|
اقتباس |
|
|
|
|
المشاركة الأصلية كتبت بواسطة تكسير |
|
|
|
|
|
|
|
بسم الله الرحمن الرحيم
كنت عايز من زمان أفتح موضوع هنا عن بناء العضلات , والحمد لله خت القرار , وححاول إن شاء الله أفيد الناس , اهلي وعشيرتي
ليه رياضة بناء العضلات ؟
لانها رياضة مملة وعايزة صبر , ولو سبتها أسبوع تعيد وكانك معملتش حاجة , وده حيسبب عقدة نفسية , أو تتجنن وتزود العيار وتصبح مدمنها , وام العيال حترقع بالصوت
لكن لو عندك صبر وفي نفس الوقت تراعي العشيرة , حتبقي نجم النجوم , شكل وقوة
لعبنا كورة وسلة وووووووو , جميل ما فيش مشاكل , بس الناس تحس من منظرك انك حشاش , رفيع ومقتم او طخين وبكرش , مع انك مكحرت نفسك جري ومشي , لأ كفاييييييييييييييييييييييييييييييييييياااااااااا
عايزين بقي شكل , ما هو الشكل مهم برضوا , بس يا حلو لازم يبقي شكل وقوة , لانه لو شكل بس حيبان , ضريب الكماويات بيبان , تحس انه منفوخ هوي , ولما تجربه تلاقيه فشنك , اما الواد الصح , تشوف عضلاته تموت لوحدك
تمام
أول حاجة اعرف انك حتغير مقاسك في اللبس بعدين , فا ما تزعلش لو في بنطلون او تشيرت عزيز عليك , لانك مش حتعرف تلبسه تاني
اعرف أنك حتكلف نفسك فلوس كثيرة في الاكل , فا وفر فلوسك إلي مضيعها علي الاونظة
اعرف انك لو اكلت أكله تعبانه حتفضل تعبان وولو اكلت اكله كبيرة حتكبر
أعرف انك بتبني جسم وقوة , فحاول انك ما تكونش شرير , علشان ربنا كبير وقادر
اعرف انك لو بصيت للأقوي منك حتحتقر نفسك فا ما تبصش , لان في الصالة حتلاقي ناس غاوية تعقدك , تبقي انت بترفع خمسة كيلوا بالعافية وهو بيرفع مية كيلو
وما تبصش للأقل منك لأنك حتتغر في روحك , وتكتفي
يبقي أبص لنفسي بس
الحديد عايز نفس طويل وصبر , والنتائج مش حتبقي بسرعة الريح , لأ حياخد وقت طويل , يعني اول نواية بلحة في الدراع ممكن تاخد 6 شهور
مش بالوقت الطويل والحديد التقيل , لأ لأ بالطريقة
الوقت مهم جدا
وطريقة اللعب برضوا
يعني ممكن تلعب ثلاث ساعات ولا ليهم لزمة , وممكن تشيل أوزان وتموتلك نمو العضلة , وممكن تلعب ساعة وتشيل أوزان خفيفة وتبقي ما شاء الله
ولكن اللعب الطويل والاوزان الثقيلة ليها وقتها
فانا ححاول احطلكم برنامج علي اعلي قدر من الأحترافية وباسهل أسلوب , وحتلاقوني مجاوب علي كل سؤال إن كان البداية حتبقي إزاي , واعمل إيه , والوقت , والاكل ,الراحة والنوم , وكل حاجة
حتي لو في إصابات برضوا حعمل إيه وإزاي , قبل التمرين وبعد التمرين , حتكلم بصراحة وربنا يعين
طبعا انا مش كوتش ولا حاجة , بس بمارس الرياضة دي علي إيد ناس محترفة , وتعبت جدا , وعملت اخطاء بالجملة , وإصابات بالكوم , فمتعلم بالغالي , ومازلت بمارس الرياضة دي , ووصلت فيها لمستوي حلو , مش هرقل يعني بس الحمد لله
لان القوة كانت اهم عندي من الإنتفاخ , فدي بتاخد وقت شوية
لان حتي في تمرين إي عضلة في تمرين للنفخ وفي تمرين للقوة , وممكن تعمل الأثنين مع بعض
طبعا ده حشرحه إن شاء الله في كل تمرينة وفي كل عضلة
بس كنت عايز أبتدي بسرعة كدة , العضلة لما بتلعب وبتشيل وزن مش معتاده عليه , بالبلدي كدة بتفهم انها لازم تشيل الوزن ده , فبتقوم متكسرة , وبعد ما تتكسر تلحم وتكبر اكثر من الاول , علشان هي فهمت انها لازم تشيل الوزن الجديد عليها ده , العضلة بتكبر في الراحة , او أثناء النوم , وكل مرة تشيل وزن اكبر , حتعمل نفس العملية , فحتحس بوجع خفيف في كل مرة , ده عادي , لكن وجع اول تمرينة حيبقي صعب شوية
ولو وقفت اللعب لفترة كبيرة , العضلة حتفهم انها مش حتشيل , تقوم تنام وتريح , ولما تيجي ترجع تشيل تاني حتحس انك مش قادر تشيل إلي كنت بتشيله قبل كدة , وتعيد من الاول , وكانك يا زيد ما غزيت
المهم
انا طولت انتظروا جديد الكوتش تكسير دماغ
إن شاء الله
|
|
|
|
|
|
قشطة عليك يا تكسير نجم يا ولدي
انا ازاي ماشفتش الموضوع ده غير دلوقتي
أتكلم عن كمال الاجسام في حياتي
انا ابتديت اللعبة دي سنة 97 بالصدفة كنت بروح مع حد صاحبي
ومن 97 لحد شهر 12 اللي فات فضلت العب شهر في السنة - اشترك شهر في الجيم وماكملش وارجع السنة اللي بعدها وهكذا
فالنتيجة طبعا ماعملتش جسم ولا حاجة بس عملت معلومات عن التمارين كلها وازاي تتلعب
والحمدلله قررت شهر 12 اللي فات اني اشترك وأكمل
واشتركت فعلا 16 ديسمبر والحمدلله مكمل لحد دلوقتي بس برضو كتير بكسل يعني ممكن يومين يقعوا في الاسبوع
وحاليا بعد اللي حصل في موضع كيبك مأثر على نفسيتي جدا لدرجة اني امبارح رحت ماكملتش التمرين ومشيت
بس اتفق معاك في كل اللي الكلام اللي قلته بس مافهمتش قوي النفخ والقوة بس اللي بفهمه ان النفخ غالبا بيبقى بالامينو والبودر والهرمونات ربنا يبعدنا عن كل الكلام ده - بس جايز قصدك الواحد لما يتمرن بوزن مش تقبل عليه ويبجيب تكرار ده بيعمل تشريح لكن انك تشيل وزن تقيل ده بيعمل حجم عضلي
انا طول عمري كنت بقول ايه الفايدة ان الواحد يشيل تقيل ويلعب غلط ويجيب 5 عدات لا الواحد يخفف ويلعب صح دي كانت مدرستي
بس غيرتها لما لقيت حد بيلعب بقاله 16 سنة - قالي انا ندمت اني طول عمري بلعب خفيف عشان ماعملتش حجم
فبقيت بعمل الاتنين انا بلعب لكل تمرين 4 ادوار دور خفيف بجيب تكرار والادوار التنانية بلعب بس التقيل بالنسبة لي يعني اجيب 7 عدات لكن لو جبت أقل بخفف والعب تاني ومش بحسب الدور ال5 عدات
مثلي الأعلي في اللعبة ارنورلد جوزيناجر - بحب ناس كتير دوريان يتس - وناصر السنباطي الله يرحمه و شون راي - روني كولمن - كيفن ليفرون - بس ارنولد ده مدرسة حتى فيه طريقة فب التمرين بالدمبلز اسمها Arnold Press
بالنسبة للأكل كلام صح جدا شهيتك بتتفتح جدا - وبعد الجيم ببقى عندي استعداد اكل اي حد - يعني مثلا الاول كنت باكل واجبتين دلوقتي باكل 3 غير الكيمة زادت وفي النص باكل فاكهة كتير بكميات كبيرة عشان الكيبهيدراتس
تركيزي في الاكل انه يبقى فيه نشويات رز او مكرونة ودهون لحمة او فراخ او سمك وكيبوهيدراتس خضار وفاكهة والصبح البان مع الاكل
عجبني كلامك على الغرور وعلاقته باللعبة وانك تقارن نفسك باقل او اكتر
انا مش ببص على الناس دي في الصالة انا اهم حاجة عندي اني اكون بلعب صح وبشيل الوزن التقيل عليا اللي يشغل العضلة ده اللي يخليني مبسوط واني بلعب صح - يعني انا بلعب متواصل بقالي شهرين الراجل التاني بيلعب بقاله سنين اقارن نفسي ازاي - جايز هو بياخد امينو او بودر او حقن اقارن نفسي بيه ازاي وليه
حاجة كمان انا بكتب على الموبايل اوزاني كل مرة عشان ازود واعرف انا بتقدم ولا لا ودي من ضمن الحاجات اللي بتدي حافز
في نقطة انت ماتكلمتش عليها ليها علاقة وثيقة باللعبة هو هوس المرايا الذي اصبانا جميعا
سواء في الجيم او في الحمام او في اي مرايا بتعدي عليها انا بحاول اقاومه بقدر الامكان انب بعد كل تمرين ابص في المرايا
لسة في كلام كتير هنتكلم فيه - ده بس ردي على اول مدخلة ليكك ماقرتش غيرها - عاش يا وحش كمل يا كابتن وانا معاك
متابع جدا ومبسوط اني لقيت موضوع زي ده - عشان نأخد برأي بعض