يا المهللين بالتغيير .. حنعمل ايه لو جه علينا الدور ؟

[Farida]

الصحف المصرية والعربية

اقتباس المشاركة الأصلية كتبت بواسطة حشيش مش عارف بصراحة يا أخت فرح دى رؤيتك الشخصية أم رؤيت التيار السلفى بصفة عامة لأنه لو كان الأخير تبقى مصيبة بصراحة! ... يعنى المفروض أن الرسالة المراد توصيلها هى طاعة أولى الأمر منا لأن الخروج عليهم وشق عصا الطاعة حرااااااااام ... حراااااااام ... حرااااااااااااام ... دلوقتى فهمت ليه الإخوان المسلمين لم يحاولوا أى محاولة جادة لإنقاذ شعب مصر من الظلم والقهر والإستبداد طوال عقود! ... لأنه حراااااااااااااااام الخروج على الحاكم وكمان لازم نتعلم الدفاع عن النفس والإسعافات الأولية الأول

ادى عيب التعليم الأجنبى و الفرجه على البى بى سى .......................ايه جاب التيار السلفى للأخوان المسلمين

 

 

[brain]

اقتباس المشاركة الأصلية كتبت بواسطة Farida ادى عيب التعليم الأجنبى و الفرجه على البى بى سى .......................ايه جاب التيار السلفى للأخوان المسلمين

ازاي يا دكتوره
المبدا نفسه
فقه الخروج على الحكم
اللي حضرتك كاتباه النهارده في موضوعك عن الازهر
لاول مره يقوله عالم من اهل السنه و الجماعه
اخر ناس قالوا كده هم الخوارج و المعتزله
القاعده هي عدم جواز الخروج على الحاكم و ان ظلم و ان جار مادام يقيم الصلاه

 

 

[فرح فرحنا]

يا جدعان .. انا مش بتكلم في فقه وفتوى وخروج وطلوع وحاكم وفاهم

انا بتكلم عن حاله اجتماعيه

يعنى لو حصل فجأه شيء بالمجتمع اللى كلنا نحيا به اي شيء لا قدر الله


مش في أوروبا والدول المتقدمه بيعملوا حاجه اسمها " تدريب " لمواجهة الحالات الطارئه

يعنى انا انسانه عايشه بمجتمع آمن زي الملايين .. بجيب حاجاتي من السوبر ماركت ودوايا من الصيدليه وبفتح الحنفيه علشان استعمل الميه و أدوس على زرار بالحائط لأضيء الكهربا



ماذا نفعل لو تغير الحال .. لا سمح الله

ساعتها بقى يبقى يحلها ألف حلاّل .. طب انا عايزه 10 بس اليوم وحوشلي ال990 لوقتها

فين دور المثقفين والمتعلمين واصحاب المهارات بالمجتمع



اللجان الشعبيه - تعبير جميل - يعنى ايه بقى !!!


هل فجأه سيتعلم الناس النظام والهدوء

هل فجأه سيتعلم الناس التريث في حالة الهرج والمرج




إذا كان في "عرض في سوبر ماركت" يحصل مثل هذا التدافع والانكلاب


فماذا يحدث لو في مجاعه حقيقيه ؟؟؟

 

 

[savary]

حضرتك بتكلمى عن مصر تحديدا ؟؟

يا فندم فى مثل مصرى عبقرى فى هذه الحاله

ويمكن يرد على تساؤل حضرتك ويبعث الطمأنينه فى قلبك

ضربوا الاعور على عينه ... قال ماهى رايحه رايحه

 

 

[فرح فرحنا]

اقتباس المشاركة الأصلية كتبت بواسطة savary حضرتك بتكلمى عن مصر تحديدا ؟؟ يا فندم فى مثل مصرى عبقرى فى هذه الحاله اشجييييييني ويمكن يرد على تساؤل حضرتك ويبعث الطمأنينه فى قلبك أيوووووه ضربوا الاعور على عينه ... قال ماهى رايحه رايحه

ما هو دا اللى كنت عامله حسااااااابو



والله وشكلك هتيييييف يا سفاري .. اديها عودين كبريت وشعللها ثوره وفي الآخررررر ألاقييييييييييك

 

 

[مدى]

ع فكرة والله موضوع مهم وقيم بجد..
وافكار هايلة..

عجبتني فكرة نتعلم الإسعافات الأولية ..

تابعي يافرح وهنفكر معاكي..


ممكن نخلي دكاترة المطاريد يعلمونا..

 

 

[savary]

اقتباس المشاركة الأصلية كتبت بواسطة فرح فرحنا ما هو دا اللى كنت عامله حسااااااابو والله وشكلك هتيييييف يا سفاري .. اديها عودين كبريت وشعللها ثوره وفي الآخررررر ألاقييييييييييك

لا والله ولا هتيف ولا حاجه
انا اساسا ما عدت اكترث !!
لا لمصر ولا للى بيحصل فيها !او للى ممكن يحصل فيها او للى هيحصل فيها

غير مكترث على كل الاصعده حاضر وماض ومستقبل !

القصه عامله زى اللى بيحلل ماتش كوره وهو فى استاد النيل
بيقول لو حصل كذا ممكن يحصل كذا
ولو لعب فلان فى المكان الفلانى هيعمل كذا

والمفروض حسن شحاته يعمل كذا ويلعب كذا دلوقتى

بس مش معنى كدا ان اللى بيحلل دا عنده استعداد يلبس تى شيرت وشورت وفوتبل وينزل يلعب
او حتى يتولى الاداره الفنيه
او يروح الاستاد يشوف الماتش بنفسه

اهو بيحلل اكل عيش و (سمبوبه ) او بيحلل تزجيه للوقت

بالنسبه لمصر
ففعليا هو ايه اللى ممكن يحصل اسوأ من الموجود دلوقتى ؟

ولا حاجه
nothing
rien !

 

 

[فرح فرحنا]

اقتباس المشاركة الأصلية كتبت بواسطة مدى ع فكرة والله موضوع مهم وقيم بجد.. وافكار هايلة.. عجبتني فكرة نتعلم الإسعافات الأولية .. تابعي يافرح وهنفكر معاكي.. ممكن نخلي دكاترة المطاريد يعلمونا..

اتابع ايه يا حاجه هو أنا عارفه افنكر ولا أعمل اي حاجه

وكمان انتي حاطالي يوم 25 يناير .. طب سنه كااااااااااام

و حنلحق ياختى نتعلم الاسعافات الاوليه

دا أنا كبيري بدي حقنه في العضل .. طيب ألف الشاش ازاااااااااااااي


وأديكي شفتي اخونا سفاري .. ماسك المايك وبيشجع وما عندوش استعداد ينزل الملعب

اقتباس اهو بيحلل اكل عيش و (سمبوبه ) او بيحلل تزجيه للوقت بالنسبه لمصر ففعليا هو ايه اللى ممكن يحصل اسوأ من الموجود دلوقتى

لا اللى بيحلل دا علشان يفهم اللى بيحصل حواليه .. علشان لما ييجي عليه الدور يكون مستعد

وسنة الحياه ,, مش معقول .. حيفضل متفرج على طول

ومسيره في يوم حينجبر ينزل الملعب شاء أم أبى

دوام الحال من المحال ,,

احنا في منطقه مشتعله ... تغلي كالبركان .. شفنا اللى حصل في العراق ولبنان وآدي تونس الصراحه انا كنت اتوقع الانفجار اللى حصل في تونس يكون هنا ,,

كلنا داخلين على مراحل صعبه .. نسأل الله السلامه

عموما سأحاول أركز أفكاري وربنا يقدحلنا المفيد

 

 

[Farida]

اقتباس المشاركة الأصلية كتبت بواسطة savary بالنسبه لمصر ففعليا هو ايه اللى ممكن يحصل اسوأ من الموجود دلوقتى ؟ ولا حاجه nothing rien !

اللى ممكن يحصل اكتر من دلوقتى اقولك واضح انك مش بتكلم حد من اهلك فى القاهرة :((
- بناتى ممكن لما يروحوا المدرسه مايرجعوش وممكن لو خرجوا من المدارس يتعرضوا لتحرشات .........................دلوقتى فيه امان نسبيا يروحوا لوحدهم -فى الأتوبيس- و يرجعوا لوحدهم
-الجامعات و المدارس حا تتقفل ........دلوقتى حتى لو فيه تعليم صورى لكن احنا بنضع المدرس امام ضميره كل لحظه يعنى على الأقل بنركبه ذنوب فوق ذنوبه لما بيفلفص فى الشرح
-العربيات يتولع فيها وخصوصا العربيات الغالية .......دلوقتى اهو بنروح و بنيجى مشاويرنا و مقضينها على قدنا و دفعنا كتير علشان يبقى عندنا عربيه
-الغوغاء حايدخلوا على البيوت فى الأحياء المتوسطه و الراقيه و ينهبوا و يسرقوا .........دلوقتى ملهيين اللى سايق توك توك و اللى بيلقط رزقه فى الموبيلات و اللى سايق له ميكروباص و اهى ماشيه
- البنوك حاتتسرق و المحلات ...........
- المستشفيات و العلاج و الصيدليات حاتحصل فيهم ازمات .................يعنى انا و المرضى ربنا يشفينا جمبعا و الكبار فى السن اكيد حايعانوا
احنا فى وضع صعب اقتصاديا و اجتماعيا و بنعانى على كل المستويات تعليميا و صحيا و اقتصاديا و امنيا لكن كل حاجه على شفا الأنهيار لكن مش بتتنهار انا باقدر اكتب اللى بيضايقنى على النت .......................ساعتها مش حأقدر اعمل حاجه
مش عارفه هل مافيش حد تعرفه عايش فى مصر بيتعلم او بيتعالج او بيعمل او بيربى عياله او بييعمل حاجه
حضرتك كفرت بمصر و اللى فيها ...............الحاجه اللى مجننانى فعلا ..........مالك و مال اللى فيها بقه
بالمناسبه انا مع الثورة و شايفه انه فعلا لو حصل كل اللى انا خايفه منه ده حاتبقى مرحله مؤقته بس ان شاء الله حاتبقى زى الفيضان حايدمر اللى حواليه لكن بعد ما يخلص الدنيا حاتنضف و الحياة حاتدب فى الأرض تانى ....وان الحريه تمنها غالى و كل اللى انا خايفه منه رخيص برضه قدام اللى ممكن يتغير بعد كده لكن باتمنى التغيير يجى بطريقه امنه و سلميه و يكون فيه قائد الناس تلتف حوله ..................ربنا يسترها على الحميع

 

 

[Farida]

سورة التوبة - سورة 9 - آية 24

الميزان في تفسير القرآن

قل ان كان اباؤكم وابناؤكم واخوانكم وازواجكم وعشيرتكم واموال اقترفتموها وتجارة تخشون كسادها ومساكن ترضونها احب اليكم من الله ورسوله وجهاد في سبيله فتربصوا حتى ياتي الله بامره والله لا يهدي القوم الفاسقين