هشام الجخ ... جحا

[oskasan]

الصحف المصرية والعربية

عتابه لمصر بيعبر عن قوة حبه ليها
صعيدي من جوه مصر لكن اسلوب القائه خلى الكلام ليه معنى تانى

 

[abysaleh]

تأثره بكلمات القصيدة جامدة جداااا

أنا قريت كلمات القصيدة دي قبل كدا
هو اللي كاتبها واللا ايه.... اعتقد انها بتاعت شاعر تاني... اللي كتب على باب سفارة كندا دا بس مش فاكرة اسمه دلوقتي

 

 

[قائد مدفعيه المطاريد]

هشام الجخ رائع و ليه اكثر من قصيدة رائعه.. و اسلوب القائه طبيعى و غير مصطنع

 

 

[oskasan]

اقتباس المشاركة الأصلية كتبت بواسطة abysaleh تأثره بكلمات القصيدة جامدة جداااا أنا قريت كلمات القصيدة دي قبل كدا هو اللي كاتبها واللا ايه.... اعتقد انها بتاعت شاعر تاني... اللي كتب على باب سفارة كندا دا بس مش فاكرة اسمه دلوقتي

هي فعلا من أشعاره
بس الحقيقة اول ما قريتها قلت ده واحد كاره مصر وما بيحبش
لكن لما شوفته بيلقيها
لقيت كم حب كبير خارج منه واللى بيقوله ده عتاب الأحبة

 

 

[حشيش]

أول مره أسمع هشام الجخ كان النهارده فى موضوع لهايا عن قصيدة له بعنوان التأشيرة ... لقيت مدى كمان عامله موضوع عليها فدمجت الموضوعين ... عجبنى جداً هشام الجخ بصراحة وإلقائه ولهجته الصعيدية المصرية الجميلة ... وبعدين دورت فى محرك البحث لقيت قصيدة (جحا) اللى أوسكا حاططها هنا ووجدتها رائعة ... بجد عمار مصر ومهما عملوا فيكى اللصوص حتفضلى منجم دهب مش حيخلص ... عايزين نعمل موضوع نجمع فيه كل قصائد هشام الجخ ... مين عنده شوية صبر ويجمع لنا قصائد الجدع ده

 

 

[مودة]

دعوه لموضوعي

مدونة مودتي بلا حدود

اقتباس المشاركة الأصلية كتبت بواسطة حشيش أول مره أسمع هشام الجخ كان النهارده فى موضوع لهايا عن قصيدة له بعنوان التأشيرة ... لقيت مدى كمان عامله موضوع عليها فدمجت الموضوعين ... عجبنى جداً هشام الجخ بصراحة وإلقائه ولهجته الصعيدية المصرية الجميلة ... وبعدين دورت فى محرك البحث لقيت قصيدة (جحا) اللى أوسكا حاططها هنا ووجدتها رائعة ... بجد عمار مصر ومهما عملوا فيكى اللصوص حتفضلى منجم دهب مش حيخلص ... عايزين نعمل موضوع نجمع فيه كل قصائد هشام الجخ ... مين عنده شوية صبر ويجمع لنا قصائد الجدع ده

ممكن اكون الجدعاية اللي عندها استمتاع بتجميع كل اشعاره
لان هشام الجخ لون جديد في الشعر وحصل على لقب هويس الشعر
في قصايد لهشام مكتوبه وفي قصايد متصوره

حجيب الاول المكتوبه وبعدين اقلكم على المتصورة
على فكره له قناة يوتيوب باسمه
اولها ثلاث خرفان

القصيدة باللغة العامية ما عدا المقاطع المكتوبة باللون الاحمر يُرجى قراءتها باللغة العربية الفصحى
خرفان 3
ودي حكاية وكان يا ما كان ..
ولا يحلالي اي كلام ..
الا بذكر النبي الهمام ..
عليه الصلاة والسلام

3 خرفان
ومعزاية
وشجراية
وبير بترول
وديب فجعان

3خرفان ما يتاكلوش في يوم واحد
ما يتهضموش

راح للخروف
اتخن خروف
قال يا خروف ؟؟؟
عيال اخوك متنعنعين ومتنغنغين
وانت هنا في اسوأ ظروف ؟؟
يادي الكسوف !!
راح الخروف
علشان خروف
ضرب الخروف
الديب حيسكت ؟؟؟؟؟؟؟؟؟؟؟
راح للخروف
تالت خروف
شفت الخروف ؟؟!!
ضرب الخروف
احميك انا
وابات معاك في الدار هنا
واديني بس انت مكان
راح الخروف
علشان خروف
إدّاه مكان

يوماً سنقراُ في الجريدةِ يا بلادي انّنا كنا خرافْ
سيجفُ هذا النفطُ فوقَ جلودِنا
ونودّعُ السبعَ السِمانَ ونلتقي ألفاً عِجَافْ
سيُدَوِّنَ التاريخُ اسماءَ الملوكِ العادلينَ
الصابرينَ
الساكتينَ
الكاتمينَ الصوتَ بينَ شعوبِهم .. مثلَ الزرافْ
سيحاكمُ التاريخُ حكامَ العروبةِ كلِّها
وسينزعُ الاظفارَ منهم في سبيلِ الاعترافْ
إني احبك يا بلادي مرغما
واقول شعرا يا بلادي مرغما
والشعر إن مسَّ السياسةَ يستحيلُ مصائبا
والشعر إن مسَّ الصعيديينَ مثلي
يستحيل كحدِّ سيفٍ لا يخافْ
انا لا اخافْ

من كام سنة بِنْهِشّ بإدينا الفيران؟؟؟
ونقول ما ندَّخلش في امور الجيران !!!
من كام راسمين رجولتنا ادب
ناقشين إدينا نقش حنة
وقلنا سنة
ورمينا من إيدنا سلاحنا وقلنا هدنة
وبلدنا بِكْر بتُغتصب
يِعلاَ صوتها غصب عنها نِتْهِمْهَا بالشَغَب !!
يا بلاد ماليها الاَّ العجب
يا ( معرَّمين ) شعر وادب
هي الرجولة تتوزن وقت الغضب غير بالغضب ؟؟؟
هو اللي متَاخد غَصَب مش برضه يتاخد غصَب ؟؟
يا بلاد ماليها الا العجب
يا ( معرمين ) شعر وادب
الوزن هو اللي اختلف ولا الميزان اللي اتقلب ؟

من كام سنة بنسأل "بهية" مين قتل
واحنا اللي قاتلينه بإدينا !!
مدِّينا إيدنا للغريب وف بعض عضِّينا وعَادِينا
مين اللي ظالم في الحكاية .. ومين جبان ؟
مانلومش ع الديب اللي خان
احنا اللي خرفان بالوراثة
الصبر وارثينه وراثة
والطاعة وارثينها وراثة
والـــ حكم وارثينه وراثة
وحاجات كتيرة مش وراثة
احنا خدناها وراثة

انا كل ما اتذكر نحية العلم يسرح خيالي
كان صوتي لسه عيالي .. بس عالي
كنت احسّ اني بهزّ المدرسة
كان العلم من فرحته يرقص على الساري شايله
طب كنتو ليه بتعلمونا نحفظ البرّ وجمايله
طب كنتو ليه بتعلمونا نكره الظلم وعمايله
لمّـا انتو ناويين تسجنونا في ارضنا
كان ايه لزوم العلم .. وهمومه .. ورزايله
طب كنتو سبتونا بهايم كنا نِمْنَــا مرتاحين
ازاي ابيع ارضي وعارف ان جسمي اصله طين
طب كنتو علمتونا مثلا اننا من اصل تركي
او اوروبي
ان جسمنا اصله حلاوة او مِلَبَّس
اشمعنى طين ؟؟؟
طب ولما الطين يروح .. ايه اللي فاضل ؟؟
ولمين نغني ونفدِي روح ؟؟ ولمين نناضل ؟؟؟؟
ولمين اعود واشتاق واحب واغير واكافح ؟؟
ولمين اغني واقول ( بحبك يا بلد) والحب طافح ؟؟

لاموا عليَّا الناس
عايزيني اقول اشعار في "محمد الدرة"
مش قايل !!!
ما انا لما قلت زمان يا بلادي يا ( رحبة )
قالوا ده واد سافل !!
واللي اتلَوِتْ مني واللي اتقَمَص مِنِّي
ونزلت عنيهم م الخجل في الارض
وبَهْدَلُوني وحَدَّفوني لبعض
وقالوا برضك عيب .. القاعة فيها بنات !!!!
طب يعني وفلسطين مش برضه فيها بنات ؟؟
والله دي فلسطين نسوانها رجالة
هما اللي عمَّالة واحنا اللي قوَّالة
عندينا تِبْقَى الست وَلَدها طول الباب وتخاف يروح مشوار
وهناك حريم من غَضَب
شايفين عيالهم دهب
وعشان ما يلمع زيادة لازم يدوق النار
وتقولوا اقول اشعار !!!!!!!!!
مش قايل

هما 3 كلمات
نعم .. اكيد .. طبعا ..
وطول ما فيه جُبَنَا .. فرعون بيتفَرْعَن
والشعر اصله جبان
اللي يقوله جبان
واللي يعيده جبان
قولنا بلاش نكتب والحرب اولى بْنا
قالوا حرام والنبي خلُّولْنا اولادنا
خايفين على ولادهم م الجنة ونعيمها
شوفتوش خيابة و همّ
الاسم رجالة والاسم عندنا دم
دي ام موسى ( المرة )
خافت على ولدها .. رمته في قلب اليم
واحنا ( بنتسولق ) وبنتشوي قرارات
تطلع قراراتنا صورة جماعية على صفحة الجُرنان
يا ما اشجع الفرسان
وتقولوا اقول اشعار .. مش قايل

همست في وِدْني ( بَحِبَّك ) ..
كان جسمها مفرود والخمرة عامياني
وبياض إديها كان بيزعق لما تعدل شعرها
الواد بيعرج م الرصاصة اللي في رِجْلُه
شدِّت حزام الروب
وبانت زي شيء معرفش شعري يوصفه..
كانوا العساكر قربوا
والواد متبت ع الحجارة اللي ف إديه
مدّت إديها وقَّفِت كل الساعات
صوت الكاسيت نبَّهني اني ف شقتي
كانوا العساكر قربوا
بيقربوا بيقربوا
والواد متَبِّت ع الحجارة اللي ف إديه
وَقَعِت قزازة البيرة من إيدي على طرف السرير
الواد صرخ في مخبأه
فاتلفتت قلقانة خايفة لاتجرح
جريت على الصوت العساكر
وابتدى صوت الرصاص يملا الجبل
دوَّرت عندي في الدولاب على حاجة تنفع لجل تِتْحَزَّم لي بيها
ما التقيت غير شال اخويا اللي اتقتل تحت الجبل
كان برضه يعرج لما يمشي من الرصاصة اللي في رجله
وكان متبت ع الحجارة اللي ف اديه
مين اللي خانك يا وطن ؟؟؟؟؟؟؟؟؟؟؟؟؟؟؟؟؟؟؟؟ ؟
قلعت حَلَقْها لما عَوَّرني ف رقبتي
وحطته جنب السرير
نامت على الارض العساكر لجل تسمع دَبِّة الواد اللي لسة مستخبي
اتكسف صخر الجبل من وقفته
هيَّج رماله ع العساكر
سامحيني يا وحدك
مقدرش اعيش هارب
انعس في حضنك كيف
والرملة في الصحرا واقفة وبتحارب

أعطوني عاما تقريبا لأجيدَ اللغةَ العبريةْ ..
فالجاري في وطني هذا ..
أخجلني صدقا أن أكتبَ شعرا باللغةِ العربيةْ


ودى القصيدة بصوت الشاعر هشام الجخ

mediafire.com gwzjfz2jmun

 

 

[مودة]

دعوه لموضوعي

مدونة مودتي بلا حدود

2-البغبغان

كان يوم مَطَر ..
البغبغان جُوَّا القَفَص طَلَّع لِسانُه لعصفورين فوق الشجر ..
خَلِّيكو سايقين العناد ..
العِشّ قاد ..
وخسِرتُو ويَّاه الولاد .. لَـمَّا انفَجَر ..
هو انتو حِمْل السِيل ؟؟ ولا حِمْل المطر ؟؟
كان فيها إيه لو تِعْمِلُوا زيِّي وتقولوا زَيّ ما يقول البَشَر ؟؟..

ردُّوا علِيه العصفورين : لَوْ عَ الوِلاَد .. البَطْن ولاَّدة ..
والعِشّ مَهْمَا يقِيد ..
صخر الجبل عَنَاقِيد ..
نِفْرِشْهَا سِجَّادة ..
وانتَ اللي فرحان بالقَفَـص ..
أصْلَـك ( قَفَص ) !!..
كَتَمُوا الهوا جُوَّاك و نَسُّوك ان ما بين الحياة والموت .. نَفَس ....

 

 

[مودة]

دعوه لموضوعي

مدونة مودتي بلا حدود

3-قصيده نانا

هشام الجخ


هذا الحلم الاحد الصمد الساكن فيا
ماازلت وبرغم الثورة تحكمني حكما ملكيا
نانا البت الدوشة الظيطة
المغرب تنزل في الاستاد انا كنت دهل صغير لسة
بسرح شعري من الضهرية
وشايف شعرها نازل يدلع على خدها
المكوة البايظة كأنها عارفه معادي معاها اشتغلت وحدها
فرحت بيا سلالم بيتنا وانا نازل بتنطط فرحة
قلعت عنها حجاب الطرحة واعدت تدعي
شم المدخل ريحتي عرفني
غمزلي بعينيه عرفته كشفني كسفني
ضربته في عينه وطرت
زعق فيا وقالي هتفضل برضه صغير مهما كبرت
مدخل اللي مربيني كان دايما عايش ويايا
كان يسهر في الامتحانات ويوصلنا لغاية اللجنة ويستنانا
والمرادي قالي امانة امانة
يارايح لتسلم على نانا
اصحابي عايزني اوصفها
وانا مش لاقي في وصفها زي
شعرها اسود لا مش اسود
شعرها ناعم لامش ناعم
شعرها زي اللي ملوش زي
اسمها نانا وساكنه وريدي
بس الناس بيقولوا عليها ساكنه معانا في نفس الحي
مشيها زي غرير المي
رمشها زي جدايل ضي
جدها من النوع الوحداني اللي ملوش خي
نانا كانت لما بتضحك يحلا في عيني العمر الجي
كانت لما بتجرح قلبي تحلى لقلبي قولة اي
قال وصحابي بيقولوا اوصفها
طب والله نفسي اوصفها
بس هاتولي في وصفها زي

 

 

[مودة]

دعوه لموضوعي

مدونة مودتي بلا حدود

قلبى زهد حبك

ليه يا منايا تروح
وتسيب اسير مجروح
بقى هى دى جزاتى؟
تبقى انت ماّساتى؟
ولا دى زى جروح؟
وهنام فى يوم وهقوم
وألقى الدمى ممسوح؟

كل الليالى بتشبه قلب طفل حزين
نفسه فى لبس جديد
لكن قصيرة الايد
وانا يد قلبى قصيرة
لكن مسيره يثور
ويعزل الحاكم ولا يوم يعيش مظلوم
متشوف حصل ايه فى تونس
اظن من كام يوم!!!

وساعتها يا قلبى لاعمل فرح بالدف
واجيب حصان يرقص
واصنع بايدى الخف
من فرحتى يا ناس
راح اللى عذبنى واحتل قلبى سنين
والله دا انا حاسة انى فى يوم حطين

واوعاك تقول اوهام...وانك قدر مكتوب
دى السلحفاة قال ايه سبقت فى يوم ارنوب
مهو اصله كان شبهك
طبعه كما طبعك
اتغر فى نفسه
اصبح لها مغلوب

قلبى ..وياما اتظلم
وعنيا...بكاية...تصحى على حكاية وتنام على حكاية
وبردو بكاية
تحزن..اديها بتبكى
تفرح..مفيش فايدة
هى الدموع هى
مهى اصلها غية

وعايزنى بعد ده كله...اقول قدر مكتوب؟؟؟

لا يا حبيب الروح..قلبى انا ضامناه
اصل انت مش عارف
اليوم زهد حبك
لا بقينا محتاجين ودك ولا عشقك
يلا يا شاطر روح
اليوم بنيت قبرك

 

 

[مودة]

دعوه لموضوعي

مدونة مودتي بلا حدود

دي نبذة عنه
هوه اللي كاتبة بايده في ملفه الشخصي في احد المواقع الاجتماعية

هشام كامل عباس محمود الجخ مهدي محمد علي سالم ابو جاموس
عمامي من قنا وخوالي من سوهاج
اتربيت في سوهاج ودخلت كلية التجارة هناك
كانت اياميها تبع جامعة اسيوط
حولت لجامعة عين شمس واتخرجت منها سنة 2003 وعملت دراسات عليا في ادارة الاعمال في جامعة عين شمس
اتعينت في الجامعة مسؤول عن المركز الثقافي في نفس سنة التخرج واستقلت من الجامعة في 11/ 2009
ومحدش يقول لي ليه
انا منفعش ابقى موظف من الاخر
مواليد اول اكتوبر برج الميزان يعني
بسمع حنان ماضي وانغام وشيرين ووائل جسار
بعشق منير ومارسيل خليفة وكاظم الساهر
بموت في ام كلثوم .. لكن كوكب الشرق عندي فيروز طبعا
بكتب شعر على مهلي على مهلي جدا بحترم الشعر
بحب الشعر وبذاكره وبهتم بيه ومش بقوله غير وانا عايز اقوله
بعشق عيون الناس وهي بتلمع وانا واقف على خشبة المسرح
وبموت في كلمة الله لما تطلع من الناس
وامنية حياتي اني لما اموت .. العالم كله يعرف ان هشام الجخ مات
اظن كدة كفاية كلام

نعناع الجنينه
ده تقريبا عمل مشترك في الالقاء بينه وبين خالد يوسف غناء


خالد يوسف غناءً
_____________

يا ست البنات على ايه انتي نويتي
عايني و أنظري كيف الشباب سويتي
جرحتي القلوب و العيون بكيتي
حرام أكبر حرام جرحتي و لا داويتي
****
نعناع الجنينه المسقي في حيضانه
يوم سافر حبيبي سبت البلد علشانه
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

قالت لي بريـــدك يا وُليّد الخالـــــــة
قلبى بيعشـــــقك والروح اليك ميـّالة
من بعد العشاء زاير لبيتنا تعــــــالى
اهي فرصة ل اللقى و أشرح لأمي الحالــــة
****
خالد يوسف غناءً
______________

الامس العصر بالحاره جيت متمشي
و ليه كل ما بتشوفيني يا حلوه تكشي
أهديكي السلام تأخدي السلام و تخشي
و الباب ذنبه أيه تكسريه فى وشي
****
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

هب النسيم و سامع نغم كلماتك
و عايز اكلمك و عامل حساب لماتك
من جهه الادب ... ادبك ادب عماتك
ومن جهه الجمال .. واخده جمال اماتك
****

خالد يوسف غناءً
______________

و حياتك يا خولي عندي طلب و سؤال
تعيّني فى جناينك ازرع يروق الحال
و بستانك يكون الزاد ما يهمنيش المال
و لا السكن و الهدمه مادام فى راحة البال
****
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

هب النسيم و سامع نغم كلماتك
و عايز اكلمك و عامل حساب لماتك
من جهه الادب ... ادبك ادب عماتك
و من جهه الجمال .. واخده جمال اماتك
****
رايد اكلمك كل ساعة ف وَسَعتنا
من بعد الضُهُر نركب ضهَر ناقتنا
قالت نعمل ايه لو العرب شافتنا
قلت قولي وُليّد عمي و ساقته جار ساقتنا
****

خالد يوسف غناءً
______________

سألت ايش الاسم قالوا البنات نعمات
ام صبعين رطب و الباقى بلح امهات
يوم ندهت علينا بيدها الناعمات
قلت نعمين تلاتة و اربع خمس نعمات
****
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

قالت بابا بابا ريت هناك خياله
خمسين ناقه لجح و العبيد شياله
قاللي يا بت عريسك جايلي فى القياله
ارفضله طلب و لا انتى ليه مياله
****

خالد يوسف غناءً
______________

و العنب البناتي طالل على المحبوبة
و اللي داقه مرة ما يعرف أبدا توبة
و يعود له تاني النوبة بعد النوبة
ما دامت قسمته على الجبين مكتوبة
****
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

قالت تَقصُد ايه يا اللي انت بتغازَلنا
واقف في طريقنا لو طلعنا نزَلنا
معاهدين بعضَنا من صغرَنا و ما زلنا
ما بنفوت بعض حتى التراب يعزلنا
****

خالد يوسف غناءً
______________

يا رايد الجمال حوّد على الخرطوم
دي بنات السودان كيف السمك بيعوم
أما بناتك يا مصر فوسطهم مبروم
يحنوا للغريب و ابن البلد محروم
****
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

سقوني السم هال علقم وقايا وقايا
و حرموني النظر من ناس يريدوا لقايا
خلاص راح العمر ايام قليله بقايا
بشكيك لله ياللي كنت السبب فى شقايا
****

خالد يوسف غناءً
______________

ملكه و بنت ملوك و زاد جمالك ربي
و المانيكير محضر و الحنن متربي
التليفون ضرب ع السفرة .. حكمة ربي
قالت لي ألو .. قال لها أحنا جروبي
****
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

يا ام عقدٍ دهب تلاتة و تلاتين كاره
ما شالت بطن ما وردت على بكاره
قلّت عينيها فينا الكل وقعوا سكارى
و سقطت في الحليب لم بينت له عكاره
****

خالد يوسف غناءً
______________

و حبيت لي بنيه واخده الاعدادي
قلت اسافر سنه وا رجع أوام للوادي
رجعت من السفر و رحت بيتها انادي
لقيتها اتجوزت شايله الولد بتدادي
****
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

فى جمالها ما ريت لا مسلمين لا نصارى
ريقها كالعسل كما سكر العصاره
مديت أيديا اجنى الجمال ببصاره
قالت ماستواش اخضر و جنيه خساره
****

خالد يوسف غناءً
______________

قالت لى بريدك يا وليّد العمه
يا وردة ربيع وسط الزهور تتشمَ
ضمتها علي و حست حنان الضمه
قالت إمتى فى العش السعيد نتلمَ

****
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

يا ست البنات ما احلى الجمال الفيكي
مهما اوصف و اسوّي الوصف ما مكفيكي
الروح و الجسد تاخدي و ما يكفيكي
بسْ خلي العيون علشان تعاين فيكي
****

خالد يوسف غناءً
______________

السبت و الأحد باب الحبيب دقيته
الأتنين و التلات سر القليب حكيته
الاربع و الخميس على المخده تكيته
و ليلة الجمعه من بعد الهزار بكيته
****
نعناع الجنينه المسقي في حيضانه
شجر الموز طرح ضلل على عيدانه
****

هشام الجخ
______________

طول يا ليل طول انا فيك و لا نعسان
و كل ما اقول تطول تنقص تزيد نقصان
و كل ما اتذكرك يا وردة الأغصان
اجي انظر لغيرك ألقى النظر يعصاني
****

خالد يوسف غناءً
______________

قالت يابا يابا ريت هناك خيالة
تسعين ناقة لقح والرجال شيالة
قلتلها عريسك جاني في القيالة
ارفض له الطلب و الا انتي ليه ميالة
****
نعناع الجنينه المسقي في حيضانه
شجر الموز طرح ضلل على عيدانه