الاكتئاب والزواج

[زعلان]

الصحف المصرية والعربية

ماهو علشان كده لازم تروح بنفسها معاه للدكتور و تفهم من الدكتور هي الي حتتجوز وهي الي تقدر تقرر .. هي سنها صغير ولا هو الوضع في مصر يمنع ذلك !!؟؟ يعني ليه حد من اهلها الي يروح نيابة عنها ممكن يروح معاها بس مش من حق حد يدخل للطبيب غيرها بعد اذن خطيبها باعتبارها حتكون زوجته وهي تقرر هل تستمر ولا تنفصل ..
الطبيب حيطلعها باذن خطيبها على اسرار تستطيع هي وحدها ومباشرة من الطبيب تحديد مصير العلاقة

 

 

[hend]

سنها مش صغير قوى لكن معندهاش الثقافه والاطلاع اللى يخليها تتكلم مع دكتور نفسى عن حقيقة مرض نفسى ومن ثم تحدد بناء على كلامه اذا كان تستمر واللا تفسخ والله اعلم هى هتفكر بناء على ايه على الاقل لو كان صارحها فى البدايه مكنش الموضوع هيكون صعب كدا اعتقد بس انا اول مرة اعرف ان الاكتئاب ممكن يكون مانع للزواج بس اعتقد بما انه صارحها وكدا يعنى يبقى اكيد مش مانع ليه على الزواج بس ممكن يعنى يكون فى تأثير على حياتهم وممكن على شغله كمان

 

 

[hend]

لما سألتها اذا كان لاحظت شئ على تصرفاته قالت انه قبل الخطوبة بيوم قالت له الفستان مش جاهز رد عليها وقال هيخلص ان شاء الله مع ان الخياطة قريبته ولم يكلف نفسه انه مثلا يتصل بيها او حتى يذهب معها هى كانت تريد تأجيل الخطوبة وقالت تتناقش معاه لكنه رد باقتضاب فاضطرت الى ان تستلف فستان صديقتها وموقف اخر انها اتصلت به على الموبايل ذات مرة فلم يرد ثم اتصلت مرة اخرى فوجدته مغلق وعندما اتى لزيارتها قالت له هذا الكلام فقال لها انت هتسألينى كدا بعد الجواز اخته دائما تقول انه يسرح كثيرا لدرجة انه ممكن لا يرد عليها

 

 

[Matrix]

دعوه لموضوعي

أطلق العنان لمشاعرك ، كن إنسان.

اقتباس المشاركة الأصلية كتبت بواسطة hend سنها مش صغير قوى لكن معندهاش الثقافه والاطلاع اللى يخليها تتكلم مع دكتور نفسى عن حقيقة مرض نفسى ومن ثم تحدد بناء على كلامه اذا كان تستمر واللا تفسخ والله اعلم هى هتفكر بناء على ايه على الاقل لو كان صارحها فى البدايه مكنش الموضوع هيكون صعب كدا اعتقد بس انا اول مرة اعرف ان الاكتئاب ممكن يكون مانع للزواج بس اعتقد بما انه صارحها وكدا يعنى يبقى اكيد مش مانع ليه على الزواج بس ممكن يعنى يكون فى تأثير على حياتهم وممكن على شغله كمان

الموضوع لا يحتاج لا ثقافة ولا إطلاع ، هي تروح تسأل الدكتور كم سؤال مباشر وبسيط :
تأثير المرض ده على حياتها كزوجة مستقبلية هيكون عامل إزاى؟
ماهي إحتمالات تطور المرض وما تأثيرات ذلك على سلوكه وعليها كزوجة؟
الإجابة على الأسئلة دي هتخليها تحدد - لوحدها - قرارها النهائي.

لكن بعيدا عن هذه القصة أنا لا أفضل الطريقة التي تتم في مصر في الزواج في كثير من الأحيان حيث لا يتم الإختيار على أساس إنساني يتعلق بدرجة الأنسجام بين الطرفين ولكن على تقييم كل طرف للتاني من كل الجوانب ودراسة عيوبه ومميزاته وكأن كل طرف بيشتري تلاجة وعاوز يشوفها لو كانت مخبوطة من الجنب ولا لأ قبل ما ياخدها ،

وده اللي بيخلوا معظم شركاء الحياة ماعندهمش الذكاء العاطفي في التعاطي مع شريك الحياة وتلاقيهم حافظين مش فاهمين وحتى تعبيرات كلامهم هي التعبيرات النمطية المكررة السائدة وردود أفعالهم على المواقف تكون ثابتة ولا تنبع من داخلهم لأن مفيش تفاعل ولا تفكير ولا إحساس ولكن برمجة ذاتبة مسبقة لعلاقة قالولوا وقالولها أنها المفروض تكون كده.

 

 

[زعلان]

لاحظ في بادية الموضوع ان المرأة وجهت الخطاب للرجل الخطيب او الزوج بانه بيتعمد ان يضع المرأة في حرج و بيخدعها

طبعا فارق كبير بين اثنين يتعرفوا على بعض بصورة طبيعية سواء بترتيب او غير ترتيب المهم انهم ياخدوا فرصة للتعارف وكل واحد يفهم الشخص الي امامه بسلبياته و عيوبه و حسناته ومميزاته بصورة طبيعية بقدر الامكان مش كل واحد يقدم السيرة الذاتية ملخصة للثاني وتخيل لو طرف مش محترف قراءة سيرة ذاتيه وما بيعملش مقابلات توظيف كتير هل حيقدر يحكم من خلال الملخص على المتقدم للوظيفة اقصد للزواجة و تخيل الموظف اقصد العريس او العروسة تيجي تقول او يقول انا بروح لطبيب نفسي لأي سبب ويحطها في رأس السي في
الطبيعي ان المعلومات من هذا النوع وغيرها بيتعرف تدريجي في اطار معرفة الشخص مش بيكون هو المحدد لشكل الشخص من اول وهلة ...
يعني فارق بين انها تقول لمامتها : انا رايحه اقبل خطيبي( " المجنون ": الي بروح لطبيب نفسي في عرفنا)علشان اتعرف على نواحي اكثر في شخصيته

او انها تقول لمامتها : انا رايحة اقبل خطيبي .. علشان اتعرف على جوانب اكثر في شخصيته و يقولها يومها مثلا انه بيروح لطبيب نفسي وهي تقوله وانا بحب العب في صوابع رجليا وقتها مش حتبقى البنت الي بتلعب في صوابع رجليها لأنها عرف عنها ما هو اهم في شخصيتها وموضوع صوابع رجليها سهل انه يتحل

 

 

[hend]

صح الكلام والله عندك حق فى حاجات بتغطى على حاجات وممكن المميزات تكون اكتر من هذا العيب لكن هى الوحيده اللى تقدر تجاوب على هذا السؤال هل هى ترى فيه المميزات اللى هتغطى على عيوبه

 

 

[hend]

اقتباس المشاركة الأصلية كتبت بواسطة Matrix الموضوع لا يحتاج لا ثقافة ولا إطلاع ، هي تروح تسأل الدكتور كم سؤال مباشر وبسيط : تأثير المرض ده على حياتها كزوجة مستقبلية هيكون عامل إزاى؟ ماهي إحتمالات تطور المرض وما تأثيرات ذلك على سلوكه وعليها كزوجة؟ الإجابة على الأسئلة دي هتخليها تحدد - لوحدها - قرارها النهائي. لكن بعيدا عن هذه القصة أنا لا أفضل الطريقة التي تتم في مصر في الزواج في كثير من الأحيان حيث لا يتم الإختيار على أساس إنساني يتعلق بدرجة الأنسجام بين الطرفين ولكن على تقييم كل طرف للتاني من كل الجوانب ودراسة عيوبه ومميزاته وكأن كل طرف بيشتري تلاجة وعاوز يشوفها لو كانت مخبوطة من الجنب ولا لأ قبل ما ياخدها ، وده اللي بيخلوا معظم شركاء الحياة ماعندهمش الذكاء العاطفي في التعاطي مع شريك الحياة وتلاقيهم حافظين مش فاهمين وحتى تعبيرات كلامهم هي التعبيرات النمطية المكررة السائدة وردود أفعالهم على المواقف تكون ثابتة ولا تنبع من داخلهم لأن مفيش تفاعل ولا تفكير ولا إحساس ولكن برمجة ذاتبة مسبقة لعلاقة قالولوا وقالولها أنها المفروض تكون كده.

اتفق تماما فيما قلت والله هذا الكلام لو كل واحد عمل بيه ما هيكون هناك فى مشاكل زوجية فعلا مداخله قيمة

 

 

[hend]

تم فسخ الخطوبة ليس لاسباب مرضية ولكن بسبب تصرفات ساذجة منه تصرفات لا تقبلها انسانة عاقلة اكيد المرض مأثر على تصرفاته لا شك

 

 

[زعلان]

يا سلام يا سلام ربنا يرزقه بواحدة احسن منها

 

 

[إكرام يوسف]

معلش.. اسمحولي.. ورغم اني غير متخصصة إلا أنني من خلال الخبرات الحياتية أقدر أقول إن الاكتئاب ـ عافانا وعافاكم الله ـ مرض صعب جدا.. مش مجرد زي ما احنا بنقول كلما نلاقي حد زعلان شوية أو متضايق ان عنده اكتئاب..لا دا مرض.. ومرض صعب كمان.. واحيانا بيتطلب علاج طول العمر.. وأنا الحقيقة قابلت في حياتي أكتر من حد بالشكل ده.. على الأقل اتنين.. واحدة كانت أكبر مني بخمس سنوات.. وطبعا لم توفق في زواجها مرتين..وحاولت الانتحار مرتين (مالهمش علاقة بالزواج أو الانفصال.. لكنها تغيرات كيميائية كما فهمت تحدث في عقل مريض الاكتئاب وربما تدفعه للانتحار.. رغم انها عولجت أكثر من مرة وكل مرة الطبيب يقول شفيت).. وفي المرة التالتة نجحت وتوفاها الله.. ربنا يرحمها ويسامحها لأنه الغفور الرحيم وهو الأعلم بحالها.. والآخرى شابة كانت تعالج منذ سنوات مراهقتها من الاكتئاب.. ورزقها الله بزوج أحبها وهو يعرف حالتها وأخفى عن أهله مرضها.. وتحملها سنوات وعندما حملت زادت عليها الحالة وصارت لا تستطيع النوم فكان يسهر إلى جانبها يهدئها ويحاول الترويح عنها .. وبالنهار يحاول أن يرفه عنها ويعزمها على الخروج والسهر والعشاء في الخارج والسينما والمسرح حتى تستطيع النوم إلا أنها كانت لا تستطيع .. وظل هو متحملا حتى وضعت طفلها ورفضت إرضاعه لأنها تريد استخدام المنوم.. رغم أن الطبيب كان يرى غير ذلك.. وفي النهاية لم يحتمل الزوج فكان الانفصال بعد سنوات كان فيها نعم الزوج المحب والمعين ذاق فيها المرار وأصيب بعدة أمراض عضوية..لكنه فقد القدرة على الاستمرار.
ومن ثم، فإن إقبال الفتاة على زيجة كهذه رغم علمها بالمرض أمر يحسب لها.. وربنا يجعله في ميزان حسناتها.. لكنها يجب أن تكون متعلقة بالخطيب لدرجة تجعلها تحتمل كثيرا من الصعاب التي ستواجهها في حياتها.. ويجب أن تكون واعية تماما بهذه الصعاب وأن تكون فعلا على استعداد لتحملها وألا تضحك على نفسها فتظلم نفسها وتظلم الزوج الذي ربما تسوء حالته أكثر إذا حدث الانفصال لاقدر الله.. أحب أن أوضح أيضا أن الاكتئاب كما فهمت مرض وراثي.. وأرجو أن يتفضل المتخصصون في هذا المنتدى بتصحيح أي معلومة خطأ أكون أوردتها بدون قصد