مقتل شاب على يد مخبرين في الإسكندرية

[مدى]

الصحف المصرية والعربية

عاااااااااااااااجل ::::::اعتقال عدد من الشباب من امام قسم سيدي جابر بالاسكندرية اثناء اعتصامهم لمعرفة اسامي للجناة في قتل خالد

 

 

[nash]

اصلا بعد إعتصامهم هايعملوا ايه؟

هاينضربوا ويتسحلوا هما كمان

الشرطه وسايلها في القمع كتير والله العظيم هما فاكرين إن إعتصامهم ده زي اللي عند القبه مش واخدين بالهم علشان شباب صغير لسه أنه بمزاج الحكومه لغرض سيء في نفسهم ووقت ما هايقرروا إن الإعتصامات دي تنفض هاااااااااتنفض

 

 

[dr-amira]

اقتباس المشاركة الأصلية كتبت بواسطة nash لااااااااا إله إلا الله حسبنا الله ونعم الوكيل شويه ساديين أنصاف متعلمين ماصدقوا مسكوا فريسه ونزلوا فيها تنكيل وسحل شعب بيعيش تحت قانون الطواريء 30 سنه طبيعي يفرز حيوانات تتلذذ بتعذيب بني جلدتهم ذنبه أيه المسكين ده وهو في عز شبابه يموت الموته البشعه دي؟ وذنب أهله أيه يعيشوا المأساة دي وذنب والدته أيه يتحرق قلبها بالمنظر ده في ذمه مين دم الشاب ده؟ وفي رقبه مين ديته ؟ حسبنا الله

فى ذمتنا كلنا يا ناش ...احنا اللى سكتنا لما حصل كده لغيرة ...و احنا اللى سكتنا على قله ادب الشرطة وتعاملها السادى مع الشعب و احنا اللى هنسكت برضة على الشاب ده و اللى جرى له ....حسبنا الله و نعم الوكيل

 

 

[شينكاوي]

lack of discipline

 

 

[فــيــروز]

اقتباس المشاركة الأصلية كتبت بواسطة مدى وأكد عدد من شهود العيان لـ"الشروق"، أن واقعة الاعتداء كانت على مرأى ومسمع من الموجودين بالسيبر والمارة بالشوارع، مشيرين أن الضرب والاعتداء استمر لأكثر من 20 دقيقة متواصلة وسط توسلات واستغاثة ودموع المجني عليه.

و محدّش اعترض !!


20 دقيقه و محدّش فتح بقّه ولا حتى فكّر يدلق عليهم جردل ميّه وِسخه يمكن المتفرّجين يفوقوا من سِحر الفُرجَه و يتدخّلوا بأى شكل من الأشكال !!

اتنين بلطجيه وقفوا يضربوا القتيل 20 دقيقه و محدّش فكّر فى أى شكل من أشكال التدخّل !!

هذا الصمت و العجز المخزى و المُخجِل كان أمام اتنين بلطجيه لا يقول الخبر أنّه كان بحوزتهم أى أسلحه قد تخيف من يرغب فى التدخّل و رغم كده محدّش فكّر حتى يجيب شومه ولاّ سنجه من اللىّ بيطلعوا فى الفاضيه و المليانه و آثر المتفرّجون الفُرجه حتى النهايه !!

 

 

[فــيــروز]

طيب بالمناسبه كده لو حد تعرّض لموقف مماثل -موقف المتفرّج طبعا ربنا يكفينا شر السحل- و كان شاهد على موقف مشابه ممكن يفكّر يتدخّل بأى شكل؟

 

 

[شينكاوي]

اولا رحم الله المتوفي وغفر له وأسكنه فسيح جناته وخالص العزاء لكل شريف في هذا البلد المغلوب أهله علي أمرهم , إسمحوا لي أنظر للموضوع من زاوية مختلفة وألا وهي جنسية أخو المتوفي وربط معظم المشاركين معاقبة الجناة بقدرة اخوه علي التواصل مع السفارة الأمريكية والتي تملك ادوات الضغط علي وزارة الطغاة لمحاكمة هؤلاء القتلة حيث أني أري ان هذه النقطة بالذات هي شديدة الخطورة علي الأمن القومي وولاء الشباب لبلدهم فمعني ان يتم إيصال المعلومة بهذه الطريقة أن المصري لا يمكنه أن يحصل علي حقه في بلده وأنه ليحصل علي هذا الحق يجب ان يكون حاملاً لباسبور دولة أجنبيه وهو يعيش في بلده الأصلي مصر وبلده الحقيقي الذي ينتمي إأليه والذي نشأ فيه وولاؤه له فهذا الشعور سيولد نوع من إستحقار الشاب لنفسه كونه يحمل الجنسية المصرية وسيولد لديه رغبة شديدة للحصول علي جنسية قوية تحفظ له حقه في بلده الأصلي , لم أسمع بمواطن يحصل علي حقه في بلده الأصلي بباسبور دولة أخري يحمله إلا في مصر فهنا مثلاً في الكويت تجد لدي الشباب الكويتي والمواطن الكويتي فخراً ببلده وجنسيته يفوق الوصف والحدود وهذا له مردود إيجابي في حال تعرض البلد لأي عارض لا قدر الله فتجد ان الشاب الكويتي يعرف ان حكومته لا تستطيع ان تسئ له لا داخل الكويت ولا خارجها وأذكر حادثة منذ وقت قريب أن احد المعاقين قد تقدم ببلاغ أنه تم تعذيبه علي يد الشرطة فقامت الدنيا ولم تقعد بل ووصل الأمر إلي محاولة مسائلة وزير الداخلية في مجلس الأمة , نحن في مصر بتنا مخجل من حملنا لجنسية مصرنا بل يفاجئك أحدهم قائلاً قريباً إن شاء الله سأصبح كندياً او امريكياً وعندها لن يستطيع احدهم ان يعاملني بشكل سئ وهذا معناه انه بحمله للمصرية في مصر هو معرض لكل سوء معاملة وقد يصل به الأمر مقتولاً مسحولاً مشوهاً علي يد مجموعة من أرازل المجتمع وشرار الخلق لمجرد انه اعترض علي سوء معاملته , هذا شئ خطير جداً علي الأمن القومي المصري وعلي الواجبات التي يستعد هذا الحالم بالجنسية الأخري تجاه هذا الوطن , انا اليوم كنت في دورة وكنا فقط إثنين مصريين في هذه الدورة وأسعدني جداً أن يقول المحاضر- الذي درس في أمريكا وعمل هناك لفترة وعمل في دبي قبل ان يعود لبلده - انه معجب بشدة بطريقة تفكير الفراعنه وكيف كانوا يخططون ويضعون الاستراتيجيات مع العلم بأني لا أفخر سوي بكوني مسلم ولا افخر بفرعونيتي المزعومة ببساطة لأني لست بفرعوني ولكن لأن إسم وطني ذكر بشئ جيد فقد أسعدني وقد تنقلب هذه السعادة لكره إن تعرضت او تعرض أحد من أفراد أسرتي لا قدر الله لشئ مثل هذا لا لشئ سوي لكوننا نحمل الجنسية المصرية , انا اقول ان هذه الحكومة ورئيسنا المفدي بطل الحرب والسلام وبتاع الخيار قد قتل في بعض منا حب مصر والفخر بكوننا مسلمين مصريين ولننتظر تردي ثم تردي يعقبه ضياع لهوية لهذا المجتمع طالما كنت غريباً في بلدي وكان الأجنبي هو فقط من يستحق الحصول علي بعض من حقوق الإنسان , آسف للإطالة ولكن الموضوع يدمي القلب بل ويسد الشرايين التي تحمل حب هذا البلد والولاء لقلب اي مصري .

 

 

[oskasan]

شنكو
على هامش المؤتمر
وحياة مصعب يا شيخ
ممكن تصغر الخط حبتين وتختار خط النسخ
وتدوس انتر بعد كل فقرة
العضمة كبرت يابنى والواحد نظره بقى على قده
وانا عندي استيجماتيزم

كنت بتقول ايه بقى ؟

 

 

[nash]

فيروز

أنا مش هاقدر أساسا أشوف المنظر علشان أقدر أتدخل

شينكاوي كلامك صحيح وعلي عيني وراسي لكن ألاف مؤلفه من البشر في مصر تتمني تحمل البسبور الأمريكي والكندي لا لشيء فقط لحفظ كرامتهم مع العلم أنه برضه هايفضل في نظر السفارة الأمريكيه مواطن درجه تانيه وده من لسان ناس عايشين بالبسبور الأمريكي

وبعدين أمن قومي أيه وكلام كبير أيه .. إذا كان أعلي جهه في مصر ماسكين في هدوم بعض ونازلين فضايح

روح شوف أخر أفلام الساده القضاه والساده وكلاء النيابه والمحامين

حاجه تقرف

 

 

[شينكاوي]

عندي حل انا يا ناس اننا نكلم ماما امريكا وخالتي فرنسا يرزعونا قنبلتين علي كام صاروخ ويحتلوا البلد وبكدا نبقي كلنا امريكان وانجليز طالما طموح ال 80 مليون الحصول علي الجنسية البديلة , انا شايف ان دا خطير جدا علي الأمن القومي وسيولد جيل ليس لديه ادني شعور بالوطنية وحب هذا البلد ونبقي نكلم بقي السودان تدافع عننا لما تحتلنا اثيوبيا ولا اوغندا ولا بقول نبيع البلد وكل واخد ياخد نصيبه وبراحته باه , انا خايف ان اولادي يكرهوني لاني مخدتش جنسية تانية واكره انا مصر ,ربنا يستر
_______________________________

حلو كدا يا عم اوسكا وبعدين خط كوفي ايه اللي بتتكلم عليه صحيح انت baby boomer
دي مش شتيمة يا اوسكا دي تقسيمة للشخصية