يوميات غزاوي - أثناء الحرب على غزة

[أحمد فاروق]

وصلتني على بريدي هذه الرسالة المليئة بضحك كالبكاء . الرسالة باللهجة الغزاوية ، وكأنها من أحد ساكني غزة .

واجا اليوم التنين والعشرين..
وكل يوم بنقول هادة أقوى يوم.. وأعنف يوم ..
لا بس بجد.. اليوم أعنف وأقوى يوم شفناه..
كنا نشوف أغلب القصف على التلفزيون .. هلقيت صار قدامنا مباشر..
طول الليل الدنيا تضوي وتطفي... زي الألعاب النارية..
بس العالم الألعاب النارية عندها من الأرض للسما.. إلا في غزة.. من السما للأرض..
هيهم وصلوا تل الهوى.. يعني بشيكل بكونوا عنا.. مش بشيكل ونص حتى..
أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين اني قاعد عالنت.. على أساس إنو الدنيا حرب لازم أضل قاعد ألطم..

تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار

..

مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..

ما علينا... الحلو في الموضوع انه شلومو بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..
وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..
وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..
والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..
اليوم قعدت أفكر أفكر ايش أعمل.. لقيت احسن اشي أعمله اني أنام .. عشان الجو بكون هدوء وفش صوت قصف (نسبياً) ..
لأنه طول الليل صوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح ..

طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها..

مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..
طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده ..
شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..
الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ ..
بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..
دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"...
بس هالمقولة بتنطبقش عالصواريخ.. ولا ايش رأيكم..؟

أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي... عشان نحكي مع الناس اللي بتصلوا من الدول العربية ..

كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي ..
ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهوة يرن..
-

ألو السلام عليكم...

-

وعليكم السلام..

-

معك فلانة من ليبيا.. الله معكم.. الله ينصركم.. الله يقويكم..

-

تسلمي يا حجة.. إدعولنا..

-

الله ينصركم ويحفظكم..

-

يلا سلام عليكم..

-

وعليكم السلام..

هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..

ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون.. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..

بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار .. حيصير اللي يشوفك يقولك منور ياحج.. الله يلطف فينا..

طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة .. وهية رياضة براميل الميا..

أول ما أفتح عنيا على طول بمارس الرياضة اليومية.. بطلع على سطح الدار بتفقد براميل الميا.. وقديش ضايل ميا.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه..

أنا لقيت حالي لهلقيت عايش قلت أكتبلكم أحكيلكم عن وضعنا .. بكرة يمكن أكون عايش بس مش قادر أكتب .. أو مش عايش من أصلو ..

إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..
ونشوفكم على خير..

 

[القلب الكبير]

لاحول ولا قوة الا بالله







حسبنا الله و نعم الوكيل يا ذا الجلال و العزة
اللهم انقذ المسلمين فى غزة
اللهم كن لهم عونا و نصيرا
اللهم ربنا جل ثناؤك و تقدست اسماؤك
اللهم لا يرد امرك و لا يهزم جندك
سبحانك و بحمدك
اللهم عليك باليهود الظالمين
اللهم منزل الكتاب,هازم الاحزاب,مجرى السحاب
اهزمهم و زلزلهم
اللهم ارينا فيهم عجائب قدرتك .. قتلة الرسل و الانبياء
ظلمت العزل الابرياء
اللهم حرر المسلمين فى غزة يا ذا الجلال و العزة
اللهم فك اسرهم و اشفى مريضهم و اكشف كربتهم
اللهم بدل خوفهم امنا يا ذا الجلال و العزة
اللهم اعز الاسلام و المسلمين و اذل الشرك و المشركين و دمر اعداء الدين و احمى حوزة الاسلام
و اجمع كلمة المسلمين على الحق يا رب العالمين
اللهم انج المستضعفين المسلمين فى كل مكان
اللهم اصلح احوال المسلمين فى فلسطين و العراق و فى كل مكان
اللهم الف بين قلوبهم و اهديهم سبل السلام و اخرجهم من الظلمات الى النور
يا ذا الجلال و الاكرام و العزة

 

 

[Ghost]

فينك يا عم احمد من زمااااااااان

 

 

[أسامة الكباريتي]

كنا نتصل بالأهل في غزة باستمرار ..
فرق التوقيت كان يجعل من مكالمتي أمرا مرهقا ..
ففي الوقت الذي أكون قد فرغت من الصلاة يكون من أطلبه قد غادر البيت إلى المسجد ..
فالفارق يترواح بين ساعة وساعة ونصف ..

زوجه حاولت معه بكل ما أوتيت من إلحاح أن يصلي في البيت .. وهو مصر على الذهاب لأداء جميع الفروض في الجامع .. مصطحبا أطفاله معه أيضا ..

قصف المساجد عادة يكون أثناء خروج المصلين عقب الصلاة .. وقد قاموا بتدمير أكثر من أربعين مسجدا بشكل كلي أو جزئي ..
عشرات الشهداء ارتقوا داخل المساجد أو في محيطها ..

مخبري سلطة رام الله كانوا حاقدين على المساجد .. فيبلغوا بأن القسام يخزن السلاح في المساجد .. بل وفي المستشفيات ..
وذلك يلقى هوى عند يهود .. مامن مسجد أرشد عنه العملاء إلا وتمت تسويته بالأرض ..

في عز دين المعارك، هبت نوّات على القطاع جلبت معها زمهريرا يقصم الحديد ..
طبعا جميع نوافذ البيوت تخلصت من زجاجها تحت رعد القصف البربري الصهيوني ومنذ اليوم الأول ..

الأمطار أغرقت خيام الإيواء المؤقت في كل القطاع .. والعواصف اقتلعت مخيمات بأكملها .. ويعرب بن قحطان يرفض إدخال أي شئ يساعد في إيواء من فقدوا بيوتهم .. وما أكثرهم ..

مصر تعاني من انحسار اقتصادي، وترفض سلطاتها تشغيل مصانع الكرافانات لكي تزود المشردين بإيواء مؤقت ..
مطلوب 20,000 بورت كابين أو كرافان أو صندوق خسبي واسع لإيواء العائلات المشردة.

مرة اتصلت حوالى الساعة العاشرة بتوقيت القدس .. فأبلغتني زوجه بأنه نائم!!!
لم أصدق .. وذهبت بي الظنون إلى المقبرة أو المشفى .. فأيقظته .. قال لي بأن القصف يخف نسبيا في الضحى فيستغل الوقت في النوم حيث لا نوم في الليل ..
طبعا هو لم يكن يذهب إلى العمل .. مدير عام في مصلحة الجوازات بالداخلية .. ومبناهم تمت تسويته بالأرض منذ اليوم الأول ..
ومين بده يروح يسأل عن معاملة تحت القصف!!!

شقيقه يقول لنا ممازحا في رد عن القساميين .. هو احنا بنشوفهم .. ماحدش بيعرف وين وكيف وإيمتى بيظهروا ..
بعدين هادول بيحاربوا مع الملائكة يعني لو شفنا الملائكة راح نشوفهم!!
ايش قصدك يا محمد؟
والله لا أمزح .. ما رأيناه من خوارق جعلنا نؤمن بأن الكثير مما أصاب اليهود ليس بفعل بشر ..
جماعتنا ماحدش بيعرف عنهم إلا انهم بيحاربوا على مداخل المدن والبلدات والمخيمات .. بس وين بالظبط ؟ الله أعلم ..
حتى اليهود ما بيشوفوهم بس بيحسوا بنيرانهم ..
وبقولولك نيران صديقة
الله يكتر منها ..


أعانهم الله وثبتهم ونصرهم ..