قبل ما تفكر تهاجر.......عايز تهاجر ليه؟؟؟احسبها صح تعيشها صح

[abysaleh]

الصحف المصرية والعربية

السلام عليكم ورحمة الله وبركاته

أولا: أعتذر عن عدم الرد لغيابي الفترة السابقة بسبب ظروف خاصة

ثانيا: أحب أشكر كل من قام بالمشاركة في الموضوع
أهلاوي،فارما،صامويل،دانا،جادوللي،علي سمير،رؤوف،هدوء الليل،ياسر،أحمد باشا___سأقوم بالرد على سيادتك في رد منفصل ان شاء الله
ايجيكويب____ يارب تتجوز وتلاقي بنت الحلال
ناش و دودي______ربنا يوفقكم لما فيه الخير واتخاذ القرار السليم بالنسبة للهجرة
حمودي_________ شكرا على التلخيص والطرائف
رسالة_______ (عارفة لما تكونى بتحبى حد أوى ومش قادرة تتكيفى معاه وتحسى انك لو استمراتى اكتر من كده هتكرهيه وهو حد مينفعش تكرهيه )انتي جيتي ع الجرح

شكرا لجميع من شاركوا سواء بالموافقة او الرفض ودا أساس التوبيك انه يكون فيه اختلاف وجهات النظر عشان الصورة تكون كاملة امام كل من ينوي الهجرة عشان ما يرجعش يندم خصوصا لو عنده المرض البطال اللي اسمه هوم سيكنس(على رأي احد الزملاء في المنتدى)

وأخيرا وليس بآخر
الاختلاف في الرأي لا يفسد للود قضية

 

 

[هدوء الليل]

اختنا عبير حمد الله علي السلامة

التوبيك ده بيفتح مواجع كتير
و حب اقول ان كون الواحد يضحي باستقراره و شغله و مركزه علشان يروح يبتدي من جديد ده قرار مؤلم جدا
انا واحد من الناس اخدت القرار بس واقف علي التنفيذ لاعتبارات كتيرة من اولها (الفيدرال ليست) و رغم اني مبسوط في شغلي و منصبي مش وحش الا اني اكتشفت ان الموضوع مش موضوع بتاخد مرتب كام علي اد ما هو راحة بالك في البيت و الشارع
كان قدامي حل من التلاتة
1- اصبر علي اللي انا فيه من قرف(القرف مش من الشغل او البيت )طب يبقي من ايه؟؟اترك الاجابة لخيالكوا الواسع و اللي عايشيين بره هيفهموني
2- ارجع للوطن الام تاني (في حالتي - هي الامارات)و ده احتمال قائم بس للاسف مش دائم يعني طال الزمان ام قصر هي ام بالتبني يعني هنرجع هنرجع
3- اخدها من قصيره و اتكل علي الله علي كندا و اللي فيها كل مقومات عيشة البني ادم المحترم اللي نفسه يحس انه انسان- مع احترامي لكل الااراء المعارضة
عارف ان كل واحد له اسبابه الشخصية و دي كانت و مازالت اسبابي
تحياتي لكم جميعا

 

 

[abysaleh]

اقتباس المشاركة الأصلية كتبت بواسطة هدوء الليل اختنا عبير حمد الله علي السلامة التوبيك ده بيفتح مواجع كتير و حب اقول ان كون الواحد يضحي باستقراره و شغله و مركزه علشان يروح يبتدي من جديد ده قرار مؤلم جدا انا واحد من الناس اخدت القرار بس واقف علي التنفيذ لاعتبارات كتيرة من اولها (الفيدرال ليست) و رغم اني مبسوط في شغلي و منصبي مش وحش الا اني اكتشفت ان الموضوع مش موضوع بتاخد مرتب كام علي اد ما هو راحة بالك في البيت و الشارع كان قدامي حل من التلاتة 1- اصبر علي اللي انا فيه من قرف(القرف مش من الشغل او البيت )طب يبقي من ايه؟؟اترك الاجابة لخيالكوا الواسع و اللي عايشيين بره هيفهموني 2- ارجع للوطن الام تاني (في حالتي - هي الامارات)و ده احتمال قائم بس للاسف مش دائم يعني طال الزمان ام قصر هي ام بالتبني يعني هنرجع هنرجع 3- اخدها من قصيره و اتكل علي الله علي كندا و اللي فيها كل مقومات عيشة البني ادم المحترم اللي نفسه يحس انه انسان- مع احترامي لكل الااراء المعارضة عارف ان كل واحد له اسبابه الشخصية و دي كانت و مازالت اسبابي تحياتي لكم جميعا

الله يسلمك يا هدوء وشكرا على المشاركة
وربنا يوفقك ومشكلة الليست دي تتحل ان شاء الله

 

 

[Resalah]

حمدالله على السلامة يا بيرو وحشتينا
والله يا بيرو موضوعك هو اللى جه على الجرح

 

 

[محمدابوسمرة]

بسم الله الرحمن الرحيم
عارفين انا عايز اهاجر ليه
انا اتربيت فى وسط ريفى جميل يعنى انا فاكر قريتى وهيه لسه مدخلهاش الكهرباء
فاكر زكرياتى مع الجيران والى عايز حاجه يستلفها من التانى
مكنش فيه فوارق بين الناس
والناس طيبه ومجامله وكله بيشارك كله فى كل المناسبات المفرحه والمحزنه
كله بيخاف على مشاعر الثانى
كل ده فاكره
كنت اتمنى الوضع يستمر هكذا ولكن ليس كل ما يتمناه المرء يدركه
سبحان من يغير ولا يتغير
مع انى عايش فى مصر سلطان زمانى بنام برحتى واسهر براحتى والعب براحتى والمصلحه شغاله
بس لما بانظر بنظرة طائر محلق واحاول انظر للمستقبل الذى ينتظر ابنائى يصيبنى الرعب
علشان تواكب المجتمع الذى تعيش فيه يجب ان تتوفر فيك الصفات التاليه
(الكدب--النفاق--الغش--الرياء--)هذه متطلبات العيشه الهنيه فى مصر المحميه
بالنسبه للتعليم الاخوه الافاضل قتلوا هذا الموضوع بحثا وكذلك الصحه
ولكن الطامه الكبرى هى طبيعة تعامل الاشخاص فيما بنهم البعض سواء على مستوى العائله او الزماله والصداقه او الجيره شىء محزن
عندما يصل الامر ان تشك فى ابتسامة الاخرين لك هل هى ابتسامه رضا ام ابتسامه صفراء
عندما تطلب النصيحه ولا تعلم هل الناصح يريد لك المصلحه او بيدخلك فى شجره
عندما تقدم يد الخير والعون ولا تجد الا كل حقد وضغينه
عندما يكون رد الجميل الكره
عندما تنعدم الشفافيه بين الاشخاص وبعضهم
عندما لا تامن على حريتك وحقوقك وادميتك
عندما يكون حبك لدينك ومصلحة ابنائك اهم اهدافكك فى الحياه
عند كل ذلك يجب ان تهاجر
وحيث ان كل مازكرته سابقا اصبح موجودا بما لا يدع مجال للشك
يجب ان تهاجر
وحيث ان الفرصه متاحه للهجره
يجب ان تهاجر
وصدق الحق حين قال(الم تكن ارض الله واسعه)
لكل ذلك انا ههاجر

 

 

[هدوء الليل]

موافق موافق موافق
الله ينور يا ابو سمرة
كلامك+ كلامي = مصر يا عبلة

 

 

[abysaleh]

اقتباس المشاركة الأصلية كتبت بواسطة أحمد باشــا و معلهش انا بأعتذر لكم ان انا غردت خارج السرب و ازعجتكم .... لكن عذري ان عنوان الموضوع يحمل فكرة مراجعة النفس ... لكن الموضوع نفسه غير ذلك اطلاقا مع تحياتي

الأخ الفاضل أحمد باشا
انا سعدت بمشاركتك الايجابية جدا وانت لا أزعجتنا ولا حاجة انت لقيت ان كل الردود متفقة على فكرة الهجرة مع ان الموضوع يحمل فكرة مراجعة النفس ودا ليه اسباب

اولا الموضوع في باب الهجرة.....يعني كل اللي بيزور الباب دا من اللي ناويين يهاجرو
ثانيا الموضوع اتعمل علشان يوضح مساوئ وعيوب الهجرة قبل فوايدها وحسناتها ودا اللي قدر يوضحهولنا الناس اللي هاجرت بالفعل وليها تجارب هناك وأغلب الي شاركو من اللي لسة بيدوروا ويبحثوا في الموضوع
عشان كدا انت لقيت ان كل الكلام قريب من بعضه ويحمل في طياته الهروب من مشاكل الحياة والمعيشة الصعبة

انا اتفق معاك في بعض النقاط وأختلف معك في البعض الاخر

بالنسبة لنقطة الهروب انا حاقتبس جزء من مشاركة زميلة في المنتدى هنا اثرت فيا اوي

المشاركة كانت بواسطة رسالة وبتقول فيها(عايزة أهاجر عشان بحب مصر أوى !!!!! عارفة لما تكونى بتحبى حد أوى ومش قادرة تتكيفى معاه وتحسى انك لو استمراتى اكتر من كده هتكرهيه وهو حد مينفعش تكرهيه أبوك .. أمك .. أبنك حد قريب منك أوى . حد دمه بيجرى فى دمك .................. تجدى نفسك مضطرة تبعدى
الناس من كتر ما تعودت تلبس وشوش مباقتيش عارفه وشها الأصلى فين واللى زهق وقرر ينزع القناع لقى نفسه مش عارف.. لقى نفسه مش قادر... فبقت صورته مشوهه منزوعة الملامح . بقى لا طايق نفسه ولا الناس مستحملاه . ( إلا من رحم ربى طبعا ) .. مبقولش ان ده الحل . ومبقولش انى صح . بالعكس أكيد اللى قادر يصلح ويستحمل أفضل منى بمراحل .. كل اللى بقوله إنى لاقادرة أغير ولا أقادرة أستحمل. قلت... أسافر........)
يكمن للوهلة الاولى تحس ان دا هروب... لكن بالعكس.... دا عدم قدرة على الاحتمال وبيكون نتيجتة وخيمة لو الواحد ماتخذش اجراء حتى لو صعب على النفس
مش كل الناس زي بعضها فيه اللي ربنا مديلة قدرة على الاحتمال وفيه اللي ما بتحملش
انا احييك بشدة على وقوفك في وجه الظلم ونصرتك للحق لكن للأسف مش كل الناس عندها القدرة دي.... ومش كل الناس بيكون حظها زي حظك وبيروحو....... ورا الشمس

مش كل اللي بيفكر في الهجرة بيكون ماعندوش انتماء.... بالعكس دا فيه كتير منهم بيكون عندهم انتماء وحب للوطن كبير جدا( والانتماء هنا للوطن والاهل والعشيرة وليس انتماء للحكومة)

الهجرة مش معناها عدم انتماء ولا معناها هروب ولا معناها اني ارمي كل سنين حياتي اللي فاتت ورا ظهري بالعكس

موضوع الهجرة من وجهة نظري مختلف كلية:::

مش معنى اني اهاجر اني مارجعش بلدي تاني.... بالعكس .... أنا باهاجر عشان اعيش انا وولادي في بيئة صحية تساعدنا على الارتقاء بالذات وتطوير انفسنا للأفضل والاستفادة بالعلم والتقدم ثم بعد ذلك نقل هذه الخبرة للبلد الام... للأهل والاصحاب والناس اللي فضلهم علينا ما نقدرش ننكره ولا نتبرا منه

وأمثلة العلماء اللي هاجروا ونجحوا نجاح باهر خارج مصركثييير ( ياترى مانجحوش جوا مصر ليه؟؟) وعادوا لبلدهم ليفيدوا اهلهم وناسهم بعلمهم.... دول ناس ممكن تقول انهم هربوا من روتين كان بيعيقهم عن التقدم وممكن تقول بدل انهم هربوا انهم بحثوا عن مكان افضل يقدر امكانياتهم ويستطيعوا فيه التقدم............ ورجعوا نفعوا بلدهم بعلمهم .....يبقى فين الهروب دا باه؟؟؟

هل حل اي مشكلة يتم بطريقة سلبية ام بإيجابية المواجهة و التصحيح ؟؟؟

و عطفا على السؤال السابق ...

هل الهروب من واقع هنا يعني بالضرورة نجاح هناك ؟؟؟

ممكن تقولي انت ح تواجه مين؟؟؟؟؟ سفهاء القوم؟؟؟ ح تصحح ايه؟؟؟؟؟اكتر من 30 سنة من الفساد والبلطجة؟؟؟؟
نعم يا سيدي أغلب من ترك هذا الواقع الاليم( وخصوصا اللي اتقرصوو جامد منه) نجحوا هناك
طيب ليه ما تحدوش الصعاب هنا زي ما بيتحدوها هناك؟؟؟؟
اقولك ليه
لما يكون فيه قانون ما بيفرقش بين صاحب السلطة والغلابةة من عامة الشعب
لما ما يكونش فيه روتين بالي انقرض من جميع البلاد ماعدا بلدنا
لما يكون فيه عدالة في توزيع الثروات.... مش 20% اوو اقل هما اللي مستواهم المعيشي كويس والباقي ....... ربنا يعوض عليهم( دا مش كلامي دي دراسات لسة قارياها في باب الساسة في المنتدى)
لما الغلابة ما يخافوش من اول مايو ساعة العلاوة( مش علاوة من هنا وبعد اقل من أسبوع زيادة في الاسعار بمعدل مرتين اكتر من العلاوة)
لما ولما ولما ...... ساعتها ح يكون تحدي الصعاب ليه نتيجة

فيه شباب كتيييير بيتحدوا الصعاب في بلدهم وبيفشلوا وبيقفوا على رجليهم تاني.... باقول لهم ربنا يوفقهم ولا يقنطو من رحمة الله اهم لسة شباب والطريق ادامهم طويل

لكن لما العمر يتسرق من بين ايديك وانت لسة بتحاول وبتفشل وولادك بيكبروا ادام عينيك وانت بتتمنى لهم بيئة خالية من التلوث : البيئي والسمعي والبصري
الدخان اللي اصبح السمة المميزة لهواء المحروسة
القمامة التي اصبحنا نجدها على الطرقات حتى في ارقى الاحياء
الالفاظ التي يندى لها الجبين وتدخل مسامعك حتى وانت داخل بيتك قافل بابك على نفسك....لما ابني ييجي يسألني يعني ايه يا كذا ويا ابن كذا!!!!

ساعتها ح تقف ادام مين واللا مين؟؟؟ ح تحمي ولادك ازاي؟؟؟؟

لسة النقاط اللي متفقة معاك فيها..........
وللحديث بقية ...

 

 

[abysaleh]

اقتباس المشاركة الأصلية كتبت بواسطة Resalah حمدالله على السلامة يا بيرو وحشتينا

اقتباس المشاركة الأصلية كتبت بواسطة Resalah والله يا بيرو موضوعك هو اللى جه على الجرح

ميرسي يا رسالة..... كلنا جروح يا رسالة

والله الجروح كترت ومش لاقي الدوا
جرحي على جرحك واللي جرحه الهوا
على الاطبا بلفلف وحالي بقا بالبلا
اروح لمين ينجدني ويوصف لي دوا

(افتكاسات)

 

 

[abysaleh]

اقتباس المشاركة الأصلية كتبت بواسطة محمدابوسمرة بسم الله الرحمن الرحيم

اقتباس المشاركة الأصلية كتبت بواسطة محمدابوسمرة عارفين انا عايز اهاجر ليه انا اتربيت فى وسط ريفى جميل يعنى انا فاكر قريتى وهيه لسه مدخلهاش الكهرباء فاكر زكرياتى مع الجيران والى عايز حاجه يستلفها من التانى مكنش فيه فوارق بين الناس والناس طيبه ومجامله وكله بيشارك كله فى كل المناسبات المفرحه والمحزنه كله بيخاف على مشاعر الثانى كل ده فاكره كنت اتمنى الوضع يستمر هكذا ولكن ليس كل ما يتمناه المرء يدركه سبحان من يغير ولا يتغير مع انى عايش فى مصر سلطان زمانى بنام برحتى واسهر براحتى والعب براحتى والمصلحه شغاله بس لما بانظر بنظرة طائر محلق واحاول انظر للمستقبل الذى ينتظر ابنائى يصيبنى الرعب علشان تواكب المجتمع الذى تعيش فيه يجب ان تتوفر فيك الصفات التاليه (الكدب--النفاق--الغش--الرياء--)هذه متطلبات العيشه الهنيه فى مصر المحميه بالنسبه للتعليم الاخوه الافاضل قتلوا هذا الموضوع بحثا وكذلك الصحه ولكن الطامه الكبرى هى طبيعة تعامل الاشخاص فيما بنهم البعض سواء على مستوى العائله او الزماله والصداقه او الجيره شىء محزن عندما يصل الامر ان تشك فى ابتسامة الاخرين لك هل هى ابتسامه رضا ام ابتسامه صفراء عندما تطلب النصيحه ولا تعلم هل الناصح يريد لك المصلحه او بيدخلك فى شجره عندما تقدم يد الخير والعون ولا تجد الا كل حقد وضغينه عندما يكون رد الجميل الكره عندما تنعدم الشفافيه بين الاشخاص وبعضهم عندما لا تامن على حريتك وحقوقك وادميتك عندما يكون حبك لدينك ومصلحة ابنائك اهم اهدافكك فى الحياه عند كل ذلك يجب ان تهاجر وحيث ان كل مازكرته سابقا اصبح موجودا بما لا يدع مجال للشك يجب ان تهاجر وحيث ان الفرصه متاحه للهجره يجب ان تهاجر وصدق الحق حين قال(الم تكن ارض الله واسعه) لكل ذلك انا ههاجر

أبو سمرة....تحياتي
للأسف الوضع بقى زي ما بتقول كده بالظبط

وانا اهيب بالشباب الواعد الصاعد اللي بيحب بلده وما بيفكرش في الهجرة انه ينظر لنفسه أولا ويحاول من تغييرها قبل ان يشتكي ويندد باندثار الأخلاق

لو عايزين تغيرو بجد لازم تبداو بانفسكم .... والله معكم ويحميكم

واللي ناويين ع الهجرة أملا في معيشة أفضل لهم ولأبنائهم خالية من الملوثات البيئية المختلفة.... يحفظكم الله ويرعاكم..... ولا تنسوا اخوانكم في بر المحروسة....
.......اللي مالوش خير في أهله مالوش خير في كندا........

 

 

[abysaleh]

اقتباس المشاركة الأصلية كتبت بواسطة أحمد باشــا الحقيقة ان نظام الحكم نجح ان يبث في الأجيال الصاعدة فكرة ان مصر بلد الحكومة و موش بلد المصريين ... و راغبي الهجرة بيهاجروا لكي يجدون وطن و جنسية بدلا من وطنهم المفقود و نجحت الشلة الفاسدة المفسدة في زرع ضعف الإنتماء لمصر في قلوب المصريين علشان محدش يحاسبهم على فسادهم و سرقاتهم لدرجة ان خبر مثل عدم وجود مبلغ تريليون و 272 مليار جنيه مصري من خطة الموازنة اصبح لا يسترعى انتباه احدكم و لا يحس انها امواله التي تسرق و تنهب و يعبث بها في حين انه يحاول معرفة كل صغيرة و كبيرة عن كندا و ان للمولود منحة 150 دولار كندي شهريا بذمتكم موش حاجة تغيظ ؟؟؟ و معلهش انا بأعتذر لكم ان انا غردت خارج السرب و ازعجتكم .... لكن عذري ان عنوان الموضوع يحمل فكرة مراجعة النفس ... لكن الموضوع نفسه غير ذلك اطلاقا مع تحياتي

أحمد باشا.... تحياتي
وعدتك اني اقولك على النقاط اللي متفقة معك فيها

انا متفقة معاك مئة في المئة ان الحكومة نجحت في زرع ضعف الانتماء.... ودا واضح ومتجلي بدءا من المناهج الدراسية ...خصوصا التاريخ.... اللي اصبحت مهمشة وتدرس هوامش الامور وبالتالي الاجيال الصاعدة بتتربى وهي مش عارفة اصلا يعني اية كلمة انتماء؟؟؟؟انتماء يعني نعمل ايه يعني؟؟؟؟ للاسف مش فاهمين وماحدش فهمهم....يبقى ازاي يطلع عندهم حاجة ما يعفوهاش ولا يفهموها؟؟؟

راغبي الهجرة بيهاجرو بحثا عن وطن وجنسية بدلا من وطنهم المفقود.....وأحب أضيف....ان دول اللي عندهم انتماء بجد وعارفين يعني ايه انتماء ومالاقهوش في بلدهم راحو يدورو عليه بره .....راحو يدورو على حد يقدر انتمائهم ويفهمه ويقدر انسانيتهم ويحترمها لكن للأسف المصري تهان انسانيته في بلده وخارج بلده طول ما هو مصري
انا ف نظري دول احسن من اللي بيهاجروو هجرة مقنعة ...كالسفر لدول الخليج مثلا.... بحثا عن الاموال والعيش الرغد.....ولا يهمهم انتماء ولا معاملة ولا غيرة .....وبيعيشوا طول حياتهم هناك ... بل فيه بعض النماذج اعرفها شخصيا ما بينزلوش اجازات نهائيا ولما بتيجي سيرة مصر بيقولو..... للأسف..... ربنا يكفينا الشر(على فكرة انا عايشة ف الخليج حاليا ودا احد أهم الاسباب اللي خلاني افكر مرة تانية ف موضوع الهجرة بشكل اكثر جدية.....علشان اكسب انسانيتي وماتحولش لنموذج من نماذج الهجرة المقنعة )

بالنسبة للمبلغ المسروق .... طبيعي جدا انه لا يسترعي انتباه الشعب المصري..... ماهما واخدين على ان البلد بتتسرق من زمان .. ايه الجديد؟؟؟؟ اللي يهمهم العلاوة اد ايه.... زودوا الاسعار اد ايه؟؟؟؟؟ لكن مهما قالو ونددوا وشجبوا وصوتهم علي واتنبح كمان........ايه النتيجة؟؟؟؟؟؟الكلاب تعوي والقافلة تسيييييييييييييييييييييييير.....
وعلى فكرة الخبر دا مش لا يسترعى انتباه أحد مننا احنا بسسسسسسسس... لا دا لا يسترعى انتباه اي فرد من افراد الشعب المصري...... اسال كده اي واحد غلبان راجع من شغله ونازل متمترمط من الاتوبيس.... اساله وشف اذا كان سمع عن الخبر اصلا....ولما سمعه ايه اللي ح يتغير..... دا ممكن يقولك.... يعني المرتبات ح تقل؟؟؟؟؟هو دا اللي يهمه

وطبعا يهمنا اعانة الطفل .... وعلى فكرة هما 300 دولار مش 150 ..... ودي بتاخدها من قبل ما تاخد الجنسية طالما انت مقيم دائم ..... لكن باه ال 150 جنية معاش بتوع واحدة مصرية غلبانة رايحة جاية على التامينات علشان تصرفهم وكل يوم يقولولها الورق ناقص ... اختام ناقصة..... الخ( وبرضه دي عن مشاهدات حقيقية وانا كنت باخلص اوراق في التامينات شفتها بعيني) والامثلة كثيرة ولا داعي للسرد

متفقة معاك مليون في المية ان الحكم والحكومة نجحوا انهم يغيبوا الشعب المصري ... يعيشوه في غيبوبة.... مايفوقش منها غير على اللي يهمه وبس.....
متفقة مليون في المية ان الحكومة بتسرق في البلد ومازالت بتسرق في البلد ودي حاجة تغيظ فعلا ان لسة فيه فلوس تتسرق..... ودا يؤكد كلام اللي بيقول ان مصر اغنى دول العالم.............بتتسرق من الاف السنين ولسة محل اطماع الجميع ولسة فيها ثروات تتسرق
متفقة معاك انها شلة فاسدة مفسدة وللأسف حققت كل اهدافها وللاسف بتزيد وتنمو مش بتقل بتقوى مش بتضعف......
حسبي الله ونعم الوكيل
حسبي الله ونعم الوكيل
حسبي الله ونعم الوكيل