ناعومى كامبل عروس الصعيد !!

[فــيــروز]

نعومى كامبل عروس الأقصر

-

نعومي كامبل مع الملياردير الروسي دورونين

قررت عارضة الأزياء البريطانية السمراء نعومى كامبل، الاحتفال بزفافها على الملياردير الروسى فلاديسلاف دورونين بمعبدالأقصر، فى السابع من شهر ديسمبر المقبل.

ومن المتوقع أن يحضر حفل زفاف كامبل، البالغة من العمر 40 عاما، ودورونين «47 عاما»، لفيف من نجوم هوليود وعدد من الشخصيات المرموقة والمشاهير. وسيقيم العروسان فى فندق «ونتر بالاس»، وهو نفس الفندق الذى أقام به الرئيس الفرنسى نيكولا ساركوزى وعارضة الأزياء الإيطالية السابقة كارلا برونى، أواخر 2007، قبل أن يقترنا العام التالى.

ويعود تاريخ إنشاء فندق «ونتر بالاس» إلى عام 1886، حيث أقيم على الطراز الفيكتورى، ويضم سبعة أجنحة سكنية فاخرة تطل على نهر النيل مباشرة، وتتراوح فيه الأسعار بين 850 يورو «للجناح الرئاسى»، و1250 يورو «للجناح الملكى».

حققت نعومى كامبل نجاحا غير مسبوق كعارضة أزياء سمراء، بمساندة صديقها وراعيها مصمم الأزياء الفرنسى إيف سان لوران‏،‏ والذى أصر على ظهورها على غلاف مجلة الموضة «فوج»، كأول فتاة غلاف سمراء عام ‏1988. وظلت نعومى العارضة السوبر طوال عقد التسعينيات،‏ إلى جانب أبرز العارضات مثل كلوديا شيفر،‏ وسيندى كروفورد،‏ وكيث موس‏.‏

وتشارك كامبل منذ عام 1997 فى رعاية الأعمال الخيرية جنوبى الصحراء الأفريقية،‏ وتتعاون فى هذا الصدد مع الزعيم الجنوب أفريقى نيلسون مانديلا‏، الذى وصفت معرفتها به بأنها من أعظم الأشياء التى مرت بها فى حياتها‏.

 

[فــيــروز]

هو أى حد "يقرّر" يعمل فرحه فى معبد مصرى يروح يعمله كده من غير ولا إحِم ولا دستور !! لأ و بيقول لك "عروس الأقصر" و فرحانين أوى و كأن المعبد كان مستنّى "ناعومى" تتهبّب فيه !! طيب و فين الباشمهندس "زاهر حوّاس" يكلّمنا عن نَفَس المعازيم و الضجيج و الإضاءه و تأثيرها السلبى على الآثار !! أنا حتى الآن لا أفهم لماذا لم يعلّق أى مسئول ع الخبر العجيب ده !!

 

 

[Prof]

اقتباس المشاركة الأصلية كتبت بواسطة فــيــروز هو أى حد "يقرّر" يعمل فرحه فى معبد مصرى يروح يعمله كده من غير ولا إحِم ولا دستور !! لأ و بيقول لك "عروس الأقصر" و فرحانين أوى و كأن المعبد كان مستنّى "ناعومى" تتهبّب فيه !! طيب و فين الباشمهندس "زاهر حوّاس" يكلّمنا عن نَفَس المعازيم و الضجيج و الإضاءه و تأثيرها السلبى على الآثار !! أنا حتى الآن لا أفهم لماذا لم يعلّق أى مسئول ع الخبر العجيب ده !!

أكاد أجزم ان الباشمهندس زاهي حواس وجدها فرصة أكثر من ممتازة من أجل مزيد من التصاوير والظهور على شاشات التلفزة.
وربما يكون هناك ظرف في الدرج والله أعلم (قصد اتهام أو قصد الإساءة).

 

 

[Farida]

اقتباس المشاركة الأصلية كتبت بواسطة فــيــروز و فرحانين أوى و كأن المعبد كان مستنّى "ناعومى" تتهبّب فيه !! !!

هى حا تتهبب اكتر من كده ايه

 

 

[حازم حسن]

خلوا نفسكم حلوة وبلاش شغل المنشة والطربوش نجمة عالمية حبت تعمل فرحها في معبد الكرنك وايه يعني مش كتر خيرها انها اختارت مصر بالذات ده يمكن نص الغرب يعرفها ويعرف اسمها اكتر مايعرف معبد الكرنك
ايه المانع اننا نسمحلها تقضى وقت جميل وتنبسط بجوازها وتركز الضوء على المعبد باعتبار ان الخبر ده حينزل في كل الـ Media اللى في العالم وتجيب معاها شخصيات مهمة وعالمية وبعدين ماهي جاية بفلوسها وهوه حد حيدفع لها حاجة من جيبه
مش عارف مكبرين الموضوع كده ليه
بطلوا حقد على العالم وخلوا قلبكم أبيض زي الفانلة بتاعت فرقتكم

 

 

[mohsen]

اقتباس المشاركة الأصلية كتبت بواسطة Farida هى حا تتهبب اكتر من كده ايه

بكرة لما تتجوز ياما حتشوف هباب!

 

 

[haya]

لو ما ربطناش بين الافترا اللي بتعمله حكومتنا في استغلال القصور والمساجد قاعات لافراح ولاد الناس الكويسين ومنعها عن عامه الشعب يعني حلال ليه وحرام علي غيرهم وبين ان نجمة عالمية تعمل فرحها في معبد الاقصر كعمل دعائي فقط فانا مش شايفه ان فيه مشكلة

لو افترضنا مثلا ان ريتشرد جير او جوليا روبرت قررت تعمل فيلم وتصور مشاهد له في معبد او متحف من متاحفنا هانرفض؟
اكيد لأ لان الغرب مهوووس بحضارتنا وهاتكون دعاية ما بعدها دعايا
وفرصه فرح ناعومي في المعبد عندنا فرصه لتنشيط السياحة
يا جماعة بصولها من زاوية تانية
الناس دول كدة كدة بيتصرفوا في البلد كأنها عزبهم ابوهم ...طيب لو احد هذه التصرفات در عائد علي الشعب المسكين هاجي انقده وارفضه ؟؟؟بالتأكيد وبدون شك الحدث ده هايكون دعايه لمصر وللسياحة واكيد وبدون شك مش كل العالم يعرف عن الاقصر واسوان لكن كل العالم يعرف عن ناعومي كمبل ؟؟فاحنا المستفيدين
الشعب مستفيد لمرة يا جماعة ايييييييييه حرام عليكم سيبوا اصحاب الفنادق والاوتيلات والموصلات والبياعين وشركات السياحة كل دول خلوهم يستفيدوا مرة حتي ولو على حساب اثارنا التاريخيه وقدسيتها

 

 

[mohsen]

هو من إمتى حواس أفندى منع المصريين من دخول الهرم؟ هو إحنا أسوأ من الأجانب؟

 

 

[حازم حسن]

وزعلانة ليه بس يا فيروز انا شايف انها دعاية ممتازة للأقصر وللسياحة في مصر

 

 

[Dr.Samo]

يوم العيد رحت أفرج المدام على مسجد السلطان حسن .....أحد التحف المعمارية
ولأن مراتى مش بتحب الأثار .....قعدت اقنعها ان عمنا أوباما جاى من اخر بلاد المسلمين يشوفه
المهم رحنا لاقينا واحد قريب زاهر حواس بيكتب كتابة
وممنوع دخول المسجد
العسكرى بتاع الحراسة قالى لو حضرتك قريب العريس أو العروسة أدخلك
طبعا شكلى قدام مراتى كان وحش .....وعملت نفسى ببص فى حتة تانية
جنب منه مسجد الرفاعى (أحد التحف المعمارية ) واللى مدفون فيه شاه إيران
الفيران والقطط بيعلبوا صلح على الشاهد بتاعه
والجامع مرتع لأى حد ......الكارثة إن فيه غرفة فى مدخل المسجد مكتوب عليها بالبنط العريض
الحزب الوطنى الديمقراطى - الدائرة الفرعية
طبعا قلت لمراتى .....يالا بينا نمشى
أنا غلطان