الغربــــــــــــــــة

[Dr.Samo]

الغربة .... هل لازلت قاسية بعد التطور التكنولوجي والتواصل الانترنتى

اقتباس المشاركة الأصلية كتبت بواسطة Dr.Samo الغربــــة الغربة تعريفها بيختلف باختلاف سنك والمرحلة العمرية فمثلا الغربة وانت صغير مع اهلك مش غربة ... اهلك هما حياتك ، والدك ووالدتك واخواتك حواليك فمفيش غربة ممكن تحن لصحاب المدرسة شوية ... بس غالبا بتكون لسه مشاعر الصداقة لسه لم تصل لمرحلة النضج علشان كدا مش بتفتقد اصحابك وانت صغير . لما بتكبر شوية ، بعد التخرج بتبتدى تفتقد اصحابك والعشرة لما بتسافر بقى بعد التخرج ب12-14 سنه بيبقى الوضع مختلف مهما كانت البلد اللى سافرت ليها .... بيفضل دايما بلدك معلمة فيك ... مهما كان فيها من تعب ... وذكريات حزينه بتفضل فاكرها برضه .. فاكر قعدة النيل بعد الساعة 7 ... فاكر القهوة وضحكة الأصحاب اللى طالعة من القلب ... فاكر صاحبك اللى اتجوز فى اليوم الفلانى وفرحه - فاكر رحلة المصيف فى صيف سنة كذا فاكر صاحبك الفلانى اللى تعب ووقفتوا جنبه - وفاكر ماتش فى الدورى او بطولة افريقيا كنتوا متجمعين بتتفرجوا عليه وبتشجعوا . الغربة بقى بتختصر دا كله .... بتتحول حياتك بقدرة قادر من سنة 12 شهر - لشهر واحد فى السنة ... ويمكن شهر ونص حتى اصحابك ... ممكن قوى ماتلحقش تقابل نصهم . وحتى اللى بتشوفهم - بتحس احساس غريب ... ان دول مش اصحاب زمان رغم انكوا بتتكلموا فى التليفون - ودايما على النت مع كل اجازة ... فى شعر ابيض بيظهر وكل مرة اسأل ... ايه يابنى انت وهو كبرتوا كدا ليه اللى فى الغربة مابياخدش باله من حاجة غريبة قوى انه هو كمان بيكبر . بس مش بياخد باله ... مش بيركز قوى فى المراية فى الغربة كمان دايما عنده شعور انه حاطط عمرة فى التلاجة وحاسس انه لما يرجع مصر ... هيلاقى نفسه زى ما سافر السنه عنده لها عبارة عن عد تنازلى لأجازة النزول مكالماته كلها بتبدا وتنتهى بكلمة ... نازل امتى - وتنتهى بخلاص هانت السفر فيه مميزات كتير ... بس الغربة صعبة حتى اسمها - غربه