رحلتى إلى الاقصر وأسوان .!!!

[Badroora]

قررت انا وصديقتى شريكتى فى السكن بمناسبة اننا اول مرة ننزل اجازة مع بعض

لازم نروح نزوراى مكان وحددنا اختيارتنا ما بين سانت كاترين وشرم او

الاقصر واسوان

رسي الاختيار على اسوان قولنا خلينا نبدا من اسوان زحف على باقي مصر يعنى

مش كلة مرة واحدة لاء .

المهم هى نزلت قبلي بشهر وانا حصلتها وقررنا نروح محطة مصر نحجز التذاكر

.للسفر

ذهبا انا وهى وعرفنا ان فيه قطار نوم قولنا يسلام حيث عبد الحليم حافظ وفاتن

حمامة وفريد الاصم وهندرستم وشادية لطفى والحركات دي .

توجهنا الى شباك التذاكر وانا بقي فتحت تحقيق عن القطر

ها لو سمحت القطر دا امان

ايوة يا فندم طبعا امان

اه طيب هو عبارة عن ايه

قالى عبارة عن غرفة فيها 2 سرير

قولتله طيب مش ممكن حد يهاجم الغرفة دي بسكينة ولا سلاح قالى لاء دا امان

ومتخفيش فيه قفل من جوة ابقي سكي الباب

قولتله طيب مستوي النضافة ايه قالى ممتاز دا فندق متحرك مش قطر

قولتله وايه الامكانيات قالى بطاطين ووجبة و.........الخ

قولتله طيب هات تذكرتين قالى البطايق

قولتله انا معى بطاقة وصديقتى لاء

قالى ليه

قولتله مش مصرية معاها باسبور

قالى لاء يبقي هتقطع تذكرة اجانب فرق بينى وبينها 100 جنية

هى طبعا انزعجت جدا انه متربية ومولودة فى مصر وبتتكلم مصري افضل من

لغتها الاصلية وهو يقولها كدا

طبعا صحبتى وانا عرفاها لو بس قولتلها كلامه صح مش هنخلص وهبوظ الرحلة

قولتله دي اختى قالى ازاى قولتله من اب تانى !!!

هى طبعا من بلد افريقية تقع بين ليبيا ونيجيريا ( افتحوا الخريطة وهترفوها على

طول ) هو طبعا لن تخيل عليه انها اختى

المهم هى قالتلى مش مسافرة قولتلها فى عرضك يا شيخة قوليلي ايه اللى يريحك

وانا اعمله

الراجل اقترح علينا نقطع درجة اولى مكيف ومش هيسالونا على بطايق

قولنا ماشي

توجهت انا الى شباك التذاكر وقولتله تذكرتين اولى مكيف بكل فخر وكانى باقطع

تذكرتين على طائرة بزنس كلاس

المهم طريقتى معجبنتس الراجل اوى وحس انى بتكبر عليه انا بقي قريت الغدر فى عنية

قولتله لو سمحت هو القطر دا هيبقي نضيف ومريح قالى طبعا فيه تلفزيون وتكيف

وبوفيه قولتله متكلمش من الفرحة والاكسيتيشن مش بقيت حبه انه يحرقلى المفجأة

قولتله طيب بليز بلاش المقاعد تكون فى النص ولا فى اخر القطر قالى ماشي

قولتله هو القطر المكيف دا زي اللى بيجي فى التليفزيون فى افلام محمد فوزى

وفريد قالى دا انت هتلاقي محمد فوزى نفسه جوة فى القطر

اخدنا التذاكر وودعت صحبتي على موعد لقاء غدا الساعة 7 ونص على رصيف

7 او 5 والله ما فكره .

المهم ذهبت الى منزلى حيث اتى كل اخواتى واولادهم لتوديعي

وصباح اليوم السفر اتت امى غرفتى واحتضنتنى وظلت تبكي حسستنى انى رايحة

كندا مش اسوان بينى وبينها 15 ساعة وبس


المهم طمنتها وقلتلها اكل العيش يا امه بقي هنعمل ايه خالى بالك من اخواتى لو مت

حلال عليهم منابي المحشي اللى فى التلاجة امى ياعينى ضمتنى اكتر ليها

وقعدت تبكي .امى على فكرة

بتحب العياط زى عنيها اى حاجة تفرح تعيط اى حاجة تبكي تعيط بردوا .

المهم ظُهر يوم السفر توجهت الى غرفتى كى اجهز امتعتى حضرت امى لى سائلة

مش هتخدى سندويشتات معاكى قولتلها لاااااااااااء مش عاوزة اشيل اكل قالتلى لاء

الطريق طويل قولتلها هو احنا مسافرين على جمل دا قطر درجة اولى وفيه

بوفيه كمان

قالتلى لاء الامر ميسلمش انا هاعمل سندويشتات قولتلها طيب زى مانت عاوزة

بس بليز متكتريش كفاية بس عشرة من كل نوع

وبعد امى ما خرجت من غرفتى تذكرت ايام الرحلات المدرسية ومدرسة النجع

المشتركة بينين والسندويشتات اللى كانت بتعملها لى ....ياااااااه ايام .

عصر يوم السفر

حضر اخواتى تانى وسلموا على وودعونى و قالولى تصحبكي السلامة

بعد عصر يوم السفر بساعتين

توجهت الى محطة مصر لكى اقابل صحبتيى هناك

وطبعا فى محطة مصر عالم تانى تهنا بين الارصفة وبعد عناء ولف بين جميع

الارصفة تلاقينا قبل طلوع القطر بمافيش .

وركبنا القطار والحمدلله

يُتبع,,,,

 

[Badroora]

الرحلة داخل القطار .........

اول شيء على باب القطار كان فيه واحدبيشيل الشنط وقال هيحطها فى الامانات

قولانا لااء

شال الشنط لحد رقم الكراسي وكانت اول كرسين فى العربية من قدام شمال فى وش

التليفزيون ومكان كدا ليه باب فكرته يا اما بلكونه او كافتيريا زى اللى كانت بتقعد فيها
فاتن حمامة

وعبد الحليم

االمهم انتهينا من وضع الشنط على الرف وجينا لاهم نقطة الا وهى مين اللى هيقعد

جنب الشباك انا طبعا مع اصحابي مُدللة جدا يعنى لازم انا اللى اقعد جنب الشباك لو

بناكل وحد

هيموت وعاوز ميه طبعا انا

خارج العدد نوهائي وحاجات من دى كتير .........الخ المهم واحنا بنحط الشنط بدات

احس ان صحبتى شكلها هتبعنى المرادى ومش هتخلينى اقعد جنب الشباك ةانا اى

رحلة عندى ما هى

الا صمت رهيب وفرجة من الشباك ومتابعة كل شيء وخيال بقي ..........

قولت خلينى اكلمها وش كدا لسه لاقتها اخذت وضعها عند الشباك قولتلها

اصلي برجع فى المواصلات ولازم ابقي جنب الشباك قالتلى ولا يهمك عملت

احسابي فى اكياس زيادة

قولتها طيب من الاخر كدا معرفش اقعد كدا ع الحرف لازم ابقي جوة تنحت اوى

ورفضت وانا بقي اتغليت منها اوى طبعا دي انانية انا عرفة اقصد انى انا اللى انانية بس هما

عارفين ميولى ومحدش تنح معايا قبل كدا ..........المهم حسيت انى انهزمت قولت

ماشي لسه اليوم طويل ويا ويلك منى .........!!!!!!!!

تحرك القطار من رمسيس الى الجيزة وركن حوالى 30 دقيقة وبعد كدا بدا يتحرك

بقي وكان الليل دامس ومافيش حاجة بتظهر غير عواميد النور فقط ...

انا بقي كنت مقلقة كل شوية اقوم واقف واقف واقوم وبعدين بدات اتخنق قاعدين جنب

البلكونة ولا الكافتيريا دي والناس مش رحمة نفسها داخلة طالعة طالعة داخلة

وبدائت ريحة غريبة تظهر كأن فى جثث فى القطر .

صديقتى اعلنت انها هتتركنى للجحيم بمفردي وهى نامت ماشاء الله مافيش ثوانى مع ان القطر

غير مريح بالمرة كفاية الكافتيريا اللى قدامنا وزباينها اللى طالعين داخلين

واحنا طبعا او انا بالذات كنت بواب الكافتيريا كل ماحد يدخل ويترك الباب وتهل علينا

روايح غريبة اروح بكل غل زقة الباب قفلاه ,.

بنظرة كدا حواليا فى القطار لاقيت كل الناس اعلنت رحلتها الى الملائكة حيث النوم

العميق والشخير كأنى قاعدة فى حقل ضفادع ...

المهم قولت خلاص كل الناس نامت يبقي التليفزيون لى لوحدى يعنى اجيب القناة اللى عوزاها قمت احاول افتح التليفزيون معرفش قولت استنى المضيفة لما تيجي تفتحهولى ..........

بعد شوية جه الكمسري اديته التذكرة ومشي بعدي بكرسيين قولتله لو سمحت هو مافيش حد هنا يقضى احتياجتنا قالى ثوانى واجيلك ......

جه ويا ريته ما جه نورنى على الحقيقة المرة

قالى اؤمرى يا استاذة قولتله فين المضيفة قالى مافيش مضيفة هنا قلت امال قالى انا اللى مسؤول ..

قولتله طيب لو سمحت ممكن روتانا سينيما قالى واجبهالك ازاى قولتله افتح التليفزيون

وهى هتيجي .........قال تليفزيون ايه قولتله دا ولا ديكور قالى الله ينور عليكي

دا بقالوه 4 سنين مش شغال انا صدمت 4 سنين ولغاية دلوئتى محدش لسه بلغ عشان

يتصلح .........قالى تؤمرى بشيء تانى ...

قولتله ايوة فين الكافتيريا اللى هنا قالى مافيش كفتريا قولتله اومال ايه اللى الناس

داخلين طلعين فيه دا قالى لمؤاخذة دى دورة مايه

قولتله طيب شكرا اوى اوى اوى .................

بدات بقي اتغل مين صحبتى اللى جيت معاها فى القطر دا وكمان تسبنى وتنام وكمان

مش تقعدنى جنب الشباك .............

طلعت شوية كتب وقعد اقري شوية مافيش فايد ة باب الحمام عمال يزيق والناس مش

رحمة نفسها ........

اتغظت منهم روحت قفلاه وزقاه برجلى وبقيت اتنح مع كل اللى يدخل واقوله هتقفل

الباب وراك يقولى اه اقوله طب عدي ..........

وطبعا تقول لمين واحد مشفش رجلى راح جاى فتح الباب بكل قوته رجلى اتزنقت

وجعتنى ................

روحت كتبة ورقة بليز اغلق الباب بعد الخروج او الدخول ................

والشهادة لله الناس عددهم كتر عشان يثبتولى حسن تعاونهم

بقي كل اللى يجي جنب الباب يميل يقرا الكلام بصوت عالى كانه بيسمع الجميع ولا

فى حصة قراءة فى المدرسة

وبعد كدا بقي اللى يتعافى على الباب يروح مطير الورقة وطبعا انا فى اول الكرسي

وكنت المطلشة وبقي اللى وقع الورقة شهم وراسة والف ......... انه يجيب الورقة

ويعلقها زى

ما كانت ....... كل شوية لو سمحتى قومى شوية عشان نجيب الورقة ............انا

بقي اتخنقت اكتر واكتر قولت سيبها ماعليك منها .............

المهم النفس حمى فى القطار وخوفت بصراحة قبل مانزل دى 15 ساعة يعنى اى

ميكروب هيتنقل ويتعايش ويبدا يظهر اعراضة من قبل مانزل .......

عدى الكمسري بالصدفة قولتله لو سمحت ممكن تشغل التكييف انا عرفه ان الجو

شتاء بس حضرتك الدنيا زحمة وم ينفع كدا يعنى ........... ضحك بسخرية وقالى

تكييف ايه يا استاذة

قولتله نعم دا الشيء الوحيد اللى مثبوت فى التذكرة اولى مكيف قالى للاسف مش

شغال دا كمان .........

هو حضرتك مش مصرية قولتله ليه قالى اصلك مستغربة كل حاجة وكانك مش من مصر

قولتله لا والله انا بس باصدق الناس لما اللى قطع التذكرة اكد ان فيه بوفية وتكييف

وتليفزيون كنت اعرف منين انه بيكدب .........

هنا بقي افتكرت الراجل كان بيقولى هتدعيلي ليه ................

طبعا قولت يا بت هونى على نفسك لو بقيتى مشمئزة من اصوات الضفادع ولا الحمام

وريحتة ولا الباب اللى مش بيبطل فتحان وقفلان ولا التكييف حاولى تتناسي كل الحاجات دى

وتخيلي اسوان واللى هتشوفيه هناك ويستاهل المعناه بجد ........

بعد شوية حسيت بجد انى عندى رغبة شديدة فى التقيء ومش هاقدر ادخل الحمام

اللى ريحته وصفاه وصف يعنى صورة وريحة ........ وصحبتى نايمة قولت مش

هاصحيها بسرعة

اخذت كيس بلاستيك وجريت لاخر العربية ولاقيت مكان كويس بين البابين فتحت

الكيس وتقيئت وحسيت انى هيغمى علي من الخنقة روحت بسرعة على الباب

وفتحته ووقفت فيه كل

شيء ظلام ومش شايفة حاجة بل بالعكس كانت بتجيلي كوابيس وانا واقفة وافكار

رغيبة انى ممكن حد يزقنى من الباب روحت بسرعة قفلت الباب وسندت خلفة لمدة

نص ساعة حسيت

انى بقيت كويسة وشعرت ببرودة قولت خلينى اروح البس الجاكت .........

الحمدلله كانت بدات معالم تظهر وناس تنزل الكرسي اللى وراى كرسيينا كان بتاع

عائلة ونزلت وانا قعدت مكانهم جنب الشباك طلعت واحدة قعدت جنبي وفضلت

ترغى كانت لذيذة

بس رغاية اوى المهم عشان اخلص منها طلعت كتاب وقعدت اقرى فيه هى راحت

فى سابع نومة وانضمت الى فريق عزف سيمفونية بيت ضفدع ..... كنت باحقد عليهم والله الناس

اللى بتنام فى اى حتة كدا وغيرهم متذنب كام ساعة بقي وصاحى ...........

شوية والبنت صحيت ولسه هترغى روحت قايمة وسيبلها المكان رجعت جنب

صحبتى اللى ماشاء الله نووووووووم عميق ..

الدفعة اللى جنبنا كان تقريبا بقالة 3 شهور فى الطريق ومقلعش جزمته ابدا المهم هو

طبعا نام من بعد مالقطر طلع من رمسيس على حسب تسجيلاتى ورصدي لكل

الراكبين فجأءة

حسن انه مش مرتاح من جزمته

انضم لحزب الحمام وقلع جزمته ولا اله الا الله بجد يعنى انا طبعا الله يكون فى عونه

اه قولت جايز يكون جاي من سفر بعيد ومافيش فرصة يغير الشراب

بس مقدرتش رجعت تانى جنب البنت هى بقي اللى سبتنى خالص وغيرت العربية كلها ......

لحد هنا مكنش ظهر اى بياع وبعد كدا بدا يهل علينا البائعين وخبط ورزع وعمال يقول

وجبات العشاء جه عندي وقالى تحبي تتعشي ايه انا عجبنى البساطة بتعتة وزوقة قولت والله

عندك ايه للعشا قالى فى وجبات وفيه سندوتشات والوجبات دى عبارة عن ايه قالى

طبيخ ولسه هيوصف قولتله لا شكرا

عندك اى عصير مقفول قالى لا فى شاي قولتله لا شكرا هو بقي حطنى فى دماغة

عشان استجوبته وبدا يزهقنى بجد

انا طبعا كنت تعتبت جدا من الوحدة ومن كل شيء فى القطر ويا ريته ساعة ولا اتنين

دا 15 ساعة ......المهم

لاقيت معايا كدا كتاب اذكار فى شنطتى ولاقيت دعاء النوم عمرى فى حياتى مادعيت

من قلبي بجد حتى وانا فى اشد المحنة الا المرة دى وكان ناقص اعيط والله ...

طبعا مش هاقول ربنا استجاب لى ولا حاجة ولكن اللى اقدر اقوله انى بعدها بدات

ادروخ يعنى معنديش احساس بالنوم بس حسيت انى بانام افتح عين واغمض عين يعنى

اون اند اوف

كل ماقفل عينى والا بتتاع الشاي ويجي جنب الكرسي بتاعى ويخبط بالمعلقة ع

الكوباية ويقول شااااااااااااى ااقوم مفزوعة وابقي عاوزة ارمية من القطر .

المهم فضل على كدا كتير لحد ما قولتله خد ثمن 2 كوباية شاي اهوم ومش عاوزينهم

ومتجيش جنبنا قالى لاء هتدفعى تخدى الشاي انت هتزكى على ولا ايه قولتله طيب هادفع مقدم ولما

اعوز الشاي هابقي اطلبة قالى ماشي

المهم بقي كل ساعة يجي ويقولى حضرتك عاوزة الشاي دلوقتى ,,,,,,,,,اقوله لاء

يقولى طيب .........وشوية ويرجع تانى قولتله بص بقي انت نفد صبري معاك مش عاوزة شاي

ومش عاوزة اشوفك هنا وعاوز ترجع الفلوس هتها

المهم سبنى ومشي


صحبتى بقي اخيرا قلقت وصحيت وقالتلى فيه اي مش عرفة انام من الازعاج اللى

بتعمليه والله كنت هاخبطها بحاجة لانها نايمة وسيبانى ولما قربنا ندخل على بقي اسيوط والمنيا

والحاجات دي صحيت

المهم اكلنا سندويشتات امى على شندويتاش امها والله انا كنت باكل غيظ لانى لما باكل

معدتى مش بتستحمل فبتخلينى انام على طول

اكلنا وهى صحيت وانا بقيت على بداية النهار كدا اغفل روحت نايمة نص نص وهى

تكلمنى وانا بانتقم مش برد عليها قولت غليها تدوق اللى دوقتة ..

بتقولى ما تيجي نروح الكافتيريا قولتها طيب روحى وانا هاصحصلك هى طبعا

منصدمتش زى قامت تعدى من عند الحمام صرخت رجعتلى تانى مخضوضة ايه

اللى جنبنا دا قولتلها ايه

بستان ورد وحديقة مائية فى حاجة

المهم الرحلة اكتملت على انى انا اللى بدات انام وهى صحصحت وبصراحة على حد

متابعتى شوفت اسامى بلاد غريبة ولا اكنها مصرية بس كلها راحت عن بالى ما عدا ملاوى مش

مش عرفه ليه

وبعد عنان بين الصخور والجبال والمناظر الحلوة الخضرة والماء واحنا طبعا الوجه الحسن

واعلن الكمسري على اننا سنصل اسوان بعد ساعة

الساعة دى قضيتها فى الشباك اتفرج على الصخور وعلى النيل وعلى الخضراء

ونسيت كل اللى عنيته فى القطار طوال مدة السفر

وصلنا اسوان والمحطة طبعا صدمتنى كنت متوقعاها حاجة كبيرة وفخمة بما انها بلد

سياحى بس مش مشكلة كله يهون

لاقينا التكاسي ذات اللون الغريب ابيض فى ازرق يا رب اكون لسه فكرة

وطبعا عفي عليها الزمن بس البلد كانت هادية وكأن سكانها كانوا فى اجازة خارجها

توجهنا الى فندق بسمة وبكرة نكمل الباقى


الرحلة داخل اسوان

فاصل ونواصل


يُتبع

 

 

[Badroora]

وصلنا الفندق وحطينا شناطنا وغيرنا هدومنا وقولنا نرتاح بقي واذا بتليفون صديقتى يرن وتبادل حديث وحوارات حميمة وسلامات وطيبيبون

وهاتك يا رغى بتاع 20 دقيقة روحت ساكة اذونى بمخدة عشان مسمعش الصوت واذا بها قومى يا امه احنا جاين ننام قولتها لاء انت

الليل بتاعك نمتية سيبني بقي انام النهار بتاعى وبعدين نبقي نتفاهم قالتلى المشكلة ان ليها قاريب هنا ولما عرفوا انها فى اسوان جايين عشان

يخدونا البيت عندهم قولتلها اوك روحى عند اهلك براحتك واتغدى معاهم وابقي هتيلي غدايا معاكي طبعا هى صبرها بينفد بسرعة .

راحت شايلة كل شيء من على وشدتنى فقمت لبسنا ونزلنا قابلنا قريبتها وروحنا بيتهم هما فى الاصل بلدياتها بس راحوا السودان اخدو الجنسية

واستقروا فى اسوان على فكرة كنت كتير هناك بفكر اسوان هى السودان واننا فعلا فى دولة تانية

المهم روحنا البيت عندهم فى منطقة اسمها زلابية المكان بسيط جدا جدا وحتى البيت نفسه بسيط ولكن منظم جدا ومترتب لاقصي حد ...

جابولنا الفطار واصروا اننا نفطر نحلفلهم اننا اكلين شنطتين سندويشتات بس مافيش فايدة من كتر

كرامهم والله كانوا بيحاولوا يأكلونا باديهم

المهم العيش الاسوانى حلو اوى ويشجع ع الاكل يعنى يستاهل الوقفة والبهدله فى الطابور

المهم اكلنا وانا اخترت اقرب كنبة وريحت عليها وشوية يلا نروح المعبد النوبي ,,,,,,

المهم كنت كسلانه وبعدين قالتلى ان بالليل ما فيش حاجة

غير السوق واننا الصبح بدري عندنا يوم طويل ما بين السد العالى ومعبد فيله وجزيرة النباتات

المهم اول ما سمعت كلمة السد العالى ..........

ضربة فى دماغى اغنية عبد الحليم وقلنا هنبنى وادينا بينينا السد العالى ..وانبثت فيا القوة والعزم

.قمت بسرعة شربت فنطاس شاي عشان افوق وتوجهنا الى

المعبد النوبي .........هو بصراحة معجبنيش اوى بس يعنى معقول بردوا ...........


يتبع ,,,,,,

 

 

[النوبة حبيبتي]

حمدالله ع السلامه يابدورره
اسوان حبيبتي
حظك قطار النوم 10ساعات خيرها في غيرها
كل اللي حصلك حصلي في السفر بالقطارات غير النوم
ان شاء الله المرة الجايه كلمي صحبتك كابتن/هبه او اوصيلك اخواتي هناك
بتحبي الزلابيه و المتحف النوبي
ان شاء الله متابع

 

 

[ILOVEEGYPT]

بصراحة سرد جميل ولذيذ للرحلة
انا رحت الاقصر واسوان من احلى البلاداللى شوفتها فى العالم
بس لى ملاحظتين انا ركبت قطار اسوان المكيف وبصراحة اكثر من رائع
الاملاحظة الثانية انا كنت احسب حضرتك من اسوان الجميلة بسبب الصورة اللى حطاها للبنت اللذيذة اللى شايلة علم مصر :11:
ومستنى بقية الرحلة

 

 

[أم حبيبة]

أسجل اعجابى و متابعتى

كملى يا سكرة

 

 

[Badroora]

الاعزاء .النوبة حبيبتيى ...اى لوف ايجيبت ...ام حبيبة .......شكرا على المتابعة واسفة ع التأخير

 

 

[Badroora]

وصلنا لحد فين اه .....متحف النوبة............

خرجنا من المتحف على بالليل كدا وبعدين كنا مش عاوزين ننام على رغم التعب

اللى كنا فيه قولنا نروح فين ... اللى كانت معانا قريبة صديقتى قالت

نروح السوق . السوق للاسف مش هاقدر احط الصور عشان احنا فيها .

المهم السوق جميل جدا جدا من حيث الاضاءة ماشاء الله اسوان مستولين على

الكهرباء الاصلية فتلاقي الشوارع كانك فى عز الضهر

اللى بيميز السوق كمان انه مافيهوش سيارات يعنى امان جدا وخصوصا لو فيه

اطفال ... والبائعين فريندلى يعنى كنا نروح نتفرج ونتصور

ونفاصل وفى الاخر منشتريش حاجة وتلاقي البائع طيب جدا وبعد كل دا

يرحب بك فى اسوان ويقول فى اى وقت حبة تشترى

ابقي تعالى ,فعلا حسيت فرق شاسع بين بائعين اسوان واخلاقهم واخلاق البائعين

فى القاهرة ,افتكر مرة سنه 98 عجبتنى شنطة فى شارع

قصر النيل وقولت اروح اشتريها وانا خارجة من القصر العينى قبلت واحد بلدياتى

قالى رايحة فين قولتله رايحة اشترى شنطة

قالى طب خليكى ناصحة ولما يقولك على اى سعر انزلى به للنص على طول

..قولتله بجد قالى طبعا وابقي شوفى ...

المهم روحت شارع قصر النيل وعجبتنى الشنطة وسالت الراجل بكام قالى

35 جنية قولت اها يعنى 17 جنية ونص قول 18 ووالله العظيم

الراجل كان صعيدي وشكلة كان طالع عنية وانا بقي كنت القشة التى قطمت ظهر

البعير , المهم انا لسه باكمل كلامى ولاقيته راح

ناتش الشنطة منى وسابب للعيشة واللى عيشنها والشنط واللى بيشتروا الشنط وقالى

يلا مافيش شنط ,المهم قارنت بين الموقفين قولت ياااه سبحان الله هنا غير .

المهم بعد ماليفنا فى السوق واكلنا ايس كريم كنت متشوقة اوى اروح على

الكورنيش , روحنا ع الكورنيش قعدنا فى كازينو ايزيس وتقريبا كنا

الزبائن الوحيدين اللى روحنالهم اليوم الكل على دمغنا والمهم طلبنا الطلبات وانا

شوفت كنافة قولت يااااااااه هاخد كنافة مع انى مش بحبها

خالص بس معرفش قولت اجرب ,الكنافة بقي كانت عندهم من رمضان والله اعلم

,,, انا اكلت الكنافة حسيت بطعم غريب اوى ,قولت خلينى

ادوق اللى معانا هى من اسوان وعارفه الكنافة بتاعتهم المهم قولتلها دوقى كدا

شوفيها مالها ,,, داقت وقالتلى انها مافيهاش حاجة يا بدور بكسر

الباء قولت هى ادرى منى طبعا ,, ضربت شوكة تانية وقولت عيب دا انا اعرف

الاكل الحمضان من وهو لسه بينطبخ ناديت على الويتر

وقولتله بليز دوق الكنافة دي لاقيته شلها من السكات وكل اللى كانوا واقفين حوالينا

اختفوا ..قولتله لاااااا تعالى هنا ونادي على اصحابك اللى

كانوا واقفين فنداهم وجم قولتلهم يلا كل واحد يدوق الكنافة دي ويقولى ايه الطعم

اللى حسه ..اول واحد قالى لو مش عجبة حضرتك نغيرها

قولتله لاء انا عزماكم عليها يلا دوقوا اول واحد قالى سكرها تقيل شوية , والتانى

قالى ممررة سنه

التالت قالى ممكن تكون بس عشان من الصبح قولتله لاء طبعا دى حمضانه ومن

رمضان اللى فات كمان ... المهم قالولى يجبولى ايه بدلها قولتلهم

لاء خلاص ولا حاجة ....

خرجنا من الكازينو واتمشينا شوية ع الكورنيش والناس وخصوصا المراكبية كانوا

بيكلمونا انجليزي واحلى كلمة ويلكام بفتح الكاف سمعتها

منهم وحسسونى ان القاهرة دولة تانية واحنا فعلا اجانب ..بس كان دمهم خفيف ...

روحنا البيت بعد ما هلكنا روحنا عند قرايب صحبتى البيت لانهم اصروا يعشونا ..

. روحنا اتعشينا وانا طبعا الاكل فى معدتى اقوى من المورفين

كالعادة اكلت واستلقيت ع الكنبة وروحت فى سابع نومة بجد احلى ايام نمت فيها فى

اسوان على الرغم انى مش بنام بالليل بس هناك كنت بنام ,

المهم الميزة فى اقارب صحبتى دول انهم 4 بنات اخوات متجوزين واجوازهم

يعملون بالخليج وهما مقيمين بمفردهم مع ااولادهم فدا حسسنى

اكتر بالامان وكنت كل ماقعد ع الكنبة عندهم وتيار الهوا يلفحنى اتوه على طول وانا م ......

صحينا الصبح اسروا اننا نترك الفندق وعيب اننا نزل فى فندق وبيتهم موجود فى

الاول كنت محرجة جدا عشان منتقلش عليهم بس هما اصروا

بشكل غريب ولاول مرة فى حياتى اشوف ناس حياتهم بسيطة جدا وستات زى الرجالة

فى نفس الوقت وبيعزموا بقلب جامد وحبونى اوى وبقي

يدللونى اكتر من صحبتى على اساس انى انا الغريبة فحبوا يدلعونى عشان

يحسسونى انى منهم ومافيش فرق وانا بصراحة حبتهم اوى

المهم روحنا الفندق اخدنا حاجتنا ووداناها البيت عندهم وقولنا هنروح السد العالى .........

انا بقي صحبتى منخوقة منى لانى دايما فى شقتنا ارفاها باغانى وطنية وشعارات

حتى فى عربيتى اللى كانت اغانى وطنية اكثر من اى شيء

المهم انا بقي من ساعت ما قولنا هنروح السد العالى وانا بقي

قولنا هنبني وادينا بينا السد العالى وبقيت مستاثرة اوى واراجع فيلم ايهاب نافع

وماجدة وشوية صور السد اللى كانت بتجي زماااااااان وخلاص

عشت فى مووووووووووود عبد الحليم وماجدة الصباح

 

 

[Badroora]

انا بقي كنت اكسسيتد مثل الاطفال وفرحانة وعاوزة بسرعة اجرى احضن السد العالى ومكنتش مصدقة نفسي انى هاشوفه زى مكانت بتمنى اشوفة زمااان

فى التليفزيون انا بقي كنت مش صبرة وعاوزة نمشي بسرعة وطبعا صحبتى وقريبتها من النوع الراسي اللى لازم يفطر ويحلى ويحكى مع الاكل

وانا بقي كنت مسروعة اوى ...المهم كل شوية اقول يلا يلا يلا يلا وهما بقي برووووووووود المهم فى الاخر بعد مكلوا وشربوا الشاي ابو لبن ولبسوا

ببطء شديد نادا علينا عيل صغير وقال الاموزيل وصل اتفضلوا انا طبعا سبقتهم وروحت قعدت جنب السواق كان بابا كبير فى السن و طيب جدا

ومثقف لاقصي درجة , والمهم قعدت ارغى معاه واحقق واسأل عن كل شيء عن السد والراجل كان صبور جدا واستحملنى اوى المهم جت صديقتى

وقريبتها المرشدة بتاعتنا وتحرك بنا الاموزيل واول كبري كدا عدا من عليه كنت مبسوطة اوى وحسه انى مش هالحق اوصل للسد من كتر السرعة بفتح السين

اللى كنت فيها المهم اثناء القيادة انا بقي كأن محدش فى الدنيا بيسوق وعنده عربية غيري عماله ارشدة واديله نصايح وهو بصراحة مستحملنى

المهم واحد كان جاى من اليسار وهو هيهديلوه عشان يعدي وانا بقي لاء لاء دا طريقك ليه تهدي وهو يعدي الراجل يبتسم ويرد على

ويقلي ايه المشكلة قولتله لا انا ما احب حد ياخد طريقي قالى لاء السياقة يعنى ادب وزوق وود بين الاخرين مش حرب ومين اللى يسبق

طبعا انا دى مش اخلاقي ابدا فى السياقة انا بابقي هاين على لما عربية تكون قدامى افضل اديله فلاش ولو مخلاش الطريق لى اروح معدية منه

وجاية قدامة ومهدية غتاته عشان يدينى فلاش ومسألش فيه اعمل فيه زى ما عمل في

المهم اللى عجبنى جدا ان السائقين اخلاق اوى اوى ومحترمين لاقصي درجة ومش بيتكلموا الا اذا انت اديتهم فرصة غير كدا لاء

وكمان ينصحوك تعمل ايه وتروح فين وتدفع كام وبصراحة كمان لما توصل اى مكان وتساله ها عاوز كام يقولك اللى تدفعه سواء قليل كتير ميفتحش بوئة

والله كنت مستغربة ان دول مصريين فعلا عوامل البيئة بتاثر فى اخلاق الناس وهما ماشاء الله شاربين من مياه النيل النقية ومتمتعين بالكهرباء المزهزهة

فمخليه عنيهم مليانه اوى ومش طمعين المهم

وصلنا السد العالى وهنا كانت المفجاءة التى احبطتنى جدا جدا وكانت غير متوقعه



هو دا بقي السد العالى اللى باشوفة فى التليفزيون ومعرفش غيرة ودا اللى كنت جاية عشان اشوفه ودا اللى غنى له عبد الحليم اما اللى شوفته داااااااااا

 

 

[Badroora]

بعد الاحباط الفظيع الذي انتابنى عن السد العالى بقتش متحمسة لاى حاجة ...

بعد السد ذهبنا الى رمز الصداقة بين مصر والاتحاد السوفيتى وكان المنظر جميل اوى ... قولنا طيب

نطلع فوق نشوف الدنيا واحد كان واقف قالى لاء ممنوع وقريبة صديقتى كانت بتمنعنا بشدة وقوة جعلتنى

استغرب واتنح اكتر انى لازم وحكما لاطلع فوق المهم تفاهمنا مع الراجل وطلعنا بعد كدا حسيت بالذنب

لان قريبة صديقتى عندها فوبيا من الاماكن العالية وعشان كدا كانت مش عوزانا نطلع فوق ومع اصرارى

للطلوع طلعت معانا فعلا انسانة طيبة جدا وانا اكن لها كل الاحترام والتقدير المهم بدا يظهر عليها علامات الخوف

من شحوب فى الوجه ورعشة وضربات قلب سريعة المهم قولتلها مالك قالتلى لا مافيش الحيت عليها انا

وصديقتى قالت انها عندها فوبيا (خوف من الاماكن العالية غير طبيعي )المهم بسرعة نزلنا كان معانا

عصير وماية شربناها واعتزرتلها وهى من ادب اخلاقها وزوقها اعتزرت انها ضعيت علينا الفرجة

المهم لمحت حد قريبها او معرفة كدا هناك اسمة استاذ س جه وقدمتنا له وسلم علينا وكان راجل اخلاق

جدا كنت فكراه سودانى طلع مصري اسوانى طبعا هو حب يكرم الضيف فاستأذن من شغلة واصر اننا

لازم نروح عنده البيت يا عم س بلاش قال لا والله ما يحصل يا عم شغلك قال استاذنت قولت يسلام

شايفة الناس محترمين ازاى يستأذن من الشغل عشان ضيوفه .

المهم ذهبنا الى منزلة استقبلتنا زوجته مصرية اسوانية ماشاء الله عليها سمارة بس جميلة ومنمقة وطيبة

جدا واستقبلتنا اجمل استقبال , طبعا الظهر كان اذن قولنا نستغلها فرصة ونصلي دخلنا صلينا ورجعنا

لاقناهم بيسالونا هتتغدوا ايه قولنا لاااااااا مش هينفع والله احنا هنمشي ودول تمشي مين ميصحش ابدا

المهم اكتفينا بشرب حاجة ساقعة وجبولنا معها بسكوت نواعم ومولوتو كيك طبعا بسكوت نواعم اخر

مرة شوفته ايام ما كنت فى تسعة ابتدائي اكلنا واثناء الحديث ذهبت زوجتة لعمل شيء ما واخذ عم س يتحدث عن

زوجته ويمدح فيها وفى اخلاقها وطريقة معاملتها لاولاده من المرحومة مراته , فعلا هذه الاخلاق ليست

غريبة على الاسوانية ناس قنوعين بشكل غير عادي خدومين لابعد الحدود وكرماء ع الاخر والنساء منهن

اللى تعاملت معاهم قد ايه محافظين ومثقفين وعندهم ثقة بنفسهم بلا حدود وليهم مكانتهم فى كل مكان

يعنى خلال 5 دقائق من التعامل معهم تشعر وكانك واحد منهم من كتر كرم اخلاقهم ...

المهم بعد ما نسفنا المشروب ونواعم يا بستوك والكيك قولنا نستاذن بقي بالعافية لما سمحولنا بالذهاب على
شرط اننا نتغدى عندهم تانى يوم المهم قولنا ربنا يسهل وانصرفنا وكنت سعيدة جدا بالحب والود اللى لاقيته
بين الناس هناك..

طبعا استاذ س مسبناش طلع معانا وقف لنا تاكسي وجه عند دفع الحساب واذا بسواق التاكسي يرفض ويوقله لاء يا عم س دول قريبك

يعنى قريببي وكله واحد ورفض ياخد الاجرة من عم س قولت يسلام شايفين اخلاق الناس .

المهم توجهنا الى الطريق لمعبد فيلة واثناء السير توقفت السيارة فى منتصف الشارع وكان قريب من لجنة
فكرت اننا بقي فى مصر قولت ياااااااااه مش هنخلص بقي وهات الرخص وشغلانه ...

واذا بعسكري المرور قادم الينا قولنا استر يا اللى بتستر

العسكرى للسائق خير اخى محتاج مساعدة قاله والله العربية وقفت فجأة العسكرى نادا على 2 من

اصحابة وشافوا العربية وبعدين سعدوه وزقوا العربية شوية لحد ما ممشينا يا دوب وصلنا لمرسي المراكب والسائق تركنا

على موعد بعد ساعتين هيروح يصلح السيارة وقبل ما يمشي وصي علينا ناس مراكبية وتركنا ومشي

روحنا للمراكبية واللى كان موصيه ياخد باله مننا المركبة بتاعتة اتعطلت فانشغل بتصليحها قولنا طيب

خلينا نشوف احنا روحنا عند المراكبية اعتقد انهم كانوا صعايدة مش اسوانين المهم قولنا ها يا رايس

عاوزين مركب رايح جاى قال الواحد 30 جنية طبعا احنا قعدنا نفاصل قلنا دى اسعار كل المراكب .

واثناء الحديث قاطعتنا بنت من كندا الشقيقة والبوي فريند بتاعها وكانوا منزعجين جدا

هدناها وسالنها مالك قالت هنا ليه بيستغلوا اننا اجانب وعاوزين يدفعونا فلوس كتير انا ممعيش فلوس

بليز كلمية خليه يدينا اسعار المصريين لاننا جيين من اسكندرية والاقصر وشرم وكل الفلوس تقريبا

خلصت .صديقتى سالتها هو قالكم كام قالت الواحد ب 27 ونص قولتلها ايش معنى النص بالذات يعنى

ميقول 28 وخلاص فاحنا ضحكنا وقلنالها عاوزة اسعار المصريين احنا قالنا ب 30 جنية النفر مصدقتش وفكرتنا
بنهزر جيت على جنب للراجل وقولتله بقي كندا ب 27ونص وانا المصرية ب 30 هابلغ عنك شرطة

السياحة المهم من هنا لهنا اشترطنا عليه هناخد المركب رايح جاى ب 50 جنية واحنا بقي حرين نركب

مجموعة نركب لوحدنا مش شغله المهم بعد فصال وصداع وافق خدنا الكندية وصديقها ودفعوا 20 جنية رايح

جاى واحنا دفعنا ال 30 احنا التلاتة

المهم اثناء سير المركب تبادلنا الحديث عن ان نفسها تعيش فى مصر واحنا مهاجرين لكندا وان كل واحد مش

عجبة البلد اللى فيها وووو.

وصلنا وقولنا هنتقابل عند المرسي بعد ساعة ولفينا واتصورنا ورجعنا وفعلا لاقناهم جم فى الموعد وكانوا

ملتزمين جدا وممنونين بمساعدتنا لهم .

والبنت قالت لنا انتوا ليه معاكم 3 موبايلات وكميرات انا فى كندا معنديش موبايل ولا عربية ولا حتى

تليفزيون احنا بقي فى بوء واحد يا خبر ليه قالت حسه انى مش محتجاهم عندى لاب توب يفى بالغرض

والشغل عندي تليفون والبيت فيه تليفون وفيه مواصلات عامة يبقي ليه اجيب حاجات مش محتجاها اوى .

طبعا هى كلمها صح ومقتنعة به جدا احنا بنجيب حاجات كيتر ومش عارفين اذا كنا محتاجنها ولا بس حبين

نمتلكها وخلاص ....


ركبنا التاكسي وتوجهنا الى اسوان البلد عشان نلحق نروح جزيرة النباتات ......

ابقوا معنا

فاصل ونواصل

يُتيع

هابقي اضيف الصور فى الاخر خالص ...