ثورة شعب مصر لإسقاط مجلس طنطاوي وبقايا النظام - 18 نوفمبر

[biopasha]

الصحف المصرية والعربية

Tahrir News
‎10:01am حالة من الكر والفر بين المتظاهرين ورجال الأمن بشارع محمد محمود، والمتظاهرين يحولون مساراتهم من شارع البستان إلى الشوارع الجانبية «محمود بسيونى وهدى شعراوى» https://ow.ly/7CyX0

 

 

[dr-amira]

«الداخلية» تنفي أن الشخص المقبوض عليه في ميدان التحرير تابعا لأمن الدولة https://ow.ly/7CyVX

 

 

[dr-amira]

اقتباس المشاركة الأصلية كتبت بواسطة Virus هو ده بالظبط الانقسام اللي قلت عليه.. "ما هو الراجل اداكوا اللي انتوا عايزينه أهو" ..ونتناسي خالص إن دلوقت بقى فيه دم وقمع وتعمد لإهانة لامصري وهو ذنب لا يغتفر وتتضاءل جنبه أي مكاسب سياسية.. أوك يابرين باشا ويابرنس باشا ويا رابت باشا وكل الباشوات.. كملوا ثقة في الجيش بعد كل اللي حصل ده..لا محاكمات ..لا تطهير داخلية.. لا تطهير قضاء..لا أمن لا احترام لرأي الشعب + طرمخة على تحقيقات القديسين و8 ابريل وامبابة وماسبيرو الخ الخ + محافظين ووزرا فلول + اتهامات العمالة + صدقوا الجيش حين يعدكم إنه في يونيو 2012 هيسلم كل حاجة تسليم مفتاح وهو في نفس اللحظة بيكدب ويقول مضربناش رصاصة على صدر مصري.. احلموا إن الثورة هترجع الميدان تاني لو مسلمناش الحكم في يونيو زي ماحلمنا في فبراير وقولنا الميدان موجود في أي وقت واكتشفنا إن الميدان مش سهل كده واكتشفنا إن ألاعيب الجيش هبل والسياسيين وقعنا في بعض وفرغ اعتصام ومظاهرات 8 يوليو من مضمونها.. أنا كمان هحلم معاكوا..محدش يكره التفاؤل.. بس للتاريخ برضو وكده وزي مانبح صوتنا من فبراير.. دي الفرصة بعد الأخيرة للتخلص من 60 سنة حكم عسكري..يا نقبض عليها بسناننا يا شكرا بقى...وآه لازم نرجع من الأول لأن احنا أصلا متحركناش أي خطوة من المربع الأول.. وعلى فكرة..استغلال الفرصة ده مشروط باتفاق لاثوار على حد يمثلهم أو على مجلس رئاسي المرة دي...غير كده نبقى احنا بقى مالناش في الثورات ونركن على جنب برضو.. والله الموفق

 

 

[VERDI]

لو مش هنحاكم طنطاوي بأثر رجعي ازاي قبلنا نحاكم مبارك بأثر رجعي
ماحنا تعودنا برضه عى الظلم.
الناس كلها كانت خارجة من ثورة يناير وكلها حماس لبدء صفحة جديدة من حياتهم كلهم أمل وعمل واصلاح ، كانت مليانة حماس لتغيير انفسهم والمجتمع والوقوف ضد كل فاسد ومرتشي ومهمل من المواطنين مش من المسئولين.
الناس فقدت أي أمل وفقدت كل الحماس، الناس بقت يائسة أكتر من قبل يناير

مين المسئول عن كل كده، مش اللي لهانا بأهداف الثورة اللي خلى مافيش أي هدف ولو صغير الا علشان نحققه لازم نحشد لمليونية!
وياريت بس كان هدفنا في العشر شهور اللي فاتوا تحقيق اهداف الثورة انما كنا بنحارب مالم نكن نحاربه ايام مبارك من ظلم وقمع حريات
استنفذ مجهوداتنا ومابقناش نفكر نهائيا في الاصلاح، مكاسب ثورة يناير كلها ضاعت، حال مصر بقى أسوأ من قبل يناير... ومافيش مسئول غير مجلس العار مجلس الفلول.

 

 

[Dr.Samo]

اقتباس المشاركة الأصلية كتبت بواسطة biopasha موقع الدستور الاصلي مريد البرغوتى : لا تنخدعوا بعبارة حكومة بصلاحيات كاملة. هل يستطيع رئيس الوزراء الجديد تعيين وزير دفاع جديد مثلاً ؟!

فيه تعليقات بتحسسنى ان الناس مش عايزة تحل ..... عايزة تولعها وخلاص ... دا من التعليقات دى

 

 

[biopasha]

طيب والكرنية اللي معاه ومتصور والبطاقه وإثبات الشخصية ..
واحد هيزور عشان يروح يموت نفسه ..

مش ملاحظين العيسوي وتصريحات الداخلية بعد العيسوي .. بقت عبيطة وهبله اوي .. وبتنفي الموضوع من أصله ..
يعني قناصه ؟؟ لا مفيش قناصة .. لغي قطاع القناصة من قلب الداخلية في ثواني

بتضربوا خرطوش في عيون المتظاهرين ؟؟
مفيش ولا طلقه إنضربت

50 شاب ماتوا علي الأقل علي يد الشرطة وفيديوهات الضرب وإطلاق النار والتعذيب و الأعتداء واطلاق الغازات ( اللي طلعت سامه ) واضحة وفي كل محطات الدنيا ظاهره جثثهم ولا إجرام إسرائيل ؟؟ ويقولك دا احنا ملتزمين بضبط النفس تماما ولا فيه اي طلقه انضربت

ولما الثوار قبضوا علي ظابط أمن الدولة أول ناس باعوا راجلهم وقالك ولا نعرفه

طيب هنصدقهم إزاي بعد كدة ..

وزارة داخلية ايه دي بس ؟؟؟ دي لو عصابة حرامية غسيل مش هتعمل كدة

اقتباس المشاركة الأصلية كتبت بواسطة dr-amira «الداخلية» تنفي أن الشخص المقبوض عليه في ميدان التحرير تابعا لأمن الدولة https://ow.ly/7CyVX

 

 

[brain]

اكثر نقطه زودت الشكوك عندي كانت امبارح و اول امبارح - نقطة محمد محمود كانت سبب اساسي لهذه الشكوك و لكنها موجوده منذ اليوم الثاني للاعتصام
الهجوم على مديريات الامن
بصراحه اول ما سمعت موضوع الهجوم على مديريات الامن اول حاجه جت في بالي ان بعض المتظاهرين يحاولون الانتقام من الشرطه بسبب ما حدث في التحرير
و لكن امس كان كلام مراسلي الجزيره - و هم محايدين جدا - صادما للجميع
قبل كلام مراسلي الجزيره كان هناك اتصال مع الفنان عبد العزيز مخيون
الراجل قال انه يسير و معه 10 الاف متظاهر يطوفوا شوارع دمنهور
مذيع الجزيره مباشر سأله عن الصدامات مع الامن
قال ان المظاهره سلميه و انهم طوال المسيره لم يتعرض لهم الامن
و انهم الان متجهون الى مبنى المحافظه
سلميه و لم يتعرض لهم الامن
و توالت الاخبار
من الاسماعيليه و نفق الممر او شارع الممر و الشرطه التي تختبئ خلف دبابه من متظاهرين يهاجمون الدبابه بالمولوتوف و احد شباب الثوره يتحدث عن ان المظاهره انتهت دون اي عنف حتى جاء هولاء
و نفس الكلام في السويس
و اسيوط
و المنيا
و الفيوم
و الغربيه
نقطه تانيه مهمه
الاصابات و الضرب كله موجود عند مديريات الامن الموجوده في تلك المحافظات
الجزيره تتحدث عن هجمات على9 مديريات امن - لو اضفنا وزارة الداخليه في القاهره يبقوا عشره - امس و اول امس
الغربيه و اسيوط و المنيا و الفيوم و الاسماعيليه و السويس و المنصوره و الاقصر و الاسكندريه
هل كل هذا صدفه ؟
علشان نعرف اللي هيحصل
هجوم على مديريات الامن لاقتحامها
هترد قوات الامن بالرصاص بقى بالخرطوش بالغازات بالطوب
من المؤكد هيتصاب ناس و هتموت
ده معناه ايه ؟
اضافة رقم جديد الى حصيلة القتلى
و اضافة حطب الى النار المشتعله
من صاحب المصلحه في ذلك ؟
نقطه تانيه غابت عن ناس كثير
ما هي اول محافظات حصلت فيها اضطرابات
القاهره و الاسكندريه و اسيوط و الفيوم و بورسعيد و البحر الاحمر و الاقصر و المنصوره و الاسماعيليه و السويس
لاول مره نسمع عن الاقصر و البحر الاحمر و الفيوم في مثل هذه الاضطرابات حتى ايام الثوره الاولى
7 من هذه المحافظات ال 10 هم من محافظات المرحله الاولى للانتخابات
لسه برضه كل دي مصادفات ؟

 

 

[Mizo]

اقتباس المشاركة الأصلية كتبت بواسطة Dr.Samo فيه تعليقات بتحسسنى ان الناس مش عايزة تحل ..... عايزة تولعها وخلاص ... دا من التعليقات دى

شوف يادكتور، فى اي بلد ديمقراطي يجب أن يكون للمعارضة ضجيج ويجب أن تكون قوية ومؤثرة ويجب أن يخشاها النظام، الحكاية دلوقتى تفرعت كثيراً والشارع اعطي شرعية ( بدون التحرير ) للمجلس العسكري مرة اخري، لكن ذلك يجب ان يصحبة تحركات سياسية تؤكد نية المجلس وتنهي النقاشات والخلافات التى تراها ويراها الكثيرين بتولع الدنيا.

الان يجب العمل على حكومة وطنية تشكل فوراً ولها صلاحيات تنفيذية موسعة يراسها شخصية وطنية توافقية

 

 

[VERDI]

برضه مؤامرات مؤامرات مؤامرات

يا عم برين الله يكرمك يارب، مين اللي ورا المؤامرات دي
كلنا متابعين وكل الاحداث واضح انها كانت عشوائية
الثورا مش ملايكة علشان مايغلطوش، اقصد بالتحديد علشان مايعملوش اللي انت شايفه غلط
فيه ناس كتير دمها بيفور وممكن يعملوا اي حاجة
مش كل الناس ممكن تشوف اخواتها بيتقتلوا ويطلعوا يهتفوا وخلاص
مش المثقفين ولا المتعلمين بس هم اللي ممكن يغضبوا ويثورا على الظلم والقتل
لا فيه مش متعلمين بتثور وبتغضب بل المش متعلمين هم اكثر غضبا لانهم متعصبين للجدعنة
بل فيه بلطجية رجالة وبتظهر وقت الشدة
طبعا اول هدف لاي حد عايز ينتقم هو مديريات الامن واقسام الشرطة ، لان الامن هو اللي بيقتل.

انا تعبت من المؤامرات

 

 

[biopasha]

طيب هكلم زملائنا اللي بيقولوا فيه ناس عاوزه تولعها وخلاص !!!!

عاوز اسأل كام سؤال !!
كل الدم اللي في التحرير دا بعد 18 نوفمبر وبعد 25 يناير وقبلها بـ 60 سنة .. ملفتش نظر حد .. إن كفاية كدة حكم وظلم عسكر .. عاوزين موظف مدني نمسكه عهده ونحاسبه عليها داخليا ويكون سياسي محنك يشتغل سياسة صح خارجيا .. كل دا مش هو لوحده لأ عن طريق مؤسسات
عاوزين مؤسسات !!

العسكر لهم شغلهم اللي هو بعيد تماما عن السياسة بل إن شغلهم عكس السياسة ومفهوش سياسة ولازم يكون كدة .

احنا عشان اتعودنا علي حكم العسكر زي اللي اتزكم من ريحة الغاز الي إنضرب من العسكر امبارح فأتعود , لم يشم هوا طبيعي فجأة في نفس المكان هيستغرب ..

مثلا مثلا يعني ..
ينفع وزارة الصحة كدة بأطباءها وصيادلتها ووزيرها ينفع يحكموا البلد ؟؟؟
مال الطب بالسياسة ؟؟؟

طيب تنفع وزارة الري أو الزراعة ؟؟؟
مال الزراعه والري بالحكم والسياسة ؟؟

طيب ماهو مال العسكر بالسياسة ؟؟
مال العسكر بالحكم ؟؟

ولا عشان الأسلحة في عهدتهم فبيستقووا بيها علي الشعب اللي اشتراهلهم ومسكهالهم وعلمهم يضربوا عليها ازاي وأول ما الشعب يكلمهم .. إيدهم تطول ع الشعب ؟؟

لأ .. عندك وأوقف .. الشعب هو الهيبة االلي لازم تحترم كدة زي الأب والأم .. وكلنا ولاد الشعب ..

اللي إيده تطول علي شعبه ما يستهلش نعمة شعبه عليه ..
اللي إيده تطول علي شعبه مايستهلش بدلته بنياشينها ..
اللي إيده تطول علي شعبه يتجرد من سلاحه اللي مصانهوش وقتل بيه أهله وشعبه ويتحاسب كويس ويبقي عبره ...

غير كدة في رأيي .. يبقي كلام تخطي العدل والإنصاف ..