Arabic Discussion Forum with a Special Interest in Travel and Immigration

بنت شعنونة · 15th January 2011, 03:39 PM

انتوا متفائلين ليه؟؟

معلش انا مش عاوزة ابوظ توبيك تونس بس ها اتشل يعني!

اصل انا شايفة نغمة تفاؤل غريبة جدا ويارب مصر يارب مصر!
ومش عارفا انا لوحدي اللي لابسة نضارة سودا والا انتوا اللي لابسين نضارات بمبة مسخسخ!

يا جدعان
يا جدعاااااااااااااااااااااااااااااااااااااااااااان

صحيح انا مش ملمة ب احداث تونس ما قبل الثورة او كانوا عايشين ازاي
ولكن
واحد حرق نفسه راح قاموا " القشة التى قصمت ظهر البعير"
واهم حاجا في القشة انها تكون غير مرتببببببببببببببببببة و غير متفق عليها عشان تنجح

عندنا بقى
اتحرق قطر الصعيد بحاله
فاكرين الصور والا افكركم؟

وفي نفس التوقيت تقريبا كان حريق المسرح الثقافي مش عارفا محافظة ايه..!

و كان حادثة غرقى العبارة

وكان الشاب االي شنق نفسه من فوق الكوبري عشان ما معهوش فلوس يتجوز

وبعدهم في الشيخ زايد الشاب اللي انتحر عشان البطالة..

و خالد سعيد..وسيد بلال..

انا مش مصدقاكم!!!!!!!!!!!!!!!!!!!!!!!!!!!!

كل دا حصلنا وبيحصلنا اكتر منه واكتر ها يحصل

وجايين دلوقتي تقولولي لمحة الامل وعدوى الثورة!!!!!!!!!!!!!!!!!!!!!!!!!!

انتوا اكيد اكيد ضاربين بانجو!

وعلى راي ناش
رايي المتواضع او المتشائم ولا الزم به احدا
بس انا فعلا مش عارفا اشوف اللي انتوا شايفينه خالص

خالص

خالص!

O.S.A.M.A · 15th January 2011, 04:06 PM

عملتيها يا شانااااااااااااااا ؟؟؟

بنت شعنونة · 15th January 2011, 04:11 PM

عملتها وماحدش عبرني

شفتني وانا مخلوعة

Prof · 15th January 2011, 04:11 PM

كده عرفنا أول اسم هايتحط في معتقلات النظام الجديد.

O.S.A.M.A · 15th January 2011, 04:13 PM

ياا عينى يا بنتى

تحبى أروح اجيب المرثية من هناك ولا نعملك واحدة تانية ؟؟؟

بنت شعنونة · 15th January 2011, 04:22 PM

انا فداااااااااااااااااااكم يا رجالة

النبي اتلهوا

رامي
مين قال اننا طيبين!
لا
احنا حمولين بغباوة
لا برضه مش دي!

احنا ملهيين على عينا.. ايوا هيا دي الحقيقة المجردة و العريانه كمان بقى
انا ملهية على عيني ب المم و بلقمة عيشي و اكلي وشربي و هم بنتي
وانت كدا
وانتوا كدا
يستجري حد فيكوا يغامر بولاده؟ يستجري يغامر ب "لقمة" ولاده بس حتى؟

اتحداكم
اللي يستجري يوريني نفسه كدا
ولا حد فينا

فاكرين نظرية القرد؟؟ والا افكركم؟

بروف
نظام جديد؟

هأااو أأأو أأأأأأأأأأأأأأأأوووووووووو
وادي قعدة... وانا ماورياش اييييييييييييييييييييي حاجا من هنا ل قرنين قدام..

سنبسري
يارب اكون غلط
ياااااااااااااااااااااااااااااااااااااااااااااارب اكون متشائمة
يارب
بس انا بقيس على نفسي
انا شخصيا.. مستحيل ها اطلع في ثورة الا اذا وصلت 20 الف مثلا عشان اعرف اننا كلنا سوا مش اني ها اروح اونطة

O.S.A.M.A · 15th January 2011, 04:36 PM

لأ بوصى يا شانا نتكلم جد بقى ...

هل يمكن أن تكون هناك شرارة حرية تندلع فى مصر مساوية لما حدث فى تونس ؟

أنا رأيي أنه طبعاً ممكن ولكن لابد من توفر عدة مقومات لحدوث الأمر ..

أولها أن يعرف بداية الشعب ماذا ينتظره إذا ما حدثت فعلاً ثورة ...

أن يعرف ويتعلم أنه له حقوق لا يعلمها لأنه كما قولتى مهتم فقط بلقمة العيش فلابد له من أن يتعلم ويعرف

ممكن تقولى وإحنا لسه هانتستنى لما الشعب يتعلم ... لأ

الشعب بيتعلم بالتعلم من الآخر يعنى أنا كنت مهتم جداً بموضوع تحرر تونس من زين العابدين بن على لسبب هام جداً هو أن يتعلم الشعب المصرى من مشاهدة الموقف وهو أعتقد كافى إلى حد إحداث تغيير

وان يعلم أنه من الممكن أن يحدث تغيير ومن الممكن أن يكون للبلد صورة أخرى غير ما نراها

زمان كان إبراهيم عيسى قال أن الشعب المصرى شعب متركب على سوست "يعنى بيتحمل الضغط" وللأسف المقولة دى فعلاً حقيقة ولكن يمكن لأن الشعب لم يرى فى حياته ثورة تحدث تغيير كما حدث من الثورة التونسية
يمكن أن ده يحدث تغيير ..

Prof · 15th January 2011, 04:36 PM

اقتباس

المشاركة الأصلية كتبت بواسطة بنت شعنونة;432775[COLOR=Black


	[/COLOR] بس انا بقيس على نفسي انا شخصيا.. مستحيل ها اطلع في ثورة الا اذا وصلت 20 الف مثلا عشان اعرف اننا كلنا سوا مش اني ها اروح اونطة

اعتقد بتقيسي غلط.. وأعتقد خمسميت بني آدم معديين من تحت بلكونتكوا كفاية أوي عشان تنزلي.. بلاها خمسمية قولي الف.

عيني ف عينك كده؟
ها تنزلي والا لأ..!

بنت شعنونة · 15th January 2011, 04:42 PM

بروف
لأ مش ها انزل على الف

ابويوسف
اعترض
واقولك ليه..

تخيل بقى 90% من الناس اللي اتقابلت معاهم شايفين الانقلاب بالمقلوب
يعني..
يالهوي
ايه اللي ها يحصل في البلد دلوقتي والسلب و النهب و هايكلوا منين ويشربوا منين دا احنا لو حصلنا كدا ها نتسرق كلنا من "العامية" او مجازا الغوغاء اللي هما سكان العشوائيات اللي لا اتعلموا ولا بياكلو ولا بيشربوا
وبالتالي
ها تبقى ثورة الجياع زي ما كان عمرو اديب بيقول عليها وها يهجموا على اللي زيهم من الناس
مش ها نهجم على الحكومة للاسف

حد فاهمني؟

brain · 15th January 2011, 04:47 PM

التاريخ مش معاكي يا شانا
الشعب التونسي ثار سنه 84
تحديدا في 27 ديسمبر 1983
و انتهت 6 يناير 1984
ثوره الخبز
و كانت اقوى تهديد للحبيب بورقيبه
و قتل فيها الكثير من التوانسه
و فشلت
لكن هل هذا يعني هزيمة الشعب ؟
بلاش تونس
الاتحاد السوفيتي
تعرض ملايين السوفيت لعمليات قتل و تعذيب في العهد الستاليني
و لم يفعل الشعب اي شئ
قتل و عذب و خطف الملايين
و لم يحرك الشعب ساكنا
لكن في عام 90
عندما حاول الجيش السوفيتي الانقلاب على جورباتشوف
خرج الشعب ووقف امام الدبابات السوفيتيه بجسده
بلاش دول علشان هتقولي دول شعوب متعلمه
الشعب الغاني
وقف ضد الحام الظالمين بعد سنوات من القتل و التعذيب و اختفاء عشرات الالاف على يد الامن
و لكن عندما جاء الوقت
خرج الشعب الغاني و اطاح بالحكومه الفاسده و اصبح نموذج للحكم الرشيد في افريقيا كما قال اوباما
الشعب السوفيتي كما قلت انتظر 37 عاما حتى ثار
الشعب التونسي خسر المعركه الاولى من 26 عاما في عام 84
لكنه انتصر في الحرب عام 2011
طيب خلينا نسأل سؤال
المفروض ايه الحل من وجهه نظرك ؟
الناس ترضى بالظلم ولا تعتاد عليه ؟

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
حازم صلاح ابو اسماعيل..عيب على شيبتك!	شؤون مصر الداخلية	د. يحي الشاعر	409	32018	3rd April 2012 09:34 PM
حشيش..مش نافع كدا على فكرة وانا ابتديت اتنرفز..!!	إقتراحات ... مشاكل تقنية	Rapt	27	3918	31st March 2012 04:25 AM
"حظ سعيد" خدت قفا على سهوة..!	صحافة ... إعلام ... سينما ومسرح	بنت شعنونة	0	1516	29th March 2012 09:05 PM
اضحك..كركر..او..الطم مع مرشحين الرئاسة!!	موضوعات عامة ... موضوعات خفيفة ... منوعات	rgydaa	83	14182	10th March 2012 07:21 PM
عايزة مساعدة عااااجلة :))	موضوعات عامة ... موضوعات خفيفة ... منوعات	بنت شعنونة	8	5545	2nd March 2012 01:13 PM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
إسـلمي يـامـصـر ... ولا حول ولا قوة إلا بإلله	د. يحي الشاعر	شهود على العصر	0	10th February 2011 08:31 PM
جميع المعلومات التنظيمية ومواعيد وأرقام الهاتف وما يجب معرفته عن مظاهرات ثورة يوم 25	د. يحي الشاعر	شؤون مصر الداخلية	1	27th January 2011 10:55 AM
حرق القرأن ....لا حول ولا قوة إلا بالله	Dr.Samo	شؤون إسلامية	46	13th September 2010 12:17 PM
شاب ياباني يختترع زوجه له‎ غرييييييييييييييب لا حول ولا قوة الا بالله	بنت الإسلام	شؤون عربية ودولية	71	13th April 2009 12:26 AM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

مناقشات وحوارات جادة

بتقولوا مين يا ولاد؟ مصر ؟؟ ثورة!!! لا حول ولا قوة الا بالله!!!