مغامرات الشيخ تامر

[shaikh_tamer]

الصحف المصرية والعربية

الحمد لله و الصلاة و السلام علي رسول الله و علي اله و صحبه و سلم.

الحمد لله قاهر القياصرة و كاسر الاكاسرة و مذل الجبابرة

الحمد لله وحده ان وفقنا لهذا و ما كان لنا ان نكون هنا لولا ان وفقنا الله

الحمد لله ان نجانا من انقلاب اهلك الحرث و النسل و ابدلنا دارا افضل من دارنا و ادمين افضل من المسوخ المؤيدة للانقلاب.

لا أقول الا كما قال سيدي نوح حينما انجاه الله.. فَإِذَا اسْتَوَيْتَ أَنتَ وَمَن مَّعَكَ عَلَى الْفُلْكِ فَقُلِ الْحَمْدُ لِلَّهِ الَّذِي نَجَّانَا مِنَ الْقَوْمِ الظَّالِمِينَ

- الحمد لله رب العالمين الرحمن الرحيم مالك يوم الدين - الحمد لله الذي خلق السماوات والأرض وجعل الظلمات والنور - وقل الحمد لله الذي لم يتخذ ولدا - الحمد لله الذي أنزل على عبده الكتاب - قل الحمد لله وسلام على عباده الذين اصطفى - الحمد لله الذي خلق السماوات والأرض - الحمد لله فاطر السماوات والأرض

و اضيف ان القلب و العقل مازال في مصر, فاللهم ارحم مصر و أهلها من الحكم العسكري الغاشم و هيئ لها فرجا قريبا.

ثانيا من لايحمد الناس لا يحمد الله

فاكرر شكري للباشمهندي شاوي صاحب الفضل في مساعدتي و قلت له ان العسكر محاصر غزة و ما يفرج عني الا واحد غزاوي فاللهم فرج همه و سهل امره و تقبل منه, و الباشمهندس مصطفي اللي حاول يساعدني و الكثير من السوريين و العراقيين و الفلسطنين و الاردنين و المغاربة و التوانسة و السودانيين و الليبين و السعوديين و المصريين و كلهم ساعدوني بفضل من الله و نعمه. و لسان حالي يقول:

انا العراق انا نجد ان يمن, انا الجنوب بها دمعي و احزاني

بالشام اهلي و بغداد الهوي و انا بالرقمتين و بالفسطاط جيراني.

ثالثا كتبت ما كتبت في 2015 و بفضل من الله وحده اظن ان كلماتي كانت ملهمة للكثيرين و الحمد لله صححت الكثير من المفاهيم للعديد من الناس اللي بتقدم و اللي فتحت الباب لكثيرين في موضوع هجرة المقاطعات بل ان عدد المسافرين علي باب المقاطعات رغم قلتهم الا انهم كانوا يعدون علي الأصابع و لله الحمد لم يسبقني احد فيما كتبت, فبفضل الله كنت الأول في هذا الباب. بل ان بعضهم قالي بعد المحاضرة ادينا سمعنا كلامك يا شيخ تامر و حكينا في النومينيشن و هم الان بفضل الله في انتظار الفيزا فاللهم لك الحمد و المنة فلم افعل هذا علشان اعمل مصلحة او لجمع مال او لشهرة و لكن لعلمي ان يأتي اخي المسلم او المصري او العربي افضل من ان يأتي اخي الفيتنامي او الهندي ..

https://www.almatareed.org/vb/showth...0#.WPsOaze1tdg

رابعا لو انت يا ابني او يا بنتي عايزين تنجحوا في الهجرة اول حاجة ابعدوا عن فتي المصريين و اعتمدوا علي نفسكم في قراءة الجايد بالانجليزي و اللي ميعرفش حاجة يسال الخواجة, فالمصريين يسمع منهم المرء كلمة واحدة صحيحة و يضيف عليها مئة كذبة.

خامسا: لسه برضوا المصريين مش بيحبوا بعض و مش عارف ليه بس احتياطي حنشتم العسكري العرص و حنقول ان هو السبب.

سادسا اللي حيقول كلمة علي المصريين حطلع *&_&^$*(%&^^*&#$^*&#^)*@&*&(@*&$# و شكرا لتفهمكم.

سابعا كما كنت بفضل الله مغيرا للكثير من المفاهيم الخاطئة, فانا اليوم ساضيف معلومات ارجو ان تكون مفيدة لمن وفقه الله بالنومينيشن او اقترب قليلا من القدوم.

ثامنا: و اسمعها مني يا ابني, لازم تخلص نيتك لله, يعني بلاش نيتك تكون انك مسافر علشان تعليم العيال و انك تعمل فلوس او انك تتجوز بنات حلوين و شكرا, صدقني بعد فترة حيقفل نجم كندا في قلبك و مش حتحس ان اللي عملته ده ليه قيمة كبيرة, خلي نيتك انك تنشئ جيل يتعلم لغة و تكنولوجيا ينصر بها لا اله الا الله و يعز بها الدين, او انك توفر فلوس و تساعد بيها المعوزين, او انك تحفظ نفسك و عرضك من ظلم معرصين العسكر, و طبعا حيطلع خفيف اللي حيقولي اتجوز كندية و اخليها تسلم يا شيخ تامر. افتكر حديث من كانت هجرته لله و رسوله فهجرته لله و رسوله, و من كانت هجرته لدينا يصيبها او امراة ينكحها فهجرته الي ما هاجر اليه. فاللهم تقبل منا و اصلح نوايانا.

بشكل عام حقولك تحضر شنطتك و احوالك ازاي:

حضرتك حتعمل فحص طبي شامل علي كل جسمك و متقولش ان كندا فيه الطب متقدم و الكلام الفاضي ده, الناس يا ابني هنا بتموت علي أبواب المستشفيات مع التأكيد طبعا علي الاسنان و العيون.

حضرتك حتشتري كل أصناف الادوية اللي انت حتحتاجها و اللي يمكن تحتاجها و حتجيبلي معاك

مضاد حيوي, مسكن, صداع, كريمات التهابات و ممكن احتياطي اللي حتولد او ناوية تولد تجيب معاها كل حاجة طبية ممكن تحتاجها و لما تجيب الحاجات ديه حتطلها من العلبة الكرتون بتاعتها و توزعها علي الشنط بتاعتك (مش مجمعة او في شنطة واحدة) علشان لو حد وقفك تقول انها للاستخدام الشخصي. الادوية هنا علي حسابك و لازم وصفة لمعظم الادوية.

حضرتك حتروح محل الباشا اللي في اسكندية فكتوريا في اول عبدالناصر اللي كان اسمه زمان عبدالعال و حتلاقي في كل محافظة توكيل خاص بيها و حتجيب الرسيفر بتاع القنوات اللي بيشتغل علي الانترنت و تدفعلك سنتين ثلاثة زيادة و تجيبلي معاك واحد. طبعا القنوات ديه علشان تسمع قناة المجد للقران الكريم مش علشان الدوري الأوروبي.

حضرتك حتجيب انظف موبايل و انظف لابتوب و ممكن تجيب جهاز للعيال لو تعرف تشيله معاك في الشنطة لان الأجهزة هنا اغلي من مصر مع اعتبار انك شاري من مدخراتك و لسه مشتغلتش.

حضرتك مش حتجيب جبنة تركي لانها حتعمل ميه لو نوعها كويس و لو نوعها وحش يبقي اشتري اللي هنا و خلاص. ممكن لب اسمر و ابيض و سوداني و هاتلي معاك.

فيه ناس بتعمل تامين طبي علي بال لما يطلعلها كارت التامين و نصيحتي هي لو معندكومش مشاكل صحية كبيرة انكم متعملوش الحوار لانكم أصلا ( و ناس كتير متعرفش الموضوع ده ) من حقكم انكم تستردوا ما دفعتوه بايصال بعد لما يجيلكم الكارت و ربنا يسلم الجميع.

حضرتك هات اعشاب, يعني كركديه و ينسون و سحلب و كراوية و ... مش محتاج اقولك اني جبت حزمة بقدونس بثلاثة دولار و نص يا مسلم, اه والله ...و ممكن تجيب الباكيت بتاع ازيس بس اشطب علي اسمه بالانجليزي علشان تهمة هنا و طبعا مش لازم افكرك انك تجيبلي معاك

كل حاجة انت بتحتاجها في المطبخ حتشتريها هنا و بالتالي لما تجيبها معاك حيكون احسن لانها أصلا موجودة عندك و غالبا انت معاك وزن زيادة, يعني مثلا هات معالق و حلل و اطباق و صواني و مفكات و شاكوش و دباسة , و رغم اني اشتريت المكواة و السشوار من هنا استعمال ارخص كتير من مصر, بس مرة تانية انت كده كده حتدفع فلو موجودين يبقي توفير ليك و لو قليل.

هات بطانية و لحاف قطن, لاني اكثر حاجة ندمان عليها كوفرتت غزل المحلة و اللحاف القطن بتوعي و جبت شوية هلاهيل ملهاش لازمة. مع العلم انك مش حتسقع زي مصر.

هات شاحن موبايل و لابتوب بفيشة ثنائية اللي موجودة في كندا, غالبا حتلاقيهم في راديو شاك.

هنا الميه في كندا فيها املاح اقل من مية مصر و علشان كده كنت بشرب ميه كتير في الأول و الصابونة بتاعت مصر قعدت معايا أسبوع بحاله, غالبا الصابونة عندي بتخلص في 3 أيام لو طولت.

هات جزمة بوت ليك و للعيال و جاكت جامد ضد الميه و شنط المدرسة و كاب و نظارة و قفطان و طاقية علشان تلبسهم في العيد.

بالنسبة للهدوم الجو داخل البيت احسن من الجو داخل البيت في مصر رغم اني في مصر كان عندي دفايتين و كنت بشغلهم طول النهار بس طبيعة البيوت المعزولة هنا خلوني احسن ان الجو لما تكون درجة الحرارة -24 و انا طافي الدفاية ارحم من مصر مع تشغيل الدفاية.. اه والله.

لو فلوسك كتير و مش عارف تحولها ازاي قدامك حلين, الأول البنوك الاليكترونية و الثاني انك تشتري دهب و تلبسه و اعتقد ان من حقك تلبس الأولاد و المدام و انت كل واحد بحد اقصي ربع كيلو, يعني متقلقش من حاجة و لما تحب تبيع الدهب كلمني.

في السفر بلاش أي حاجة فيها معدن تكون معاك في الهاندباج زي الحزام مثلا, و لو تعرف تحط اللابتوب بتاعك في شنطة الشحن (مش في الهاندباج) يكون احسن.

الكنديين مش بيرموا حاجة اطلاقا و فيه هنا سوق مستعمل (بالة) نشط جدا و الحاجات رخيصة فمش عايزك تقلق من أي شيء و كله موجود و رخيص و يمكن تلاقيه ببلاش كمان.

افتكر كويس انك لو جبت معاك كل بيتك و اشتريت كمان اللي نفسك فيه حترجع تقول يا ريتني كنت جبت الكرسي الخشب المكسور اللي كنت راكنه في البلكونة.

الليسته ديه مش نهائية و كل لما افتكر حاجة ان شاء الله حكتبها.

البوست القادم اول مغامرة للشيخ تامر بعد حط الرحال في الأراضي الكندية.او ما يعرف بالدليل الغير عادي في اللانديج في مقاطعات الاكادي.

 

[shaikh_tamer]

انا محضرتش أي شنطة و كنا بنحضر الشنط زي اللي هربان من حكم لأننا حجزنا في ظروف استثنائية و اخدنا القرار قبلها باسبوع تقريبا, الحمد لله انا معايا الفزيا من نص 2016 الأول بس كنت باخرم المراكب علشان معرفش ارجع.

محضرتش ولا شنطة و سيبت الموضوع ده لمن لاعلم له بالسفر و اقصي مكان راحه او مغامرة راحها في حياته هو شاطئ الشاطبي السياحي و هي لامؤاخذة العزيزة مراتي.

لولا الملامة كنت قلت هي حطت ايه و سابت ايه بس ربنا ستار حليم، ده حتي الواد ابني كان بيغفلها و يحط لعبه المكسرة اللي كنا حنرميها, اصله لقي مولد في البيت و كله عمال يحدف و انتوا عارفين العيال بتحب الحفلات.

ما علينا, اقتربت السيارة من مطار برج العرب اثناء غروب يوم جميل في اسكندرية, كان جميل علشان مسافر, و لقيت سعادة الأمين واقف عند الحاجز بيمنع الاهل من الاقتراب من ساحة المطار المقدسة, يعني بعيد عن المطار حوالي 50 متر كده, اه والله, تقولش حيدخلوا الجنة, بعد لما سعادته سمحلي بالدخول و لقيته منع اهلي, قلتله هات الباسبور و رجعت وقفت معاهم تاني علشان اودعهم, والله لولا الاضطرار مكنتش سافرت.

خليت معايا فلوس مصري خمسات علشان لزوم البقشيش للشيالين و خلافه, و مديتش لعسكري او امين شرطة.

حطيت اللابتوب في الشنطة و ده كان مشكلة في كل المطارات ما عدا مصر لانهم بيطلبوا انك تطلعه من الشنطة و للأسف جبت حزام و برضوا كانوا بيطلبوا اني اشيله و كان افضل البس بنطلون من غير حزام زي لما قلت قبل كده و المصيبة الكبيرة بقي اني كنت جايب جزمة سيفتي, اه و النعمة, تخيلوا انتوا بقي الشكل عند كل جهاز كشف معادن, بس عادي يعني , انا اللي كان بيكلمني كنت باقوله حضرتك انا مصري فكان بيطبطب عليا و يسلم امره لله و يسكت.

مش حنسي نظرة الضابط و هو بيختم ختم المغادرة علي فيزة الهجرة, ليها معاني كتيرة اوي و مراتي لاحظتها, تحس انه حاقد عليك او بيقولك يا ابن اللذين حتهرب بجلدك او انه كارهك رغم انه بيورد عليه كل يوم الالاف!

ركبت الطيارة و خليت العيال بيني و بين ام العيال في كراسي الطيارة علشان نسيطر و طيرنا الي الأراضي القطرية المقدسة في ترانزيت قبل التوجه لموريال.

بصراحة انا اتبسطت اوي من قطر و من المعاملة في مطار قطر و لاني خبير في السفر للسعودية و انا صغير بصراحة حسيت بفرق كبير, و الفندق كان الكونكورد و احسن حاجة عملناها هي اننا منعنا العيال من النوم نهائيا, و كانوا بيعيطوا علشان يناموا بس هيهات, اصل لو سيبناهم يناموا في الفندق حيسهروا في الطيارة و الطيارة 13 ساعة و لكم ان تتخليوا حجم الكارثة.

الرحلة كانت كويسة و الاكل كويس و طبعا نسيت أقول ان العزيزة زوجتي مجابتش أي نوع من أنواع الاكل او الحلويات للسيطرة علي القرود المرافقة بس ربنا ستر و صحوا في الطيارة ساعة او ساعتين بس و عدت علي خير.

بعد الوصول لمطار موريال و حمدنا الله علي نعمته ان نجانا من القوم الظالمين و اخد الصور التذكارية مع العلم الكندي الأصيل توجهنا اللي غرفة يذهب اليها المهاجرين الجدد.

حضرتك بتاخد رقم و تستني دورك و باسمع حكاوي ان الموضوع ده بياخد وقت طويل بس انا اول لما رحت لقيت واحد كان قاعد في القاعة الغلط و معاه موظفة قالتلي متاخدش رقم الدور من الماكينة, خد الرقم ده (بتاع اللي كان قاعد غلط), بعد دقيقتين اكتشفت ان اسمه عزرا و من فلسطين فحمدت الله ان سخر لنا "عزرا" ليقصر لنا الانتظار و تفاءلت بهذه البداية في أراضي الفرنجة, مكملتش خمس دقائق وسط زملائي المهاجرين اللي كلهم تقريبا هنود و نادوا علي رقمي وسط زهول الجميع طبعا ازاي هما ملطوعين كام ساعة و ده يدخل كده, طبعا برطموا بالهندي و اخوكم قالهم مقولته الشهيرة ان الشيخ تامر لما يتغندر اوعي من العنبر.

الولية الزابطة كانت كويسة و انا أصلا مشحون منهم من كلام الهنود عنهم في المنتديات و ازاي هما باردين و متخلفين و ازاي انت المفروض تمتصهم فاضاف هذا المزيد من الاستبشار, المهم مقعدتش معاها عشر دقائق و مبروك اتفضل يا كبير, و محدش عد الفلوس اللي معايا او شاف تذكرتي او الكلام الفتي ده, ممكن علشان شخصيتي المتميزة و الذكية و الاستثنائية و اهم من كل ده تواضعي الشديد.

نزلت الدور اللي تحت في المطار و اخدت الشنط من السير و حطيته في السير بتاع طيارة نيوبروزويك اللي كان فاضل عليها حوالي ساعتين. ولا يفوتني اني أقول ان مطار الدوحة يدي مطار موريال بالجزمة.

كل كروت الكرديت اللي معايا مش شغالة علشان العسكري العرص اللي قفل الكروت و مفيش انترنت مجاني في المطار و محتاج اتصل بالفندق علشان اشيك علي الحجز و اطمن اهلي, حاولت محاولات مضنية اتصل بالبوث اللي في المطار و للاسف معرفتش, قررت اخبط في الريسبشن احكيلهم مالي يمكن يصعب عليهم حالي, لقيت الحاجة الكبارة اللي هنا بتديلي سماعة و بتقولي كلم الرقم ده و هو حيساعدك, كلمت الرقم طلع ان فيه باسورد معين للواي فاي يجدد كل نص ساعة تقريبا, الحمد لله اتصلت باهلي و الفندق و غيرت من المطار شوية دولارات و زبطت الكلام و يله بينا يا عيال علي الكونكشن.

طبعا نيوبروزويك من المقاطعات اللي فيها اقل نسبة من المهاجرين في مقاطعات الخط الموازي لامريكا, و كنا احنا الوحيدين اللي مش اكاديين في الطيارة و طبعا ده بقي تاريخ لانها اتلوثت بالمصريين خلاص. وصلنا الطيارة و كانت المضيفة حامل في الشهر السادس او هكذا بدا عليها و بعدين وصلنا المطار وسط ابتسامات من الجميع و اتصلت بالتاكسي علشان يوصلني بالفندق.

دخلت الاوضة و العيال قلعوا الجزمة و ديه كانت اسوء حاجة في الرحلة, ايوه.. ريحة رجليهم كانت لا تغتفر, بس الصدمة الحضارية شغلتني و مفقتلهومش.

نمنا الليلة الاولي و احنا جاين من مصر معناش أي اكل اطلاقا و اصحوا يله علشان تفطروا, و ديه حاجة كويسة انكوا تحجزوا اكسكلوسيف او بالفطار, فطرنا و طلعنا اتمشينا و غنينا اغننية كندا يا اول نور في الدنيا شق ظلام الليل.

سالت احسن مدرسة فين و دورت في نفس الزون بتاع المدرسة بس مش قريب منها اوي علشان القريب منها مش بيركب الباص, شقتي كانت تاني شقة شفتها لان اول واحدة طلبوا مني كشف حساب و اثبات مصدر الدخل و ريفرينس و صور الباسبور و تعهد و إيداع و فيش من الشرطة و ضامن و كانوا عايزيني اعمل عجينة الفلاحة فقولتلهم اني جيت كندا اسهل من اني استاجر منهم شقة و ربنا كرمني بواحد جشع قالي مش عايز اعرف اسمك أساسا وريني الفلوس و اتفضل من بكرة يا كبير و قد كان.

نقلت الكام شنطة و قعدت في الشقة و دمتم.

رغم اني هنا من 2016 بس ملقيتش شغل, ادعولي الاقي شغلانة كويسة.

 

 

[sal_g]

تسجيل متابعة الحمد الله على سلامة حضرتك و ربنا ييسرلنا جميعا و ييسر لحضرتك الأحوال و يفتحلك ابواب الرزق

 

 

[shawi]

عَنْ أَبِي هُرَيْرَةَ رَضِيَ الله عَنْهُ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ:

" مَنْ نَفَّسَ عَنْ مُؤْمِنٍ كُرْبَةً مِنْ كُرَبِ الدُّنْيَا، نَفَّسَ اللَّهُ عَنْهُ كُرْبَةً مِنْ كُرَبِ يَوْمِ الْقِيَامَةِ.

وَمَنْ يَسَّرَ عَلَى مُعْسِرٍ، يَسَّرَ اللَّهُ عَلَيْهِ فِي الدُّنْيَا وَالْآخِرَةِ.

وَمَنْ سَتَرَ مُسْلِمًا، سَتَرَهُ اللَّهُ فِي الدُّنْيَا وَالْآخِرَةِ.

وَاللَّهُ فِي عَوْنِ الْعَبْدِ مَا كَانَ الْعَبْدُ فِي عَوْنِ أَخِيهِ.

وَمَنْ سَلَكَ طَرِيقًا يَلْتَمِسُ فِيهِ عِلْمًا، سَهَّلَ اللَّهُ لَهُ بِهِ طَرِيقًا إِلَى الْجَنَّةِ.

وَمَا اجْتَمَعَ قَوْمٌ فِي بَيْتٍ مِنْ بُيُوتِ اللَّهِ، يَتْلُونَ كِتَابَ اللَّهِ، وَيَتَدَارَسُونَهُ بَيْنَهُمْ، إِلَّا نَزَلَتْ عَلَيْهِمْ السَّكِينَةُ، وَغَشِيَتْهُمْ الرَّحْمَةُ، وَحَفَّتْهُمْ الْمَلَائِكَةُ وَذَكَرَهُمْ اللَّهُ فِيمَنْ عِنْدَهُ.

وَمَنْ بَطَّأَ بِهِ عَمَلُهُ، لَمْ يُسْرِعْ بِهِ نَسَبُهُ".

////////////////////////////////////////////////////////////
اخي الفاضل شيخ تامر
والله العظيم اني نسيت ما قد قدمت وهذه منه منها الله على......فاخف ما علمت بما قد قدمت فيبقيها الله لي ذخرا في أخرتي لعلها تنفعني يوم الحساب
وفقك الله وسدد خطاك ونفع بك وتذكر ما اوردته اعلاه
اعمل الخير سواء تعرف او لا تعرف من تقدمه له وسيعقبه الله لك وفي اولادك وذريتك باذن الله

 

 

[shawi]

اقتباس المشاركة الأصلية كتبت بواسطة shaikh_tamer [RIGHT][FONT=&quot]T] رغم اني هنا من 2016 بس ملقيتش شغل, ادعولي الاقي شغلانة كويسة.

هنا يا شيخ تامر محتاجين نتكلم علشان تفيد وتستفيد
يعني التخصص والشهاده
عملت ايه في برامج المهاجرين الجدد
عملت ايه في التسجيل للغه
عملت ايه في التسجيل للمعاهد والكليات
عملت ايه في الريزومي
عندكم سوبر ماركت كبير وكنيديان تاير والذي منه وشبهه شفت عندهم حاجه
طيب النتوورك اخبارها ايه مين عرفك ومين بقى يعرفك

مين عمده منطقتكم علشان نشيعله جواب من الدوار عندنا

طالما جيت في 2016......عملت ملف الضرايب......باقي 8 ايام وكل حاجه تخلص

 

 

[shawi]

انت خدت غفوه ونمت والا ايه ياشيخ تامر
فينك

 

 

[shaikh_tamer]

اقتباس المشاركة الأصلية كتبت بواسطة shawi هنا يا شيخ تامر محتاجين نتكلم علشان تفيد وتستفيد يعني التخصص والشهاده عملت ايه في برامج المهاجرين الجدد عملت ايه في التسجيل للغه عملت ايه في التسجيل للمعاهد والكليات عملت ايه في الريزومي عندكم سوبر ماركت كبير وكنيديان تاير والذي منه وشبهه شفت عندهم حاجه طيب النتوورك اخبارها ايه مين عرفك ومين بقى يعرفك مين عمده منطقتكم علشان نشيعله جواب من الدوار عندنا طالما جيت في 2016......عملت ملف الضرايب......باقي 8 ايام وكل حاجه تخلص

ربنا يبارك فيك يا باشمهندس والله.
انت ناسي علشان انت راجل فاضل و افضالك كتير فاكيد حتنسي.
ربنا يكرمك و يوفقك.
انا يا هندسة فني شبكات و الشغل هنا محدود و اكبر مكان بيشغل هو شركة اي بي ام و للاسف عايزة خبرة كبيرة مش عندي.
بالنسبة للغة فانا قعدت شهور مستني من ضغط اخواننا السوريين في مكان زي الواي, بس ده ميمنعش ان فيه بدائل بس بعيدة شوية عن محل سكني.
بالنسبة للكويلدج, فانا قدمت بس بعتوني ويتنج ليست علشان ممتحنتش انجليزي, و طبقوا قاعدة المؤهل الاول ياخد المكان.
اما بالنسبة للسي في فانا زبطته و ربنا يسهل.
و سجلت نفسي في كذا منظمة لمساعدة المهاجرين بس الناس ديه بطيئة اوي يا عم الحاج.
انا مدي نفسي مهلة شهرين حنزل علي كنديان تاير و الكجوال مش مستحيل,. هو اقل من المقاطعات التانية بس موجود.
النتورك ضعيفة لان مفيش كميونتي كبيرة, تقريبا انا المصري رقم 2 او 3 في المدينة و ده علشان المصريين بيجوا هنا هربانين من المصريين في المقاطعات التانية, فمش عايزين يعرفوا مصريين تاني. و الحمد لله علاقتي بالجنسيات الاخري طيبة و خصوصا ان كلهم تقريبا باستثناء بلاد المغرب العربي جايين لاجئين, و فيه جالية سعودية مش بطالة كلهم طلبة بيدرسوا هنا في الجامعة.
من الاخر مفيش عمدة شامل للمنطقة. بس ده ميمنعش ان فيه هجوم علي اخر الصيف الجاي لمصريين كتير, اعتقد العدد مش اقل من 50 جايين علي برنامج ترشيح المقاطعة.
يا مسهل الحال يا رب.

 

 

[khaled_sabry]

ياااااااااااااااه يا شيخ تامر
رغم انى مش نوميناتد نيوبرونزويك الا ان فيه كتير من زمايلنا فى مرحله ال CIC من المطاريد بفضل من الله اولا و موضوعك ثانيا

 

 

[khaled_sabry]

ندخل على الاسئله بقى
بما ان حضرتك من ذوى الاطفال فى سن صغير زى حلاتى - ايه اخبار السكن ؟؟
انا فهمت من كلامك انك اخدت شقه - فهل الشقه مع دوشه العيال و كدهون
لانى على ما اسمع انك لو عليت صوتك شويه اللى فى الشقه اللى جنبك حيسمعك و ممكن يعملك مخالفه و تطرد من الشقه بعد كام مخالفه

فعلا موضوع ايجار شقه و لا بيت من الحجات اللى شغلانى

 

 

[nanymigration]

حمد الله عالسلامة يا شيخ تامر .. و عقبال ما نحصلك قريب ان شاء الله .. بس انا الحقيقة قلقت من كلامك فيما يخص التأمين الطبي كلنا معانا اطفال و بيعيوا كتير و الواحد خايف يحتاس هناك و مهما جبنا أدوية معلنا اكيد هتخلص غير اني ممكن اسافر وانا حامل فهبقي قلقانة من الولادة هناك .. طب هل لو الواحد اشتري تأمين خاص بيبقي في حدود كام للفرد و هل الخدمة الطبية فيه افضل من التأمين الصحي العادي
posted via mobile device