلاف
إحنا هنا أولاد آدم وحواء
ولنا رب واحد مهما أختلفنا

أرجوأن لايكون رأيي مؤذي لأحد

 

 

[مزاياإنسانة]

شوف الستات حلوين وطيبين إزاي
الدور بقى على الرجالة اللي بيحبوا الحروب بكل أنواعها :(

 

 

[بنت الشاطئ]

دعوه لموضوعي

مدونه بنت الشـــــــــاطئ

ماهو ممكن عضو يستقصد الاخر ويجيبه الارض

لا طبعا مش موافقه

بس ممكن يكون فى ايقونه لايك & انلايك

حتكون الطف ومش حتاثر على النفسيه قوى

دة احنا طلع روحنا عشان ناخد تقييم

يقوم يروح مننا كدة بكليكه

 

 

[om saif]

مش موافقه لانه يستغل غلط
احنا مش فى المدرسه
حتى منتدى كندا فيزا لغاه لاساءة استخدامه واهو منتدى اجنبي وكل شيء عندهم عادى بس كانوا برضوا بيتضايقوا

 

 

[حسام]

موافق وبشدة
زي ما ينحترم راى الناس لراينا لازم برضة نتيح حرية الرأى لرفض ما يقوله عضو ما
معلش يا عم حشيش
عندي ملحوظة أو اقتراح
الملحوظة بلاش يبقي فيه فارق كبير قوي كدة بين درجة تقييم عضو وعضو تبعا لعدد المشاركات
دي خصوصا فى انا عندي اللى تقييمه الايجابي بديشيليون نقطة وأكيد السلبي هيبقي كدة
ممكن يبقي فيه تدرج فى تقييم كل عضو تبعا لعدد مشاركاته
بس مش انا عندي 35نقطة مرسيس اس وعضو تانى يبقي الجوز نقط والعربية
مجرد اقتراح
وكل سنة وانتو طيبين

 

 

[fatfouta]

اقتباس المشاركة الأصلية كتبت بواسطة بنت الشاطئ ماهو ممكن عضو يستقصد الاخر ويجيبه الارض

هو ده فعلا اللى بيحصل وواحد يبقى مختلف مع التانى يعمل له ارهاب فكرى يعنى لو اتكلمت او فتحت بؤك هديك تقييم سالب وده بيخلى ناس فعلا تسكت وماتقولش رأيها خوفا من التقييم السالب وحصل ادامى كتييييييير
وبكده هنفقد الحوار للاسف

حشيش .....رمضان كريم بلاش نعمل سبب فى الخلافات

رابت...مااااااااااشى كنت فاكراك طيب طلعت شرير