ياحرام .........ماعندوش قبول

[Farida]

الصحف المصرية والعربية

القبول صفه من عند الله يهبها لمن يشاء - كل شئ طبعا بمشيئه الله ما قلناش حاجه - لكن فعلا القبول لا دخل للشخص مننا فيه بتاتا فيه ناس مهما استخفت دمها ومهما جاملت و مهما عملت و سوت بتبقى كويسه و كل حاجه لكن ماتقدرش تتكلم معاها براحتك او دايما حاسس انك عايز الأرض تتشق و تبلعك قبل ما فلان ده او فلانه دى يلمحك و يمسك ودانك و هاتك يا كلام ....الناس دى فعلا بتصعب على بس مش لاقيالها حل
افتكرت كان دايما لما يتقدم عريس زماااااااااااااااااااااان قوى كانت الحجه اللى باستخدمها دايما للرفض وماحدش يقدر يناقشنى فيها انه للأسف مافيش قبول و فى الغالب بيبقى مافيش نفس مافيش مزاج او عندى خطط اخرى للمستقبل
اكتشفت ان للأسف كما فى الواقع فيه احيانا بعض الشخصيات على النت ايضا بالنسبه لى مالهاش قبول مش من اول نظرة لأ من اول كلمه بس ده موضوع تانى
المهم ماطولش عليكم قولوا طولى ......موضوع القبول فى السينما و المسرح و الأعلام و الفن عموما ده بقه هو اللى فعلا بيقى محطم لصاحبه بالرغم من اجتهاده و كم الشهادات مثلا اللى حاصل عليها .او الفرص اللى بتتوفره انتاجيا ............
تعالوا نتناقش فى الموضوع ده مع ذكر امثله انا مثلا عندى شويه امثله

حمدى حافظ مثلا ........و جلال عيسى .....و ايهاب نافع ....و .هشام عبد الحميد .....و كملوا انتم بقه

 

[oskasan]

مش شرط يا مدام فريده
واحد زي حسن حسنى مثلا
افلامه القديمه مقرفه وشكله من ناحية القبول بعيد خالص لكن دلوقتى بقيت ادور على افلامه
والعكس صحيح لبعض الممثلين كسيد زيان مثلا او محمد نجم او سمير غانم
كانت بدايتهم كويسه وبعدين لعبوا على رصيدهم في حب الناس وخسروا

 

 

[Farida]

اقتباس المشاركة الأصلية كتبت بواسطة oskasan مش شرط يا مدام فريده واحد زي حسن حسنى مثلا افلامه القديمه مقرفه وشكله من ناحية القبول بعيد خالص لكن دلوقتى بقيت ادور على افلامه والعكس صحيح لبعض الممثلين كسيد زيان مثلا او محمد نجم او سمير غانم كانت بدايتهم كويسه وبعدين لعبوا على رصيدهم في حب الناس وخسروا

لأ انا اقصد القبول من اول وهله و كأن فيه جبل بينك و بين اللى بيقدم فن ما .............
اللى انت بتقول عليه ده تذبذب مستوى الأداء او سوء اختيار اعمال لكن اللى باتكلم عنه الحاجز النفسى اللى بيتواجد بينك و بين اللى قدامك و اللى مهما عمل و سوى ان شاء الله يطلع فى دور ايه مش حأقبله زى حالة ايهاب نافع مثلا اهى ماجده عملت معاه اللى ما يعمل و هو نفسه كان طيار و له حياته و مجال عمله لكن طلع رومانسى طله فىدور دينى طلع السلم ....no way

 

 

[حرررم بم بم]

اقتباس المشاركة الأصلية كتبت بواسطة farida حمدى حافظ مثلا ........و جلال عيسى .....و ايهاب نافع ....و .هشام عبد الحميد .....و كملوا انتم بقه

أنا معاكي يا دكتورة في دول ما عدا هشام عبد الحميد دلوقتي على الأقل ،، زمان أيام ما كان رفيع و مسلوع مكانش فيه قبول خالص فعلا و بستغرب إزاي كانوا بيدوه أدوار تمثيل أما دلوقتي فمقبول نوعاً ما

بالإضافة للقائمة : يوسف منصور بتاع الكونغو فو ، الشحات مبروك ، و طبعاً كبيرهم الذي علمهم اللا قبول محمود ياسين

 

 

[nash]

والله من قبل ما أفهم موضوع القبول ويعني أيه الكلمه ومعناها الحقيقي ....

كان فيه ناس حتي من العيله لما أشوفهم أتعفرت وحقيقي بتشاهد لما كانوا يزورونا ويمشوا ....

لحد الأن لا افهم سبب عدم تقبلي لمغني زمان وكان اسمه ( حاجه التلباني ) ومحمود الحديني ...والله رغم اني كنت صغيرة لكن لما كنت اشوفهم وبالذات التلباني اقفل التلفزيون ولو حد أصر يشغله كنت أعيط واملا الدنيا صريخ....مش طايقاة يا عالم....

أحيانا كنت بقول الناس دي إزاي طايقه نفسها...لكن أتفاعلت مع الفكرة لما قست الأمور علي نفسي ولقيت أني ممكن أكون في نفس الوضع بالنسبه لناس تانيه ..برضه مش طايقني ...

في فترة من الفترات كان محمود يس ونور الشريف فتي أحلام البنات ..أنا كنت بستغرب جدا ...طيب إزاي ..ده أنا مش بطيقهم.....


في الأخر لقيت مسئله القبول فعلا شيء نسبي ..وافتكرت دعوة جدتي لخيلاني ..ربنا يجعل في وشكم القبول

 

 

[No Body]

محمود الحديني ... صح

صلاح نظمي .... زمان

محمد نجم ...... دلوقتي

 

 

[nash]

ملك الغلاسه في التلفزيون المصري من وجهه نظري بالطبع

وحيد سيف وافيهاته اللي مالهاش لا طعم ولا لون ولا رائحه ولما يجيب ممثل صغير والدور كله يتحول لتريقه عليه...حقيقي منتهي السماجه ....طبعا هو والأخ سمير غانم...الأثنين كانوا ماشيين علي نفس النهج في التريقه والإستخفاف بممثلين الكمبارس ....

 

 

[Sonesta]

دعوه لموضوعي

ليالى المطاريد.,,,هل تعلم

اقتباس المشاركة الأصلية كتبت بواسطة nash والله من قبل ما أفهم موضوع القبول ويعني أيه الكلمه ومعناها الحقيقي .... كان فيه ناس حتي من العيله لما أشوفهم أتعفرت وحقيقي بتشاهد لما كانوا يزورونا ويمشوا .... لحد الأن لا افهم سبب عدم تقبلي لمغني زمان وكان اسمه ( حاجه التلباني ) ومحمود الحديني ...والله رغم اني كنت صغيرة لكن لما كنت اشوفهم وبالذات التلباني اقفل التلفزيون ولو حد أصر يشغله كنت أعيط واملا الدنيا صريخ....مش طايقاة يا عالم.... أحيانا كنت بقول الناس دي إزاي طايقه نفسها...لكن أتفاعلت مع الفكرة لما قست الأمور علي نفسي ولقيت أني ممكن أكون في نفس الوضع بالنسبه لناس تانيه ..برضه مش طايقني ... في فترة من الفترات كان محمود يس ونور الشريف فتي أحلام البنات ..أنا كنت بستغرب جدا ...طيب إزاي ..ده أنا مش بطيقهم..... في الأخر لقيت مسئله القبول فعلا شيء نسبي ..وافتكرت دعوة جدتي لخيلاني ..ربنا يجعل في وشكم القبول

عبداللطيف التلبانى يا ناش

زوقك من زوقى وذوتى عليهم

محى إسماعيل - عبد الرحيم منصور - مجدى وهبة

 

 

[فــيــروز]

كثير من أبناء الفنّانين ابتلاهم الله بعدم وجود قبول !! حاجه غريبه فعلا !!

"ناديه ذو الفقار" ابنة "فاتن حمامه" ظهرت فى عدد محدود جدّا من الأفلام و لم تستمر بسبب هذه المشكله !!
"غاده نافع" حاولت أمّها أن تفرضها علينا فرضا من خلال فيلم تليفزيونى كما تواجدت فى عدد من المسلسلات لكنّها لم تستمر ..
"رانيا محمود ياسين" نفس الشئ ..
"محمد عبد الحافظ" و ظهوره فى عدد كبير من الأعمال التى أخرجها والده "اسماعيل عبد الحافظ" .. بيطلع يعيّط فى كل المسلسلات تقريبا و حاجه تقرف ..
"مى نور الشريف" التى ظهرت فى مسلسل "الدوالى" و فى طريقها للظهور فى مسلسل أبيها القادم !!
"محمد إمام" ابن "عادل إمام" .. لا تعليق طبعا ..


ما يزيد الطين بلّه بالنسبه لبعض هذه الأسماء محاولتهم تقليد الوالد أو الوالده اعتقادا منهم أن هذا سرّ النجاح بينما يأتى هذا -غالبا- بأثر عكسى .. و ربّما هم بحاجه لمعرفة أن كونهم أبناء نجوم يجعل بعض المشاهدين من أمثالى يترقبّون أداءهم بقدر أكبر المحاسبه .. و ربّما نحن نقارن بين أدائهم و أداء هؤلاء الآباء و تكون نتيجة المقارنه غالبا ليست فى صالحهم !! يعنى كونهم أبناء نجوم يرتّب عليهم عبء أكبر من نظرائهم ممّن ليسوا من عائله فنّيه ..


بعيدا عن هؤلاء هناك أسماء أخرى يحضرنى منها حاليا "محمد نجاتى" .. أنا شخصيا لا أطيقه ولا أتحمّل مشاهدته ولو لثوانِ على الشاشه .. و لا أعرف سرّ اختياره لأداء مسلسل عن "بليغ حمدى" ولا ما العلاقه -الشكليه على الأقل- بينهما !!


"نرمين ماهر" -أظن اسمها كده- اللىّ كانت فى فيلم "السفاره فى العماره" فى دور المضيفه التايلانديه .. رغم جمال وجهها و ترشّحها سابقا فى مسابقة ملكة جمال "مصر" هذه الفتاه ما إن تفتح فمها للكلام حتى تجعلك تكره الدنيا و ما فيها .. مخارج الألفاظ عندها ضايعه تماما و أداءها الصوتى لأى دور يفسده بشدّه و تحسّ إنّك مستفَز من طريقة كلامها ..

"مصطفى شعبان" كان له قبول كبير فى رأيى الشخصى من خلال مسلسل "عائلة الحاج مستولى" و فيلم "مافيا" و بعدها حصل شئ ما لا أدرى ما هو خلاّنى قفلت تماما من ناحيته

"راقيه ابراهيم" !!

"طارق علاّم" كمذيع و كممثل ..

"يوسف منصور" اللىّ كان بيضرب الحيطه بالشلّوت تقع على طول ..

"ماريا" مطربة "الكورن فليكس" .. شئ لا يوصف .. الحقيقه كثيرات و كثيرين من مطربات و مطربى الفيديو كليب أشياء لا توصف ..

"مهنّد" بطل المسلسل الشهير برغم وسامته الشديده شكلا إلاّ أنّه موضوعا لا يُحتَمل و كلّه كوم و إعلان الشامبو اللىّ بيظهر فيه و هو يتحرّك و ينظر للكاميرا بدلال كوم تانى !!


أكتفى بهذا القدر .. و طبعا القائمه السابقه يتدخّل فيها الذوق الشخصى بدرجه كبيره .. هناك أمر آخر لابد أن يؤخذ فى الاعتبار و هو أن وسائل الإعلام و الفضائيات بشكل خاص صار لها سطوة فرض أسماء بعينها حتى لو لم يكُن لها قبول مُستحَق و كلّما رأيت "هيفاء وهبى" فى أغنيه أو حديث يتأكّد لى هذا الاعتقاد .. يعنى ليس معنى الانتشار و البقاء أنّه مرتبط بقبول لأن هناك حسابات أخرى غير رأى الجمهور تتدخّل فى هذه المسأله ..

 

 

[حرررم بم بم]

حمدا لله على السلامة يا استاذة ،، أشرقت الانوار

اقتباس غاده نافع" حاولت أمّها أن تفرضها علينا فرضا من خلال فيلم تليفزيونى كما تواجدت فى عدد من المسلسلات لكنّها لم تستمر .. "رانيا محمود ياسين" نفس الشئ .. "محمد عبد الحافظ" و ظهوره فى عدد كبير من الأعمال التى أخرجها والده "اسماعيل عبد الحافظ" .. بيطلع يعيّط فى كل المسلسلات تقريبا و حاجه تقرف .. "مى نور الشريف" التى ظهرت فى مسلسل "الدوالى" و فى طريقها للظهور فى مسلسل أبيها القادم !! "محمد إمام" ابن "عادل إمام" .. لا تعليق طبعا ..

أتفق مع سيادتِك تمام الإتفاق