شفت مين من المشاهير

[عبقرينو]

الصحف المصرية والعربية

اقتباس المشاركة الأصلية كتبت بواسطة Farida تخيلوا نسيت واحد مشهور جدا جدا قابلته و نسيت احكى لكم عنه تفتكروا مين ؟؟؟؟

مين هة هههههههه ؟

 

 

[عبقرينو]

محمد العزبي في هايبر وان - الشيخ زايد

بسيط جدا في تعاملاتة وعملاق في هيئتة

 

 

[Farida]

اقتباس المشاركة الأصلية كتبت بواسطة عبقرينو مين هة هههههههه ؟

أكبر رأس فى البلد
اللى مستغرباه ماجاش على بالى مطلقا فى الأول يعنى انعام سالوسه تيجى على بالى و هو لأ تخيلوا

 

 

[فــيــروز]

اقتباس المشاركة الأصلية كتبت بواسطة Farida أكبر رأس فى البلد اللى مستغرباه ماجاش على بالى مطلقا فى الأول يعنى انعام سالوسه تيجى على بالى و هو لأ تخيلوا

قولى بقى بلاش تحنيس

 

 

[HAMOUDI]

بصوا ياجماعه
اول واحده شوفته وانا فى ثانوي كنت فى مدرسه ثانوية عسكريه قالوا لنا النهارده يوم رياضى هاتروحوا بعد الحصه الاولى هيهيهيههيهيهيهي اه بس فى شرط قبل مارتوحوا خدوا الاعلام دي
بتاعة المدرسة وبتاعة الجمهورية والخ..... واطلعوا بيها على قصر الثقافه فيه ايه ياجماعه
الريس جاي هاتقفوا 10 دقايق وتوتبينوا الاعلام قدام التلفزيون وترجعوا حاضر وحسسونا ان فى الا دعوه شخصيه لكل واحد فينا وخصوصا لو قلنا ان احنا من المدرسة الفلانيه
استنوا ياولاد انتم ماينفعش تركبوا انتوا تاخدوها مشي على الاقدام علشان تكونوا عنوان المدرسة(بنظام طالب المدرسه الفلانيه مميز فى كل مكان وبيبان من بين الف طالب وحاجات زي كده خلونا ماشيين منفوخين فى الشارع وحاسين ان الناس نفسها تبقى فى مدرستنا والى خلص تعليم يبقى نفسه يتسخط تانى علشان يدخل مدرستنا بس بعد كده عرفنا ان الناس كانوا بيقولوا ايه الناس الى عايشه فى الدور دي وممكن كلام مش ظريف يعاقب عليه القانون )بعدها فضلنا ماشيين على رجلينا 3 كيلو واحنا فى اولى ثانوي وفضلنا واقفين واقفين واقفين ورا سياج من عساكر الامن المركزي3 او 4 ساعات فى الشمس وبعدين لقينا الدنيا اسكت هس اتنين اجانب غالبا مصورين بس تبع التليفزيون المصري ثم سارينه وبعدين هل علينا فى عربيه مكشوفه المشهد كالاتى
باى باى يمين باي باي شمال ثم انزل يديه الاثنين ورفعهم مع جزعه للاعلى كانه بيلعب تمرين رياضي وباي باي بايده الاتين ثم اختفى داخل قصر الثقافه
كان صديقي وائل بجانبي كان تعليقه كالاتى ايه ده بقى منادينا علشان نتفرج على واحد بيفقر
انا طبعا دمي اتحرق وقلت جوايا (مش كنت طلعت ولعبت ماتشين كوره احسن)
وانتهى الموضوع على ذلك
من المشاهد الى شوفتها يومها واحد من البسطاء كان واقف بالظبط مااقصد الا الوصف كان احساسي ان مهتنه قهوجي عنده 50 سنه دقيق الحجم ولازق فى حب جنود الامن المركزى الظابط قال له ارجع
ارجع قال لا
لالالالالالالالالالالالالالالالالالالالالالالالالا لاء انا بحبه
عايز تحبسني علشان بحبه انا بحبه


وعلى طريقة اخونا ضبش
بعد هذا الموقف بحوالى 15 سنه كنت فى شرم الشيخ وكان الريس لما ينزل هناك الدنيا بتقف يعني مثلا ممنوع العمل وممنوع تحرك اى معدات ميكانيكيه الخ
وكنت اعمل فى مكان مصاريفه اليوميه الثابته باسعار ايامها حوالى 10000 جنيه ومع ذلك تم وقفنا عن العمل نحن وكل شرم الشيخ
وفى اثناء تحدثى مع زميل ليا فوجئت بزميل يقول ليا موكب الريس اهو فقلت له ماشي وكان ظهرى للطريق (بينا وبين الموكب حوالي 100 متر)على اعتبار ان الموكب يمر مرورا سريعا ومش هالحق ابص واستمررت فى الكلام معه فقال لي الموكب لسه شغال فتعجبت ونظرت ثم بعد برهه ظللت اعد السيارات فوصلت للعدد 49 من افخم السيارات اى اننى قمت ببدء عد السيارات فى منتصف الموكب وكان العدد 49 سياره من ليموزين ومرسيدس و..و... و...

 

 

[nash]

الصيف اللي فات شوفت تيسير فهمي في مارينا وبالتحديد في شاطيء اليشمك الحريمي..

ومذيعه مصريه حاجه شلبي ..هما اللي قالولي ( صحباتي يعني ) ..الحقيقه الماكياج أحيانا بيكون نعمه ..

شفنا حسام حسن وحماقي .....برضه في بورتو مارينا...محدش بس يقول اني من علية القوم انا كبيري أروح عزومه مع صحباتي

في مصر الجديده فيلا زهرة العلا قدام بيتنا ... وكان غالبا بيجتمع عندها الممثلين لتصوير مشهد ما.. ووقت خروجنا من المدرسه ( ايام العز يعني ) كنا نشوفهم ونقعد نعملهم باي باي وكانوا حبوبين جدا ..ومرة الكلب بتاعها وكان لولو عضني وكنت مستنيه باص المدرسه الصبح بدري وطبعا كان ليا الشرف
الغريبه انها كانت بتروح بنفسها تشتري الخضار من سوق جامع الفتح ايام ماكان نوافير وحاجه جميله ...

 

 

[HAMOUDI]

اقتباس المشاركة الأصلية كتبت بواسطة farida أكبر رأس فى البلد اللى مستغرباه ماجاش على بالى مطلقا فى الأول يعنى انعام سالوسه تيجى على بالى و هو لأ تخيلوا

على فكرة انا كنت هاقول كده. بس عما جيت ارد عليكي كنتي سبقتيني
بس شوفتيه ازاي وكان بيعمل ايه؟؟؟

على فكره انعام سالسوه وخيريه احمد من المحببين الى قلبي

 

 

[أمة العزيز]

حلو اوي الموضوع ده

شفت جميل راتب .. في الدقي كان نازل من العربية بتاعته .. شكله لطيف جدا وكان عجوز جدا جدا

وشفت هناء الشوربجي في الدقي بردو عند محطة المترو ..

شفت الشباب بتوع اوقات فراغ في سيلانترو جامعة الدول

شفت ابراهيم الفقي

عمرو موسى .. ومحمد صبيح .. في جامعة الدول كان عندنا مؤتمر هناك

د.هبة رؤوف عزت .. ود.نادية مصطفى .. ود.محمد عمارة
في كلية سياسة واقتصاد

على الدين هلال في سياسة بردو

د.جلال امين وليا صورة معاه

واخيرا غسان بن جدو .. في المطار

 

 

[أحمد باشــا]

جميل جدا الموضوع ده

انا بقى شفت كل الفنانين تقريبا القدام و بعض الجداد ...منهم من يسكن بجواري و آخرين قابلتهم بسبب طبيعة عملي و آخرين في مصايف او اماكن عامة.... لكن دول موش مهم

المهم اني شفت عبد الناصر شخصيا 3 مرات من البلكونة كان بيركب سيارة مكشوفة و يمر امام منزلنا و شقيقي الأصعر كان يناديه بصوت عالي فيرفع رأسه و يشاور بكلتا يديه محييا

و شفت السادات في استراحة القناطر و شفت جيهان السادات اكثر من مرة و سلمتني مرة جائزة و شفت كل عائلة عبد الناصر في ظروف عمل مختلفة و منهم زوجته الفاضلة مرة واحدة احسست فيها انها ام مصرية طيبة القلب

القنبلة .... شفت مناحم بيجن يتجول في شارعنا بيسلم على البوابين و السياس ... و القصة كانت ان مصطفى خليل رئيس الوزراء وقتها نظم اجتماع بينهما في الأسكندرية وقت مباحثات السلام و كانت في فندق فلسطين بالمنتزة ... و عندما علم بيجن انهم سيجتمعون في فندق يحمل اسم فلسطين رفض .... فمصطفى خليل عاقبه بأن جعل الإجتماع في فندق سان جيوفاني الصغير جدا و يومها رأيت عمال الفندق يهجمون على السوق و يحملون اي شئ يجدونه من مواد غذائية و واحد بيوقع عالكميات .... و طبعا بيجن وصل بدري قبل ما يجهز الفندق لإستقباله فتجول على قدميه في الشوارع المحيطة و التي كانت خالية تماما من المارة فلا احد كان يستقبله ... و لكنه بكل برود اخذ يصافح البوابين و سياس الجراجات معرفهم بنفسه انه مناحم بيجن و هم مندهشون لا يعرفونه تماما و لا يفهمون ما يقول ..... برضه قابلت موشيه شاسون سفير اسرائيل السابق في مكتبي و قد اتى لعمل ما و رفضت العمل الذي كان المفروض لصالح شخص مصري ثم اتضح لي بعد مجيئه انه سائقه الخاص

و من الأجانب شفت كرامنليس رئيس وزراء اليونان وقتها و كان يقود سيارته بنفسه في شوارع اثينا و طبعا لم اكن اعرفه فرأيت سائق التاكسي الذي اركبه يصيح اوو كرامنليس و لفظ اوو هو حرف التمييز ال باللغة اليونانية و يسبق الأسم للتفخيم فحسبت انه يحيى رئيس سواقين التاكسي مثلا فسألته من هذا ؟؟؟ فقال لي كرامنليس رئيس الوزراء

و ايضا كنت اقف بطابور لدخول السوبر ماركت في جنيف و خرج رجل عجوز جدا هو و زوجته يجر امامه عربة المشتروات و يضع مشترواته بمساعدة زوجته في السيارة و وجدت الواقفين يصفقون له و هو يخجل منهم فسألت الواقفة امامي في الصف من يكون هذا فقالت لي انه مستشار سويسرا ... و هو منصب يعادل رئيس الجمهورية عندنا

و قابلت " شخصية هامة " فلسطينية كنت احسبه مناضل بحق و وجدت كل اهتماماته بالفتيات و شرائط الأفلام اياها على فكره لسه حي احسن تفتكرو حد تاني

و في ميونخ قابلت كل اعضاء منظمة الأوبيك وقتها و على رأسهم اليماني رئيس المنظمة و موفد السعودية

آه افتكرت .... هههههههههه

شفت حسني مبارك لما كان نائب السادات في مطار النزهة يوم عيد الجيش تقريبا و كنت في استعراض فريق الجودو بنادي سموحة

 

 

[مهاجرة]

انا شفت عبدالله الرويشد زماااان كنت طالبة بالثاني ثانوي وكنا في بغداد في فندق عشتار شيراتون وسمعت انه عبدالله الرويشد كان بالفندق فرحت اشتريت دفتر صغير علشان اخذ توقيعه وبالفعل شفته لكن كان اسمر وقصير حتى اني ماعرفته بالبداية