من اقوال المواتنين الشرفاء و الرد عليها

[Farida]

الصحف المصرية والعربية

المواتنين الشرفاء دول اللى هم اهالينا و قرايبنا و جيراننا و اللى بيعتمد عليهم المجلس العسكرى و دايما بيوجه لهم النداءات واحد ورا التانى علشان هم اللى يتصدوا للثوار و كتير منهم بيروحوا العباسيه و كتير منهم بيتفرجوا على شوبير و مدحت شلبى و توفيق عكاشه ......و كتير منهم برضه مش بيقرأ غير الأهرام و الجمهوريه و المسا و بيكرهوا يسرى فوده عما و لما يشوفوا قناة الجزيره يقلبوها على طول و اللى راحوا انتخبوا الأخوان و السلفيين مش عن اقتناع و لكن لما لقوهم بيهاجموا الميدان و الثوار .......
هنا بنجمع اقوالهم اولا علشان نعرف ان همنا واحد لما نقابلهم و نتونس باراء بعض لما نرد عليهم و كمان علشان اكتشفت انهم مش بيجوا بالهجوم و لكن بيجوا بالهداوة و رمى المعلومة من بعيد لبعيد ........
ها استعنا على الشقا بالله

 

[Farida]

- الثوار دول اللى خربوا البلد
(هم الثوار اللى حكموا ولا بيحكموا البلد)
- هم العيال دول عايزين ايه
(نفس الفكرة بتاعه شباب 25 الطاهر اللى اختفى و نزل مكانه العيال و الصيع .....طيب الشيخ عماد عفت من العيال الصيع )
- مش انتوا اللى جبتوا عصام شرف دلوقتى بقه كخه
(الميدان رشح اكتر من شخصيه و المجلس اللى اختار عصام شرف و بعدين ماهو زى ماالثوار جابوه هم اللى مشوه )
- مش نستنى على الجنزورى الراجل مالحقش يعمل حاجه
(واحد عنده 79 سنه و كان عامل زى الست المستحيه قاعد فى بيتهم ماستجراش يفتح بقه و لو شوفتوا استقالته اللى نشرها ابراهيم عيسى تعرفوا ان الرجل ده مش حايهبب اى حاجه )
- مباريك لوكان عايز يهرب كان هرب مش الثوار اللى مشوه لأ هو سلم الحكم بمزاجه
(لأ يا فالح هو اجبر على الخلع بسبب ضغط الثورة و الثوار و لو كان بمزاجه ماكناش شوفناه بيلعب فى مناخيره فى الزنزانه )

 

 

[إكرام يوسف]

تسلم ايدك يا دكتورة على الردود اللي ما فيش حد عنده دماغ ممكن يقاوح فيها

اقتباس المشاركة الأصلية كتبت بواسطة Farida - - مباريك لوكان عايز يهرب كان هرب مش الثوار اللى مشوه لأ هو سلم الحكم بمزاجه

هنا بقى دول نقطتين:1_ مبارك لو كان عايز يهرب كان هرب:
طبعا ما كانش عايز يهرب لأنه ما يقدرش..القانون الدولي أضيفت له مادة تنص على إمكانية محاسبة أي طاغية بتهمة ارتكاب جرائم ضد الإنسانية في أي بلد موقع على هذه المادة.. والعالم كله موقع عليها ماعدا كوريا الشمالي.. وأظن الصين كمان.. يعني ما كانش يقدر يروح غيركوريا الشمالية لو عايز يهر ب لأن أي بلد حيروحها.. من حق أي شاب ناشط يجرجره من قفاه على المحكمة بتهمة ارتكاب جرائم ضد الإنسانية وكان كفاية عليه يجيب صورة الشباب اللي بتدهسه العربيات أو صورة القناصة وهمه بيضربوا رصاص حي على الميدانوحتى لو فكر يروح كوريا الشمالية ـ ده بافتراض انه حيقبلوه هناك ـ كان ممكن يتعكش في أي مطار ينزل فيه ترانزيت.. يعني ما كانش فيه مفر غير إنه يروح السعودية أو أي دولة خليجية من اللي مافيش مواطن فيها يقدر يرفع دعوى ضد ضيف الملك أو الأمير.. لكن السعودية ماعرضتش عشان كانت لسة مبتلاة بشين الهاربين بن علي..وأول ماراح جدة قامت السيول.. والشعب اعتبره شؤم عليهم..وطبعا السعودية مش ناقصة واغش.. وخصوصا ان فيه حالة حراك سياسي هناك والناس مش ناقصة.. مافضلش غير الإمارات هي اللي عرضت عليه .. لكن هو حس انه حيكون في أمان وسط الجنرالات اللي شاري ولااءهم ببدلات الولاء اللي عملوا منها ثروات..
خصوصا انهم عملوا محاولة جس نبض لما قالوا حيروح يتعالج في ألمانيا.. راح حزب الخضر الألماني أصدر بيان أنه حيطالب بمحاكمته بمجرد ما يحط رجليه في ألمانيا.. فرجعوا لحسوا كلامهم وقالوا انه مش محتاج يتعالج في ألمانيا.
يعني مجبر أخاك لا بطل.. اضطر يقعد في شرك الشيخ مع وعد بحمايته لغاية ما تهبل وأذاع البيان اللي أّاعه في قناة العربية من ورا الجيش، فالجنرالات حسوا انه بيلعب من وراهم فحبوا يقرصوا ودنه.. بس خلاص

2- هو اللي سلم الحكم بمزاجه:

ـ مافيش عيل صغير يصدق الحكاية دي.. الثورة خلت العالم كله يعرف ان الراجل ده مالوش قعاد فيها..والراجل لغاية ليلتها بالليل كان بيقول سأظل..همه الجماعة الجنرالات لقوه مصر يستعبط عشان يسيبها للمحروس.. وطبعا ده كان على جثتهم.. وماصدقوا الثورة قامت عشان يخلصوا منه من غير مايزفروا ايديهم..وخصوصا ان المحروس بعت يطلب من التليفزيون إذاعة أمر بإقالة طنطاوي.. واللي بوظ الطبخة المناوي عشان كده العسكر شايلهاله جميلة

 

 

[أحمد فاروق]

اقتباس المشاركة الأصلية كتبت بواسطة إكرام يوسف هنا بقى دول نقطتين:1_ مبارك لو كان عايز يهرب كان هرب:

تمام كلامك يا أستاذة.
بس غير كده، وبعيدًا عن الرد على "المواطنين الشرفاء"، وبالنسبة للكلام مع "الثوار العملاء" ...
مبارك يستحيل يفضل في مصر إلا لو كان المجلس العسكري إداه الأمان. ففيه اتفاق بين مبارك والمجلس العسكري إنه يفضل في مصر بأمان. لما يسقط حكم العسكر، مبارك والمجلس العسكري هيهربوا برة مصر فورًا. ودي هتكون علامة نجاح الثورة.