هنا القاهره ..

[فــيــروز]

الصحف المصرية والعربية

اليوم يمر خمسه و سبعون عاما على المرّه الأولى التى قيلت فيها هذه العباره المؤثّره : هنا القاهره ..

لم يكن هذا بالظبط ما قاله المذيع الشاب "أحمد سالم" إعلانا عن انطلاق الإذاعه الجديده بل قال :

ألو.. ألو.. هنا الإذاعة اللاسلكية للحكومة المصرية

تلاه بعدها تلاوه قرآنيه بصوت الشيخ "محمد رفعت" ليكون بذلك أول من يتلو القرآن عبر ميكروفون الإذاعه مقابل ثلاثة جنيهات أجر ثمّ سهره مع "أم كلثوم" قدّمها "سالم" بقوله :

هنا القاهرة.. سيداتي وسادتي أولي سهرات الإذاعة المصرية في أول يوم من عمرها تحييها الآنسة أم كلثوم

وقد تقاضت عنها خمسين جنيها ..

قبل ذلك بسنوات قليله كانت الإذاعات المحليّه شائعه فى "مصر" وكان منشئوها هم هواة اللاسلكى .. كانت إذاعات ذات مجال محدود و أنشئت غالبا لغرض دعائى بحت و إن كان البعض قد استخدمها لبث رسائل الغرام و الغزل !! لكن الغرض الدعائى كان هو الهدف الغالب لإنشاء مثل هذه المحطّات الأهليه المتنافسه حتى لم يكن غريبا علي الأسماع في ذلك الوقت أن يخرج شخص بصوت عالٍ فينادي:

ألو ألو الحق يا أخينا أنت وهو في قنبلة انفجرت في الموسكي

ثم يأتي مرة ثانية ليقول:

القنبلة التي انفجرت الآن هي الأسعار المذهلة التي تبيع بها محال الضبع للعب الأطفال

و بعد زيادة التنافس بين هذه المحطات الأهليه لحد السخريه و التطاول صدر قرار من الحكومه المصريه بفك هذه المحطات فى موعد أقصاه 29 مايو 1934 و أسندت مهمّة إدخال الإذاعه المركزيه لشركة "ماركونى" البريطانيه وفق عقد مدّته عشر سنوات


ملحوظه : المعلومات التاريخيه الموجوده بهذه المداخله مصدرها جريدة "المصرى اليوم" و جريدة "الوفد"

 

[فــيــروز]

بهذه المناسبه المميّزه فكّرت أن ننشئ موضوعا نتبادل فيه الحديث عن الذكريات الإذاعيه التى لازال لها مكانا فى ذاكرتنا .. إذ على العكس ممّا كان متوقّعا بعد انتشار الفضائيات و الإنترنت ؛ لازال للإذاعه -حتى إن اختلف المحتوى عن ذى قبل- مكان و مكانه فى قلوب و عقول المصريين و ربّما النجاح المدوّى الذى حقّقته إذاعة "نجوم إف إم" دليل جيّد على أن الإذاعه يمكن أن تحفر لها مكانا فى اهتمامات المستمع لو اختارت الطريق الصحيح للوصول إليه .. فإلى اللقاء مع الذكريات ..

 

 

[hoppa]

انا لا استمع للاذاعة إطلاقا
بس لفت نظرى

اقتباس تلاه بعدها تلاوه قرآنيه بصوت الشيخ "محمد رفعت" ليكون بذلك أول من يتلو القرآن عبر ميكروفون الإذاعه مقابل ثلاثة جنيهات أجر ثمّ سهره مع "أم كلثوم" قدّمها "سالم" بقوله : نا القاهرة.. سيداتي وسادتي أولي سهرات الإذاعة المصرية في أول يوم من عمرها تحييها الآنسة أم كلثوم

و الله جميل قارئ القرآن ياخد 3 جنيه...و الأغانى لها 50 جنيه فعلا بيقدروا القرآن

 

 

[Farida]

يا مواضيعك يا فيروز
انا بقه يا ستى كنت من عشاق الأذاعه ايام الثانوى و الجامعه و ماقبل الزواج و الدش - كسرة تحت الدال- البدايه كانت طبعا من اول ما نقوم من النوم الصبح مع خمسه رياضه و بعد كده بالسلامه يا حبيبى بالسلامه و خمسه فرفشه -حديثه شويه و جت بعد ما عمر بطيشه مسك الأذاعه - و برنامج همسة عتاب بتاع شوف مصلحتك يا سيد و القهوة يا محمود علشان يزحلق اللى جاى يشتكى و لو غايبين عن المدرسه نفضل مع ماما لما نسمع ابله فضيله و ربات البيوت ........
و طبعا حلقات فؤاد المهندس و شويكار فى رمضان و الأذاعه اساسيه بعد الفطار فى رمضان
مش بانسى تمثيليات العبقرى محمد علوان انف و 3 عيون - عمر الشريف- شئ من العذاب نيللى و محمد عبد الوهاب كان قمة فى الأداء ......مسلسل عبد الحليم و نجلاء فتحى مش فاكره اسمه
كل دول سمعتهم الساعه اسادسه ....... و طبعا برامج كنت باتابعها زى مالايطلبه المستمعون و كان بيجيب الأغانى النادره و اللىالناس مش بيطلبوها و طبعا غواص فى بحر النغم برضه حديث شويه يجى من عشرين سنه بس ...زو برامج زى زياره لمكتبه فولان و شاهد على العصر مواعيدهم مقدسه و مش ناسيه صدمتى فى ايناس جوهى كنت لازم اقعد اسمع تمثيلتها هى و حسن امام عمر و حسنى غنيم و كانوا بيمثلوا القصص العالميه و ووقتها كنت متخيله ايناس جوهر زى العصفورة لحد ما اتصدمت
طبعا البرنامج الموسيقى و هاله حشيش دول بقه طول المذاكرة فى ثانويه عامه لدرجه كنت باسجل الأغانى و اعمل شرايط لصحباتى فيها اجمل 10 أغانى مش ناسيه الأغنيه وقتها اللى كانت مكسره الدنيا وقتها Big in Japan .........ولا اذاعه ام كلثوم الساعه خمسه دى مقدسه و اغنيه الساعه عشره تقريبا ............ولا برنامج اميمه كامل اعترافات منتصف الليل يالهوى كانت بتعمل بلاوى و سمعت حاجات عمرى ما تخيلتها وهى كانت بتعك جامد فى الردود .........بجد كانت اجمل ايام ايام الأذاعه .......دلوقتى بناتى رجعوا تانى للأذاعه بس مع الألم مع الأسف لأذاعة نجوم اف ام

 

 

[Farida]

تخيلوا ان الشيخ محمد رفعت كان بيرفض رفض قاطع التسجيل للأذاعه لأنه كان بيعتقد ان الطلب عليه حايقل لما الناس تسمعه فى الأذاعه و علشان كده تسجيلاته قليله جدا ..........عارفين ان الأحنفالات السنه دى الغيت بسبب وفاة حفيد الرئيس ..............

 

 

[فــيــروز]

اقتباس المشاركة الأصلية كتبت بواسطة hoppa و الله جميل قارئ القرآن ياخد 3 جنيه...و الأغانى لها 50 جنيه فعلا بيقدروا القرآن

ماعتقدش إنّها بتتحسب كده ..
التقدير ليس للقرآن و لكن لقارئه .. و قد تدفعى لقارئ أى مبلغ يطلبه بينما قارئ آخر لنفس القرآن لا تحبّى سماع تلاوته !!
يجب الأخذ فى الاعتبار كمان المدّه التى سيقوم فيها المقرئ و المطرب بالعمل ..
قراءة القرآن الافتتاحيه مهما طالت عمرها ما هتوازى طول حفلتين -كما قرأت- قدّمتهم "أم كلثوم" بهذه المناسبه .. و يمكن يكون ده أجرها المعتاد عن مثل هذه الحفلات و الذى يصعب مقارنته بأجر مقرئ للقرآن مهما بلغت إمكانياته و تفرّده .. ليس بسبب عدم تقدير للقرآن لكن لأن "أم كلثوم" كان لها أجر ثابت و معروف و يمكن يكون مبالغ فيه و أتصوّر أنّه كان أكبر من أجر أى قارئ للقرآن فى هذا الوقت

 

 

[فــيــروز]

اقتباس المشاركة الأصلية كتبت بواسطة Farida يا مواضيعك يا فيروز

يا ردودك يا "فريده" .. أنا مستنيّه بس اروّح عشان افتح ع الرابح -على رأى عم أيوب- فى ذكرياتى مع الإذاعه ..

اقتباس المشاركة الأصلية كتبت بواسطة Farida تخيلوا ان الشيخ محمد رفعت كان بيرفض رفض قاطع التسجيل للأذاعه لأنه كان بيعتقد ان الطلب عليه حايقل لما الناس تسمعه فى الأذاعه و علشان كده تسجيلاته قليله جدا ..........عارفين ان الأحنفالات السنه دى الغيت بسبب وفاة حفيد الرئيس ..............

تخيّلى إن "إيناس جوهر" قررت وقف بث تسجيلات الشيخ "رفعت" بعد تولّيها منصب الإذاعه و مخنّقه على الورثه بس مش فاكره تفاصيل الخلاف ..

الاحتفالات فعلا أُلغيت بقرار من "أحمد أنيس" و طبعا ده باعتبار إن الإذاعه و التليفزيون همّا الورث و العزبه اللىّ سابها له الحاج "أنيس" قبل ما يموت !! بس تصدّقى لسه بردو فيه صور للنفاق أشد من كده و العالم دى لسّه بتحبو .. ده بمناسبة كتاب تاريخى كنت باقرا فيه أمس

 

 

[Farida]

اقتباس المشاركة الأصلية كتبت بواسطة فــيــروز .. ده بمناسبة كتاب تاريخى كنت باقرا فيه أمس

 

 

[Modest]

بالرغم أني لم أكن من متابعي الإذاعة إلا أن هناك برامج لم استطع الفكاك منها .. إما لكونها مقررة في البيت أو لتزامن سماعها مع فتح الراديو في العربية مثلاً..و منها:-


نتائج مباريات الدوري العام الساعة 7 إلا خمسة مساءاً بصوت فهمي عمر.

فوازير أمال فهمي بعد الإفطار مباشرة في رمضان و التسابق على حلها بيني و بين أخي و الزهو بقى لما احلها قبلُه و الإحباط الشديد لما يحلها قبلي

و برنامج بالسلامة يا حبيبي بالسلامة

و كلمتييييييييين و بسسس لفؤاد المهندس الصبح الساعة 8 إلا خمسة.

و إيناس جوهر و هي بتقول الدنيا هي الشابة و انت الجدع .. تشوف رشاقة خطوتك تـxxx لكن إذا مش عارف ايه تقع.. و عجبي (الـ xxx من عندي)



كلاكيت تاني مرة : يا مواضيعك يا فيروز

 

 

[أمة العزيز]

انا ماليش خالص في موضوع الاذاعة الا على خفيف أوي
وبتبقى بالصدفة
ممكن اذاعة الاغاني
الشباب والرياضة
وبكون راكبة في عربية غالبا
حتى الافم ام .. مفتكرش اني ادمنتها .. صدفة كله

بس في البيت دايما يتكلموا عن مسلسل اذاعي اسمه مرزوق .. وعلى برنامج ربات البيوت

مستمتعة جدا بالسرد الجميل للذكريات :)