ثقافة "شوبير"!

[أحمد فاروق]

الصحف المصرية والعربية

أنا مش عارف الموضوع ده جينات الناس بتتولد بيها، واللا مكتسب من البيئة والتربية، واللا الاتنين مع بعض، واللا الموضوع مش موجود أصلا وأنا بيتهيألي، واللا ايه؟

فيه ناس المبادئ في دمها من يوم ما تتولد، عايزين الحق هو اللي يسود، والصح هو اللي يمشي، بيكرهوا الظلم والغلط. دي صفاتهم اللي بيفتحوا عينيهم على المجتمع وهي عندهم، مهما كان المجتمع ده ملخبط. يعني مهما كان فيه ظلم وقهر وأخطاء، بيبقوا شايفين الحق والصح فين، وكمان مابيساوموش عليه بأي تمن. يعني مابيساوموش على المبادئ.

فيه ناس تانية بتفتح عينيها على المجتمع بتلاقيه بأوضاع معينة. تلقائيًا يتكيفوا مع الأوضاع الموجودة بشكل يحقق ليهم أكبر مكاسب. وكأن مبادئ الحق والصح غير موجودة خالص. أو إنه شايف "المبادئ" نسبية ومتغيرة مش مطلقة وثابتة. يعني ممكن يكون شايف النفاق والكذب والغش والظلم وازدواجية المعايير ... الخ، كلها أمور عادية جدًا وغير خاطئة، وربما مبادئ هدفها تحقيق مصلحته، وإن كل الناس كده، وإنه كل واحد هو وشطارته.

اللي خلاني أكتب الكلام ده إني شفت شوبير على التليفزيون بيقول: "عايزين يعزلوا النائب العام، انت مين انت عشان تطالب بعزل النائب العام؟ مين انت؟". الثقافة دي أصابتني بالاشمئزاز والغثيان الشديدين، وعارف كويس إنها موجودة ومنتشرة. ثقافة سطحية تقدس أصحاب السلطة. النائب العام بالنسبة لشوبير صنم كبير، وهو اتعود على حماية الأصنام لأن في حمياتهم مصالح ليه. شايف إن واحد من الرعاع الدهماء ماينفعش يطالب بعزل النائب العام، لأنه ده النااااااااائب العاااااااااااااام، الراجل الكبير أوي في البلد، ازاي ممكن حد يفكر في عزله؟ شوبير اتعود إنه فيه سلطة، هي اللي تحكم طول الوقت، أوامرها مطاعة، لها كل الاحترام وربما التقديس. وفيه ملايين محكومة، عليها الطاعة، مالهاش أي صوت. الرد على أصحاب الثقافة دي إن اللي يطالب بعزل النائب العام - ولو مصري واحد - فهو بيعبر عن إرادته في تسيير أمور بلده، بلده هو مش بلد حد تاني. فهو حتى لو كان صوت واحد، فمن حقه يطلب اللي عايزه، لأنها ببساطة بلده. من حقه يطالب السلطة اللي وكلها في إدارة بلده بتنفيذ مطالبه اللي شايفها. المواطنين العاديين مش رعاع ولا دهماء ولا مجرد محكومين، دول يا شوبير أصحاب البلد، دول ملاك البلد. إرادة أصحاب البلد في إدارة بلدهم لازم تتنفذ مهما كانت، لأن من حكم في ماله فما ظلم. ولو القانون الحالي - اللي وضعه المصريين ممثلين في نواب البرلمان - بيمنع إقالة النائب العام، يبقى يتحمل نواب البرلمان مسئولية تمثيل الشعب ويعدلوا القانون لإنفاذ إرادة الشعب.

في محاولة لتسجيل اسمه في الباب اللي يستحقه في التاريخ، سميتها ثقافة "شوبير".

ثقافة "شوبير" من ألد أعداء الثورة.

 

[aymanology]

راي محترم جدا

 

 

[أحمد فاروق]

يا باشا ربنا يجبر بخاطرك