هجرة المقاطعات province nomination program - pnp

[shaikh_tamer]

الصحف المصرية والعربية

بسم الله و الحمد لله و الصلاة و السلام علي رسول الله محمد صلي الله عليه و سلم, حنحاول نتكلم عن كل شئ عن هجرة المقاطعات لانه اصبح الباب الاكبر للهجرة لكندا, و تقريبا 90% من المصريين و العرب اللي سافروا السنة ديه 2015 كانوا عن طريق هجرة المقاطعات.

طبعا هجرة المقاطعات مش الطريقة الوحيدة, و الهدف منها الحصول علي ترشيح المقاطعة اللي ممكن تحصل عليه مباشرة من وزارة الهجرة cic او من خلال المقاطعة علشان انت عامل ماهر او حرفي ماهر او معاك فلوس و عايز تعمل مشروع, يعني احنا ممكن نقدم مباشرة علي الوزراة و ممكن نقدم في المقاطعة و نطلب منها الترشيح في الوزراة و ده اسهل و اقل شروطا من شروط الوزارة الصعبة اللي في النهاية تندرج تحت نظام الاكسبرس انتري اللي اتكلم عنها الباشمهندس مصطفي في المنتدي و اعتقد انه مفيش داعي اتكلم عن نظم الهجرة الاخري لانها بالفعل قتلت بحثا هنا بالمنتدي. بس الحقيقة انت لازم تقرأ التعليمات الرسمية من موقع الهجرة الكندي و محدش يقولي فين الترجمة.. انت حتهاجر ولا حتهزر؟

طيب ندخل في موضوع هجرة المقاطعات و حتركز علي العمال المهرة بس مبدئيا الموضوع ده انا كتبته في نهاية 2015 و فيه بعض المقاطعات غيرت و عدلت في نظام الترشيح اكثر من 6 مرات خلال السنة... يعني تلغي شرط او تضيف شرط, او تطلب وظائف بعينها و ساعات بيطلبوا شروط غريبة و عجيبة!

بس السؤال ليه نظام هجرة المقاطعات؟؟

اولا لان فيه مقاطعات بعينها كل المهاجرين الجدد بيروحوا عليها, لان اي جنسية عايزة تبدأ حياتها من مكان فيه حد ممكن يساعدها فيه, يعني العرب بيفضلوا مقاطعتين ثلاثة و كذلك الهنود بيفضلوا المقاطعة اللي فيها نسبة هنود عالية و هكذا.. و الموضوع ده بيخل بالتنوع في كل مقاطعة و بيخلي مقاطعات فاضية خالص من المهاجرين و مقاطعات تانية فيها مهاجرين كتير و علشان كده هما قرروا يعملوا الفلترة ديه من الاول علشان يلزمك تقعد فترة معينة (غالبا سنتين) و غالبا حتلاقي شغل و ممكن تبدأ في اجراءات شراء بيت و تستقر بالمقاطعة انت و اولادك من بعدك.

طبعا انا مش محتاج اقول ان معظم العرب المهاجرين بيروحوا الاماكن اللي فيها بدل البطالة عالي و انا شخصيا اعرف صديق في اوروبا لما جاتله مقابلة شغل الزامية اصحابه عزوه و كلهم قالوا ليه ان شاء الله ربنا حيستر و حتترفض :)

ما عدد مقاطعات كندا اسم كل مقاطعة؟

طبعا المقاطعات اللي عليها الاقبال الاكبر فديه صعب جدا جدا تلاقي او حتي تسمع عن حد جاله ترشيح فيها الا لو كان بالفعل في كندا نفسها و اهمهم البرتا و اونتاريو و بريتش كلومبيا.

اما المقاطعات الاقل اقبالا في الجنوب زي مانيتوبا و ساشكوان او الساحلية زي برنس ادوارد و نوفا سكوشا نيو برنزويك و المقاطعات الشمالية فديه هي اللي حيكون عليها الشغل كله..

مرة تانية الموضوع ده في نهاية 2015 و فيه مقاطعات غيرت في شروطها ست مرات خلال السنة و علشان كده لابد من التحديث المستمر.

مصلطحات شائعة:

Pnp

ده اختصار لكلمة province nomination program

و حتلاقي الحروف الاولي من اسم المقاطعة متبوعا بالاختصار ده

يعني مثلا برنامج مانيتوبا اسمه mpnp و نوفاسكوشا اسمه nspnp

CIC

Citizenship and Immigration Canada

هي الوزارة التابعة للحكومة الفيدرالية الكندية و هي التي تصب بها كافة انظمة حتي اللي مش بتعدي علي الاكسبرس انتري لازم ترجع و تتعامل في النهاية مع السي اي سي لانها اللي بتصدر الفيزا في الاخر.

EOI و ده اختصار لكلمة

Expression of interest

و ده اول خطوة "عادة" في موضوع المقاطعة و هو عملية التقديم و في بعض المقاطعات بتتكلم انت ليه عايز المقاطعة ديه بالذات و في مقاطعات تانية بتقول معلومات عنك و مؤهلك و فيه مقاطعات معندهاش الخطوة ديه اصلا و انما بتبعت ورقك علي طول.

AOR

Acknowledge of receive

و ده لما ربنا يكرمك و تبعت ورقك فالمقاطعة بتعتلك اميل تقولك ورقك وصل.

ITA او ATA

Invitation to apply or advice to apply

و ده لما EOI يتقبل بشكل مبدئي و تتم الموافقة عليه و ده تقريبا 70% من مشوار الهجرة لانهم في دراسة ملفك بيتاكدوا من مطابقة الكلام اللي انت قلته في EOIعن طريق مراجعة ورقك مش اكثر. و ده غير الانفيتشين بتاع السي اي سي اللي بيجيلك علي بروفايل الاكسبرس انتري.

Nomination

تم ترشيح يا معلم و تكمل بقي مع السي اي سي و ابقي ادعيلنا.

فيه نقطة مهمة لما تدور علي ترشيح المقاطعة:

اولا لازم تشوف مهنتك ريجوليتيد ولا لا, يعني محتاج ترخيص محلي من المقاطعة نفسها لمزاولة المهنة ولا لا, لاني اعرف ناس ريجوليتد و جالهم الترشيح و طالبوهم خلال 60 يجيبوا التصريح وده طبعا مستحيل و المفترض انهم يراسلوا الجهة المسئولة عن التصريح داخل المقاطعة و يحاولوا يتواصلوا معاها باي ايملات و ممكن يدفعوا فلوس طلب الترخيص بس برضوا ترشيحهم مش بيكون مضمون, في المقابل انت ممكن تكون مهنتك ريجوليتد فعلا بس انت تدور علي مهنة قريبة منها و طبعا اقل منها بس مش ريجوليتد.

حضرتك حتدخل علي موقع الجوب بانك

https://www.jobbank.gc.ca/occupation_search-eng.do

و بعدين تختار المدينة و المقاطعة و الوظيفة اللي انت عايز تشوفها ريجوليتد ولا لا:

و بعد السيرش اختار التاب اللي اسمه

Education & Job Requirements

و بعدين في المنتصف حتلاقي اسم المقاطعة و منها حتعرف اذا كانت وظيفتك ريجوليتد ولا لا. و لو ريجوليتد فالموقع حيمدك بكل المعلومات اللي انت ممكن تحتاجها عن الترخيص من حيث اسم الجهة المنوط بها الترخيص و ايملاته و تليفوناته و عناوينه.

حاجة تانية هي الصدق, يعني متحاولش تقول اي كلام يمكن يثبت عدم صحته في المستقبل, و خلي بالك ان المستقبل ده ممكن يكون خمس سنين مش بس مجرد انك تحط الرحال هناك, ممكن تقول انك معرفتش تجيب شهادة خبرة انك اشتغلت في مكان و رفض لو هي ديه الحقيقة و ده شائع في كل الدول العربية بس متكذبش علشان لو ثبت كذبك بطريقة ما ممكن يلغوا ملفك.

طيب اول خطوة قبل لما نتكلم في المقاطعات هي انك تحفظ الموقع ده عندك و تضيفه في المواقع المفضلة و كل شوية تدخل علي كل لينك فيه و تشوف ايه اللي حصل و لو فيه جديد تشارك بيه معانا هنا:

https://www.cic.gc.ca/english/immigrate/provincial/apply-who.asp

في اخر الموقع حتلاقي لينك للعنوان الاليكتروني لاحدي عشر مقاطعة هي عدد كل مقاطعات كندا و انت مطالب تدخل و تشوف شروط كل مقاطعة علي حدة.

فيه برامج مدن (مش مقاطعات) بتفتح و تقفل داخل مقاطعات بعينها بهدف زيادة المهاجرين في البلد ديه بعينها, في مانيتوبا فتحت بلد من فترة و قفلت و حاليا فاتحة مدينة صغيرة اسمها موردن و ده الموقع بتاعهم:

https://www.mordenimmigration.com/

فيه ناس بتتلخبط بين ترشيح المقاطعة تحت نظام الاكسبريس انتري و ترشيح المقاطعة خارج نظام الاكسبريس انتري, الاول لازم تكون مؤهل اصلا من خلال اللغة و معادلة الشهادة يعني من الاخر جايب 67 فما فوق, بينما الثاني مش لازم تكون مؤهل و بيقبلوا سن اكبر و درجات لغة اقل بس غالبا بيكون من شروطهم انك تكون مقيم بالفعل في المقاطعة (بالنسبة لمقاطعات الكعب العالي) او ان بينزلوا لستة وظائف معينة بالنسبة للمقاطعات اللي طالبة مهاجرين كتير و البرامج ديه غالبا مش بتكمل اسبوع و تقفل فعايزة متابعة مستمرة.

1-مقاطعة البرتا

للاسف برنامج البرتا قفل في اغسطس الماضي و الموقع الرسمي بتاعهم مفيهوش معلومات عن المؤهلين بس بعد شوية سيرش لقيت انهم كانوا منزلين لسته وظائف بيقولوا انهم مش مؤهلين يقدموا

و شروطهم من كام موقع مش رسمي بيقولوا انه مستحيل ان اللي زينا يقبلوه لان ببساطة شرطهم للتقديم ان المتقدم يكون ساكن في البرتا... شكرا البرتا.

2-بريتش كولومبيا

البرنامج قفل في سبتمبر الماضي و المعلومات عنه من المواقع الاخري بيقول انهم بيقبلوا 3 اشكال لهجرة المقاطعات: الاكسبريس و الاسكيلد و البيزنس.

نفس نظام البرتا بتطلب المقيمين او المشتغلين بالفعل في بريتش كولومبيا و بتقول ان الاعداد اللي بالفعل عندها من المهاجرين يكفي و يفيض.. شكر بريتش كولومبيا.

3-مانيتوبا

و انا باعتبرها من اهم وجهات المهاجرين الجدد بتقبل العدد الاكبر منهم كل سنة و اعتقد انه عيب اتكلم عن مانيتوبا في حضرة المهندس شاوي جزاه الله كل خير لاني ساعدني بشكل شخصي, بس بشكل عام مانيتوبا منزلة برنامج بيطلب انك تكون عارف صديق او قريب هناك.

المقاطعة فاتحة البيزنس و الاسكيلد.

الموقع ده حاليا فيه كل تفاصيل الاسكيلد:

https://www.immigratemanitoba.com/mpnp-for-skilled-workers/eligibility/eligibility-swo/

4-مقاطعة نيوبرونزويك

اعتقد انها من اهم المقاطعات اللي المفروض نركز عليها لعدة اسباب اهمها ان جوها كويس و مناسب لينا كمصريين و عرب و هي المقاطعة الوحيدة اللي بتتكلم انجليزي و فرنساوي في نفس الوقت يعني اولادك اتوماتيك حيتكلموا اللغتين و هي المقاطعة الوحيدة اللي ليها حدود مع امريكا في نفس الوقت اللي بتطل علي الاطلنطي و اخيرا لما تقوم الحرب بين امريكا و روسيا حتكون المقاطعة ديه بعيدة عن ساحل روسيا. المقاطعة شروطها بخلاف ال 67 انك تكون حضرت ندوة عنها في خلال السنتين اللي فاتوا, مع العلم انهم في شهر يوليو عقدوا ندوة في القاهرة و الاسكندرية, المقاطعة تعطي الاولوية لمن له قريب مقيم هناك و للمتحدثين بالفرنسية و عندهم ليسة بوظائف معينة لهم الاولوية:

https://www.welcomenb.ca/content/wel-bien/en/immigrating_and_settling/how_to_immigrate/new_brunswick_provincialnomineeprogram/New_Brunswick_express_entry/EligibilityRequirements.html

و يكفي المقاطعة شرفا ان فيها افضل انواع السلمون في العالم.

5-نيوفاوندلاند

و ده في الشمال علي الاطلنطي و في عز الصيف درجة الحراة بتكون عندهم 15 و 20 يا معلم بس بيطلبوا عرض عمل علشان تروح هناك.

المعلومة اللي انا بأكد عليها هي ان المقاطعة ديه من اكثر المقاطعات اللي محتاجة مهاجرين بس في الحقيقة انهم معاويج و طالبين عرض عمل, بس كل ده حيتغير مع الحكومة الجديدة في كندا, علشان كده انا باتوقع ان انظمة الهجرة تتغير قريبا جدا في المقاطعة ديه و اعتقد انها جديرة بالتركيز و يكفيها انها بتنتج اكبر كمية جمبري مياه باردة في العالم, تقريبا 20% من انتاج العالم من الجمبري.

6-الاقاليم الشمالية الغربية

نفس مشكلة نيوفاوندلاند, محتاجين ناس بس مش بيقولوا و عددهم بيقل و مجالات العمل بتزيد, و ان كانت المقاطعة ديه بتتميز انها اسرع المقاطعات في وقت الترشيح, اي مهاجر بينجح انه يدخل كندا و يشتغل هناك 6 شهور بس بياخد الترشيح بس برضوا طالبين عرض عمل و اعتقد ان الكلام ده حيتغير قريبا جدا بس مهم جدا المتابعة.

7-نوفاسكوشا

و ديه كل ملفات الهجرة من بعد 2013 عدت عليها, و هي المقاطعة الثالثة علي الاطلنطي بعد نيوفاوندلاند و نيوبرونزويك.

المقاطعة كانت عاملة ليستة وظائف بس اعتقد ان الباشمهندس مصطفي سعد هو خير من يحدثنا عنها لانه بالفعل جاله ترشيح منها.

8-اونتاريو

و ديه للاسف طالبة شرط وجود عرض عمل .. شكرا انتاريو.

بس اخواننا اللي معاهم ماجستير او دكتوراه مش مطلوب منهم عرض عمل, بيدفعوا 1500 دولار كندي و بيدرسوا ملفهم بس برضوا عايزنهم من اللي عايشين هناك .. مرة تانية شكرا انتاريو

9-برينس ادوارد

دول ناس طيبين اوي, كانوا بيقولوا اول السنة اكتب كلمتين انت ليه بتحب المقاطعة و ابعت رقم ملفك في الاكسبريس انتري و احنا حنشوف..بس للاسف محدش سمع صوتهم بعدها, يمكن علشان الاعداد المسموحة ليهم ضعيفة بس مفيش ضرر من المحاولة.

المقاطعة فيه مقاطعات تحت نظام الاكسبريس و خارج نظام الاكسبريس و بيزنس

ادخل علي اللينك و ابعت EOI اللي حتلاقيه في اخر الصفحة

https://www.gov.pe.ca/immigration/index.php3?number=1052516&lang=E

بس لازم تكون جايب 67 درجة علي الاكسبريس علشان تقدم.

المقاطعة كان فيها احتلال انجليزي و فرنساوي و اهلها عندهم اعتزاز بيها و رغم انها من اعلي المقاطعات في الضرائب الا انها متقدمة بشكل كبير في مصادر الطاقة و الابحاث العلمية. و جوها دافئ الي حد ما و ضمت الاجتماع الذي اسفر عن ولادة دولة تعرف اليوم باسم كندا.

المقاطعة فيها نشاط الصيد في المياه العميقة و ده بيخلي فيها انواع نادرة من الاسماك بس هي بتهتم اكثر بالزراعة و منها اكثر من ربع انتاج كندا من البطاطس لان فيها ايرلندنين كتير و الايرلنديين مبيتعلموش من دروس التاريخ.

 

[shaikh_tamer]

10-ساشكوان

فتحت ساشكوان نظام هجرة خارج الاكسبريس انتري لمدة اسبوع تقريبا و نظرا للاعداد الكبيرة للمتقدمين قفلته مباشرة ثم فتحته مرة اخري و قفلته مرة اخري. المقاطعة كبيرة و اكتشفوا فيها البترول و بالفعل لحقت بجارتها مانيتوبا. المقاطعة لها حدود مع امريكا و تهتم بالزراعة و فيها اكبر تنوع بين انظمة الهجرة بين الحرفيين و المهرة و حتي اصحاب خبرة المزارع.

المقاطعة طالبة فقط 60 درجة علشان تقدم و هي تنافس مانيتوبا في اجتذاب المهاجرين الجدد و شروطها كتير و كويسة و محتاجين نركز عليها كويس لانها مش صعبة.

11-ياكون

و ديه مقاطعة في الشمال الغربي, لها حدود مع السكا و هي ابرد مقاطعات كندا و مصدر الدخل الاساسي عن طريق التنقيب عن المعادن ثم صناعة الاثاث لوجود غابات خشبية ثم الفراء, حيث تعد من اهم مصادر الفراء هناك.

المقاطعة حاليا فيها اقل عدد من المهاجرين علي الاطلاق و اكثر عدد من السكان الاصليين مقارنة بغيرهم في كل كندا.

المقاطعة بتسمح بهجرة المقاطعات تحت الاكسبريس انتري و الحرفيين المهرة و البيزنس.

المقاطعة بتطلب عرض عمل بس بشكل استثنائي مش حنقول شكرا ياكون لان فكرة الحصول علي عرض عمل مش مستحيلة لانهم اساسا مش لاقيين حد يروح عندهم بسبب البرد و اعتقد ان فيه امل كبير للافراد و خصوصا الحرفيين اللي اشتغلوا في شركات دولية في مصر او الخليج انهم يحصلوا علي عرض عمل بمجرد مراسلة الشركات هناك.

-------------------------------------------------------------------------------

بشكل عام انا مكتبتش كل التفاصيل عن كل مقاطعة لانها متغيرة و متنوعة و املي اننا نساعد بعض هنا في البحث عن اي معلومة جديدة او مقاطعة حسنت او سهلت شروط القبول فيها فالموضوع ده لابد ان يكون محدث و متجدد باستمرار.

نصيحة لوجه الله و عن تجربة من منتديات اخري, متخليش شروط المقاطعة (حتي لو مش مناسبة ليك فعلا) تخليك متقدمش, يعني مثلا قدم في الاقاليم الشمالية و قدم في ونيوفاندلاند حتي لو معندكش عرض عمل, و قدم في مانيتوبا حتي لو معندش صديق او قريب و قدم في نيوبرونزويك حتي لو محضرتش ندواتهم و صدقوني فيه ناس نجحت في الحصول علي الترشيح لسبب بسيط جدا هي حرص الحكومات ديه علي التنوع .... يعني بيلاقوا كل المقدمين من قارة اسيا العظيمة و مفيش عرب او افارقة و بالتالي ممكن جدا جدا يوافقوا عليك لو كان ملفك مقنع ليهم حرصا علي التنوع. و التجربة مش حتخسر و مجرد سعيك بيخليك تاخد ثواب حتي لو محصلش نصيب في مرة بس اكيد بتاخد اجر السعي.

نصيحتي لكل شخص بيفكر في الهجرة ان الموضوع عايز اهتمام و متابعة منك, يعني مثلا فيه مقاطعات بتطلب منك انك تتكلم عن نفسك او انت ليه اخترت المقاطعة ديه بالذات و في الحالة ديه اعمل سيرش عن المهرجانات الشعبية بتاعت المقاطعة و سيرش عن تاريخ المقاطعة و المشاهير من الممثلين و السياسيين فيها و عن مصادر دخلها و عن مدي ملائمة مؤهلك للوظائف المطلوبة و دور كويس في الانشطة الثقافية و الفنية بتاعت المقاطعة و مفيش مانع تدور عن الكوميونيتي العرب اللي فيها و اسماء اشخاص عرب نجحوا في المقاطعة و اشترك في صفحات الفيسبوك للمقاطعة, دور كمان علي مشاكل المقاطعة و المعارضة بتقول ايه و الحزب الحاكم فيها ايه توجهاته لان ده ممكن يفيدك في طريقة عرضك لنفسك, اتكلم كويس عن نفسك في ضوء احتياجات المقاطعة, يعني شوف وظيفتك مطلوبة ولا لا و حتي لو مش مطلوبة اقنعهم بنفسك, يعني لو انت محاسب كلمهم انك خبرة متميزة و انك اشتغلت في اماكن مهمة و لو انت دكتور اتكلم عن اي كورسات اخدتها قولهم انك عايز تحقق نجاح اكبر من اللي حققته في بلدك, و لو عندك اي مواهب رسم او رياضة او بطولة اتكلم عن نفسك و اقنعهم انهم مش حيندموا لو رشحوك, ممكن اوي تتكلم عن انشطة خيرية اشتركت فيها او حتي فرق احدثته في مجتمعك, ممكن تتكلم عن والدك او الدتك الناجحين الملهمين لك و ازاي انت انسان مرهف الحس(اكذب مش مشكلة). اكتب خطاب الترشيح بشكل جيد و لو انت اسلوبك في الكتابة مش جامد روح دور علي مترجم يعملك الكلام ده بشكل احترافي.اهم حاجة متقولش ديه مقاطعة حلوة و انا بحبها :) و لو ملقيتش اي مقاطعة مناسبة ليك روح دور علي اميل رئيس الوزراء بتاع كل مقاطعة و كلمه و راسل الجرائد المحلية و التلفزيونات و قولهم انا موجود و خليهم يغيروا قوانين و شروط الترشيح للمقاطعة, الناس ديه بتسمع للناس العادية مش زي المسئولين اللي عندنا في مصر...

و ربنا يكفينا شر المقاطعة

كلمة عتاب اخيرة لاخواننا المصريين (اللي انا منهم), هي ان محدش حياخد رزقك منك و الارزاق بيد الله يهبها لمن يشاء و لو عرفت معلومة يا عم المصري مش لازم تكتمها بل حدث بها اخيك المصري و متخافش علي رزقك, صدقني الهنود و شرق اسيا بيعلموا كده و ده خلاهم باعداد مهولة جدا في كل كندا, و لما يكون فيه عرب كتير فده خير مش شر و حيفتحلك ابواب رزق كتيره. و صدقني نظرة سريعة في اي منتدي انجليزي حتتكتشف ان مفيش اسرار و ان المعلومة اللي انت ممكن تكون فاكرها سر, فيه علي الاقل من 300 الي 400 مليون شخص في شرق اسيا عرفها قبلك.

زمان و انا صغير كان ابي الله يرحمه يعمل استاذا جامعيا بالمملكة العربية السعودية و حكي لي عن صديقه الذي استقبله في منزله بمجرد وصوله الاراضي السعودية و اصر ان يبيت معه في نفس المنزل (كلاهما كانا بدون اسرتيهما) ثم عاد الصديق السعودية الي مصر و عندما هم ابي ان يدفع له ثمن الاقامة و ثمن العفش رفض رفضا قاطعا فقال له ابي لكنك ساعدتني, فقال له الصديق و هذا دين في رقبتك و جزاءه ان تنظر الي قادم جديد الي السعودية بغض النظر عن اسمه او حاجته فتساعده, حينها ستكون رددت الي المعروف, تلك هي الباقيات الصالحات التي تزيل عنك مشاكل عويصة بدون سبب منطقي معقول.

ياريت كلنا نهتم بالتحديث المستمر للموضوع ده.

و دعواتكم لي

 

 

[shaikh_tamer]

مهم برضوا اننا ندخل نشوف موقع اليهودي كوهين بيقول ايه لان فيه قدر لاباس به من الخبرات
https://www.canadavisa.com/canada-imm...igration-b6.0/

 

 

[aadmak]

جمعت اطراف القضية بالكامل .. ربنا يجزيك كل خير ..

 

 

[eltahan]

thanks for all these information :)

 

 

[ahmed_fouad]

موضوع اكثر من وائع وانا رأيي ان مقاطعات زى برونزويك ونيوقاوندلاند لازم نركز عليها اكثر والله المستعان
posted via mobile device

 

 

[shaikh_tamer]

جزانا الله و اياكم يا فندم, و العفو يا فندم.
اللي انا نسيت اكتبه في الموضوع ان كلا المقاطعتين حتنشأ مشاريع للتنقيب عن البترول قريبا كلاهما في سانت جونز, اصل المقاطعتين فيهما بلد اسمها سانت جونز. و حينها حتزود الوزارة الاعداد المرشحة علشان يشتغلوا في المشاريع الجديدة.
بالتوفيق

 

 

[burner]

يا جماعة انا عندي استفسار
انا جالي ITA اني اقدم علي نومينيشن بتاع اونتاريو بس مش عارف اعمل ايه في الموضوع
انا عارف ايه الورق المطلوب و بجهزة بس محتاج اعرف ازاي اقبل الدعوة و ازاي ابعتلهم الورق "علي اي عنوان" و ازاي ادفع الرسوم بتاعتهم
يا ريت لو حد يساعدني في الموضوع ده
و ان شاء الله اول ما اخلص الموضوع هاكتب توبك بالتفصيل علي اللي حصل بكل الخطوات

 

 

[shaikh_tamer]

اقتباس المشاركة الأصلية كتبت بواسطة burner يا جماعة انا عندي استفسار انا جالي ITA اني اقدم علي نومينيشن بتاع اونتاريو بس مش عارف اعمل ايه في الموضوع انا عارف ايه الورق المطلوب و بجهزة بس محتاج اعرف ازاي اقبل الدعوة و ازاي ابعتلهم الورق "علي اي عنوان" و ازاي ادفع الرسوم بتاعتهم يا ريت لو حد يساعدني في الموضوع ده و ان شاء الله اول ما اخلص الموضوع هاكتب توبك بالتفصيل علي اللي حصل بكل الخطوات

مبروك يا Burner
بس انت جالك الترشيح علي اساس اي نظام؟
يعني انت قدمت علي اي اساس لان الورق بيختلف حسب النظام اللي انت قدمت فيه.
العنوان هو:
Ontario Immigrant Nominee Program (OINP)
Ministry of Citizenship, Immigration and International Trade
400 University Avenue, Ground Floor
Toronto, Ontario
M7A 2R9

بس خلي بالك الورق و الفورم بتتختلف باختلاف النظام اللي انت قدمت عليه.

لو انت من العمال المهرة اللي قضوا سنتين او معاهم عرض عمل المصاريف حتكون كالتالي:

• Nominees with a job offer (within the Greater Toronto Area): $2,000
• Nominees with a job offer (outside the Greater Toronto Area): $1,500
• Nominees with a job offer from a foreign company making an investment under the Investment Component: $3,500

و بتكون بشيك مصرفي او امر دفع او بنك درافت او امر دفع بريدي مقبولين الدفع لوزير مالية اونتاريو.
الفترة 60 يوم والتفاصيل كتير بس كلها علي الموقع الرسمي بتاعهم اللي ارجو انه يكون اللي انت اتعاملت معاه بالفعل لان للاسف فيه نصابين كتير.
لو عايز تتواصل معايا علي الخاص انا تحت امرك.

 

 

[burner]

اقتباس المشاركة الأصلية كتبت بواسطة shaikh_tamer مبروك يا Burner بس انت جالك الترشيح علي اساس اي نظام؟ يعني انت قدمت علي اي اساس لان الورق بيختلف حسب النظام اللي انت قدمت فيه. العنوان هو: Ontario Immigrant Nominee Program (OINP) Ministry of Citizenship, Immigration and International Trade 400 University Avenue, Ground Floor Toronto, Ontario M7A 2R9 بس خلي بالك الورق و الفورم بتتختلف باختلاف النظام اللي انت قدمت عليه. لو انت من العمال المهرة اللي قضوا سنتين او معاهم عرض عمل المصاريف حتكون كالتالي: Nominees with a job offer (within the Greater Toronto Area): $2,000 Nominees with a job offer (outside the Greater Toronto Area): $1,500 Nominees with a job offer from a foreign company making an investment under the Investment Component: $3,500 و بتكون بشيك مصرفي او امر دفع او بنك درافت او امر دفع بريدي مقبولين الدفع لوزير مالية اونتاريو. الفترة 60 يوم والتفاصيل كتير بس كلها علي الموقع الرسمي بتاعهم اللي ارجو انه يكون اللي انت اتعاملت معاه بالفعل لان للاسف فيه نصابين كتير. لو عايز تتواصل معايا علي الخاص انا تحت امرك.

الاستاذ الفاضل shaikh_tamer
شكرا جدا علي المعلومات اللي انتا قولتهالي
بالنسبة لجالي ازاي
فانا جالي انفيتيشن علي الاكونت بتاع الاكسبرس انتري نفسه اني اقدم ورقي عشان النومينيشن بتاع اونتاريو و كاتبين ان قدامي 45 يوم عشان اجهز الورق و اقدمة
غالبا هاقدم ورقي علي اساس هيومن كابيتال تحت ال FSWP
المشكلة دلوقتي الورق اللي جهزته (صور طبعا) حوالي 120 ورقه بما فيها صور الباسبورات ليا و لمراتي و ابني فهل لازم اعمل كل الورق ده سيرتيفايد كوبيز و ممكن اعمل الكلام ده منين في مصر لو تقدر تفيدني يبقي جزاك الله خير