ماذا لو كان أبوك زبالاً؟

[يجعله عامر]

الصحف المصرية والعربية

هل تحترم الزبال وتقيّمه بناءً على شخصه وما يصدر عنه لا من خلال مهنته التي يحتقرها مجتمعك المصري؟

طيب :::: مممممم


ماذا لو كان أبوك زبالاً؟
ماذا لو تقدم لخطوبة ابنتك أو أختك زبالاً؟
ماذا لو أحبّكِ أختاه زبالاً وأراد الارتباط بك ؟
ماذا لو رشّح زبالاً نفسه لرئاسة دولتك؟
ماذا لو تحوّل الزبال إلى داعية ديني أو قائد أو وزير أو أستاذ جامعة؟

=========

هذه لكل من يحمل عنّا ما يزعجنا ولا نستطيع حمله .

 

[hoppa]

هى الزبالة زبالة اخلاف و فكر و طريقة حياة و الا فقر و بس
الفقر عمره ما كان عيب
بس نحسبها كويس
محدش يتمنى انه والده يكون زبال او يتربط ببنت زبال او يزوج اخته لزبالى ليه...

لانه احتمال كبير يكون جاهل
احتمال كبير يكون فقير لدرجة انه ميكونش عنده عزة نفس حتسألونى ايه عزة النفس حقولكم المعنى فى بطن الشاعر
كمان مش هيبقى عنده سعة الافق اللازمة لتطوير ذاته يعنى الزبال فى مجتمعنا زبال لانه عاوز كدة يشتغل بالطريقة القديمة مش عايز مثلا يبقى عامل نظافة فى شركة نظافة تتخلص من الزبالة بطريق صحية مش تديها للخنازير تاكلها....

يعنى من الآخر الزبالين دولا عار على المجتمع المتحضر و دا يفرق كتير عن عامل النظافة اللى بيقوم بدوره باحترام لمهنته اللى لازم تتطور زى اى شئ تانى فى الحياة يتطور...

 

 

[مدى]

اقتباس هل تحترم الزبال وتقيّمه بناءً على شخصه وما يصدر عنه لا من خلال مهنته التي يحتقرها مجتمعك المصري؟

احترامه كشخص انسان ده أكيد..
بالعكس الواحد بيحس بحرج شديد لما يمر بواحد منهم..
ناس فعلا تحس انهم منكرين ذاتهم طواعيا أو غلبا لأجل لقمة العيش..
وياريت فينا اللي بيقدر..

اقتباس ماذا لو كان أبوك زبالاً؟

مش هكون وقتها مدى اللي هيا دلوقتي..
اولويات حياتي واسلوب تفكيري وكله هيختلف..
مش عارفة هكون متقبلة الوضع ولا لا..ده في علم الغيب..
ولو اتقبلته هيكون لأي مدى..!
بردوا مش عارفة اتخيل..

اقتباس ماذا لو أحبّكِ أختاه زبالاً وأراد الارتباط بك ؟

لازم يكون فيه توافق اجتماعي يا أستاذ عامر..
يعني لو انا زي دلوقتي..مش هينفع..
الحياة مش اثنين لوحدهم..
الحياة الزوجية دي مجتمع ..

اقتباس ماذا لو رشّح زبالاً نفسه لرئاسة دولتك؟

اقتباس ماذا لو تحوّل الزبال إلى داعية ديني أو قائد أو وزير أو أستاذ جامعة؟

هنا اتلخبطت..
يعني هل تقصد وظيفة..!
ولا ايه ..

كونه يتحول لداعية دينية..لا حرج..
الدعوة مش قصر على شخص دون آخر..
بل كلنا كأمة ده مايميزنا..
وزير أو قائد..مش عارفة احدد..
أستاذ جامعة وبيشتغل في الزبالة كمهنة..!
مش اعتقد هيكون كده في العالم..
ولا هو كان بيشتغل فيها بعدين اتعلم وطور نفسه لحد ماوصل لمنصب أستاذ جامعي..!
لو كده يبقى لا أقل من اني ارفع له القبعة أحتراما..


دم بخير..

 

 

[فــيــروز]

سأتألّم كثيرا لو كان أبى رحمه الله زبّال ..

ليس لعدم تقديرى له و لكن لمعرفتى كيف سيحكم عليه الآخرون دون أن يعرفوه على حقيقته التى أعرفها أنا ..
سأتألّم لأن مهنته ستكون هى السُبّه التى يحلو للبعض أن يهينوا بها غيرهم واصفين إيّاهم بالزبّالين أو ولاد الزبّالين ..
سأتألم لأنّه سيكون يعمل بمهنه شديدة الخطوره و الصعوبه دون أدنى احتياطات الأمن و السلامه وقد يُصاب بأمراض فتّاكه و هو يلملم قاذورات الآخرين الذين يحتقرونه ..

بالمناسبه .. رأيى الشخصى أن عمل الزبّال -فى مجتمعنا- يستحق الاحترام أكثر بكثير من عامل النظافه الذى نسى موضوع عزّة النفس هذا -وقد يكون له بعض الحق- ولم يرَ غضاضه فى أن يتحوّل لمتسوّل و كلّنا عارفين ده .. الزبّال بقى مش بيشحت ده بيشتغل شغلانه تشق على كثيرين و يتقاضى عنها أجرا ولا يمد يده .. و ماقالش لأ أشتغل فى شركة النضافه اللىّ هتدّيه مُرتّب ملاليم لمُجرّد أن يرتدى البدله البرتقالى و يقف يشحت من الناس شحاته مُقنّعه .. أصحاب المهنتين غلابه و مساكين و يعملون بظروف غير آدميه إطلاقا بس لو احتجنا بشدّه للمقارنه يبقى ستأتى لصالح الزبّال

 

 

[مدى]

اقتباس المشاركة الأصلية كتبت بواسطة فــيــروز سأتألّم كثيرا لو كان أبى رحمه الله زبّال .. ليس لعدم تقديرى له و لكن لمعرفتى كيف سيحكم عليه الآخرون دون أن يعرفوه على حقيقته التى أعرفها أنا .. سأتألّم لأن مهنته ستكون هى السُبّه التى يحلو للبعض أن يهينوا بها غيرهم واصفين إيّاهم بالزبّالين أو ولاد الزبّالين .. سأتألم لأنّه سيكون يعمل بمهنه شديدة الخطوره و الصعوبه دون أدنى احتياطات الأمن و السلامه وقد يُصاب بأمراض فتّاكه و هو يلملم قاذورات الآخرين الذين يحتقرونه .. بالمناسبه .. رأيى الشخصى أن عمل الزبّال -فى مجتمعنا- يستحق الاحترام أكثر بكثير من عامل النظافه الذى نسى موضوع عزّة النفس هذا -وقد يكون له بعض الحق- ولم يرَ غضاضه فى أن يتحوّل لمتسوّل و كلّنا عارفين ده .. الزبّال بقى مش بيشحت ده بيشتغل شغلانه تشق على كثيرين و يتقاضى عنها أجرا ولا يمد يده .. و ماقالش لأ أشتغل فى شركة النضافه اللىّ هتدّيه مُرتّب ملاليم لمُجرّد أن يرتدى البدله البرتقالى و يقف يشحت من الناس شحاته مُقنّعه .. أصحاب المهنتين غلابه و مساكين و يعملون بظروف غير آدميه إطلاقا بس لو احتجنا بشدّه للمقارنه يبقى ستأتى لصالح الزبّال

اول مرة انتبه ان في فرق بين الزبال وعامل النظافة..
تشكري ع الملحوظة الغالية..

 

 

[hoppa]

اقتباس المشاركة الأصلية كتبت بواسطة فــيــروز بالمناسبه .. رأيى الشخصى أن عمل الزبّال -فى مجتمعنا- يستحق الاحترام أكثر بكثير من عامل النظافه الذى نسى موضوع عزّة النفس هذا -وقد يكون له بعض الحق- ولم يرَ غضاضه فى أن يتحوّل لمتسوّل و كلّنا عارفين ده .. الزبّال بقى مش بيشحت ده بيشتغل شغلانه تشق على كثيرين و يتقاضى عنها أجرا ولا يمد يده .. و ماقالش لأ أشتغل فى شركة النضافه اللىّ هتدّيه مُرتّب ملاليم لمُجرّد أن يرتدى البدله البرتقالى و يقف يشحت من الناس شحاته مُقنّعه .. أصحاب المهنتين غلابه و مساكين و يعملون بظروف غير آدميه إطلاقا بس لو احتجنا بشدّه للمقارنه يبقى ستأتى لصالح الزبّال

مش عارفة ليه الموظف فى شركة النظافة هيشحت...بجد مش فاهمه

على فكرة فى قنا لما بدأ المحافظ عادل لبيب مهمة التطوير كانت اكبر مشكلة عنده حكاية الزبالة دى
عمل ايه تفتكرى
شغل شباب جامعى و دبلومات يعنى متعلمين كعمال نظافة و مسئولين عن عربات نقل الزبالة و التخلص منها و يديروا المنظومة بكاملها و لم يسندها لشركات اجنبيه ليس لها معرفة بنظام المصريين و تعاملهم مع الزبالة....

نسيت اقولك ان مرتب الواحد منهم كان فى حدود 300 جنيه....عارفة انك مش هتصدقينى بس انا متأكدة من الكلام دا


و بالمناسبة كمان تفتكرى واحد عايش فى ظروف غير آدمية و راضى بانها غير آدمية مش لانه مش قادر يغيرها لأ لآنه راضى بيها بمعنى راضى .....يتقال عليه غير انه معندوش عزة نفس

 

 

[فــيــروز]

اقتباس المشاركة الأصلية كتبت بواسطة hoppa مش عارفة ليه الموظف فى شركة النظافة هيشحت...بجد مش فاهمه على فكرة فى قنا لما بدأ المحافظ عادل لبيب مهمة التطوير كانت اكبر مشكلة عنده حكاية الزبالة دى عمل ايه تفتكرى شغل شباب جامعى و دبلومات يعنى متعلمين كعمال نظافة و مسئولين عن عربات نقل الزبالة و التخلص منها و يديروا المنظومة بكاملها و لم يسندها لشركات اجنبيه ليس لها عرفة بنظام المصريين و تعاملهم مع الزبالة.... نسيت اقولك ان مرتب الواحد منهم كان فى حدود 300 جنيه....عارفة انك مش هتصدقينى بس انا متأكدة من الكلام دا و بالمناسبة كمان تفتكرى واحد عايش فى ظروف غير آدمية و راضى بانها غير آدمية مش لانه مش قادر يغيرها لأ لآنه راضى بيها بمعنى راضى .....يتقال عليه غير انه معندوش عزة نفس

مش عارفه أنا الحقيقه حضرتك زُرتى "القاهره" أو "الجيزه" آخر مرّه إمتى !! و شُفتى عمّال النظافه فيهما شكلهم إيه و بيعملوا إيه !!

مشروع "عادل لبيب" له كل الاحترام بس مين قال إن الحال فى "قنا" هو الحال فى "القاهره" و "الجيزه" !! يا ريت كان يبقى عندهم شجاعة تطبيق نفس الفكره هنا بس انتِ عارفه الأمر لا يخلو من سبّوبه و عقدة خواجه .. فعفوا يا عزيزتى أمّا تبقى تجربة "قنا" تُطبَق هنا نبقى نقدر نقارن .. لكن طول ما هى غير مُطبَقّه حال عُمّال النظافه صعب و يضطرّهم للتسوّل و مش مصدّقه أمّا تنزلى "القاهره" إن شاء الله تشوفى بعينك ..

أمّا عن التغيير .. يا ترى تقصدى بيه إيه !! إن الزبّال يبطّل يشتغل زبّال ولاّ تصوّرك إيه عن تغييره لحياته التى لا يرضى بها إلاّ قليلون !!

 

 

[hoppa]

اقتباس المشاركة الأصلية كتبت بواسطة فــيــروز أمّا عن التغيير .. يا ترى تقصدى بيه إيه !! إن الزبّال يبطّل يشتغل زبّال ولاّ تصوّرك إيه عن تغييره لحياته التى لا يرضى بها إلاّ قليلون !!

التغيير هو فى آلية العمل نفسها
هو الفوضى الى حصلت الفترة اللى فاتت دى مع مرض انفلونزا الخنازير مش سببها الاول ان مصر فيه مراعى خنازير عايشة على الزبالة
الزبال اللى شعال عمل حر ده هل يا ترى بيتخلص من الزبالة بطريقة صحية و الا بيفتش فيها الاول و بعدين يرميها للخنازير او ايا كانت الحيوانات اللى بيربيها ده اللى قصدى على عزة النفس

هو بصراحة الاصل الاصل ان كل اسرة تخرج زبالتها بنفسها و تبقى فى حاويات فى الطريق العام
موظفى شركات النظافة بينقلوها آليا مش بيلمسوها حتى و بعدين يتخلصوا منها فى اماكن بعيدة بدفنها غالبا او اعادة تدويرها
انما فى مصر لان كل شئ من غير نظام او آلية واضحة للعمل حتى بعدما عملوا رسوم نظافة على فاتورة الكهرباء الناس استسهلت و معدتش بتخرج زبالتها و كفاية الزبال القديم اللى بياخد كام جنيه ميتعدوش يشيلها من قدام الباب وكفاية على كدة و لا يهمهم بيتخلص منها ازاى رغم انهم لما حيخرجوا من الشقق الفاخرة و يتمشوا بالعربيات الفاخرة فى شوارع المحروسة حيلاقوا الزبالة فى كل مكان و ليهم دور للاسف فى الفوضى دى

 

 

[hoppa]

اقتباس المشاركة الأصلية كتبت بواسطة فــيــروز مش عارفه أنا الحقيقه حضرتك زُرتى "القاهره" أو "الجيزه" آخر مرّه إمتى !! و شُفتى عمّال النظافه فيهما شكلهم إيه و بيعملوا إيه !!

زرتهم آخر مرة الشهر اللى فات و مشفتش و لا عامل نظافة واحد بس الزبالة مالية الشوارع حتى الشوارع الكبيرة اللى مفروض انها مناطق راقية فى المهندسين مثلا

 

 

[اغابي]

اقتباس المشاركة الأصلية كتبت بواسطة hoppa مش عارفة ليه الموظف فى شركة النظافة هيشحت...بجد مش فاهمه على فكرة فى قنا لما بدأ المحافظ عادل لبيب مهمة التطوير كانت اكبر مشكلة عنده حكاية الزبالة دى عمل ايه تفتكرى شغل شباب جامعى و دبلومات يعنى متعلمين كعمال نظافة و مسئولين عن عربات نقل الزبالة و التخلص منها و يديروا المنظومة بكاملها و لم يسندها لشركات اجنبيه ليس لها عرفة بنظام المصريين و تعاملهم مع الزبالة.... نسيت اقولك ان مرتب الواحد منهم كان فى حدود 300 جنيه....عارفة انك مش هتصدقينى بس انا متأكدة من الكلام دا و بالمناسبة كمان تفتكرى واحد عايش فى ظروف غير آدمية و راضى بانها غير آدمية مش لانه مش قادر يغيرها لأ لآنه راضى بيها بمعنى راضى .....يتقال عليه غير انه معندوش عزة نفس

على فكرة كلامك صح واضيف كمان انه حاول يعمل نفس الفكرة فى اسكندرية وفشلت فقال فى تصريح للصحافة وفى برنامج 90 دقيقة - شعب قنا كان متعاون لابعد الحدود رغم بساطة اهله فى التعليم والامكانيات ولكن اهل اسكندرية متمردين جدا ورفضوا منطق النظافة والنظام
وكانت له مشاكل كتير فى اسكندرية - بسبب هدمه بعض العمارات المبنية بدون تراخيص وعشوائيات ومشوهة منظر الشوارع لدرجة ممكن العمارة تكون 14 دور مما اضطر الملاك اصحاب العمارات ان يقوموا باعمال شغب وتجمهرو امام المحافظة .
وكان يطلق عليه بدل عادل لبيب عادل رصيف نسبة الى تغيير كل الارصفة وبناء ارصفة انسب وبمميزات افضل لصالح اسكندرية لكن الناس ما كنتش ومازالو مش حابين عادل لبيب .