Arabic Discussion Forum with a Special Interest in Travel and Immigration

أحمد باشــا · 3rd June 2009, 07:34 PM

التوبيك ده هنحكي فيه كلنا سمات الشخصية المصرية المتفردة عن بقية خلق الله

في المظهر

السلوك

طريقة الكلام

طريقة التفكير

الموضوع مفتوح تماما .... كل واحد يدلو بدلوه (

) بطريقته و زي ما يحب

يالا عاوزين مداخلات ..... ناااااااااااااااااااااار

بس من غير مبالغات او تجاوز

oskasan · 3rd June 2009, 08:05 PM

عادى جدا انه يكون حلاق صحة ونقوله يا دكتور
ويكون سباك ونقوله يا باشمهندس
ويكون عسكرى أمن مركزى ونقوله ياباشا

عندنا عقدة نقص في الألقاب

وفي النهاية بعد ما تعظمله وتديله برستيجه
يطلع .....

أحمد باشــا · 3rd June 2009, 08:40 PM

في الخارج كنت اراهن على شخص ما انه مصري من طريقة مشيته و هدومه

لاحظت ان المصري لما يمشي مبيرفعش قدميه عن الأرض و غالبا الأحذية بتحتك بالأرض .... ده غير مظهر مؤلم كان بيحزنني جدا ان المصري غالبا باصص في الأرض بعكس الأجانب تلاقيه رافع راسه لفوق و فارد صدره و كتافه

في الحج .... و مع كل الجنسيات الأخرى تحس ان المصري صاحب حضارة فعلا ... يعني كنت الاحظ منظر الفلاح البسيط ماسك منديل و بيراعى النظافة بعكس جنسيات كتيره تانيه لا داعي لذكرها ... و برضه تحس احترامه للنظام

من أظرف الحاجات ... مرة قابلت 3 بنات مصريات في معسكر دولي ... هم كانوا بيدعوا انهم اسبانيات ... لكن انا من طريقة هدومهم ... و نطقهم المميز في الأنجليزية كنت عارف انهن مصريات من أول لحظة

زوجة صديق لي المانية .... كنا في منطقة ترفيهية في احدى الغابات شافت مجموعة ناس قاعدين على بعد فقالت دول مصريين .... سألتها عرفت ازاي ؟؟ قالت ان المصريين هم بس اللي بيفرشوا جرايد تحت الأكل !!!!!!!

طبعا المصريين هم اللي لما يضحكوا .... مرة ..... عيونهم تدمع و يقولو اللهم اجعله خير

اهل الريف عموما قبلي و بحري .... يتركوا منازلهم عالطوب بدون بياض الواجهات خوفا من الحسد .... و الريف عندنا بصراحة شكله قمئ جدا بسبب هذه العادة بعكس الريف في بلاد تانيه

و بمناسبة الريف .... رأيت اطفالا صغار ... لا يلبسون سوى فانلة داخلية فقط .... لأن الحفاضات موش موجودة من الأساس فيتم التصريف في الهواء الطلق أول بأول .... طبعا الطفل عليه كمية قاذورات و ذباب و بلاوي سودة .... و برضه معلقين خمسه و خميسه في شعره او خرزة زرقاء منعا للحسد .... حسد من ايه .... الله اعلم

....

hoppa · 3rd June 2009, 10:30 PM

اقتباس

المشاركة الأصلية كتبت بواسطة أحمد باشــا


	اهل الريف عموما قبلي و بحري .... يتركوا منازلهم عالطوب بدون بياض الواجهات خوفا من الحسد .... و الريف عندنا بصراحة شكله قمئ جدا بسبب هذه العادة بعكس الريف في بلاد تانيه

هذا غير صحيح اطلاقا يا استاذى الفاضل
الريف المصرى - على الأقل فى الصعيد الذى اعرفه - مشهور و معروف جدا بتزيين حوائط البيوت و يقدر اى حد ماشى على طريق القاهره اسوان الزراعى يشوفها بس اللى بالطين و الحجر و بتكون غالبا من دور واحد انما واسعة المساحة اما اللى بالطوب الأحمر و الخرسانة المسلحة فغالبا كل القرشين يدوب بيكفوا البناء و التشطيب يعتبروه كماليات مش مهمة

اما عن فن تزيين البيوت فيه مجلة اسمها الشرق الأوسط عملت عنه تحقيق و افردت صفحاتها للحديث عن هذا الفن و ارتباطه بالمناسبات (حج - عمرة - زواج...) و طبعا فيه الكثير من الصور

و انظر حضرتك

طبعا البيوت قديمة و متهالكة لان عملية تجديد التبييض دى مش بتم الا فى المناسبات لانها مكلفة
دا غير السيول اللى بتبوظه و الآتربة اللى بتطفى جماله

أحمد باشــا · 3rd June 2009, 11:28 PM

اقتباس

المشاركة الأصلية كتبت بواسطة hoppa


	هذا غير صحيح اطلاقا يا استاذى الفاضل

اطلاقا .... يا مفترية

على فكرة رسومات الفلكلور المصري على الواجهات و معانيها و رموزها .... عندي اهتمام بها من زمان .... و يمكن ابقى اعمل موضوع عنها لو ربنا أذن

بس الحالات دي محدودة و ليست عامة .... لدرجة ان معظمها مسجل ... و حاليا شبه انقرضت

العمارة النوبية هي اللي غنية جدا بالتراث ... و احتمال تكون المنطقة عندكم متأثرة بها

لو عندكم في القرية نماذج صوريها .... يبقى اتسجلت على الأقل

لكن انا بأتكلم عن عموم الريف المصري .... ادخلي على جوجول ايرث .... موش هتفرقي بين لون الطين في الأرض و المباني

أحمد باشــا · 3rd June 2009, 11:35 PM

O.S.A.M.A · 4th June 2009, 04:02 AM

أخى العزيز جداً أحمد باشا ...

الأول موضوع هايل بصراحة وفيه كلام كتير ممكن الواحد يتكلم فيه

بس أنا شايف أن أهم سمة فى المصرى ومعلش هيا سمة شوية مرتبطة بالسياسة والحالة الإقتصادية فى المحروسة
أنه بيتقبل الصدمات بصدر رحب.. لأ وكمان بيحول الحالة السيئة اللى هو عايش فيها لنكتة.. وكمان يضحك عليها... وأنا ماعتقدش أن فيه أى جنسية تتمتع بالحس الفكاهى زى المصرى يعنى أنت عارف طبعاً قد أيه أحنا بارعين فى فن الكاريكاتير وفن النكتة المرسومة على حالنا وما فيش حد أعتقد يقدر يضاهينا فى الموضوع ده ...

أنا ليا صديق رسام كاريكاتير خليجى وشخص أكثر من رائع كل الكاريكاتيرات بتاعته بتضحكنى بس عارف ليه لأن دايما فى الكاريكاتير بتاعه فيه الكاراكتر المصرى المحبوب ولما كنت باسأله أنت كده ممكن توقع نفسك فى الغلط أنك ممكن تخلى الكاراكتر ده شخص مش لطيف وتتحسب عليك ... قالى بمنتهى البساطة..
"لو الكاريكاتير مافيهوش مصرى يبقى مش كاريكاتير" ...

كل ده ممكن نقول أنه مقبول بس لحد معين عشان ما نبقاش زى ما الغالى أبراهيم عيسى قال أن شعب مصر شعب متركب على سست يعنى بيتقبل الصدمات وعايش

فأنا شايف أنها أهم ميزة فى الكاراكتر المصرى "أنه مركب سست "

dede_alkady · 3rd June 2009, 08:41 PM

الحشرية الرهيبه
معرفة اخبار الناس
تناقل الاخبار بسرعة البرق
حاجه صعبه بجد

sanaa · 3rd June 2009, 08:46 PM

المصري معروف تطلعه من وست ميت الف

لو لقيت واحد بيرمي قشر لب في الشارع وقدامه صفيحه زباله يبقي اكيد ده مصري

لو لقيت واحد بيشخص المرض اللي عندك وبيوصف لك دواء وهو مش دكتور يبقي ده اكيد مصري

لو لقيت واحد يستلف عشان يجبلك هديه يبقي اكيد ده مصري

لو لقيت حد ينده علي حد بصوت عالي في الشارع يبقي اكيد ده مصري

لو لقيت ناس يقولوا احنا بنشتري راجل ولماالراجل ده يروح يخطب بنتهم يطلبوا طلبات لا حصر لها يبقوا اكيد دول مصريين

لو لقتيت ناس عازمين اتنين وعاملين اكل يكفي عشرين يبقوا مصريين

بس كده دلوقتي ونرجع في وقت لاحق

hoppa · 3rd June 2009, 10:34 PM

اما بقى عن العادات التى ارى انها تميز المصريين عندكم التسليم بحرارة و ميييييية كلمة ازيك و عامل ايه خصوصا لو كانت مكالمة تليفونية
ولوتسليم باليد بيشدوا على اليد بطريقة رهيبة و احضان جاااااامدة بقى

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
فرض حظر التجول	ثورة مصر ... 25 يناير 2011	أحمد باشــا	1	1423	22nd November 2011 11:34 AM
كيف تبيع الترمواي	توعية جماهيرية	chemistry	9	2141	19th November 2011 10:16 AM
☼←◄ ۞ مـــ ـــدونــ ــة بــا شــ ــا ۞ ►→☼	مدونات الأعضاء	Remooo	121	10829	6th November 2011 05:08 PM
شطب احمد العزبي من نقابة الصيادلة	شؤون مصر الداخلية	tafshan	85	12301	31st October 2011 10:44 PM
سيف الإسلام القذافي يظهر في تسجيل حديث	شؤون عربية ودولية	Mafia	14	2553	23rd August 2011 12:13 AM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
دليل القادمين الجدد ...لو عاوز مساعدة ....اطلبها هنا ...و اكيد هتلاقيها	elmadysm	الهجرة إلى كندا	143	31st January 2016 05:33 PM
يبقى انت اكيد اكيد فى مصر : بعد 25 يناير	Farida	ثورة مصر ... 25 يناير 2011	4	15th March 2011 08:56 AM
انا اكيد باحلم	brain	شؤون عربية ودولية	16	19th January 2011 09:47 PM
و يبقى الله ...د.ايمن الجندى	dr-amira	منقوووووووووووولات	0	10th November 2010 09:29 AM
يبقي انت أكيد في مصر	karimnassar	موضوعات عامة ... موضوعات خفيفة ... منوعات	3	24th November 2008 02:59 PM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

موضوعات عامة ... موضوعات خفيفة ... منوعات

يبقى اكيد ... مصري