أمى وزوجتى فى الميزان ... للرجال فقط

[حشيش]

الصحف المصرية والعربية

بلا شك كل رجل منا يشعر بداخله بأن أمه لن يجود الزمان عليه بمن هى مثلها أو حتى قريبة منها فى كل شئ خاصة فى قدر إعتناءها به ويعقد من حين لآخر مقارنة بين أمه وزوجته وتكون النتيجة دوماً فى صالح الأم ... مذاق طعام الأم مختلف ... تنظيم البيت وإعتناء الأم بكل كبيرة وصغيرة بداخله خارج المنافسة ... مش عارف هل سبب هذا الشعور هو تعلق أى رجل بأمه وحسب أم أن إختلاف جيل الأم عن جيل الزوجة هو السبب فى هذا الإحساس؟ ... يعنى هل جيل الأم (الجيل الذى عاصر أيام الملك فاروق) يختلف عن جيل أبو علاء ؟

 

[نجيبة نجيب]

السبب عدم القدرة على الانصاف وتغلب العاطفة على الضمير

 

 

[محمد الجعفرى]

ازيك يا استاذ حشيش و كل سنة وانت طيب


الموضوع مش موضوع زمن و اختلاف جيل لانه ببساطة

الزوجة حتكون ام

و اكيد حيكون ليها التقدير و الاحترام....أم

السبب الام بتدى من غير ما تفكر انها تاخد الام

عاوزك احسن منها مش علشان مصلحتها بل عشان

مصلحتك الام شايفاك صغير قدامها مش علشان تقلل من

قيمتك بل لاجل انها تكبرك أم الزوجة ما اقدرش

اتكلم عليها علشان ما اظلمهاش من غير ما يكون

عندى دليل بس الوضع اكيد مختلف

و فى النهاية اقولك نظرة يا عم حشيش

 

 

[charisma]

اقتباس المشاركة الأصلية كتبت بواسطة حشيش بلا شك كل رجل منا يشعر بداخله بأن أمه لن يجود الزمان عليه بمن هى مثلها أو حتى قريبة منها فى كل شئ خاصة فى قدر إعتناءها به ويعقد من حين لآخر مقارنة بين أمه وزوجته وتكون النتيجة دوماً فى صالح الأم ... مذاق طعام الأم مختلف ... تنظيم البيت وإعتناء الأم بكل كبيرة وصغيرة بداخله خارج المنافسة ... مش عارف هل سبب هذا الشعور هو تعلق أى رجل بأمه وحسب أم أن إختلاف جيل الأم عن جيل الزوجة هو السبب فى هذا الإحساس؟ ... يعنى هل جيل الأم (الجيل الذى عاصر أيام الملك فاروق) يختلف عن جيل أبو علاء ؟

اقتباس أيووووووه عارفه أنه للرجال فقط بس بصراحه ما قدرتش ما أردش

أهو الرد أهو في كلامك نفسه ... بتسأل ليه طيب عقدوتنا

إحيات كل الغاليين عندك ما تحسسها بكده ....الست مننا
عارفه ومتاكده إنها لوعملت اراجوز برضه هايفضل اكل ماما أحلي واعتناء ماما أحلي ودلع ماما أحلي

بس اكظظظظظم ( شايفني وأنا بأضغط علي أسناني )هذا الاحساس قدر الامكان جوه قلبك وما تخليش المودام تحس بيه...لو سمحت يعني...يا أخي ده أنت جيت علي الجرح

 

 

[حشيش]

اقتباس المشاركة الأصلية كتبت بواسطة charisma أهو الرد أهو في كلامك نفسه ... بتسأل ليه طيب عقدوتنا إحيات كل الغاليين عندك ما تحسسها بكده ....الست مننا عارفه ومتاكده إنها لوعملت اراجوز برضه هايفضل اكل ماما أحلي واعتناء ماما أحلي ودلع ماما أحلي بس اكظظظظظم ( شايفني وأنا بأضغط علي أسناني )هذا الاحساس قدر الامكان جوه قلبك وما تخليش المودام تحس بيه...لو سمحت يعني...يا أخي ده أنت جيت علي الجرح

حاضر بس حوشى دموعك يا أمال

 

 

[charisma]

اقتباس المشاركة الأصلية كتبت بواسطة حشيش حاضر بس حوشى دموعك يا أمال

حاضر اديني حوشت دموعي وجيت أرد عليك بأعصاب هاديه أهو
السبب الأوحد في هذا هيا العاطفه تجاه الأم وديه مالهاش أي حل
لإن حتي لو اعتبرنا ان جيل الملك فاروق كان بيستعمل الزبده الفلاحي وجيل ابو علاء بيستخدم روابي

فاعتبر نفسك عند والدتك ربنا يديها الصحه ويباركلك فيها
وهاتفطر ....اليومين دول مافيش غير سمنه روابي بتاعه ابو علاء وبالتالي مامتك هاتستخدمها ..هل هاتحس بتغير في اكل مامتك عن زمان ولا هاتفضل تحبه وتحس انك لو لفيت الدنيا مش هتلاقي زيييه ؟.

جاوب انت بنفسك وانت هاتعرف ساعتها السبب الحقيقي هل هو في العاطفه ولا في سمنه روابي أقصد في إختلاف الاجيال يعني

 

 

[امانى]

مفيش وجه للمقارنة

الام تعطى ولا تنتظر المقابل
الام تتمنى ان تراك احسن الناس واحسن منها كمان
الام تزعل منك ولكنها لا تغضب عليك
الام مهما كبرت تفضل فى نظرها الطفل المدلل
الخ الخ الخ
هتفضل الام هى الام من عهد الملك فاروق الى يوم الدين

 

 

[فــيــروز]

لأ مش اختلاف جيل و "أبو علاء" مالوش دخل بدى كمان ..

لكن الفكره أن الأم تتولّى رعايتك من و انت فى اللفّه .. كل ما تفعله -حتى دون أن تقصد هى- يغرس فى لا وعيك و فى عقلك الباطن و يشكّل أول لقاء بينك و بين العالم !!

فطبيعى تكون كل اختياراتها ليك هى مرجعيتك الأولى .. فيه ناس بتعمل صلصة المكرونه بالتوم و لأن أمّى لم تكن تصنعها بنفس الطريقه دائما ما اعتبرت طريقة أمّى هى الأصليه و طريقة الناس التانيين هى الاختيار الثانى الذى لا أميل إليه .. الموضوع مالوش علاقه كبيره بجنس الإنسان يعنى ممكن الستّات كمان يحسّوا بنفس الشعور تجاه ما كانت تفعله الأمّهات .. و يمكن ده ينعكس عليهن فى طريقة تعاملهن مع ابنائهن لاحقا ..

حاجه كمان تجعل المقارنه not valid أصلا .. هى إن ربنا سبحانه و تعالى هو الذى غرس فى النساء عاطفة الأمومه مع ما تستتبعه من عطاء و تفانى و تضحيه من أجل أبنائها .. حاجه built in يعنى من تخرج عنها تعتبر استثناء و شذوذ .. يعنى الأم تحب ابنها من قبل أن تراه و تغفر له كل شئ بسبب ما زرع داخلها من حب و عاطفه طاغيه نحوه .. حاجه يعنى نقدر نقول مالهاش اختيار أو يد فيها

بينما الزوجه وضعها مختلف و عاطفتها نحوك مرتبطه بعلاقتك بها و ما تمر به هذه العلاقه من صعود أو هبوط و لك دور فى مستوى حرارة هذه العلاقه .. ولاّ انت مش عاوز تبذل أى مجهود لتحسين علاقتك بزوجتك و تكتفى بالمقارنه بعلاقتك بأمّك و الخروج إن مفيش زى حنان الأم !! طيب ما ده شئ بديهى بالنسبه للرجل و للمرأه كمان على فكره ..

 

 

[charisma]

اقتباس المشاركة الأصلية كتبت بواسطة فــيــروز لأ مش اختلاف جيل !! طيب ما ده شئ بديهى بالنسبه للرجل و للمرأه كمان على فكره ..

أأأه بس الست شايله في قلبها وكاتمه

 

 

[invador]

والله ياحشيشه الام دى اغلى حاجه فى الدنيا اسالنى انا