Arabic Discussion Forum with a Special Interest in Travel and Immigration

toota · 9th January 2010, 05:57 AM

مبارح وانا قاعدة في اوضتي....شميت ريحة قلية وريحة زيت بيتحرق...ابني عمرو كعادته بيحب يعمل اكل...شويه مكرونة...على بطاطس محمرة...على رز...وبما انه سايب الريجيم بقاله فترة بسبب الامتحانات...سايباه يعك براحته....

اتاريه نسي الزيت بعد ما ولع عليه وراح انشغل بالبروجكت الي بيعمله ع النت لتسليمه النهاردة الصبح....وانا معرفش...

شويه الاقي ضوء احمر جاي من المطبخ مع هجوم شديد لدخانه كثيفة,,,,قمت اجري اشوف فيه ايه...اتاري الزيت ولع ومولع البوتاجاز حواليه لانه يظهر طرطش ....مع الزيت صعب ترمي مية لان الزيت بيولع زيادةة...حاولت اغطي الزيت بغطاء حلة مطفاش...

كل خوفي الشفاط الي فوق البوتاجاز انه تولع فيه النار...رحت شادة الطاسه على الارض وغطيتها بفوطه وطفيت النار....شويه الاقي الشفاط ولع...ومش عارفه اطفيه...في ثواني...كان الشفاط شابب النار على الستارة الي على الشباك جنبه...المطبخ ولع في ثواني...هنا حسيت ان الموقف اكبر مني وبرغم ان كل ده تم في ثواني...الا ان الدخان جوه الشقه المقفوله الشبابيك بسبب البرد كان صعب جدا تحمله ومبقتش شايفه قدامي ولا قادرة اخد نفسي....قعدت اصرخ وقول حريقة....وافتح الشبابيك....في ثواني كنت لبست طرحتي وجريت انا وابني بره الشقه وبننده ع الجيران الي الحمدلله رب العالمين لحقونا بطفايات الحريق وطفوا النار....بس كانت المشكلة ان الشفاط كل شويه يشب النار تاني....جت المطافي...وبسلامتهم حافظين مش فاهمين...زعلانين اننا طفينا الزيت بالطفايه مش بالمية

المهم كنت خرجت عيال وزة الي مولودين عمرهم يوم واحد بره الشقه...اما القطط التانيه..فص ملح وداب..ننده ماننده...مافيش حد بيرد ولا بيعبرنا...لدرجة ان ابني الي بيعشق القطط اكتر مني...كل شويه يغطس جوه الشقه ويخش يدور عليهم ويخرج ميلاقيهمش.........لحد ما بقى وشه اسود من الدخان.......وتوقعت من كتر الدخان حرجع الشقه الاقيهم فطسوا وماتوا.....

المهم الحمدلله على كل حال..الخسائر كانت قليله ومحدودة جدا ولله الحمد والمنّة....هو البوتاجاز على شويه طاسات على شويه حلل...وطبعا السيراميك والحيطان كلها اسود ومحتاجة بياض...ده طبعا غير صدرنا الي قفل من الدخان وطول الليل مش عارفين ننام....

السنة الي فاتت ابتدت بوفاة عمتي....السنة دي بحريقة....مش عايزة اتشائم..ولا احط في بالي الكلام ده....

يلا كل سنة واحنا كلنا طيبين وبخير...

moka · 9th January 2010, 06:02 AM

.
.

الف حمدلله على السلامة يا مدام توتااااااااا ..!
وبعد كده اربطي عمرو بالسلاسل وما يدخلش المطبخ !!

والحمدلله على انها جت على قد كده .. وما تشوفوا شر ان شاء الله ..!

biopasha · 9th January 2010, 06:09 AM

الحمد لله علي سلامتكم جميعا ...
ربنا سلّم ولطف .. الحمد لله ..
ابقوا خلوا بالكم من موضوع النار والمطبخ دا ..
انا والدتي كانت بتحذر عليا في موضوع المطبخ والنار دا .. لحد ما بزهق ...
النار والكهربا دول .. خط احمر خلي الاولاد يخلوا بالهم كويس ..
واهم حاجة في المواقف دي اطفاء امبوبة البوتجاز واطفاء المفتاح الرئيسي للكهربا في الشقة .. وطبعا لو فيه طفايات حريق وجرس انذار يبقي ممتاز ..
ربنا يحفظكم ويحفظنا جميعا ..

toota · 9th January 2010, 06:10 AM

اقتباس

المشاركة الأصلية كتبت بواسطة moka


	. . الف حمدلله على السلامة يا مدام توتااااااااا ..! وبعد كده اربطي عمرو بالسلاسل وما يدخلش المطبخ !! والحمدلله على انها جت على قد كده .. وما تشوفوا شر ان شاء الله ..!

الله يسلمك يا موكا...عمرو مجنني ومش بيسمع الكلام...بس اظن بعد الي شافه انه اتعلم

toota · 9th January 2010, 06:12 AM

اقتباس

المشاركة الأصلية كتبت بواسطة biopasha


	الحمد لله علي سلامتكم جميعا ... ربنا سلّم ولطف .. الحمد لله .. ابقوا خلوا بالكم من موضوع النار والمطبخ دا .. انا والدتي كانت بتحذر عليا في موضوع المطبخ والنار دا .. لحد ما بزهق ... النار والكهربا دول .. خط احمر خلي الاولاد يخلوا بالهم كويس .. واهم حاجة في المواقف دي اطفاء امبوبة البوتجاز واطفاء المفتاح الرئيسي للكهربا في الشقة .. وطبعا لو فيه طفايات حريق وجرس انذار يبقي ممتاز .. ربنا يحفظكم ويحفظنا جميعا ..

اول مرة اتعرض للموقف ده هنا وبالشكل ده....لما الجيران طفوا الحريقة...قبلها شالوا الانبوبه عشان ميحصلش انفجار وقفلوا الكهرباء,,,,,الواحد في المواقف دي بيبقى مش عارف يتصرف....

الحمدلله على كل حال...قدّر الله وماشاء فعل

FINETOUCH · 9th January 2010, 06:13 AM

حمدا لله على سلامتكم
لا تنسى تتصدقى باى شئ

toota · 9th January 2010, 06:14 AM

اقتباس

المشاركة الأصلية كتبت بواسطة FINETOUCH


	حمدا لله على سلامتكم لا تنسى تتصدقى باى شئ

الله يسلمك يا استاذ فاين...باذن الله..حطلع دفع بلاء....

ana_3enady · 9th January 2010, 06:18 AM

دعوه لموضوعي

RobertInole

حمد لله على سلامتكم يا مدام توتا

قدر ولطف

toota · 9th January 2010, 06:19 AM

اقتباس

المشاركة الأصلية كتبت بواسطة ana_3enady


	حمد لله على سلامتكم يا مدام توتا قدر ولطف

الله يسلمك يا انا عندي....ميرسي

مدى · 9th January 2010, 06:23 AM

حمداً لله ع سلامتك وسلامة بيتك وأولادك وقططك..
ماتزعليش ..ولا تتشائمي ولا حاجة السنة اللي فاتت انا بدأتها فــ رأس السنة بالظبط بحادثة مووت..
و1/6 دخلت عملة عملية من لاشيء..
وكنت خايفة اووي من آخر السنة..
آتاري ربنا شايل كل الحجات الحلوة لآخرها..

بالنسبة لشوية البوية اهو تجديد لا جه ع البال ولا الخاطر..

مرة تاني الف حمد لله ع سلامتك.. وسيبي عمر براحته يبدع..ده الطبخ ده موااهب..

صباحك تفاؤل...

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
زيارة لقرية فقيرة يوم السبت القادم	تكافل إجتماعى	toota	14	3319	13th October 2010 10:50 PM
موضه خلع الحجاب	مواضيع شخصية	Admin	73	11993	13th October 2010 08:30 PM
صبايا...والأفورة الاعلامية	صحافة ... إعلام ... سينما ومسرح	sincere	22	3499	5th May 2010 10:53 PM
فتوش..كفتة مشوية..وبانية	شؤون المطبخ	بندق	12	4476	1st May 2010 10:40 PM
اختبار ..هل انت صديقي !	موضوعات عامة ... موضوعات خفيفة ... منوعات	هدي	8	2757	1st May 2010 02:23 AM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بداية حركة التحرير المنظمة فى قناة السويس سنة 1951	د. يحي الشاعر	الملكية	4	18th June 2013 06:39 PM
لا صوت يعلو على صوت المعركة...	دكتور مهندس جمال الشربيني	ثورة مصر ... 25 يناير 2011	0	17th November 2011 06:57 AM
بداية جديدة مع سنة جديدة	ana_3enady	ترحيبات ... مناسبات ... علاقات عامة	9	3rd January 2011 07:04 AM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

مواضيع شخصية

بداية سنة .... حريقةةةةةة