بدون محامى الحياة أفضل جدا جدا جدا

[فدائى النبى]

الصحف المصرية والعربية

السلام على أهل السلام و الخير
انا حبيت انى اعمل الموضوع ده لأن موضوع وجود محامى هجره فى عملية الهجرة موضوع ملح جدا و خصوصا على اذهان الناس اللى لسه بتبتدى فى موضوع الهجرة
كل اللى عاوز يهاجر يبداعبه الأمل نحو حياة أفضل و عدالة اجتماعية و فرصه نجاح عادلة
و للاسف الناس دى بتلعب على الأوتار دى ببراعة لدرجة بيتخليهم زى اللى بصحيح و كلامهم زى ما يكون بجد
انا حاليا فى انتظار رد السفارة فى سوريا و ايا ما سيكون الرد انا سعيد و فخور انى ماشى مشوار ال csq بدون محامى بفضل الله انو ارشدنى لناس عندهم خبرة زى الناس اللى هنا خصهم الله لقضاء حوائج الناس و ان شاء الله يكون لهم الأمن يوم القيامة
من هذا المنطلق و شعورا بالواجب و لأن من يشكر الناس يشكر الله انا بشكر الناس اللى هنا بعرض مساوىء المحامين و عرضها على من يهمه المر
ايه الكلام الكبير ده
المهم انا شخصيا لى تجارب مش تجربة واحده مع الساده المحامين - و لله و التاريخ همه ما فيش فيهم محامى واحد كلهم سماسرة و صيع مالهمش شغلانه فى كندا علشان كدا خدوا موضوع الهجرة سبوبة - و هاقولها هنا فى الموضوع ده علشان اللى بعدنا ما يقولوش منهم لله اللى قبلنا ما حذروناش
أتمنى من السادة المطاريد اصحاب التجارب مع السادة الصيع - هوه ده المسمى الحقيقى لما يطلق عليهم محامين الهجرة- انهم يعرضوا تجربتهم هنا حتى و لو كانت التجربة بسيطة
و الله ولى التوفيق

 

[فدائى النبى]

انا شخصيا هابدأ بنفسى مع مكاتب الهجرة
الأول
اول مكتب رحتله كان مكتب اسمة MIS و دا بتاع واحد اسمة فريد عواد و السيدة أخته سالى عواد و دا مكانة فى شارع المشير احمد إسماعيل بمساكن شيراتون و دول رحتلهم و انا فى الكليه و كان معايا واحد صاحبى بس كان خلص الكلية و سالناهم ايه المطلوب و السادة الفاضل رحبوا بينا جدا و لدرجة ان الدمعة فرت من عينى و حسيت ان الدنيا لسه فيها خير
و قالوا لينا ان الموضوع بسيط و المطلوب هوه الأيلتس أو ال ديلف و مبلغ صغير لا يذكر حوالى 1500 دولار أمريكى
بينى و بينكم انا اتحمست قوى و قلتله طيب ممكن و انا فى الكليه اقدم علشان استفيد من فترة الكليه فى مدة الانتظار الحقيقة الراجل ما كدبش على و قالى لاء بلاش احسن و خليك اول ما تخلص تيجى و نبداء على طول
خرجت من عنده و انا طاير و خلاص بجهز نفسى انى اروح كندا عن قريب
و صاحبى الله يجازية خير بيقولى دا كله هتش و دول ناس نصابين احنا بس جايين نشوف بينصبوا ازاى و نقولهم كله واحد يلعب قدام بيتهم و نشتغل من نفسنا
طبعا انا ردبت عليه بكل ما اوتيت من قوة و قولتله انته كدا دايما شكاك و ما ليكش فى الناس المحترمه
دا الاستاذ المستشار المحامى قالى ان الموضوع بسيط انته اللى دايما شكاك
المهم روحت و انما سعيد جدا و ناوى انى اجهز نفسى من دلوقتى
و بعد كدا و انا بقراء الجرنال لقيت واحد تانى منزل اعلان انه كمان مستشار هجره قلت طيب ليه لاء ما نروح و نشوف
و دى الحلقة الجاية من المسلسل

 

 

[فدائى النبى]

الثانى
و انا قاعد فى يوم كنت مكبر دماغى و ما رحتش محاضرة السكة الحديد علشان الدكتور ما بياخدش غياب و هوه قال انه مش هايسقط حد من الدفعه فى المادة
فتحت الجرنال لقيت واحد منزل اعلان فى أقصى يمين الصفحة كاتب م/ شريف أديب للهجرة الى كندا و عنوانهم على ما افتكر فى مصر الجديدة قريب من ميدان تريومف بس مش فاكر فين بالظبط
اتصلت بيهم و ردت على السكرتيرة و قالت لى لازم تحدد معاد قولتلها و ماله نحدد معاد نقابل فيه الباشمهندس شريف اديب
ردت على بصوت لا انساة ادخل الرعب الى قلبى و قالتلى انه مش مهندس دا مستشار
قولتلها معلش اصلى انا بدرس هندسة و م اللى قبل اسمه دى انا متعود انها مهندس على العموم يا ستى الغلط مردود
انا كنت خايف احسن يمنعونى من دخول كندا و يضيع حلم الهجرة
المهم حددت معاد مع السيد المستشار المحامى و رحت اقابلة
لقيت الشقة اللى فيها المكتب عبارة عن شقة واضح جدا انها متأجرة بشكل مؤقت تماماً و فى عمارة آيلة للسقوط
الشاهد السيدة السكرتيرة اعطتنى ابليكيشن و قالت لى املاة
نسيت اقول انى كان معايا صديقى امير رفيق مشورا الهجرة و قالى انو مش هايدخل بس هايستنانى بره
المهم جه على الدور فى الدخول انا و 7 من المنتظرين و قعدنا صف واحد امام السيد المستشار المحامى و تكلم سيادته بشكل آلى تماماً و شرح ان الهجرة الى كندا تحتاج الى لغة و و ذلك عن طريق الأيلتس و فلوس عن طريق الحساب البنكى
و قال ان الموضوع هاياخد شويه وقت و طبعا الكلام ده كان قبل الليستة المشؤومة و القانون الجديد
و الناس بدأت تسأل و انا بصراحة كنت مخنوق من طريقة كلامة و معاملته للناس اللى كانت كلها عجرفة و قلة ذوق على اعتبار ان الطريقة دى هاتدخل الرهبة قى قلوب الذين قعدوا امامة و تحسسهم انه بيعمل كدا غصب عنه من منطلق قومى بحت
و لما جه الدور على فى السؤال - أصل كل حاجة ماشية بالدور- قولتلة انا مش عاوز اخد جنسية كندية م ما كنتش عارف لية انا قولت كدا بس اللى كنت حاسس بيه انى عاوز اخنق على الكائن ده بأى شكل
انا عاوز اروح هناك و بعدين افضل مصرى على طول
الراجل و لأول مرة فى التاريخ تحرك حركة لا تكاد تكون ملحوظة لدرجة اننى اعتقدت انها خدعة بصرية و قالى تخيل يا اخ احمد انك اول واحد يستفزنى من اول ما بدات الشغلانة دى
شعرت بحلاوة النصر و آمالة على رأى الرئيس السادات و قالى مش عاوز تاخد ما تاخدش المهم انك تروح هناك
و فجأة و بدون حسبان للموضوع غلط ووقع قدامى بلسانة و قالى انا بيجيلى رجال اعمال بيدفعوا بال200 ألف جنية علشان ياخد الجنسية الكندية و همه قاعدين فى مكانهم
و نزلت عدالة السماء على استاد باليرمو و نطق سعادة المستشار المحامى بالحقيقة انه نصاب مرخص له
المهم انا خنقت عليه شويه فى الكلام و هوه كمان خنق على و فى النهاية البيه قال انه بياخد على ما افتكر 3000 دولار اتعاب
المهم خرجت من المكتب ده و الناس اللى كانوا معايا جوه بيبصولى بإحتقار على انى من المتخلفين الصناديد المقسمين باللات و العزى
خرجت انا و صديقى و قولتلة مش عارف انا اتجننت ولا ايه انا عاملت الراجل بمنتهى العجرفة بس مش عارف ليه ما استلطفتوش
ضحك و قالى اهلا بيك على ارض الواقع
و فى يوم من ذات اليام و انا قاعد بقراء الجرنال برضة لقيت اعلان شدنى

 

 

[فدائى النبى]

لقيت اعلان عن مكتب اسمة بيرزى و افتكر انه كان فى مصر الجديدة جنب ميدان الاسماعيلية بس مش فاكر فين بالظبط
رحت المكتب دة و انا كان بداء يساورنى الشك ناحية السادة المستشارين المحامين انهم ممكن يكون فيهم 1 % نصابين و الباقى كويسين
المهم رحت و عجبنى قوى الصور اللى كانوا معلقينها على الحيطة و خصوصا الصور اللى كانت لأشخاص المفروض انهم سافروا و متصورين هناك و كاتبين كلام شكر الى المكتب
بالظبط زى ما بنشوف تقرير الحكومة عن تحسن الاقتصاد و الطفرة النوعية
مش معقول هانكذب الحكومة و نقول ان دا محصلش
هوه دا كمان كان نفس شعورى ناحية السادة المستشارين المحامين
المهم رحت و قابلت الآنسة اللى كانت مسؤلة و كانت صغيرة قوى انها تكون مستشارة بس الحاجه اللى بقيت متعود عليها ان الكلام بيكون بشكل آلى و تكرارى بس اللى لاحظته ان الأمورة اللى كانت قاعده قدامى كانت من اخوانى المسيحين و كانت بتتعمد انها تلف ايديها بشكل مفضوح و مذرى علشان الصليب اللى على ايديها يبان قدامى و كأنها بتقولى ان الملتحين اللى زيك مالهمش مكان فى كندا
طبعا ممكن حد يتهمنى انى بتحامل عليها و انى مكبر الموضوع بس دا ظهر جدا لما قالت لى خد بالك كندا مش زى مصر يعنى موضوع انك تلبس قصير ولا تلبس مراتك نقاب بالعافيه و شغل الناس الوهابيين - و مش عارف هيه جابت الكلمة دى منين - مش هايكون مقبول فى كندا
سألتها بمنتهى البرود يعنى ايه وهابيين
قالت لى يعنى المتعصبين
المهم السيدة ما قالتش جديد غير ان المطلوب 3000 دولار مقسمين 1000 عند التعاقد و 1000 عند الموافقة و 1000 عند الميديكال
خرجت من هناك و انا ناوى انى ما اعتبش المكتب دا تانى بتاع الحيوانات دول و كنت بفكر فى اى مصيبة البسهالهم جزاء وفاقاً على عنصريتهم و اخذهم الناس بالمظاهر و نويت انى ارجع للراجل الأولانى بتاع مساكن الشيراتون الراجل الطيب الصالح اللى بيضحك على طول و ما بيطلعش من بقه العيبة
و اذ بى فى يوم من الأيام لما كنت بكلم خطيبتى قبل ما نتخطب قالت لى انها قرت اعلان فى الجرنال جايز يهمنى

 

 

[فدائى النبى]

وصلنا كام دلوقتى
الرابع
زى ما قلت كنت بكلم مراتى قبل ما تكون مراتى و كان على وشك الخطوبة
يعنى هيه كانت فى مرحلة المزه بتاعتى
المهم قالت لى انها لقيت اعلان فى الجورنال ممكن يهمنى و لما قابلتها اديتهولى و لقيته اعلان مكتب هجرة اسمة الموارد العالمية و عنوانه 21 شارع البطل احمد عبد العزيز
اتصلت و حددت معاد و رحت هناك و دخلت لقيت واحده ست بلغت من العمر أرذله و ما شاء الله حاطه جنبها مصحف كبير رغم انها لابسة صليب
لقناعة داخلية انا برفض فكرة الهلال مع الصليب دى تماماً
مصريين كلنا واحد بس خلى الهلال هلال و الصليب صليب
المهم انا كنت ناوى اسيبها و امشى فى نص المقابله بس الست بصراحة كانت ذوق و محترمة و قالت انها عندها اكتر من عرض للهجرة و اكن الموضوع ده جديد على
قالن انها ممكن تجهزلى اوراقى و تاخد 3000 دولار
و ممكن تقدملى استشارات تليفونية و تاخد 1000 دولار
و انا طبعا قولتلها ممكن اروح علشان انا جعان
مشيت من عندها و انا تفكيرى كله فى الاخ الأول بتالع مساكن شيراتون اللى هايعمل كل حاجه و هاياخد 1500 دولار و كمان راجل ذوق و مؤدب و ما بيطلعش منه العيبه

 

 

[فدائى النبى]

و جاء الشتاء و كنت فى فترة الإعداد لدخول الجيش
و لو تفتكروا صاحبى اللى كان مرافقنى فى موضوع الهجره جاتله فرصه شغل كمهندس اتصالات فى ايطاليا و سافر على هناك رغم انى حذرته من ايطاليا و مش عارف ليه حذرته بس كانت ليلة مشينا فيها لحد الفجر فى شوارع وسط البلد لحد ما وصلنى لمسجد الفتح فى رمسيس و احنا بنتناقش نقاش موضوعى عن الهجرة لكندا ولا دول العالم القديم و ايه الاحسن ولا نقعد فى مصر
المهم هوه وصلنى لحد الجامع علشان اصلى الفجر و هوه روح لأنه كان من اخوانى المسيحيين
و من بعدها ما شوفتوش الا و انا بسلم عليه و هوه مسافر ايطاليا
المهم دخل الشتا و كانت شمس الشتا هى اجمل هدية ممكن تاخدها فى يوم بارد
و فى يوم بالرد بر ضه لقيت اعلان عن مكتب مش فاكر اسمة ايه عنوانه فى شارع شمس الدين الذهبى خلف سنترال الماظة
المهم رحت هناك و قابلنى سعادة المستشار المحامى
ايه ده
الراجل من هيبته و طلعته كدا تحس انه مفتى الديار الكندية و علية شنب الاهى ما يعدمة ابدا
و ندة على جون
انا قولت الاخ جون دا ممكن يكون مساعد وزير الهجره الكندى و ها يوصيه على
و طلع جون ده واحد سودانى من السودانيين بتوع الجنوب اللى لاجئين فى مصر و بيعمل الشاى و القهوه
و طبعا عزم على و انا اعتذرت فى خجل
المهم الراجل بصراحة قالى سيبك من الوهام بتاع المكاتب التانية دة و انا مش هاضحك عليك
انا كل وظيفتى انى اساعدك و بس
ما عنديش واسطة تخلى ملفك فى السفارة اول واحد ولا هاشيلك هيلا بيلا اوديك كندا مغلف بالسيلوفان
ولا هاشغلك عند ابن عمتى اللى فاتح شركة كبيره هناك ولا نسيبى هايقابلك فى مطار اوتاوا و بينطاء كوره و بيقول اخمد اخمد
الراجل قالى انا دورى فقط استشارى مساعد و هاخد بالصلاه على النبى 5000 دولار
و جال نظرى فى المكان باحثاً عن مخرج آخر للمكتب غير اللى دخلت منه علشان اقلب المكتب على نافوخه أو البسة الترابيزة اللى قدامى فى دماغة و اجرى من المخرج التانى بس للاسف ما لقيتش فكنت مضطر انى استحمل كلامة الفكيس حت نهايتة و استأذنته و انصرفت فى أدب و انا عاقد العزم على الذهاب الى المكتب الأول فى مساكن الشيراتون

 

 

[فدائى النبى]

و فى هذة الأثناء كنت بقراء عن الأسطى وهيب يوسف كل يوم جمعة فى الأهرام بس شىء إلاهى منعنى انى اروحلة بعد ما كان عندى قناعة انهم كلهم نصابين و مالهمش لازمة الا الراجل الأول الطيب بتاع ربنا اللى بيضحك على طول و ما تطلعش منه العيبة سعادة المستشار المحامى فريد عواد و اخته ذات القوام الرشيق
و لكن فى هذة الأثناء جائنى اتصالان هاتفيان من مكتب برزى و مكتب الموارد العالمية
الاثنين بيقولوا ان عندهم عروض جديدة هاتفيدنى و يا ريت لو اشرفهم بالزيارة علشان اشوف الجديد اللى عندهم
رحت للست اللى بلغت من العمر أرذلة و قابلتها و لقيتها بتقولى انها عاملة عرض جديد و هوه انها تكون مستشارة تليفونية لى - و مش عارف ايه الجديد لأن الموضوع ده كان موجود من الأول- لكن فاجئتنى بالجديد و هوه ان اتعابها 1000 دولار هاتقسمهم على نصين
هييييييييييييييييييه كنت متفاجىء جدا لدرجة انى استاذنت بعد ما خلصت كلامها مباشرة بدون ما اقولها حتى هافكر فى العرض الفظيع بتاعك
اما الاتصال الثانى كان من مكتب برزى و انا كنت نسيت قلة الذوق و الأدب اللى لقيتها عندهم لكن اتصاله فكرنى و الدم غلى فى عروقى و قلت مش رايح و بعدين قلت ايه المشكلة روح و استغل اول فرصه أهزاه فيها و امسح بيه الأرض و رحت قابلت الاستاذ برزى بذات نفسيتة و كان فى عينية نظرة مريبة غريبة ما شفتهاش من ايام الموحوم محموء المليجى
و قالى ان السفارة الكندية اتصلت بيه سخصياً و قالت ليهم بشكل صريح ان ما فيش حد هايسافر كندا الا اذا كان معاه عرض عمل و اى حد مش معاه عرض عمل هايروح النار و هانتف عليه كلنا
و خدوا بالكو من موضوع عرض عمل مش عقد عمل
و سألت الأخ المستشار هوه ايه الفرق بين عرض العمل و عقد العمل
اعتدل فى جلستة و حسيت انه فهم انه كسب الجولة و انه يكفيه التعادل فى الجولة الجاية علشان يفوز بالمبارة كلها
قالى عرض العمل ده عبارة عن عقد عمل مزيف هانقدمة للسفارة بدون ادنى مسؤلية على الشركة اللى هاتقدم عرض العمل ولا مسؤلية عليهم همه كمان
و قولتله الموضوع دا يفيد فى ايه
قالى هاتستنى 6 سنين لو مش معاك عرض العمل و لو معاك الموضوع هاياخد 6 شهور
قولتلة و الموضوه دا هايتكلف كام غير ال3000 دولار اللى هاتاخدهم سعادتك
اعتدل اكثر فى جلستة و قال لى ان الموضوع هايتكلف حوالى 62000 جنية مصرى فقط لا غير
طبعا استأذنت و انا دماغى بتلف من المبلغ و كمان من كلامة و زعلت قوى انى ما اتلككتش و شتمته
و عقدت العزم انى بمجرد ما تطلع نتيجة الإرجاء من الجيش و أخد تاجيل هاروح للمكتب بتاع الراجل الطيب اللى بيضحك على طول و ما بتطلعش منه العيبة فى مساكن شيراتون و استفسر منه على كل حاجة و نبداء الرحلة الى جبال روكى

 

 

[نهر النيل]

منتظرين باقي التجربة

بالتوفيق

 

 

[فدائى النبى]

معلش انا آسف بس كانت استراحة للغدا و صلاة العصر
المهم
طلعت نتيجة الإرجاء للجيش و الحمد لله لقيت نفسى لابس ظابط احتياط
طبعا ضربة فى الصميم و لكن الفضل لله وحدة قدرت انزلها من ظابط لعسكرى و دخلت مركز تدريب مشاة 2 بالمعادى
او كما يطلق عليه مركز التدريب الراقى
و بعد ما خلصت مركز التدريب اخدت بعضى و رحت للمكتب بتاع الراجل الطيب اللى بيضحك على طول و ما بتطلعش منه العيبه ابدا
رحت و مالقيتش الراجل موجود و لقيت اخته ذات القوام الرشيق موجودة
طبعا انا ما اشد المعجبين بالرجيم بتاعها و محافظتها على قوامها و انها نزلت من حدود ال500 كيلوا الى 350 كيلو جرام
المهم انا قولتلها يا مودام سالى دقت ساعة العمل و لازم نبداء حالا
قالت لى و مالة بس فيه مشكلة ان خبرتك ما كملتش 4 سنين
طيب ما تخلى خطيبتك هيه اللى تقدم و هانقدم فيدرال و ان شاء الله هاتكون مدة الانتظار سنتين و نص
سنه من تاريخ تقديم الsimplified application
و بعد سنه هاتقدم الملف كامل و بعد سنه و نص هاتاخد الفيزا
طيب يا ستنا ايه المطلوب قالت ولا حاجة بس مصاريف الالبيكيشن و 750 دولار نص اتعاب المكتب اللى احتنا اتفقنا عليهم
طبعا زى الدهل دفعنا الفلوس و قالت ان شاء الله هانتصل بيكوا قبل اقرب معاد من تقديم الملف الكامل علشان تقولكوا تمتحنوا ال tef و هانفكركوا بمعاد الامتحان و لو حابب اصحيك الصبح هاصحيك
انا بصراحة الدمعة فرت من عينى لما لقيت حنان الأم من الست دى و قولتلها سلميلى على الاستاذ الطيب بتاع ربنا اللى بيضحك و ما تطلعش منه العيبة قالتلى يوصل
و كتبت عقد من 8 صفحات و ختمته و ادتنى وصل بالفلوس
و مشيت و انا اتنفس الصعداء و أحمد الله على انو وقعنى فى ناس ولاد حلال زى دول
و هنا لازم انوه ان تاريخ تقديم الابليكيشن الفيدرال و توقيع العقد كان بعد 28 نوفمير و صدور الليستة المشؤمة
و قضيت جيشى فى الهيئة الهندسية للقوات المسلحة و اللى كنت خايف منه و قرفان منه ما كانش احسن منه
و عسى ان تكرهوا شيئا و هو خير لكم
و كانت سنه فارقه فى حياتى اللى قضيتها فى الجيش و اتعلمت فيها هندسة صح على ايدين مهندسين صح و اللى اهم من كدا قابلت ناس من كل مصر من كل المستويات و الثقافات و كانى دخلت كل بيت فى مصر و شفت ال80 مليون واحد واحد
المهم كان المفترض ان المدام سالى ذات القوام الرشيق تتصل بى قرب آخر جيشى علشان تفكرنى بمعاد الامتحان علشان تقديم الملف الكامل لكنها ما اتصلتش
اتصلت انا بيها ما ردتش
قلت جايز تكون تعبانه او مسافرة او مشغولة او عندها اى شىء فى الدنيا يمنعها من انها ترد على التليفونات
و بعد شويه ايام كررت المحاولة و ما ردتش و استغربت بس كنت متأكد ان عندها عذر قهرى مانعها من الرد
المهم بعد محاولات مضنية و اتصالات مستمرة ردت على و قالت لى نعم عاوز ايه
قولتلها احنا مش المفروض ان دا معاد تجهيز الملف الكامل و تقديمة للسفارة
قالتلى و مين قالك ان فيه بينا بزنس اساساً
قولتلها نعم يا روح ............ قالت لى هوه ده اللى عندى و لما هاعوزك هاطلبك مع السلامة
المهم بعد محاولات اتصال من تليفونات غريبة علشان ترد المهم ردت الهانم و قولتلها انا عاوز اقابلك ووافقت على مضض
و رحت فى المعاد و كنت لابس ميرى و حاطط بلاسيهات بتاعة نقيب
طبعا كانت مغامرة ممكن اروح ورا الشمس لو حد من الشرطة العسكرية او دروية انضباطية وقفتنى و سالت على كارنيهى و هاتلاقينى جندى و لابس نقيب و سألتنى هوه انته مش مهندس رديت عليها و قولتلها ظابط مهندس قالت لى بس انته جيت لى و انته فى الكلية قولتلها انا دخلت اكادمية بعد الكلية و بقيت ظابط مهندس
الشاهد انها شافت النجوم على كتفى جابت لورا و قالت الطيب احسن و خصوصا لما لمحتلها انى حاليا فى المخابرات العسكرية و انا فى الحقيقة كنت باخد فرقة هناك مش اكتر
المهم الهانم ساعتها عرفتنى ان فيه قانون جديد و لسيتة وظائف مطلوبة و انى انا خارج ليستة الوظائف
طبعا انا كنت بدأت ادور على النت و اعرف كل اللى هيه قالته و كانت الحقيقة المرة اللى اكتشفتها ان المحامى مالوش اى قيمة فى مسار طلب الهجره و اكتشفت الشىء المتوقع انى انا و مراتى اللى كانت فى الوقت دا خطيبتى مش فى ليستة ال38
و لقيت تحت الليستة الاستثناءات الاربعه اللى مسموح ليهم بالهجرة الى كندا
المهم قطعت كلامها الصفيق عن الليستة و انى لازم استنى لحد السفارة ما تشوف و سالتها سؤال محدد
لما انتى عارفة كل الكلام ده كنت بتمضى معايا عقد ليه تاخدى فلوسى و انتى عارفه انى مرفوض
قالتلى انها كانت مستنية تعديل الحكومة و كانت متوقعه ان القانون يتلغى
طبعا الكلام ده تقولة فى العاشرة مساءاً مش معايا
المهم قولتلها انا عاوز اغير مسارى لكيبيك طبقا للموجود على موقع وزارة الهجرة الكندية
قالت لى الكلمة اللى كنت مستنيها
قالت لى انا ما بشتغلش هجره لكيبيك
عاوز تروح كيبيك شوفلك مكتب تانى بيشتغل لكيبيك
قولتلها نعم يا روح ...... دا انا اوديكى ورا الشمس و اسيبك فى البرد هناك لحد ما تنشفى
طبعا انا شخصيا م اعرفش اوتوبيس كام اللى بيروح ورا الشمس و لكن كان الكلام ده على سبيل التهديد
قالت لى انا ما بتهددش و انا معايا جنسية كندية و ممكن اخلى السفارة تبهدلك
قولتلها الكلام ده عند ام تيتى انا ممكن انزع منك اعترافات انك كنتى عاوزه تاخدى منى معلومات عسكرية و اقدمها للمجموعة 75- اللى هيه المخابرات العسكرية- و ساعتها انا هابقى بطل و انتى ما حدش هايصدقك و خلى مستر كندا ينفعك
المهم قولتلها هاتى اللى انتى اخدتية و نبقى خالصين و ربنا يعوض على فى السنة اللى ضاعت
قالت لى ما لكش حاجه عندى و انته اخدت بفلوسك خدمات
طبعا انا ما رضيتش انى اصعد الموقف اكتر من كدا لأنى زى ما قلت كنت لابس نقيب و انا اصلا مجند
المهم مشيت و رجعت المنصورة فى اجازة و استعملت بعض علاقات مع اشخاص تافهين اعرفهم
المهم من هنا لهنا قدرت اوصل ان فية ظابط فى امن الدوله كلمها فى التليفون و قالها الطيب احسن بدل ما تخشى السجن الحربى و مش هاتشمى ريحة الشارع تانى و قالها كمان ان موضوع التحريات و التسجيلات ممكن تتعمل فى ساعة زمن و انهم بيتعاونوا مع المخابرات الحربية لو الموضوع جاسوسية زى حضرتها و ان احسن ليها تصفى مشاكلها مع سعادة النقيب اللى هوه انا بهدوء و راحة
طبعا الراجل ما عملش كدا علشان خاطر عيونى و انما هوه قالى الحاج و كل قرايب الحاج عليهم ياشروا بس
طبعا الحاج دا خالى و هوه عضى مجلس نيابى كبير عن الحزب الوطنى و هذوكا الظابط كان يتملحسلى
شكرا لجهاز امن الدولة و كل الظباط اللى بايعين القضية
المهم لقيتها بتتصل بى ما ردتش
فضلت شويه كدا و بعدين رديت قالت لى انها عاوزه تقابلنى قلتلها تعالى فى المجموعة 75 و مقرها فى الحته الفلانيه
طبعا كنت حاطط ايدى على قلبى انها توافق لأنى انا اصلا مش فى المجموعة 75 انا فى الهيئة الهندسية
بس الحمد لله قالت لى بلاش فى الجيش و خلينا ملكى احسن
رحت قابلتها فى سيتى ستارز قالت لى ان الفلوس دى مش ليها و بس دى بتدفع منها ضرايب و ايجارات و مرتبات و انها ما هاتقدر ترجع المبلغ كله
المهم رجعت حوالى نصة
انا قلت خلاص و ما حدش بيتعلم ببلاش
و بعد شوية لقيت ايميل جالى من السفارة الكندية

 

 

[فدائى النبى]

طبعا ايميل كا بيبشرنى انو تم رفضى طبقاً للقانون الجديد و انهم هايرجعوا لى الفلوس ان شاء الله قريب
طبعا انا ما كنتش مستنى الايميل ده و كنت فعلا بداء اشتغل على كيبيك من واقع موقع الهجرة الرسمى لكيبيك
و جه الايميل ده قلت كويس ان المصاريف اللى اندفعت هاترجع تانى
حاليا انا فى بلاد الحرمين فى انتظار رد سفارة كيبيك فى سوريا و ايا كان الرد بتاعهم انا هاكون سعيد انى عملت دا بدون محامى و انا اكثر سعادة انى لقيت ناس بتساعد بعضها و بتدى خبرة لبعض لله فقط و مافيش اى اغراض من وراها
و بعيدا عن الكلام العاطفى انا لو كنت مشيت لوحدى بناء على اللى فهمته من موقع الهجرة لكيبيك كنت وقعت فى مشاكل كتيره لولا فضل ربنا انو ارشدنى للمنتدى ده اللى استفدت منه كتيييييييييييييييير جدا و ما حدش بخل على بالمعلومة
شكرا لكل اساتذتى و يا رب يكون التوفيق من نصيب كل طالب للخير من هجرتة