Mahmoud Mohamed Hegazy
·
عن الفرق بين الدولة " المهزأة " ... والدولة " القوية "
مشهد رقم 1
في فبراير اللي فات .. وبعد نشوة قصف الطائرات المصرية لعمارتين في وسط مدنية درنة الليبية .. وبعد ما الجنرال عبد الفتاح اللمبي لبس النضارة الشمس ووقف إتصور سيلفي مع الطيارات وهي بتقلع من أحد مطارات وسط الدلتا .. مصحوبة بنوبات طفح هرموني تحت شعار " مصريتنا وطنيتنا حمادة إمام " ..
مصر راحت للأمم المتحدة علشان تستصدر قرار تحت الفصل السابع بخصوص ليبيا .. مدعومة بتطبيل إعلامي داخلي رأس حربته توفيق عكاشة ومدام لميس .. راحت - كدهون - بدون تنسيق مع حد .. بدون إتصلات .. في تحرك يليق بنظام مهزأ على رأسة واحد محدود بحجم السيسي .
ورغم إن مصر وقتها كانت تمتلك أسباب مش بطالة لهذا الطلب .. في تهديد حقيقي لحدودها وفوضى سلاح .. وفي 20 مواطن مصري أعدمتهم داعش في ليبيا .. بس العالم لا يدار بالطريقة دي طبعا .. مندوبنا هناك كان شكله " لباس " وهوا تاية ومش قادر ياخد حتى موافقة المجموعة العربية عالقرار .. وسط سخرية البعثات الديلوماسية الغربية .. وإنتهى الحال بفضيحة دبولماسية ورفض مجلس الأمن - كل - الطلبات المصرية .. ومقدرناش حتى ناخد إجماع على قرار إدانة .. لتستقر الأمور على " هيومان رايتس واتش " بتفضحنا فضيحة المطاهر يوم طلوعه عالمعاش بسبب قتل المدنيين .
مشهد رقم 2
في أبريل إللي فات .. وبعد إجتياح الحوثيين للمدن والمحافظات اليمنية .. السعودية إستشعرت الخطر من المد الإيراني إللي أصبح بيحاصرها .. فراحت للأمم المتحدة بعد تنسيق شهر كامل مع الحلفاء علشان - بردوا - تستصدر قرار بخصوص اليمن تحت الفصل السابع .
السعودية بقى وبكل هدوء .. قدرت تستصدر قرار من الامم المتحدة بخصوص اليمن تحت الفصل السابع - اه والله الفصل السابع شخصيا - بمواقفة جميع الدول .. وحتى روسيا بجلالة قدرها مقدرتش تصوت " بالفيتو " على القرار وإكتفت بالإمتناع عن التصويت رغم إنها كانت أعلنت صراحة معارضتها للمشروع. اه حضرتك .. السعودية إنتصرت دبلوماسيا على روسيا " بوتين " إللي سلفنا الجاكتة الزرقا إياها . مش بس كدة .. دا سيادتك فرضت حظر على تسليح الحوثيين والقوات الموالية لصالح ؛ وفرضت حظر سفر على عبد الملك الحوثي وعلى عبد الله صالح وإبنه .. وحطتهم في القوائم السوداء ..والأمم المتحدة أقرت للسعودية بفعل ما يلزم لتأمين الموانئ اليمنية ومراقبتها .
مشهد رقم 3
طائرة روسية مدنية تسقط في سيناء .. السلطات المصرية ل 6 ساعات بتنفي إن الطيارة وقعت أساسا .. بريطانيا وبعض الدول الأوربية رحلت وأجلت رعاياها من شرم الشيخ فورا .. وسط إنتشار فيديوهات وتقارير صحفية عن ال 50 دولار إللي ممكن تكرمشهم لظابط ويعيدلك مفاعل نووي .
روسيا كمان أعلنت وحددت بشكل قاطع إن الطيارة سقطت بسبب عملية ارهابية .. وبوتين كلم شعبه ووعدهم بالقصاص .. وقرر وقف جميع رحلات مصر للطيران لروسيا .. وسحب رعاياه .. بينما مصر حتى اللحظة محدش كلمنا ولا فهمنا إية اللي بيحصل .. وسط تأكيدات من رئاسة الجمهورية إن مصر تتعرض لحروب الجيل الرابع .. في الوقت إللي أكد فيه اللواء سيد الجابري الخبير الإستراتيجي أن مدافع الليزر الكهرومغناطيسية هي التي أسقطت الطائرة الروسية .
مشهد رقم 4
تركيا تسقط طائرة حربية روسية .. بعد 5 دقائق فقط من دخولها الأجواء التركية .. الناتو بيعلن وقوفه الكامل بجانب تركيا لحماية أراضيها .. الحكومة التركية طلعت كلمت شعبها وفهمتهم إية اللي بيحصل .. وتوعدت بإستمرار حماية حدودها .
بوتين كمان طلع كلم شعبه وفهمهم في إية .. وعمل فيها " عبدو المجروح " وقال إن روسيا تلقت طعنة من الخلف .. والحكومة الروسية طلبت من الروس ميروحوش تركيا كشكل من أشكال العقاب .. بس مسحبتهمش ولا رحلتهم ولا منعت الطائرات التركية تروح روسيا smile emoticon
مشهد رقم 5
مصر لا تلعب أي دور في رسم خريطة المستقبل السوري وتكتفي بالتصفيق للضربات الروسية .. في الوقت إللي السعودية والاردن محضرين ملفاتهم وطلباتهم .. علشان يحددو مصير أهم بقعة في الأمن القومي العربي وعمق حدود مصر الجيوسياسية .. وإحنا طبعا ولا هنا ومشغولين بمطاردة العيال اللي لابسة تيشرتات عليها "وطن بلا تعذيب " .. أو القبض على فتاة اخوانية لوحت بإشارة رابعة لطائرة F16 smile emoticon
مشهد رقم 6
وزير الخارجية الأثيوبي بيدينا محاضرة بيعرفنا فيها حجمنا .. وبيتكلم عن إن الجعجعة المصرية فارغة وللإستهلاك المحلي .. في وقت السيسي وقع اتفاقية مع اثيوبيا محدش عارف فيها اية او تفاصيلها بتتكلم عن اية في دولة كنافة بإمتياز بتتعامل في ملف مصيري زي دة بالهمبكة .
دا حصل في نفس الوقت إللي في تقارير سودانية بتتحدث عن شكوى اودعتها السودان ضد مصر في الامم المتحدة بسبب إجرائها الإنتخابات على اراضي سودانية (حلايب وشلاتين ) .
مصر بعد 63 سنة من حكم العسكر أصبحت دولة ضعيفة بلا نفوذ .. فقدت كل أوراق الضغط بتاعتها بمزاجها وبرغبتها .. علشان الدولة المصرية تقف تتفرج فقط على الإقليم وهوا بيتقسم لمناطق نفوذ جديدة خالص واحنا في " البلالا "
مصر الكارهه نفسها .. إللي عندها إصرار عجيب على تقزيم دورها ؛ بتعادي الفصايل الفلسطينة في " غزة " وبتصنفهم إرهابيين .. إللي هما مخزون إستراتيجي وداعم قوي للدور المصري في المنطقة .. مصر إللي مررت تقسيم السودان - كدهون - وطالقة كلاب إعلامها يشتموا في شعوب الأرض .. إختارت تدعم كل ما هو وسخ وشبهها في سوريا وليبيا .. لينتهي بها الحال تعيش على المعونات والمنح .. وبعض الملابس الداخلية المستعملة والبطاطين من الامارات .. ولا عارفة تأمن منابع النيل ولا تقدر تستصدر قرار من الأمم المتحدة .. في وقت قررنا فية " نقلع بلابيص " لإسرائيل ونهجرلها الحدود ونعادي الفلسطينيين في الإعلام ومنلاقيش حرج ننتخبها في الأمم المتحدة .
مصر سعت بجد وإجتهاد انها تبقى ولا حاجة ... وبقت فعلا ولا حاجة
آخر 10 مشاركات
25th November 2015, 04:06 AM
عن الفرق بين الدولة " المهزأة " ... والدولة " القوية "
العرض المتطور