تحياتي من مسيساجا

[somayasaleh]

الصحف المصرية والعربية

الاعضاء الافاضل......اسكندرانية كنداوية......نهر النيل.......باشمهندس اهلاوي اصيل..(رفيقي في الهندسة الطبية)......مدام وسيمو......العزيزة الغالية كودو الشهيرة بام ادم.......أم آدم الحبيبة......استاذنا كلنا استاذ نصار......دكتور ايهاب طاهر......استاذ اكسلانس......

استاذ رؤوف...استاذ نوبدي

اخونا الكبير قوي في المقام طبعا وطيبة القلب زناتي باشا

واخيرا وليس باخر ....رمز الذوق والادب والاخلاق الرفيعة دكتور هشام....والله لايق علي حضرتك روبن هود فعلا....واحيك مرة تانيه وتالته علي الرد لوبستر...ربنا يبارك فيك

الاعضاء الافاضل السابق اساميهم....اعجز عن شكركم بالترحيب بي...بس احنا فعلا اسرة واحدة...وربنا يديم المعروف بنا....ويجعل كل ما نقوم به ده لخدمة الغير ابتغاء لوجه الله تعالي فقط لا غير...لمساعدة الناس اللي مش عارفة تحصل علي معلومة صح


ندخل في الجد بقي.....موضع التقديم للجامعات والهاي سكول
===================================
اي حد في اي كلية او اي تخصص يدخل علي السيت ده....ويقدم عن طريقه

www.ouac.on.ca

والتقديم بمتوسط 120 دولار او اكتر حسب الجامعة...ويشمل اختيار تلات كليات في تلات جامعات مختلفة...واذا اراد اضافة اختيار رابع....يدفع حوالي 40 دولار لكل اختيار كلية زيادة
وهذا الاختيار الزيادة ممكن اضافته في اي وقت لاحق
وهذا الملف فيه كل المعلومات الخاصة بجميع جامعات اونتاريو...وشروط وطريقة التقديم لعام 2010 فقط

https://www.ouac.on.ca/105/pdf/b_105_b.pdf*

التقديم علي النت لا يحتاج اي مستندات ...بعد كده ح يبعتوا يطلبوا المستندات اللي بتفيد هو في سنة كام ودرس في مدراس ايه وتفصيل المواد الدراسية اللي اخدها.....الخ

طبعا الطلبات ده تتبعت من الجامعة اللي كان فيها في ظرف مغلق باسم الجامعة اللمطلوبة

زي ما قلت قبل كده......اولادي في هندسة وطب اسنان

ابني في نهائي هندسة اتصالات..مع انه لسه ما كملش 22 سنة ما شاء الله ....قدم في تلات جامعات

1- جامعة يورك 2- ماك مستر 3- ووتور لوو

في خلال عشر ايام ردوا عليه الجامعات التلات وطلبوا الاوراق السابقة...وكذلك شهادات الجي سي اس اي واحنا بنحضر فيها الان

بالنسبة لموضوع الطب ...او الصيدلة ،،،،او طب الاسنان.....ده مواااااااااااال لوحده

هنا لازم الطالب اللي ناوي علي حاجة من دول من بعد الثانوي او الدبلوما الامركيه او الاي جي سي اس اي......يدخل كلية علوم لمدة من تلات الي اربع سنين....وبعد كده يقدم علي امتحانات قبول مدرسة الطب او الصيدلة...الخ وده ليها شروط صعبة جدا جدا ...وكمان المصاريف غالية جدا جدا ،،،، وكل جامعة مختلفة في الشروط عن الجامعة التانية.......وده برضه تلاقوه في السيت اللي فوق

اللي هو OUAC

مثلا انا بنتي المفروض مخلصة سنة كاملة طب اسنان....مع انها لسه ماكملتش 18 سنة ما شاء الله....

.بس لازم تبدأ من اول علوم تلات سنين وبعدين تقدم علي طب اسنان لمدة اربع سنين تانية ....

وفيه اقتراح تاني قال لنا عليه ناس اصدقائنا....ان هي تكمل في مصر ....وبعد كده تدخل هنا من سنة تانيةاو تالتة علي حسب معادلة المواد اللي درستها هناك.....

وحاجة تالتة ....انها بعد ما تكمل هناك......تيجي تعمل معادلة هنا وهي وحظها

وفي اختيار رابع....انها تغير الكريير الطبي ده خالص ...وتختار اي كاريير تاني وخاصة انها بنوتة وسنها لسه صغير

كده يبقي فاضل الهاي سكول....وده لعمر ابن الصغير

المدارس هنا اسهل حاجة في التقديم......بالنسبة للمرحلة اللي قبل الهاي سكول...اسمها تعليم اساسي...وده بياخدوا الاولاد علي حسب سنهم....في المدرسة الاقرب لعنوانهموطبعا مجانا

بالنسبة للهاي سكول.......بيعملوا امتحان للاولاد علشان يحددوا مستواهم ويدخلوهم في الصف الدراسي المناسب لهم

اي وقت في السنة بتيجي...بيدخلوا الاولاد ولو فاضل شهر علي نهاية الدراسة....يعني محدش ح يتعب من الموضوع ده

كده خلصنا موضوع الدراسة واللي عنده سؤال يتفضل قبل ما ندخل في السكن والتجهيزات الاولية ....وبعدين الشوبينج....وما ادراكم ما الشوبنج.....

وبعدين الاكل الحلال والمطاعم والذي منه.....

ربنا يوفق الجميع

 

 

[No Body]

معلش يا SomayaSaleh

عندي سؤال كتبته في باب أي سؤال عن الهجرة بس مضطر أعيده تاني لأن NassarLink ما شافهوش ألا وهو :

هل المتقدمين لكيبك واللي حصلوا على التأشيرة ووقت اللاندينج عملوا لاندينج في مقاطعة إنجليزية .. هل تتم إجراءات وصولهم واستلامهم مجموعة الأوراق المهمة زي البي آر والسين وغيرهم .. تتم بمعرفة المقاطعة الإنجليزية إللي نزلوا فيها .. واللا لازم تتم إجراءاتهم عن طريق كيبك ؟

مش عارف أنا أوضحت واللا السؤال مكعبل واللا إيه ؟؟

الشكر مقدماً

 

 

[nour alhudah]

جزيل الشكر لك ياباش مهندسة سمية عالموضوع الجميل دا
والف مبروك للآندينج وحمد الله عسلامة عودتك

انا طبعا اعرفك من منتدى محاورات المصريين وعجبني فيكي حماسك ونشاطك في موضوعك الي بيخص المهاجرين وتجميعك لمعلوماتهم وعمل التحديث بااستمرار .. ماشاء الله عليكي
انا طبعا عندي كوم أسئلة لكن حخليها لوقت تاني عشان ماابقى غلسة

واهلا وسهلا فيكي مرة أخرى

 

 

[ناوية ع الهجرة]

حبيبتي سمسمة انا جيت معاكم لان المكان حلو بناسه والناس الحلوة اللي زيك وزي الباشمهندس زناتي ودكتور هشام هما اللي بيحلوا المكان مش العكس
طبعا الف شكر ليكي على المعلومات الجامدة دي واللي بحس انها المختصر المفيد
بجد ربنا يجازيكي خير ويخليلك اولادك ويباركلك فيهم ويكملوا دراستهم على خير في كندا
انا كان عندي سؤال بالنسبة للرخصة هو لازم يكون في وقت بعد الحصول على الG1 قبل الحصول على الG
ولا ممكن نقدم عليها على طول ؟

 

 

[أكسيلانس]

السلام عليكم ورحمة الله وبركاته

سؤال بالنسبه للتعليم الاساسي يا مدام سوميه

أولادي بيدرسوا اللغه الفرنسيه و الالمانيه كلغه تانيه و مستواهم جيد فيهم - هل عند حضرتك فكره عن اللغه التانيه بالنسبه للابتدائي - أعتقد فيه فرنساوي بس يا تري فيه ألماني
و السؤال التاني لو وصلنا في نصف العام - هل يجب أن أحصل علي أي شهادات من مدرستهم في مصر عن ما درسوا ألخ ,, و لا مش مطلوب حاجه غير شهادات الميلاد
سؤال أخير معلش ::
بالنسبه للتشيلد بنفت , حضرتك ذكرتي أنها 300 $ للطفل هل يقدم عليها بمجرد وصول الاولاد للبلد و لا ممكن أنا أقدم عليها قبل ما يوصلوا ,, و كم من الوقت تستغرق حت تصرف ,,

خالص الشكر

 

 

[somayasaleh]

الاخ الفاضل نو بدي....معلومات مش اكيدة في الموضوع....كلها سماعي

انا سمعت انه لو معاك الس سي كيو لازم تنزل علي كيبك....بس بعد كده ممكن تستقر في اي بلد تانية....مع ملاحظة ان العكس ما ينفعش

اختنا الحبيبة ام حسن نورتي المكان يا فندم...بيتك ومطرحك...في انتظار كوم الاسئلة ولا يهمك

مدام ناوية....وحشتيني...فينك من زمان....شوفي يا ستي...رخصة الجي1 صالحة لمدة خمس سنين

رخصة الجي 2 صالحة لمدة خمس سنين.....كل الرخص مدتها خمس سنين.....بس خدي بالك ان الجي1 والجي 2 دول عليهم شوية محظورات....قلناها كتير قبل كده

اكسلانس باشا
بالنسبة للجزء الاول من السؤال....بصراحة ماعرفش موضوع الااماني ده....مع ان ابني كان لغة تانية الماني....بس هو دلوقتي في الهاي سكول....مطلوب ان يعرف ماس وانجلش وسينس فقط

الجزء التاني...مش فارقة اول العام من نص العم من اخره....الاولاد ح يروحوا المدارس ح يروحوا ولو فاضل يوم علي السنة الدراسية...المطلوب شهادات الميلاد مترجمة......شهادات التطعيم مهمة جدا....ولو شهادات دراسية من المدرسة مش ح يخسر...ولو انهم مش بيطلبوها....بس يمكن يكون فيه مدارس معينة بتطلوبه....علشان كده من الافضل ان حضرتك تجهزهم احتياطي
الجزء التالت....التشيلد بنفت....لازم الاولاد يكونوا معامك علشان تقدم عليها....هم في المطار بيشوفوا الاولاد سنهم كام وعلي الاساس ده بيعطوا لك كل طفل نموذج تعبيه براحتك في البيت وبعد كده تقدمه في اي وقت.......احنا لسه ما قدمناش لظروف خاصة......حضرتك ممكن تقدم عليه في اي وقت بعد اللاندنج وح تتحسب من يوم الدخول....مثلا انا في المطار شافوا اولادي شكلهم صغير ....سألوهم انت كام سنة.....15.....17....21....طبعا اعطونا اتنين بس

يارت اكون عرفت اجاوب عليكم....اشوفكم علي خير في حلقة قادمة

 

 

[ناوية ع الهجرة]

انا هنا بس كنت في البيت التاني لغاية ما حصل اللي حصل والباشمهندس زناتي دعاني عشان استخبى في الجبل مع المطاريد
على فكرة انا كنت بدخل المنتدى كتير قبل كده بس ما كنتش مشتركة
بالنسبة لسؤالي عن الرخصة انا كنت اقصد هل لازم انتظر فترة بين الحصول على الG1 وال G
يعني ممكن اخد الG1 وبعدين اقدم بعدها على طول على الG لاني كنت قريت قبل كده اني لازم انتظر 9 شهور بعد الحصول على الG2 وبعدها اتقدم للG فهل في فترة برضه بين الG وال G1 في حالة توفر
شهادة الخبرة
وشكرا مقدماشـكــ وبارك الله فيك ـــرا لك ... لك مني أجمل تحية .

 

 

[znaty]

اقتباس المشاركة الأصلية كتبت بواسطة ناوية ع الهجرة انا هنا بس كنت في البيت التاني لغاية ما حصل اللي حصل والباشمهندس زناتي دعاني عشان استخبى في الجبل مع المطاريد على فكرة انا كنت بدخل المنتدى كتير قبل كده بس ما كنتش مشتركة بالنسبة لسؤالي عن الرخصة انا كنت اقصد هل لازم انتظر فترة بين الحصول على الG1 وال G يعني ممكن اخد الG1 وبعدين اقدم بعدها على طول على الG لاني كنت قريت قبل كده اني لازم انتظر 9 شهور بعد الحصول على الG2 وبعدها اتقدم للG فهل في فترة برضه بين الG وال G1 في حالة توفر شهادة الخبرة وشكرا مقدماشـكــ وبارك الله فيك ـــرا لك ... لك مني أجمل تحية .

الللللله ..كدة العيلة اتلمت تاني ..حمد الله على السلامة

لو جبتي معاكي شهادة خبرة من المرور في مصر ..او برينت من الكويت وتترجميه في كندا من مترجم معتمد..مدة الخبرة سنتين او اكثر
تقدمي دايركت على جي كمان موش جي ون لو عاوزة

م سمية ..دة الموضوع ماطلعش جداول ابدايت بس ..دة انتي طلعتي متميزة في الكتابة والملخصات بشكل مذهل
ربنا يجزيكي بكل حرف درجة في الجنة يارب

دكتور روبين هيتش الحبيب ..شكلكم كدة هاتلعبوا في دماغي وهابعت اجيب مع تو علبة من العك الكروي في ايت دة ؟؟ شكله هايطلع حلو ..ماهو موش معقوله الناس كلها بتمدح فيه ويطلع مقلب

اه نسيت ..مدام ناوية ..مبروك عالباسبور

 

 

[ناوية ع الهجرة]

اقتباس المشاركة الأصلية كتبت بواسطة znaty الللللله ..كدة العيلة اتلمت تاني ..حمد الله على السلامة اه نسيت ..مدام ناوية ..مبروك عالباسبور

الله يسلمك ياباشمهندس ربنا يكرمك
الله يبارك فيك عقبالكم ان شاء الله
تحب ابعتلكم اتنين انت وجيجي

 

 

[ام يمنى]

سلام عليكم مدام سميه
الحمد لله على سلامة وصولك بس معلش جت متاخره انا كنت متابعه بس المذاكره كانت واخده كل وقتي. الحمد لله خلاص خلصت و مستنيه النتيجه يا رب اجيب المطلوب و ماحتجش امتحان تاني.
المهم انا بشكرك على مشاركتك الرائعه فعلا وصف دقيق و فيه كل المعلومات باسلوب جميل بس معلش عندي سؤال ليكي
احنا ان شاء الله لسه حنتصور قريب هل انا اقدر اعرف بعد منستلم الصور اذا كانت الصوره مظبوطه و لا لا قبل مانبعتها. لان انا شايفه الكل بالرغم من حرصهم على مواصفات الصوره لكن دايما بتحصل فيها مشاكل؟؟
و بالتوفيق ليكي و للعائله ان شاء الله
سلام