تساقط الشعر ..اسبابه..وعلاجه!

[بنت شعنونة]

الصحف المصرية والعربية

عشان نتكلم عن مشاكل الشعر لازم نعرف يعني ايه شعر اصلا
عشان نعرف نبتدي..
استنوني اجيب شوية صور وارجع..

 

[بنت شعنونة]

انا ها اتكلم كلام مبسط عشان بس ما تزهقوش وما تتعقدوش




دي صورة تشريحية مبسطة للشعراية
الجزء البيضاوي اللي تحت دا هوا بصيلة الشعر اللي هوا الجدر ودا بيجله تغذية عن طريق الشعيرات الدموية اللي لونها ازرق واحمر قدامكم دا
الجزء الطويل دا هوا ال shaft اللي هوا جسد الشعراية نفسه وهوا بينطلق من جدر الشعرة الى سطح الجلد ثم للخارج


نيجي بقى للشافت نفسه اللي هيا الشعراية نفسها..



دا شكل الشعراية تحت المجهر الالكتروني
شايفين الطبقات الخارجية دي
دي اسمها طبقة الكيراتين الخارجية للشعرة ودي طبقة وقائية وتتكون من بروتينات
بعدها يجي طبقة ال core
وهيا قلب الشعرة واللي بناء عليه يتحدد نوع شعرك .. ناعم ..خشن.. مفرود..كيرلي..وهكذا..

 

 

[dr-amira]

ميه ميه يا دكتوره .....استمرى واحنا معاكى

 

 

[بنت شعنونة]

ربنا يخليكي يا دكتر اميرة
ولو عاوزين اي سؤال الحقوني بيه الله يكرمكم عشان انا مش من النوع اللي بعرف يشرح لوحده كدا

طبقة الكيراتين دي بقى يا جماعاة ممكن يحصلها اضرار كتير جدا اهمها ان الطبقات دي تبقى شبه الحراشف
يعني بالشكل دا..


الصورة اللي على اليمين الاولى هيا اللي انا قصدي عليها
والشكل دا اللي بيظهر لينا في ششكل تقصف الشعر وهياشانه وتغير الكوالتي بتاعه
ودا اسبابه كتيييييييييييييييييييير جدا
من اول الجيل و الكريمات الفرد و السشوار الكتير و الشمس ومية البحر و البسين وحاجات تانية كتير بتخلي الشعراية تتحول من الصورة الاصلية الي الحراشف وبالتالي نبتدي نسمع
شعري ماكانش كدا
بقى وحش
اتقصف
خشن
هايش

الصورة التانية شمال دا انفجار داخل جسم الشعرة نتيجة الهواء الساخن اللي هوا السشوار

طبيعي انك تدخلي كوافير تلاقي واحدا قاعدة بتتسشور والكوافيرة ماسكة شعرها شاداااااااه ع الاخر و دخاااااااااااااااان طالع من شعرها وعاااااااااااادي
هنا كارثا
اللي بيحصل انه الشعر بيكون مبلول وفجأة بنقرر اننا ننشفه تماما بالسشوار ونحطه لالالالالالالالالالازق في الشعر يقوم يحصل في "قلب" الشعرة core تحوصل لنقطة او اكتر من المية لما المية تغلي بفعل السشوار يقوم يحصل انفجار بالشكل اللي انتوا شايفينه دا
ودا ينتهي عندنا بالشكوى التالية
شعري بيتقصف من نصه؟
شعري بيقع من نصه او يقع انصاص
شعري عامل زي العقل حتت تخينة وحتت رفيعة
وهكذا

الصورة التانية يمين..
اسمها knobe
العقدة
ودا لما بيحصل الحراشف اللي قلنا عليها بيبتدي الشعر يتشبك في بعضه ويحصل زي عقد وكلاكيع داخل نفس الشعراية او بينها وبين اخواتها وبالتالي عشان نسلكها بنتدي نشد اكتر المشط او الفرشاة ف نبتدي نقطع الشعر ونوقعه





نيجي بقى لأسباب تساقط الشعر


الانيميا
هرمونات غير منتظمة تظهر في اختلال الدورة وعدم انتظام مواعيدها او ظهور شعر زيادة في مناطق مختلفة من الجسم او ظهور بعض شعيرات في اماكن غير معتاد ظهور الشعر فيها
- الضغط النفسي
-السكر
-بعض امراض زي الذئبة الحمراء او بعض امراض الجهاز الهضمي اللي بيكون فيها هضم مش كويس
- مناعة ضعيفة وتكرار نزلات برد وحرارة طالع نازل
- بعد العمليات الجراحية و التخدير الكلي

نيجي بقى لكام سبب مش ها تصدقوهم

استعمال منتجات مجهولة الهوية على الشعر
او منتجات معروفة غير مناسبة للشعر بكميات كبيرة او تكرار كبير
السشوار الكتير
الرضاعة
غسيل الشعر اليومي
تسريح الشعر بالفرشاة
تقطيع الشعر بسبب الطفل الرضيع

 

 

[نانا]

تسلم ايدك يا د / شانا

على فكرة شرحك حلو اوي

بقولك يا شانا
بما انك قولتي أسباب تساقط وتقصف الشعر

يا ريت تقوليلنا ايه الحل وازاي نعالجه
وهل فيه اسباب وراثية ممكن تكون ورا تساقط الشعر

وبعد اذنك عايزة اعمل استشارة في الموضوع دا

انا مثلا شعري الحمد لله كان كويس
بس بقالي سنتين بعمل فيه حاجات غريبة جدا وتقريبا بدأ يبوظ مني للسبب دا

انا ساعات وانا قاعدة سرحانة ولا بذاكر بمسك أي خصلة شعر وانزل فيها بهدلة ازاي بقى
بمسكها واقعد اقطع فيها
ازاي بردو
انا مش بقطعها من جذورها طبعا
انا بقطعها من نصها كدة
حركة متخلفة اتعودت عليها
والموضوع لما طول معايا بدأت احس بأثر دا على شعرة وانه من فوق من عند القُصة مثا بقى متقصف شوية ومتقطع

عارفة اللي انا بعمله دا تخلف

بس والله بدأت اقلل جدا وما اعملش الهبل دا .. بس ساعات غصب عني

مش عارفة دا مرض نفسي دا ولا ايه سببه

قوليلي اعمل ايه يا شانا عشان اعالج الموضوع دا وارجع شعري زي ما كان

وازاي كمان احسن مستواه لأني الفترة الأخيرة كنت هاملاه شوية

وعايزة اقولك حاجة كمان انا فتله شعري رفيعة اوي
هل دا حاجة وراثية وطبيعة شعري ولا عيب
وهل ينفع اخليها اتخن من كدة ولا ايه


وعايزة استشيرك في حاجة كمان
ايه رأيك في عمل الشعر حاجة اسمها ( طاقية ) وهو انك تلفيه على راسك ( أكيد انتي فاهمة قصدي )

وحاجة كمان
ايه رأيك في لف الشعر بالرولو
هل دا حلو ولا سيء للشعر ؟

معلش انا اسألتي كتيير

بس ما صدقت والله اقول اللي في نفسي

وميرسي انك اديبتينا الفرصة للإستفسار والإستفادة من الموضوع دا

 

 

[بنت شعنونة]

نانا
انا اللي بشكرك انك لحقيتيني ب اسئلة دا انا كنت ابتديت اهيس

واحدا واحدا
اولا اللي انتي بتعمليه دا نفس فكرة انفجار الشعرة وبنفس الصورة
ولكن دا بيؤدي انك بتخلي شعرك في حالة "صدمة" وبالتالي يبدا نمو الشعرة اللي نهايتها متقصف يتحول لبطيئ وبالتالي يضعف تغذية قلب الشعرة دي ةبالتالي تبتدي التقصيفة تسرح على فوق و بالبلدي كدا تتشقق اكتر ولفوق ودا ها يخلي كوالتي شعرك من سيء الى اسوأ
الحل
بطلي اللي بتعمليه دا لأنك ممكن تعملي كارثا و تخلي شعرك يبطل يطول او يبقى مشوه خصوصا ان فتلة شعرك ضعيفة اصلا

فتلة شعرك دا جين وراثي بتتولدي بيه ولا يتغير للاحسن ابدا..مهما عملنا "خلقة ربنا"

الطاقية والله بين بينين يعني ممكن تبقى مضرة وممكن نعديها
الشرط ما يبقاش الشعر مشدود ومش تعمليها عكس عكاس و تغيري الاتجاه لأن دا ممكن يعمل تساقط زيادة

ولو استوفيتي الشرطين دول ممكن نعديها وتبقى افضل من الرولو لأن غالبا في مصر بتلفوه مشدوووووووووووود جدا +بتناموا بيه ودي مصيبة


علاج شعرك شوية فيتامنيات تنساب حالتك + استعمال شامبو جيد + قص طرف الشعر لحد ما يبقى مافيش تقصيفه ويكرر كل شهر قص الاطراف لمدة 3 شهور
اكل سلطة كويس
استعمال بلسم جيد لأطراف الشعر او حمام كريم مرطب جيد

 

 

[نانا]

شانا ميرسي بجد على ردك
والحمد لله انك لحقتيني

بس حكاية انفجار الشعرة دا خضني اوي
وحاسة اني كنت غبية اوي في اللي نت بعمله دا .. واللي مش عارفة بعمله ليه اصلا


بالنسبة للنقطة دي ممكن معلش سؤال

اقتباس المشاركة الأصلية كتبت بواسطة بنت شعنونة الطاقية والله بين بينين يعني ممكن تبقى مضرة وممكن نعديها الشرط ما يبقاش الشعر مشدود ومش تعمليها عكس عكاس و تغيري الاتجاه لأن دا ممكن يعمل تساقط زيادة

بالنسبة لممكن تبقى مُضرة وممكن نعدياها
يعني معنى كدة انها مالهاش فايدة ؟
يعني يإما تضر يإما نعديها

وبالنسبة لحكاية عكس عكاس دي

انا اختي بتحب تعملها على الناحيتين ازاي

انها تعملها الأول على اتجاه وبعد ما تسيبها فترة
تروح تفكها
وتعملها على الإتجاه التاني
ودا تقريبا علشان شعرها ينشف من الإتجاهين ويتفرد افضل

انا مش بعمل طاقية لانها بتجيبلي صداع وبتضايقني جدا .. بس كنت بفكر اعملها لاني افتكرتها مفيدة

بس شكلي هرجع في كلامي


معلش يا شانا على الأسئلة التافهة دي
بس أملي فيكي كبييير

 

 

[بنت شعنونة]

نانا
الاسئلة اللي بتقولي عليها تافهة دي مهم جدااااااااااا لأنها اخطاء يومية تؤدي الى كوارث
ف اسئلي براحتك اهو ترحميني من اني اكلم نفسي

معنى الجملة اللي انا كتبتها..
انا بقارن بين الطقية و الرولو او اي حاجا تانية
يبقى الطقية ارحم
انما لو ها اقارنها ب اني ما اعملش حاجا مؤذية يبقى بلاش الطقية طبعا
بالبلدي "احسن" الوحشين.. فهمتي قصدي؟

موضوع عكس عكاس خليني اشرحهولك بصورة مبسطة وبمثال بسيط
تخيلي انك عندك شجرة صغنطوطة كدا لطيفة
وراح جاي طفل "شاددها" من رقبتها كدا ناحية المين جامد
ف الشجرة صمدت
راح جاي بعد شوية وشاددها من الشمال جامد
الشجرة صمدت ولكن "اتلخلخت"
ثقي انه في اي شدة من الجايين لازم الشجرة "تطلع" في ايده
وهذا يتمثل ان الشعره تقع..
فهمتي قصدي؟

ف لما الفها في اتجاه واحد يبقى انتي بتاخدي احتمال النصف في انه الشعرة تقع على "ضعف" الوقت اللي ممكن تقع فيه لو عملتيها عكس عكاس


فهمتي اي حاجا؟

 

 

[بنت شعنونة]

جملة كمان
انتي بتقولي ماانتيش عارفا بتعملي كدا ليه
دا توتر نفسي يا نانا وممكن مع الوقت يتحول الى عادة وهنا تبقى مصيبة بجد
بعض البنات ب "تنتف" شعرها من الجدر تقوم تعمل حاجا اسمها traction alopecia
يعني صلع نتيجة شد الشعر
ودا بيوصل لحالات صلع رسمي وليس لها علالالالالالالالالالالالالالالالالالالالالالاج

 

 

[نانا]

اقتباس المشاركة الأصلية كتبت بواسطة بنت شعنونة نانا الاسئلة اللي بتقولي عليها تافهة دي مهم جدااااااااااا لأنها اخطاء يومية تؤدي الى كوارث ف اسئلي براحتك اهو ترحميني من اني اكلم نفسي

ميرسي يا شانا طمنيني
اصلي كنت حاسة انها اسئلة متخلفة اوي

اقتباس المشاركة الأصلية كتبت بواسطة بنت شعنونة معنى الجملة اللي انا كتبتها.. انا بقارن بين الطقية و الرولو او اي حاجا تانية يبقى الطقية ارحم انما لو ها اقارنها ب اني ما اعملش حاجا مؤذية يبقى بلاش الطقية طبعا بالبلدي "احسن" الوحشين.. فهمتي قصدي؟ موضوع عكس عكاس خليني اشرحهولك بصورة مبسطة وبمثال بسيط تخيلي انك عندك شجرة صغنطوطة كدا لطيفة وراح جاي طفل "شاددها" من رقبتها كدا ناحية المين جامد ف الشجرة صمدت راح جاي بعد شوية وشاددها من الشمال جامد الشجرة صمدت ولكن "اتلخلخت" ثقي انه في اي شدة من الجايين لازم الشجرة "تطلع" في ايده وهذا يتمثل ان الشعره تقع.. فهمتي قصدي؟ ف لما الفها في اتجاه واحد يبقى انتي بتاخدي احتمال النصف في انه الشعرة تقع على "ضعف" الوقت اللي ممكن تقع فيه لو عملتيها عكس عكاس فهمتي اي حاجا؟

أه طبعا فهمت لأنك ما شاء الله شرحك حلو
وبالأمثلة كمان

خلاص يبقى كدة اتراجع عن موضوع الطاقية وبلاش احسن

واخلي اللي بيعملها بيطل هو كمان

بس عايزة اسألك سؤال كمان يا شانا معلش استحمليني

ايه هو أفضل وضع للشعر
يعني في الطبيعي كدة وانا مثلا قاعدة في البيت اسرح شعري ازاي وايه القَصة اللي اسيبه عليها .. وايه الحاجة اللي ناس في العادي بتعملها ومضرة للشعر

وكمان وانا جاية انام اعمل فيه ايه

ولو حد نام ونسي يشيل مثلا الكلبسة او البنسة اللي في شعره هل دا ممكن يضر شعره او فروة راسه ؟
اصلي لو حصل وسيبتها بحس كدة ان مكانها بيألمني .. عشان كدة بفضل اشيلهم من شعري قبل النوم

سمعت كمان ان بالكتير الواحد يغسل شعره مرتين في الأسبوع هل دا مظبوط ؟

وايه افضل مدة لغسل الشعر ؟


متشكرة جدا يا شانا

وأي سؤال عندي وييجي في بالي إن شاء الله هآجي أقولك عليه .. ومتشكرة بجد انك فتحتي باب الأسئلة في الموضوع المهم دا