استشارة من اهالي اسكندرية

[نهر النيل]

الصحف المصرية والعربية

اعزائي مطاريد اسكندرية


ارجو تعاونكم لو تكرمتم

اسرة ستنقل اقامتهاالى الاسكندرية لظروف العمل وترغب في معرفة مدارس اللغات الجيدة وعناوينها واذا امكن الاسعار

كما ارجو ذكر الاحياء الجيدة للإقامة على ان تكون قريبة من الجامعة وان امكن تكون قريبة من المدارس المقترحة او لأحدهما وبالطبع الاسعار التقريبيه للإيجارللشقق المقترحة حسب المنطقة الموجودة بها


اشكركم جزيل الشكر

 

[أحمد باشــا]

اسكندرية وضعها مختلف ... مدارس اللغات نوعين القديمة و معظمها في وسط المدينة تقريبا و المدارس الإستثمارية الحديثة و هي في مناطق بعيدة شرق و جنوب الأسكندرية

بالنسبة لإيجار الشقق فيتفاوت السعر ما بين قربها او بعدها عن البحر ... يعني تقريبا اي منطقة هتلاقي الأسعار تتدرج من بحري لقبلي تنازليا

اعتقد نقطة بداية البحث تبدأ بتحديد مكان العمل و بعدها ممكن اختيار المناسب

لأن لو واحد بيشتغل في غرب الأسكندرية موش معقول هيسكن في شرقها و ممكن تبقى المسافة 45 كم او تصل ل 60 كم كمان

الأحياء الجيدة دي موضوع نسبي بحت حسب الإمكانيات .... لكن الطريف انه تقريبا في كل مناطق الأسكندرية ستجدين الأحياء الراقية تقريبا بالقرب من البحر و تقل للجنوب حتى تصل للعشوائيات في اقصى جنوبها ماعدا بعض الإستثناءات

الأسكندرية مدينة شريطية على الساحل تمتد من سيدي كرير غربا الى ابوقير شرقا بطول يزيد عن 75 كم

الجامعة تتركز تقريبا في وسط المدينة لكن الجامعات الخاصة فمنها في الجنوب و الشرق و الغرب..... مفيش شمال في اسكندرية لأنه بحر

 

 

[نهر النيل]

جزاك الله خير احمد باشا

طيب مكان العمل بكلية الطب جامعة الاسكندرية
ممكن تديني معلومات زيادة عشان البحث يكون مركزاكثر



تحياتي

 

 

[أحمد باشــا]

اقتباس المشاركة الأصلية كتبت بواسطة Utopia جزاك الله خير احمد باشا طيب مكان العمل بكلية الطب جامعة الاسكندرية ممكن تديني معلومات زيادة عشان البحث يكون مركزاكثر تحياتي

ايوه كده بداية صح

السكن هيبقى في منطقة وسط المدينة و ما حولها للشرق مثلا هيبقى الأزاريطة ثم الشاطبيى فكامب شيزار و الإبراهيمية و هتلاقي اكيد حسب المستوى اللي انت عاوزاه

و الجامعة في نفس المنطقة تقريبا مفيش مشاكل و مدارس اللغات التقليدية برضو هناك و قريبة و مدارس اللغات الإستثمارية لها اتوبيسات و قليل منها قريب و معظمها بعيدة في الشرق

 

 

[نهر النيل]

بارك الله فيك احمد باشا

طيب ايه الفرق بين المدارس القديمة والحديثة ولو تكرمت ممكن تقترح اسماء مدرستين او ثلاثة يمكن التفضيل بينهم


اسفة جدا بتعبك معايا

جعله الله في ميزان حسناتك

 

 

[مصري جدا]

اولا المدارس القديمه اللي لها سمعه كويسه حسب ماكنت في اسكندريه....من7سنوات هي.....لغة انجليزيه
1-القلب المقدس دي مدرسة راهبات للبنات بمنطقة رشدي
2-كلية النصر للبنات الشاطبي
3-المنار للبنات محطة الرمل قرب كلية الطب ......والترتيب تنازلي الأحسن رقم 1

 

 

[مصري جدا]

المدارس الحديثه كترت واسعارها عاليه ......كنت اعرف مدرسة الرياده بسموحه من اوائل المدارس وكانت كويسه ايام ماكنت هناك....

 

 

[HanyMan]

فلى برضوا مدرسة سانت جان انتيد فى الشاطبى وسان مارك فى نفس الشارع ناحية البحر والاتنيين مدارس قوية جدا وبيوفروا اتوبيسات بالاضافة لانهم مدارس عريقة ومحترمة

عشان حضرتك فى كلية الطب انا ارشح لحضرتك وبقوة منطقتين يا اما الشاطبى يا الازاريطة والاتنين ان شاء الله راقيين جدا
ولعلم حضرتك اسكندرية مدينة سهلة جدا لتتعرفى عليها مش زى القاهرة وبكل بساطة هم 3 شوارع قاطعين اسكندرية بالعرض وموازيين تقريبا للبحر واكيد الاولاد هيعشقوها زى اى اسكندرانى

تحياتى

 

 

[أحمد باشــا]

بالنسبة لمدارس الأولاد لازم تحددي هم بنات او اولاد و عمرهم و نوع اللغة الأجنبية انجليزي او فرنسي او الماني

يعني مصري جدا اتكلم عن مدارس البنات انجليزي و هاني مان اتكلم عن مدارس للبنات و الأولاد فرنسي

 

 

[نهر النيل]

ميرسي مصري جدا وهاني مان وطبعا احمد باشا


جزاكم الله خير


الاولاد ولدين وبنت في المرحلة الابتدائية والدراسة مدارس انجليزي IGC لكن مافي مانع يحولولهم امريكي اذا المدرسة سمعتها كويسه