ينفع السياحة في مصر تبقى من غير خمور؟

[Dr.Samo]

الصحف المصرية والعربية

فيه فندق فى الواحات .... فى واحة سيوة على ما أذكر
الفندق دا على ضوء الشموع .... مافيهوش إضاءة بالكهرباء
وبيمنع إستخدام الموبيل ....طبعا مش هيكتفوا الزباين بس بيطلبوا منهم عدم إستخدام الموبايل
الفندق دا عليه حجز مستمر ودائم .... وعملائه دايما من أثرياء اوروبا
واحة سيوة طبعا بالليل بتبقى جميله (طبيعة هادية - جو غالبا معتدل - السما صافية )
بعيد عن مؤثرات التكنولوجيا .... وبعيد عن كل ما يفسد روح الإنسان
ليه ما نتعاملش مع موضوع الخمور والقمار دا بنفس الطريقة
موضوع القمار دا من الحاجات السيئة فعلا
الأسوء بقى فعلا موضوع السيدات (فى قانون مصرى بيمنع الريسبشن فى أى فندق انه يسأل انه يسأل على وثيقة الزواج بالنسبة للأجانب والعرب ...فقط للمصريين ) وبصراحة القانون دا مقزز جدا ، وفى ضباط كتير قابلتهم كانوا مستائئين جدا من القانون دا

 

 

[نهر النيل]

انا بقى الموضوع ده بفكر فيه من زمان كتييير

احنا بلد سياحي 100%
صح
لكن ليه اللي ييجي بلدنا مايجيش بشروطنا احنا


لكن اللي انا فكرت فيه ان مش هينفع ننفذ الكلام ده عملي وبشكل سريع

لكن ممكن بطريقة تانيه

معروف ان الخمر صحيا
الخمر له سلبيات كتيرة جدا على الصحة وممكن كتير تتوفر التقارير دي من جهات رسمية عالمية


ومعروف كمان ان الخمر بيذهب العقل
وان معظم الجرائم اللي بترتكب في الخارج بتكون بسبب ان الفاعل متعاطي للخمر
اذن امنيا اذا تناول الفرد الخمر من المحتمل انه يرتكب جرم ..صغر ام كبر فهو سيكون جرم لكن الأدهى ان ممكن الشخص ما يتحاسبش بسبب انه اثبت انه كان غير واعي بتصرفاته



طيب ليه ما نستغلش احنا الاسباب دي
ومن خلال حقوق الانسان نعلن ان مصر بلد سياحي استشفائي
بمعنى ان على السائح اللي جاي مصر لازم يعرف انه جاي عشان ينقي جسمه من السموم اللي فيه وكمان فترة يبتعد فيها عن تناول الكحوليات
اسباب كتير بالشكل ده

واعتقد والله اعلم ان في سياح كتيير ممكن يقبلوا الوضع ده بل ويجعوا بعض كمان



لكن تبقى المشكلة

ان في تجار مصريين او اصحاب كازينوهات واوتيلات مش هيعجبهم الكلام ده نهائي
لأنه ضد مكاسبهم من الخمور



وعشان كده لابد نخللي المشروبات الرسمية في الفنادق والكازينوها هو العرقسوس والتمر هندي والدوم والقصب ..على شرط يكون شوب العرقسوس ب 20 دولار عشان يعرفوا نها حاجة قيمه اوي ووقتها هيجروا على المشروبات دي


بس عيب الموضوع ده ان الغلابة مش هيعرفوا يطروا على قلبهم بكوباية عصير قصب ولا سوبيا

لكن ممكن برضه نخللي السعر في المحلات العادية زي ما هو عشان الغلابة يعيشوا




انا الموضوع ده في دماغي اوي
وكان نفسي اراسل شركات طيرا عشان اعرض عليها موضوع منع الخمور اثناء الطيران لأسباب امنيه لأن بيحصل كتير تجاوزات من مسافرين مخمورين في الجو مما يهدد امن الطاقم والمسافرين على نفس الطائرة

 

 

[Raouf]

اقتباس المشاركة الأصلية كتبت بواسطة جرديز طب ما يروح يشربها في بلدهم يا أستاذ رؤوف !!! هو فعلا المشكلة عندنا والا عندهم ؟؟؟!!! وبعدين حيفيد البلد ازاي ملعش عشان مش فاهم الجزئية دي كويس ! طب السجاير حرمتها لا تصل لدرجة حرمة الخمور , ومع ذلك لا انت ولا الاجانب تقدروا تشربوا سجاير indoors إذا كان ده لإقرارهم بضررها المتعدي على الغير , فأين ثمن الضرر المادي والمعنوي للخمور ؟! كتير بشعر اننا مصرين على امتهان أنفسنا بشتى السبل . المشكلة لا تتعلق بحريته هو في معاقرة الخمر , فهذا شيء لا يعنيني ولا يعني أي مسلم ... إنما المشكلة هي في ارتباط السماح بالخمور بضرورة تقديمها بشكل مهني يقوم به عمال يشرف عليهم موظفون يتحكم فيهم مدراء يزودهم بذلك مستوردون . وكل هذه الدائرة محرمة في الشريعة الإسلامية بدءا من عملية الاستيراد وانتهاء بالدخل . معنى ذلك ان تجبر جميع العاملين في قطاع السياحة على ارتكاب الحرام .

بالراحة بس
هايفيد البلد ازاى
هايفيد البلد كتير من اول الراجل اللى هايوصله فى المطار بشنطه لغاية شركات الطيران و مكاتب السياحة و العمال و الموظفون فى كل قطاع السياحة
يعنى هايفيد قطاع من البلد ممكن يوصل الى 30% من البلد فيهم فقراء و اغنياء
اما اننى اجبر جميع العاملين فى قطاع السياحة على ارتكاب الحرام
فالاجابة بسيطة
انا لا اجبر احد من يؤرقه ضميره فليترك هذا العمل و يبحث عن اخر
هو حر و انا اعرف افاض2ل بيشتغلوا فى مجال السياحة و ناس محترميين جدا جدا
و بخصوص السجائر indoors ده لان السجائر ليها تأثير سلبى على المحيطيين و دايما حريتك تقف عند حرية الاخرين
انا عايش فى بلد خليجى يمنع دخول الخمور الى اراضيه
و صدقنى انا شفت هنا ناس بيشربوا خمور بصورة يومية اكتر من كل اللى شفتهم فى حياتى
اذا المنع ليس هو ما سيصلح المجتمع و لكن اصلاح الاخلاق هو ما سيمنعه
" اية قيمة للفضيلة اذا لم توجد حرية "
لامارتين

 

 

[حسام]

ليه فيه ناس مش عايزة تقول اننا بلد أغلبه مسلمين وديننا بيحرم الخمور
واللى عايز ييجي بلدنا
يتفضل
لكن الخمور ممنوعة
السايح اللى مش قادر يسيب الخمرة فترة زيارته لمصر بلاش يشوف المعابد والمتاحف والشواطئ وخليه بازازته
وانا مش ضد السياحة
لكن ضد اننا نتخلى عن ثوابتنا
ولو قعدنا نتخلي عنها
هنطالب باباحة السياحة الجنسية رسمي عشان الدولارات
الحمدلله اللى فى المنتدي عارفين انى مش متشدد
وباخد نقد لدرجة التجاوز من الملقبين نفسهم بالاسلاميين
يعني انا لا اخوان ولا سلفيين ولا الناس دي خالص
بس ببساطة
انا مسلم
هقبل ده لو انا فى دولة دين الغالبية منها مش مسلم
ساعتها اوك
تقدر فى الهند تمد ايدك على بقرة؟
الموضوع بسيط
بعض احترام النفس مطلوب
والرزق ربنا هيبعته لو اشتغلنا صح وفكرنا صح

 

 

[nash]

طب ورشدي يقدم أيه ..ينسون مثلا؟

المشكله ليس في قرار بيع الخمور من عدمها .. المشكله أن من يدير الفنادق شركات عالميه وليس أفراد....

من كذا سنه منع صاحب أوتيل جراند حياه الشيخ البراهيم بيع الخمور وحدثت ربكه كبيرة نتيجه القرار الفردي ....

شخصيا أتمني أن ينفذ قرار مثل هذا .. لأونه بالاساس حمايه لاولادنا قبل أي شيء....

عقبال ما يقفلوا المحلين الموجودين في ميدان تريمف .... حاجه تقرف بصراحه ... رأيي ولا أجبر أحد عليه

 

 

[Raouf]

اقتباس المشاركة الأصلية كتبت بواسطة nash طب ورشدي يقدم أيه ..ينسون مثلا؟ المشكله ليس في قرار بيع الخمور من عدمها .. المشكله أن من يدير الفنادق شركات عالميه وليس أفراد.... من كذا سنه منع صاحب أوتيل جراند حياه الشيخ البراهيم بيع الخمور وحدثت ربكه كبيرة نتيجه القرار الفردي .... شخصيا أتمني أن ينفذ قرار مثل هذا .. لأونه بالاساس حمايه لاولادنا قبل أي شيء.... عقبال ما يقفلوا المحلين الموجودين في ميدان تريمف .... حاجه تقرف بصراحه ... رأيي ولا أجبر أحد عليه

طيب يا ناش معلش هاسألك سؤال
تفتكرى لما محلين تريومف و كل الاوتيلات تمنع برضه
تفتكرى الشباب هيبطلوا يشربوا خمور ؟؟؟؟؟؟؟؟؟؟
انا مش عايز اظهر بمظهر المدافع عن الخمور لكن ممكن نقيس ده على اى حاجة تانى زى التدخين مثلا انا بادافع عن المبدأ مش عن الخمور

 

 

[nash]

أنا فاهمه عليك يا رؤوف ... بس هو الواحد بيعمل اللي عليه الأول والتوفيق والإراده بأيد رب العالمين ... السهوله والصعوبه في الحصول علي شيء ما ...ممكن يكون لها يد في إمتناع الإنسان او تقليل من عاده معينه سيئه ....

طيب مافي السعوديه مواقع إنترنت كتيرة محجوبه ... وطبعا بيعملوا المستحيل بالبروكسيات لدخولها ... مش كلهم بيعرفوا تكنولوجيا وبالتالي بتصبح الظاهرة مقصورة علي فئه ليست بالغالبيه ... أحنا بس نعمل اللي علينا ....

 

 

[أكسيلانس]

أه - أنا شايف ناس بتخبط علي بابي -- ربنا يستر

أولا - أحب أوضح شويه حقائق مشوه - جرت العاده علي تضخيمها بشكل مستر -- و هي أن دخل مصر يعتمد علي الخمر و القمار -- و هذا غير صحيح بالمره -- قيمة مساهمة ربحيه الخمور بالفنادق لا يزيد عن 5% من أجمالي الارباح - و عندنا في الفندق الذي أعمل به تقل عن 2%
ثانيا - القمار -- و عائدات القمار -- لا يشترط لكي ترخص فندق خمس نجوم أن يكون لديك كازينو قمار و علي سبيل المثال مدينة الغردقه بالكامل و بها 300 فندق - لا يوجد بها غير كازينو واحد في فندق -Intercontinental - و عائدات القمار عباره عن 50% ضريبه تفرض علي أيرادات الكازينوا - و تذهب بالكامل لصندوق تنشيط السياحه التابع لوزارة السياحه للانفاق منها علي المعارض الخارجيه و الاعلانات بغرض تنشيط السياحه - يعني لا تدخل علي الموازنه العامه للدوله نوهائيا !!!

السؤال المطروح - هل يمكن أن يكون هناك سياحه بلا خمور -- الاجابه -- نعم و لكن في أماكن محدده

بمعني - هناك ما يعرف بالسياحه الاثريه - و التي تأتي لزيارة المعالم الاثريه خصوصا - و هذا النوع من السياحه قد لا يتأثر بعدم وجود الخمور لانها سياحه تأتي لغرض محدد و كذلك ما يعرف بالسياحه العلاجيه - و هي محصور في منطقة سفاجا و عيون موسي
أما الجزء الاكبر من السياحه و هو السياحه الترفيهيه - فهذا هو المشكله - لان السائح يأتي اليها للاستجمام و التنزهه - و هو اي يتطلب توفير كل ما أعتاد عليه السائح في بلاده من طعام و شراب - الخمور بالنسبه للسائح الغربي هي تماثل بالضبط شرب الشاي بالنسبة لنا -- فلا توجد أسره فرنسيه أو سويسريه لا تشرب النبيذ مع الطعام -- كما لا توجد أسره أو شباب أو رجال روس لا يشربون الفودكا و هكذا -
كان في الماضي دخل مصر من الخمو كبير لانه لم يكن بها مصانع تصنع هذه الخمور و كانت الضرائب و مالزالت تصل الي 400 % علي الخمور المستورده - الان لدينا مصانع للخمور تغطي أحتياجات ال 13 مليون سائح بالكامل من الانتاج المحلي و هو ربما شئ يجهله الكثيرين - هذه المصانع مملوكه لشركات عالميه .. و بالتالي أصبح سعرها رخيص جدا 20 جنيه مثلا للنبيذ !!

المشكله التي يدور الحديث حولها عويسه شويه -- لانها لا تنحصر بالخمور فقط -- فمثل50% من الاجانب الشباب الذين يأتون لمصر غير متزوجين - ( أصدقاء ) فكيف سنتعامل معهم في الوقت الذي يشترط علي المصرين و العرب تقديم ما يثبت العلاقه الزوجيه للحجز بالفنادق - لا يشترط هذا من الاجانب -- الحديث عن العري للاجانب - هل يمكن أن يأتي سائح لنزول البحر مثلا بكامل ملابسه - و تمنع أرتداء المايوهات البكيني - أو تمنعهم من الخروج للشارع بالجيبات الميكروجيب أو الهوت شورت - أو الحمالات و ما شابه !!

عملة بالسعوديه لفتره من الزمن -- و كانت الخمور موجوده في كل بيوت الشخصيات الكيبيره بالبلد - و يسمح بدخولها للسفارات دون رسوم جمركيه - و كذلك تدخل للامراء دون تفتيش - و كانوا هؤلاء بالتبعيه يبيعوا هذه الخمور بأسعار فلكيله في سوق شديد السريه -- لكنها موجوده -- الدوله تمنعها و تحرمها - و لكنها تسمح بدخولها لسفارت الاجانب - لانها تعرف أنها من عادات هؤلاء فقط لا غير !!

أرجو ان تكون الصوره الهباب قد وضحت

تحياتي

 

 

[Raouf]

اقتباس المشاركة الأصلية كتبت بواسطة nash أنا فاهمه عليك يا رؤوف ... بس هو الواحد بيعمل اللي عليه الأول والتوفيق والإراده بأيد رب العالمين ... السهوله والصعوبه في الحصول علي شيء ما ...ممكن يكون لها يد في إمتناع الإنسان او تقليل من عاده معينه سيئه .... طيب مافي السعوديه مواقع إنترنت كتيرة محجوبه ... وطبعا بيعملوا المستحيل بالبروكسيات لدخولها ... مش كلهم بيعرفوا تكنولوجيا وبالتالي بتصبح الظاهرة مقصورة علي فئه ليست بالغالبيه ... أحنا بس نعمل اللي علينا ....

طيب قيسيها بالمخدرات فى مصر
ناش انتى عارفة نسبة الشباب اللى بيشرب مخدرات اد ايه مع انها ممنوعة و مجرمة قانونا
و اد ايه نسبة الشباب اللى عمرهم ما جربوها فى مصر
عارفة الخليج نسبة قد ايه بيشربوا خمور مع انه ممنوعة و مجرمة
الحل مش فى المنع
الحل فى التوعية
الحل فى الاخلاق مش فى المنع
المنع هيزود المشكلة مش هيحلها

 

 

[nash]

ربنا يحفظ شبابنا يارؤوف ياااارب ...

طبعا انا عارفه ان العند بيولد كفروسياسه المنع بتحفز البني آدم يعمل المستحيل للحصول علي الشيء الممنوع وزي ماقالوا الممنوع مرغوب ...

لكن صعوبه الحصول علي الشيء ممكن تكون أداه ناجحه لمنع فئه معينه من الشباب يعني نص البلا والعمي وكل حاجه ....

في الإمارات محلات بيع الخمور مفتوحه للأجانب علي مصراعيها ... ولو إماراتي حب يشرب ... لازم يكون معاه تصريح علشان يقدر يشتري ... طبعا فيها إهانه ضمنيه لحامل التصريح وبالتالي كتير بيتكسفوا ويقللوا أو مايحاولوش من أصله ...

المخدارت يالطيف أسهل من السجاير هنا في مصر ومش هانضحك علي نفسنا لدرجه حسيت أنها مؤامرة علي شباب مصر من شله اللصوص علشان يفضلوا مسطولين .... مع الأفلام الهابطه كانوا عاملين زي فك الكماشه المرعب الطابق علي رقبه الشباب ....

يمكن ببساطه أنا ببص علي الموقف بعين الأم الأنانيه اللي عايزة تحافظ علي أولادها من الهوا الطاير .... ومستعده أقتلهم ولا إن واحد فيهم يقدم علي حاجه بالمنظر ده.... لإنهم كده كده هايموتوا ...وأحنا عارفين أن الخمر تذهب العقل ... يعني الأخ من دول بيكون زي المعتوة أو أداة جريمه متحركه علي قدمين وممكن يعمل مصايب سودا في نفسه أو في غيرة من غير مايحس ....

دي وجهه نظري المتواضعه