Arabic Discussion Forum with a Special Interest in Travel and Immigration

youfes · 21st September 2014, 10:27 PM

بناء على طلب من الزميل العزيز أحمد أمين [ahmed.amin] .. الموضوع دا بخصوص شهادات الخيرة المطلوبة للتقديم للهجرة لكندا ( الفيدرال تحديدا ) خصوصا تلك المطلوبة ممن يعملون بوظائف حكومية فى مصر .. الموضوع طبعا اتشرح أكتر من مرة خصوصا من جانب الأستاذ الفاضل أبو حماد [abo_hammad] و أستاذ أبو بكر و غيرهم الكثير بس احنا هنا بنحاول نجمع التجارب فى مكان واحد للتسهيل .. طبعا انتوا عارفين تقريبا شهادة الخبرة هى من أهم أسباب قبول الملف من عدمه بالنظر الى إن باقى الحاجات بتكون واضحة ازاى بتتعمل .. و أكبر مشكلة بتواجه اللى بيحاولوا يطلعوا شهادة الخبرة من الدوائر الحكومية فى مصر البيروقراطية المعتادة و انهم ميقدروش يطلعوا شهادة الخبرة بالشكل اللى انت عايزه .. احنا هنا عايزين نسمع من الزملاء الافاضل اللى عملوا شهادات الخبرة خصوصا الحكومية طلعوها ازاى ... ازاى استوفوا الشروط الأربعة .. المدة ، المرتب ، عدد ساعات العمل الاسبوعية و الأهم و هى المهام الوظيفية ...
مستنيين تجاربكم تسهيلا للى لسه بيحاولوا يعملوها ...
بالتوفيق

youfes · 21st September 2014, 10:34 PM

و دى مشاركة سابقة ومهمة للأستاذ الفاضل أبو حماد

اقتباس

المشاركة الأصلية كتبت بواسطة abo_hammad


	الحمد لله و الصلاة و السلام على رسول الله -صل الله عليه و سلم- إخوانى و أخواتى المطاريد بناء على طلب الاخ محمد بدوى انا قلت انى اختصر الخطوات الرئيسية للتقديم لكندا نظام العمالة الماهرة فيدرال. هنبدأ بالتأهيل ,يعنى نعرف منين اننا مؤهلين للتقديم, فيه عوامل رئيسية للتقديم و هى: A- نعرف نجيب شهادة خبرة بسنة على الاقل فى مهنة من الليستة بمواصفات هنتكلم عليها بعدين. B- اننا نقدر نحصل على درجة 6 فى كل فرع من فروع الايلتس الاربعة. C- نقوم بتقييم شهادات البكالوريوس و لو فيه ماجيستير يبقى هيتقييم مع البكالوريوس لانه هيزود النقط و التقييم بيتم فى احد المؤسسات المعتمدة فى كندا و اشهرها و اسرعها WES للمهن غير الطبية و المهن الطبية لها مؤسسة لوحدها. D- كل ما فات له عدد نقاط معينة, و المطلوب هو الحصول على الرقم السحرى 67 , و نبدأ بتجميع النقاط: 1- لو عرفنا نجيب شهادات خبرة بالمواصفات الملطوبة لمدة 6 سنين يبقى هنحصل على سكور كامل و هو 15 نقطة. توضيح: ليس شرطا ان تكون سنوات الخبرة كلها فى نفس مجال المهنة الموجودة فى الليستة و اللى هنقدم عليها, مثلا: لو مطلوب فى الليستة مهندسين برمجيات, و انت قدرت تجيب شهادة بيها لمدة سنة واحدة و جيبت شهادة انك اشتغلت فى الـ IT مثلا لمدة خمس سنين, و دى مش فى الليستة, الضابط هيحسب لك الست سنين كاملين ان شاء الله. و كمان مش شرط ان وظيفة التقديم تكون هى اخر وظيفة اشتغلتها, يعنى ينفع تقدم على شغلانة اشتغلتها فى 2008 و سيبتها من ساعتها, مفيش مشاكل لانهم عايزينها تكون فى اخر عشر سنين. و دلوقتى نتكلم فى مواصفات شهادة الخبرة: لازم شهادة الخبرة تتكتب على ورقة الشركة اللى عليها اللوجو بتاع الشركة و العناوين و ارقام التليفونات و الفاكس و الايمال و الموقع بتوع الشركة, و حكاية الموقع دى مش مهمة جدا,لان 90% من الشركات ملهاش مواقع,فامحدش يقلق. و لازم الشهادة تتضمن الاتى: المسمي الوظيفي- و ده لازم يتطابق مع التيايتل الرئيسي او احد التايتلات الموجودة فى النوك غير كده مش هينفع- و المدة اللى اشتغلتها بالتواريخ و القبض بتاعك و عدد ساعات العمل بالاسبوع و المهام الوظيفية و كمان تتمضى و تتختم. و لازم نعرف ازاى نكتب المهام الوظيفية بتاعتنا, محدش يدخل على السايت و ينقل منه لان ده هيسبب الرفض للملف, و لا ننقل بتصرف, يعنى نغير الالفاظ و الترتيب, ده ايضا هيخلى الضابط يشك انك ناقل, طب نعمل ايه ؟ احنا لو كتبنا المهام الحقيقية بتاعتنا هنلاقى منهم على الاقل 3 او 4 مهام فى السايت اصلا و اللى مش عارف يكتبهم,يبقى يقرأ المهام الموجودة على السايت و يكتبهم بطريقة مختلفة و يزود شوية تفاصيل و هضرب مثل عشان الكلام يوضح. لو الموقع قال ان من مهام المبرمج مثلا انه ياخد طلبات العميل, احنا نكتبها مثلا كالاتى: جمع طلبات العميل الوظيفية و غير الوظيفية و توثيقها. و لو قال مثلا: ان المبرمج يقوم باختبار الاكواد و البرامج. احنا نكتبها, اختبار الاكواد باستخدام طريقة svt و هكذا. طب و اللى الـ HR عنده مرخمة و مش هتكتب له الشهادة بالطريقة دى و هينقص حاجة او اتنين يعمل ايه؟ لو القبض مش هيتكتب يبقى نترجم العقد و نبعته و نكتب خطاب توضيح للاوفيسر بان الـ HR مش عايزين يكتبوا لى القبض و انا ترجمت العقد لان القبض مثبوت فيه. طب ناقص المهام او عدد ساعات العمل, يبقى الحل ان السوبر فايزور بتاعك او المدير المباشر يكتب خطاب توصية على ورقة الشركة و يذكر فيه كل المعلومات الناقصة و يمضى و لو عرفت تختمها يبقى خير و بركة و تبعت الكارت بتاعه. اظن انى كده خلصت كل حاجة تخص شهادة الخبرة, المداخلة الجاية هتبقى عن تقييم شهادات الدراسة, انتظرونى

ahmed.amin · 21st September 2014, 11:37 PM

شكرا يا يوسف على الموضوع
مخلص الوضع بتاعى
شهاده الكليه بتاعتى بكالوريوس طب و حاليا شغال طبيب اشعه فى مستشفى حكومى الصبح و مركز اشعه بالليل
لو انا هأقدم على نوك الاطباء يبقى لازم اعادل الشهاده من MCC
لو انا هأقدم على اى نوك تانى يبقى ممكن اعادل الشهاده من WES

عندى مشكلتين

المشكله الاولى ( ملف قوى بس ارساله هيكون متأخر )
انى لو هأقدم على نوك الاطباء لازم أعادل الشهاده من وده بياخد حوالى 3 - 4 شهور وانا لسه باعت ليهم من حوالى 3 ايام ( يا رب تخلص قبل ديسمبر علشان ما ادخلش ف النظام الجديد ) و مع ان ديسمبر ده متأخر جدا يعنى ممكن يكون ال cap وصل للنهايه
علشان كده بأحاول من دلوقتى أجهز كل الورق المطلوب بالأخص شهاده الخبره لأنها أكيد اصعب نقطه علشان التعامل الحكومى عشان كده محتاج مساعده ف الشهاده لأى حد كان شغال ف الحكومه.

المشكله التانيه
علشان الملف البطئ و التعامل الحكومى الصعب فكرت انى أعمل ملف بديل ( هيكلفنى حوالى 10 الاف جنيه زياده علشان : تقييم ال WES ومصاريف ملف احتياطى ) علشان كده عاوز اعمل خطوات شهاده الخبره صح على قد ما اقدر لأن لو MCC مخلصش الورق على اول ديسمبر هأضطر ابعت الملف الاحتياطى بتقييم ال WES مع التقديم على نوك تانى (اخصائى سونار)
انا بشتغل فى مركز الآشعه بالليل بس بدون عقود موثقه فلو انا قدمت بال WES يبقى لازم شهاده الخبره من مركز الآشعه فمش عارف اعمل ايه علشان اثبت الفتره اللى اشتغلتها فى المركز
صاحب المركز متعاون ممكن لو ورق محتاج انه يكون رسمى او يتوثق هو يساعدنى و يروح معايا الشهر العقارى بس انا معرفش ايه الخطوات

اعتقد ان الاحتمال الاكبر بسبب ان ال MCC بطئ جدا اعتقد انى هأرسل ملفين
الملف الاول تقديم على نوك الاطباء و شهاده خبره من الحكومه ( ملف قوى بس هيكون متأخر جدا )
الملف الثانى تقديم على نوك السونار و شهاده خبره من مركز الاشعه ( ملف أضعف بس سريع )

youfes · 22nd September 2014, 12:12 AM

يا أحمد ... انا كنت مستغرب انت ليه بتسأل على ال wes و كنت عايز أسألك .. بس فكرت لحد تانى
بص سا صديقى اللى أنا أعرفة الشهادة ملهاش دعوة بالوظيفة .. انت خريج طب يبقى الشهادة هتتقيم ب ال MCC و هتاخد نقطها .. يكش حتى تشتغل مهندس (افتراض خيالى طبعا) هتجيب شهادة خبرة بانك مهندس هتاخد عليها النقط و تقدم على النوك بتاعه ... يبقى شهادة تخرجك حاجة .. و الوظيفة حاجة تانية خالص .. انت مش محتاج ال wes فى حاجة لإنك مش محتاج حاجة منه الا لو معاك دبلومة أو ماجستير أو دكتوراة أو بكالوريوس (أى كلية عدا طب و صيدلة ) بس حتى لو معاك ماجستير فى حاجة مش هيفيدك تقييم الماجستير لإن انت هتاخد 23 نقطة ببكالوريوس طب و الماجستير هيديك نفس النقط يبقى ملوش لازمة.

youfes · 22nd September 2014, 12:15 AM

باختصار تانى فى حدود معرفتى ... توع الشهادة هو اللى بيحدد الجهة اللى بتقيم الشهادة ... بكالوريوس طب يبقى mcc بكالوريوس صيدلة pebc ... باقى الشهادات wes أو ICAS ... الوظيفة مش هتفرق معاك غير فى النوك بس اللى هتقدم عليه الى جانب الخبرة طبعا!!!

ahmed.amin · 22nd September 2014, 12:24 AM

لأ نوع ال noc هو اللى بيحدد
a specialist physician (NOC 3111) or general practitioner/family physician (NOC 3112), the Medical Council of Canada must do an educational credential assessment only for your primary medical diploma
يعنى لو انت مقدم على انك مدرس او أستاذ ف الجامعة او أخصائي سونار او اى حاجه غير ممارس عام او أخصائي يبقى تقظن ف wes

youfes · 22nd September 2014, 12:48 AM

اقتباس

المشاركة الأصلية كتبت بواسطة ahmed.amin


	لأ نوع ال noc هو اللى بيحدد a specialist physician (NOC 3111) or general practitioner/family physician (NOC 3112), the Medical Council of Canada must do an educational credential assessment only for your primary medical diploma يعنى لو انت مقدم على انك مدرس او أستاذ ف الجامعة او أخصائي سونار او اى حاجه غير ممارس عام او أخصائي يبقى تقظن ف wes

ما هو الوظايف دول لازم يكون ال wes بحكم الشهادة المطلوبة لإنه يشتغل فى الوظيفة دى ... بمعنى لازم استاذ أو مدرس فى الجامعة يكون معاه ماستر أو دكتوراة و دا بيكون عن طريق ال wes .. و طبعا السونار هو حاطط فى دماغه إنك هتكون خريج كلية زى عندهم للسونار و دى برضه عن طريق ال wes .. إنما لو معاك بكالوريوس طب يبقى عن طريق ال mcc .. انا اتمنى ان ال wes ينفع لإنه كان هيخدم ناس كتير .. و بحكم ان الشهادة واحدة يبقى ليه هتختلف باختلاف الوظيفة ؟!!! ..
اتمنى حد يكون عنده قول فصل !

Dr m · 22nd September 2014, 08:34 AM

اقتباس

المشاركة الأصلية كتبت بواسطة youfes


	ما هو الوظايف دول لازم يكون ال wes بحكم الشهادة المطلوبة لإنه يشتغل فى الوظيفة دى ... بمعنى لازم استاذ أو مدرس فى الجامعة يكون معاه ماستر أو دكتوراة و دا بيكون عن طريق ال wes .. و طبعا السونار هو حاطط فى دماغه إنك هتكون خريج كلية زى عندهم للسونار و دى برضه عن طريق ال wes .. إنما لو معاك بكالوريوس طب يبقى عن طريق ال mcc .. انا اتمنى ان ال wes ينفع لإنه كان هيخدم ناس كتير .. و بحكم ان الشهادة واحدة يبقى ليه هتختلف باختلاف الوظيفة ؟!!! .. اتمنى حد يكون عنده قول فصل !

هوا فعلا الكلام صحيح يعني لو هتقدم على وظيفة سونار يبقى تعمل شهادتك مع ال wes

Dr m · 22nd September 2014, 09:39 AM

https://www.fsw2014.info/sample-reference-letter/

الموقع ده فيه sample لشهادات الخبرة
فانت عليك وعلى برنامج ورد تضبط جواب خبرة محترم وتطبعه على ورقه عليها لوجو مركز الاشعه وارقام تليفوناته وتروح لمدير المركز وتخليه يمضيلك ويختملك عليه ولو معاه business card تشبكه مع جواب الخبرة بدبوس ويفضل لو انت عامل عقد تبعت صورة العقد

طيب بالنسبة لوزارة الصحة حاول تجيب شهادة توصيف وظيفي عليها اسمك مع مفردات مرتب مع شهادة خبرة من المديرية وتترجمهم عند اي مكتب ترجمة وتكتب معاهم cover letter ان الشهادات الحكومية لاتصدر الا بهذا الشكل ( ده من متابعتي من فترة في المنتدى والناس اللي اتقبلت وحكت انهم عملوا كده )

حاول قدر الامكان تكتب شهادة خبرة بالمواصفات المطلوبة لانه سبب رئيسي من اسباب الرفض.. طبعا فيه اوفيسرز بيعدوا الموضوع وفيه اوفيسرز رخمين.. الله اعلم الواحد نصيبه فين

sohatosa · 22nd September 2014, 11:24 AM

السلام عليكم كنت عايزة اعرف انا لو هقدم علي وظيفه اكبر من وظيفتي الحقيقيه شويه بس هقدر اطلع لها جواب خبرة مختوم وممضي، عايزة اعرف هو لازم احط شخص يتصلوا بيه ولا مش ضروري

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
شهادات الخبرة للتقديم للهجرة .. مواصفاتها و كيفية...	الهجرة إلى كندا	Ahmed H.	262	111134	21st September 2014 10:27 PM
توثيق البكالوريوس بالنسبة للأطباء عن طريق ال MCC	الهجرة إلى كندا	dr_voltron	140	45980	6th September 2014 11:13 AM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

الهجرة إلى كندا

شهادات الخبرة للتقديم للهجرة .. مواصفاتها و كيفية استخراجها