أخيرا.. أصبحت جدة أليس في بلاد العجائب

[إكرام يوسف]

الصحف المصرية والعربية

أخيرا وبعد محاولات فاشلة على مدار جيلين لإدخال بنت في العائلة .. نجح ابني الأصغر بسام في إدخال الفرحة على قلوبنا .. وأنجب لنا ابنته الرائعة "أليس".. أهو كده بقى تبقى الخلفة.. بلا صبيان بلا بتاع.. حاجة كده كيوت وبتصوصو مش بتعيط.. ومربعة ايديها طول الوقت في أدب جم.. وهادية ومحترمة من غير صويت ولا زعيق.. هي صحيح عمرها دلوقت يومين بس لكن البدايات مبشرة.. يارب فرح الناس كلها بتحقيق أمنياتهم زي ماحققت أمنيتي يكون عندي بنت.
على فكرة بسام كان كده وهو صغير.. ربنا يستر ولماتكبر ما تبقاش غجرية زيه.. لكن زياد كان بيصوت من يوم ما اتولد لغاية دلوقت وجايب ولد "نديم" خنشور برضه ربنا يحميه ويبارك فيه

كنت مبسوطة قوي من زياد عشان من أول الحمل كان متضامن مع مراته.. وكل أكل الدكتور يمنعها منه، يحرم نفسه منه حتى لو كان برة البيت (جالي مرة لوحده وقلت له فيه مانجة وأنا عارفة انه بيعشقها.. قال لي لأ أنا متضامن مع أميرة.. واصحابه حاولا يغروه يعزموه مرة على الرنجة اللي بيعشقها برضه لكن هو أبى)..لكن كانت مفاجأة أنه قرر يدخل معاها حجرة العمليات عشان يدعمها نفسيا لما عرف انها حتعمل قيصرية ببنج نصفي.. بس هي استندلت لما دخلت حجرة العمليات وخافت وطلبت منهم ينيموها. وهو ياحرام فضل موجود يتابع العملية لحظة بلحظة (فيه حد يقف كده يتفرج وهمه بيفتحوا بطن مراته ولما تنزل بنته يفضلوا يلطشولها ويضربها ضرب مجرم عشان ماكانتش قادرة تتنفس) المهم انه صور العملية كاملة عشان يفرجها للام وبنتها لما تكبر.. بصراحة لغاية دلوقت مش قادرة اتحيل انه يعمل كده.. خصوصا انه ماكانش بيقدر يدخل مستشفى مع حد قبل كده.. ولما أخوه عملناله عملية ازالة غضروف من الركبة (بسبب ضابط مجرم رماه من فوق سور الجامعة على الارض لما كان بيحرق علم اسرائيل) ماقدرش يقف معانا في المستشفى وهرب.. لما سألته ازاي عملت كده.. قال لي أنا شفت أيام الثورة حاجات أفظع من كده بكتير.. وفي يوم واحد شلت على ايدي 8 شهداء.. مش قادرة اتخيل الأيام بتربي الولاد ازاي..
قلت احكيلكم حاجة تفرح تخرجنا من جو التوتر.. لكن برضه ماقدرتش أخرج من سيرة الثورة.. يارب أليس وجيلها يتربوا في مصر اللي حلمنا لهم بيها وعشان عشرات السنين نناضل عشان تحقيقها

 

[aymanology]

الف مبروك يا مدام اكرام (يا تيته اكرام) .. تتربي في عز ابوها وامها .. وتفرحي بيها عروسه ان شاء الله

 

 

[إكرام يوسف]

الله يبارك فيك ويفرح قلبك يا أستاذ أيمنولوجي

 

 

[كلمة]

ألف مبروك يا مدام إكرام وتتربى فى عزكم وربنا يجعلها إن شاء الله من الصالحين

 

 

[مودة]

دعوه لموضوعي

مدونة مودتي بلا حدود

الف مبروووك ياارب وحمد لله على سلامة وصولها لكوكبنا
ان شاء الله تتربى في عز والديها وعزك
وتشوفيها يارب أجمل عروسة في الدنيا
عايزين بقى السبوع حاجه كده ماحصلتش
الف مبرووك يارب

 

 

[hopsan]

الف مبروك يا أستاذه على الأموره و ربنا يجعلها قره عين أبوها و أمها و تشوفيها ماشيه فى المظاهره اللى بتطالب بسحب الموبيل من مورسى و هو فى الزنزانه ... البنات برضه حاجه تانيه .. إحنا برضه مالناش حظ فى البنات .... العائله و عيله العائله لا أثر فيها لحاجه طريه ... و كان نفسى يكون عندى أخت علشان آخود مصروفها و أتعرف على صحاباتها ... بس يلا مفيش نصيب

 

 

[إكرام يوسف]

كلمة
مودة
هوبسان
ربنا يفرح قلوبكم .. ويسعدكم زي مافرحتي تهنئتكم.. وما تقلقش يا هوبس أكيد ربنا محضرلك في الغيب بنوتة زي العسل حتيجي في وقتها بس انت وصي ولادك يختاروا عرايس حلوين

 

 

[Sweet Heart]

ألف مبروك يا مدام إكرام يا أحلى جدة في الدنيا
ربنا يبارك لكم يا رب فيها وتشوفوها أحلى عروسة في الدنيا

 

 

[نفرتارى]

ألف ألف مبروك مدام إكرام على القمرة الجديدة
يارب يجعلها حانيه على والديها وقرة عين لهم
وانا بقول يا بختها بيكي جدة طيبه وجميله

يارب تشوفيها عروسه زي دي

 

 

[hopsan]

اقتباس المشاركة الأصلية كتبت بواسطة إكرام يوسف كلمة بس انت وصي ولادك يختاروا عرايس حلوين

أهى فى حته الحلوين دى يتفتح لها موضوع مستقل
يا خوفى لتكون مرايه الحب عاميه