لا ناقة لى ولا جمل .. لكنه وزير مستفز لأقصى حد

[بندق]

العام الدراسى فى الثانوية الانجليزية IGSCE كان عام طويل جدا على الطلبة وأهاليهم .. قرار وزارة التعليم العالى يسمح بدخول الطلبة للجامعة اذا أكملو المواد الدراسية بعد الصف الحادى عشر .. وبناء عليه اجتهد الطلاب فى تحصيل المواد واتهرى اهاليهم فى الدروس الخصوصية للتحصيل ورسوم الامتحانات .. طبعا كل طالب ضغط السنوات الثلاث فى سنتين خصوصا انه فيه سنة الجاب فى الثانوية (بتاعت خامسة ابتدائى و سادسة الشهيرة)


فجأة وبدون مقدمات وأثناء انعقاد الامتحانات .. الأخ طلع علينا بقرار يلغى النظام السابق ..

طبعا استاء أهالى الطلاب وتساءلو لماذا لم يتم هذا من بداية العام أو من بداية السنة العاشرة؟


تكلمت والدة احدى الطلاب مع برنامد 90 دقيقة تشكو وتتساءل لماذا؟
هى شكوى جماعية بلا شك .. جابلوها الوزير على التليفون .. الوزير المستفز (الذى اجمع الجميع على انه مكانه ليس وزارة التعليم العالى) لكن الحكومة متخصصة فى تعذيب الشعب بكل ما هو ممكن أو السياسة العامة أنه كلما كثر اللغط حول وزير كلما كان عمره فى الوزارة أطول ..


المهم الأخ وزير التعليم يقول انه طالما معاكم فلوس ودو ولادكم تدرس برة .. برة مصر يعنى .. الأخ مش عاجبه ان يعمل المصريين فى الخارج ويريد كل واحد يعلم ولاده على مزاج سعادته حتى يستفيد من كونه مواطن مصرى .. الأخ وزير التعليم استفز المرأة لأقصى حد .. وما لا يعرفه هذا الوزير .. أنه السيدة التى كانت تتحدث معه والتى قالت له حرفيا لو وجدت فى بلدى فرصة للعيش ما خرجت .. هى أرملة تعيل ثلاثة أطفال وتعمل فى مدرسة انترناشيونال والمدرسة تعاطفت معها لدى وفاة زوجها وقدمت لها عرض العمل ومجانية الدراسة لأولادها ..


سيدى الوزير .. ربنا يجعلك نصيبك فى دعوة من دعوات هؤلاء الأيام .. وأشوفك يا رب عبرة لكل وزير سابق

 

[زعلان]

طيب هو ال KG يحتسب من ضمن الدراسة ولا ده زي ما بيسموه ما قبل المدرسة

 

 

[بندق]

اقتباس المشاركة الأصلية كتبت بواسطة زعلان طيب هو ال KG يحتسب من ضمن الدراسة ولا ده زي ما بيسموه ما قبل المدرسة

لا يا هندزة مش من ضمن .. 12 سنة تبدأ من جريد (وخوص) وان

 

 

[dr-amira]

اهى الديكتاتورية و العشوائية ديه فى اتخاذ القرارات اللى مخوفانى احول بنتى للتعليم الانترناشونال ...شوية نسمع انهم هيتحرموا من جنة الجامعات الحكومية لان معاهم فلوس
وشوية هيقلل نسبة قبولهم ....ربنا معانا

 

 

[Farida]

هو ده بنى ادم ...زفى كل السنوات السايقه كان بيتم تقديم ورقه بالعربى فى امتحانات الرساضيات و العلوم لمدارس اللغات بجانب الورقه اللى باللغه الأنجليزيه و كانوا الطلاب بيلجأوا لها احيانا لو استعصى عليهم فهم كلمه بالأنجليزى و كمان كانوا احيانا لما تعصلج معاهم مسأله يكتشفوا انها مكتوبه بالعربى غير بالأنجليزى و ساعتها بيبان الفرق ..........الوزير بنفس المنطق لغى موضوع ورقه الأسئله بالعربى دى باعتبار انهم بيتعلموا لغات يبقى مالوش لازمه العربى مع ان فى كل سنه بتظهر مشاكل فى الأسئله بالأنجليزى من الممتحنين انفسهم

 

 

[زعلان]

طيب ممكن سؤال هل الاولاد (البنات و الصبيان) الي بيدرسوا في مصر في مدارس اجنبية بيعرفوا يقروا و يكتبوا عربي كويس بطلاقة يعني زينا ولا زي الي عايشين بره مصر العربي عندهم لو كان موجود يبقى سيء جدا