ناشط سياسى يعلن الكفر

[Eng Hesham]

الصحف المصرية والعربية

كتب: محمد بشر

نشر بالامس الناشط السياسى واحد مصابين الثورة سامح المصرى على صفحته الشخصية بموقع التواصل الاجتماعى فيس بوك بيان يعلن فيه الكفر بعنوان (انا كافر حد ليه شوق فى حاجة )

مما اثار استغراب الكثيرين لماذا كفر ؟ وما هو سبب اعلانه الكفر؟ وبمن كفر ؟

فضلنا ان ننقل لكم نسخة عما كتبه على صفحته الشخصية فى موقع التواصل الاجتماعى فيس بوك .

بدا سامح المصرى كلامه بقوله :

انا كافر حد لية شوق في حاجة

ايوة انا كافر حد لية شوق في حاجة
(مستغرب لية انتا وهو اني بقول علي نفسي انا كافر طيب اسمع يا سيدي بالراحة الكلام اللي هقولة وانت هتعرف انا لية كفرت
اولا يا سيدي انتا وهو انا كافر بالنبي السباب زي ما قال عنه شيخ من المشايخ وتحديدا عبدالله بدر شوف واسمع بنفسك هو اللي قال انا ماقلتش حاجة)


انت لسة مش مصدق ان انا كافر
(اه ياعم انت وهو انا كافر بدين يدعو الية ليلا نهار الشيخ وجدي غنيم يدعو الية بالسب والقذف
وشتايم من اللي قلبك يبغضها زي يا شراميط يا انجاس )
اسمع ياعم انتا وهو!!!







(ايوة ياعم انا كافر بدين غزوة الصناديق اللي فية الصناديق بتقول للدين نعم وكمان الدين اللي يقول لمواطني الدولة اتركو دولتنا وارحلو عنا)



(ايوة يا عم انتا وهو انا كافر بدين يطلب فية الشيوخ من الفقراء دعم دولتهم قبل ان يتبرع الاغنياء بما يزيد عن حاجتهم)



(ايوة يا عم انا كافر بالدين الذي يسمح للداعين الية بتوزيع صور العاريات والخوض في الاعراض)







ا(يوة ياعم انا كافر بالدين اللي الداعين الية يشوهو البنات ويخوضو في عرضهم )



(ايوة يا عم انا كافر بالدين اللي الداعين الية ملهمش شغلانة غير تكفير الناس ليلا نهارا حتي وصل بهم الحال الي تكفير بعضهم البعض)



(ايوة يا عم انا كافر بدين يخلي الداعين الية يطردو من ذهبو لاتمام مناسك العبادة والصلاه في بيت الله من بيوت الله)




(ايوة يا عم انا كافر بدين يوصل الحاكم بتاع بلدي انه يخاف وهو بيأدي مناسكة)





(ايوة يا عم انا كافر بدين يخليني اتفتش وانا رايح اقابل ربنا)




وكمان




(ايوة يا عم انا كافر بدين الداعين الية يستنكرون القصاص من القتلة فية ويكرمونهم كمان)



اية يا عم انتا وهو لسة مش مصدقين اني كافر اه والله انا كافر بالدين اللي فية كل اللي انا قلتة فوق دة
تعالو بقي معايا كدة اخدكم في جولة في ديني علشان تتعرفو عليه يمكن اكسب فيكم ثواب وادخلكم معايا في الدين اللي انا قررت اني اؤمن بيه ولا اقولكم مش هضحك عليكم واقولكم اني لسة مؤمن بية لا انا مؤمن بية من اول يوم اتولدت فية
بص بقي يا عم انت وهو الدين اللي انا مؤمن بية هو دين عظيم رسولة محمد عليه الصلاة والسلام عمرة ما كان سباب بل بالعكس خالص كان ذو خلقا حميد وسمي الصادق الامين لصدقة وامانتة رسولة قال عنه ربنا .
بسم الله الرحمن الرحيم
(والنجم إذا هوى ( 1 ) ما ضل صاحبكم وما غوى ( 2 ) وما ينطق عن الهوى ( 3 ) إن هو إلا وحي يوحى ) صدق الله العظيم
ايوة والله هو دة النبي عليه الصلاة والسلام اللي انا بؤمن بيه مكانش بينطق عن الهوي وكان كلامة كلة حسن وخلقة حسن كان طيب قوي وجميل قوي في كل شيء.
كان بيدعو لدين ربنا بالموعظة الحسنة وعمرة ما قال الفاظ وحشة زي اللي بيقولها الناس المشايخ دول هو محمد بن عبد المطلب هو النبي لا كذب
تعرفو لية انا امنت بالدين اللي النبي محمد صلي الله علية وسلم كان بيدعيلة وسيبت الناس الوحشة دي ؟
لانة دين كلة رحمة وربنا اللي النبي صلي الله عليه وسلم دعانا لعبادته كتابة الحكيم كلة بيبداء ببسم الله الرحمن الرحيم وعمر ما سورة من كتابة بدائت ببسم الله المنتقم الجبار.
تعرفو كمان الدين اللي انا مؤمن بية عمرة ما حضنا اننا نكفر حد وازاي هنكفر الناس وربنا سبحانة وتعالي قال في كتابة الحكيم
بسم الله الرحمن الرحيم
( قل ياعبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم ) صدق الله العظيم .
شايفين يا ناس قد اية ربنا اللي انا بعبدة رحيم وبيغفر كل الذنوب وبيدي الناس كلها فرصة انها تتوب عن اي ذنب لا وكمان بيبدل سيئاتنا حسنات مدام ان التوبة نصوحة.
طب اقولكم سر ان العلاقة بيني وبين ربنا مافيش حد يعرف عنها حاجة الا ربنا سبحانه وتعالي وحدة لان ربنا وحدة يعلم ما في القلوب .
طب اقولكم حاجة كمان النبي صلي الله علية وسلم رغم كل محاولات قتلة لم يقم الصحابة بترك صلاتهم خلفة من اجل حمايتة .
وكمان سيدنا عثمان بن عفان الصحابي الجليل اتقتل وهو بيصلي علشان محدش كان بيحمية ومافيش حد من بعدة ممن يدعون الي دين الله زي سيدنا علي بن ابي طالب او زي سيدنا عمر بن عبدالعزيز حتي الفاطميين والعثمانيين خلي حد يحميه وهو بيصلي .
طب اقولكم حاجة كمان ان ديني كرم النساء وجعل سورة كاملة باسمهم ومنع اننا نخوض في اعراضهم او نقذف المحصنات .
طب عارفين بقي كمان ان دينا يستحيل يخليا نطرد حد من بيت ربنا لانة بيت امن لكل من دخله حتي نبيبنا صلي الله علية وسلم قال للمشركين من دخل بيت ربنا فهو امن .
هو دة الدين اللي كلة رحمة وصفح هو دة الدين اللي قالنا نقف للظلم ونقولة لاء هو دة الدين اللي اتعلمت منة معني الرحمة وازاي اني اكون رحيم بكل شيء حتي الحيوانات هو دة الدين اللي ربنا امرنا فيه بالقصاص من القتلة هو دة الدين اللي اتعلمت منه معني العدل هو دة الدين اللي اتعلمت منه اني احترم اي انسان اخر مهما كان دينة ولا احقرة .
اه والله هو دة الدين اللي انا مؤمن بية
اية رائيكم بقي عندي حق اكون كافر بوجهة نظرهم للدين ولا لأ ؟






https://www.hayaaa.com/mag/news/item/...A8%D9%88%D9%83

 

[Ehab Salem]

هو حر....... يكفر و يعلن كفره زي ما هو عايز بكل الوسائل ...... و محدش من حقه يلمس شعره منه

طبعاً أنا عارف إن الولد بيهوش عشان يوصل الفكرة اللي شرحها في الاخر ......... إنما أنا بأتكلم عن المبدأ........ لو كفر بجد هو حر

و على فكره الموضوع بجد
الإلحاد فعلاً ينتشر في مصر و العالم العربي بسبب الخطاب الديني المتخلف
Posted via Mobile Device

 

 

[جرديز]

ما كفرش ولا حاجة
ده مجرد تعبير عن الرأي لكن بأسلوب الصدمة ومقابلة الأضداد .

 

 

[Remooo]

ما كفرش ولا حاجة ولكنه استخدم الاسلوب ده للتعبير عن السخط
والغضب مما يدور على الساحة..
من الاخر يعنى بيقول ان ديننا مش زى ما الشيوخ الافاضل بيعلنوا وبيتكلموا وبيكفروا زى ما هما عايزين..ديننا يناقض ذلك تماما..هؤلاء الاشخاص فعلا اصبحوا وسيلة لابعاد المسلمين انفسهم عن دينهم
بدل من ان يقربوا بين المسلم وبين تعاليم دينه ويكونوا صورة طيبة لغير المسلمين

فيه مقولة للامام الغزالى

"إن انتشار الكفر في العالم يحمل نصف أوزاره متدينون بغضوا الله إلى خلقه بسوء صنيعهم وسوء كلامهم"

وهو ما نراه واقعا وليس فقط على مستوى الدعاة ولكن على مستوى الاشخاص العاديين الذين يرتدوا عباءة الدين للاسف بدلا من ان يكونوا قدوة ودعاة بأقوالهم وأفعالهم..اصبحوا أبعد ما يكونوا عن ذلك






على هامش المؤتمر
الردة يا باشمهندس ايهاب فى دول تطبق الشريعة توجب توقيع الحد
الالحاد انتشر او ما انتشرش مش ده مربط الفرس
الاسلام سينتهى غريبا كما بدا غريبا ودى معروفة لينا كمسلمين كأحد علامات الساعة

اما فى الدول العلمانية فقط فهو حر ومحدش يقدر يقربله ويشيل هو وزرنفسه

 

 

[Ehab Salem]

اقتباس المشاركة الأصلية كتبت بواسطة Remooo الردة يا باشمهندس ايهاب فى دول تطبق الشريعة توجب توقيع الحد

مفيش حاجه إسمها حد الرده .... زي ما بنفرح بإن واحد غير مسلم يعلن إسلامه لازم نقبل إن واحد مسلم يعلن إنه لم يعد مسلم

 

 

[Ahmed Kotb]

اقتباس المشاركة الأصلية كتبت بواسطة Ehab Salem مفيش حاجه إسمها حد الرده .... زي ما بنفرح بإن واحد غير مسلم يعلن إسلامه لازم نقبل إن واحد مسلم يعلن إنه لم يعد مسلم

لأ في يا بشهندس حاجة إسمها حد الردة
أنا معرفش كتير في الدين لكن دي أنا متأكد منها وأظن إنها موجودة في القرآن كمان

 

 

[Mzohairy]

لأ مفيش

 

 

[Remooo]

حد الردة هو القتل

(عَنْ عَبْدِ اللَّهِ بنِ مسعودٍ رَضِيَ اللهُ عَنْهُ قَالَ: قَالَ رَسُولُ اللَّهِ صلَّى اللَّهُ عَلَيْهِ وسَلَّمَ: ((لا يَحِلُّ دَمُ امْرِئٍ مُسْلِمٍ إِلاَّ بإِحْدَى ثَلاثٍ: الثَّيِّبُ الزَّانِي، والنَّفْسُ بالنَّفْسِ، والتَّارِكُ لدِينِهِ المُفَارِقُ للجَمَاعَةِ)).

مُتَّفَقٌ عَلَيْهِ.

وفي صحيح البخاري عن ابن عباس رضي الله عنهما عن النبي صلى الله عليه وسلم أنه قال: ((من بدل دينه فاقتلوه))

وفي الصحيحين عن معاذ رضي الله عنه أنه قال لمرتد رآه عند أبي موسى الأشعري في اليمن: (لا أنزل –يعني من دابته– حتى يقتل؛ قضاء الله ورسوله)[3]،

والأدلة في هذا كثيرة، وقد أوضحها أهل العلم في باب حكم المرتد في جميع المذاهب الأربعة، فمن أحب أن يعلمها فليراجع الباب المذكور.

وابقوا دوروا على راحتكم

 

 

[Ehab Salem]

اقتباس المشاركة الأصلية كتبت بواسطة Ahmed Kotb وأظن إنها موجودة في القرآن كمان

مفيش حد للرده في القرأن يا أحمد ....
بالظبط زي ما هو مفيش رجم للزاني في القرأن يا أحمد .....
و لا حد لجلد شارب الخمر في القرأن يا أحمد

 

 

[Ehab Salem]

اقتباس المشاركة الأصلية كتبت بواسطة Remooo وابقوا دوروا على راحتكم

دورنا من زمان