العسكر وبيع البلد !!!!!

[م الغزالى]

الصحف المصرية والعربية

مساحة دولة العسكر تتسع ودولة مصر تتقلص !!!!

 

 

[م الغزالى]

ملخص الحدوتة الراوى محمود حجازى:

القصة مبدأتش بالجزر .. القصة بدأت مع نظام 3 يوليو .. لما أدرك إن عليه استحقاق خارجي كرئيس بلا شرعية " على راسه بطحة " لازم يقدم تنازلات من أجل الحصول على شرعية وتأييد العالم الخارجي .. بجانب مزيدا من " القلع ملط " للكفيل الخليجي إللي دعم ودفع مليارات من أجل شرعنة الإنقلاب على ثورة يناير .

من 3 يوليو 2013 .. والنظام المصري الجديد المنبثق عن نمرة 30 يونيو مبيعملش حاجة غير إنه يقلع ملط لأي دولة ممكن تبدي اعتراف او ترحيب بزيارة السيسي .

عسكر كامب ديفيد - مش الجيش المصري - بحكم العلاقات الطويلة مع امريكا والزيارات المستمرة لقادة الجيش لأمريكا .. إتنصحوا هناك نصيحة واحدة بس علشان يقدروا يستمروا " ظبطوا علاقتكم مع اسرائيل " .. لو عملنا خط بياني لعلاقة مصر بإسرائيل من ساعة ما إتأسست .. هنلاقي إن العلاقات المصرية الإسرائيلية في أفضل حالاتها على الإطلاق .. هتكلم في بوست كامل عن محطات محددة بتثبت حالة " الروقان " اللي بين مصر واسرائيل .. بس تعالوا نقول إن اسرائيل هيا اللي توسطت لمصر مؤخرا لتسليمنا الطيارات الأباتشي .

تخيل يا مؤمن اسرئايل بتتوسط لينا علشان امريكا تدينا الاباتشي وتبعت تطمينات لقوات حفظ السلام اللي بتراقب الاتفاق إنها معندهاش مانع من توغل قوات الجيش المصري في سيناء لمطاردة الارهابيين.. في الوقت إللي حسب الاهرام وهأرتز الإسرائيلية .. مصر عرفت اسرائيل خطوة بخطوة كل تفاصيل صفقة التنازل عن الجزر وطمنتها ان السعودية هتلتزم ببنود الإتفاقية .

الأزمة بقى كانت فيما بعد إسرائيل .. لأن النظام المصري عنده سلعه ممكن يبيعها لإسرائيل وهي الأمن والتعاون والتنسيق والضغط على الفلسطينيين وحصارهم .. لكن مع باقي دول العالم مكانش في عنده حاجة يبيعها .. كنظام بائس بلا قوى ناعمه مؤثرة .. مفلس اقتصاديا يقتات على المعونات الخليجية .. بشرعية مشكوك فيها .. وسجل حقوق انسان " عرة " واخباره على كل جرايد العالم كلها قتل وتعذيب .

كانت جرت العادة إن زيارات مصر الخارجية دايما بتجيب إستثمارات للبلد .. لكن مع ضعف حيلة النظام المصري .. بدأت تتغير الإستراتيجية .. وبقت زياراتنا الخارجية مرتبطة بصفقات سلاح " هنشتريها " او محطات كهرباء " هنفترض تمنها " .

السيسي كان أول زبون يشتري طيارت " الرافال " من فرنسا .. ايون مصر الفقيرة إللي عندها ازمة اقتصادية طاحنة .. اشترت اغلى طيارة في العالم صاحبة أكبر تكلفة تشغيل وقطع غيار .. في رشوة واضحة للحكومة الفرنسية لشراء اعترافها بالنظام .. وطبعا هندفع تمنها 4 مليار قروض .. مش بس كدة .. النظام كمان اشترى حاملة طائرات " هيلكوبتر " من فرنسا بردوا بحوالي مليار دولار وبردوا قروض عالبلد .

https://goo.gl/uwlWEu https://goo.gl/b6p6xF
في زيارة السيسي لألمانيا وقع صفقة سيمنز الشهيرة بعقد هو الأضخم في تاريخ الشركة إللي كانت بتعاني من وضع مالي حرج .. بعقد قيمتة 8 مليار يورو .. وبردوا هيبقى قروض هندفعها إحنا وعيالنا

https://goo.gl/SY1BFy
حتى لما راح المجر .. اتعاقد معاهم على تصنيع عربيات قطارات بقيمة 13 مليون جنية .. كل برغوت على قد دمه .. بس كان لازم يقدم حاجة https://goo.gl/gR7tU4
لكن كل دا كان مقبول لو قارناه بإللي جه بعد كدة .. لما قرر النظام إعلان مبادئ ترسيم الحدود مع اليونان وقبرص .. إللي مكناش مضطرين ليه ابدا خصوصا مع بدأ ملامح طفرات مهولة في إكتشافات الغاز الطبيعي في البحر المتوسط .. اتفاق بلا أي عوائد اقتصادية او جغرافية على مصر .. مجرد دعم لليونان في خناقتها مع تركيا إللي بنكيد فيها لإعتبارات دعمها للإخوان .

لكن المصيبة الحقيقية .. كانت في إتفاق مبادئ سد النهضة إللي لأول مرة مصر أقرت حق دولة من دول حوض النيل في بناء السدود .. اتفاق وقع عليه السيسي بدون برلمان وبدون استفتاء او حوار مجتمعي .. مجرد محاولة لتثبيت حكمه من خلال توريطنا باتفاقيات هوا موقعها .. هتخلي الدول صاحبة المصالح المستفيدة من وجوده .. تسوق وتروج وممكن تضغط لإستمراره .

زي ما قولتلكم .. القصة مش الجزر وبس .. مكانش لازم نعدي كل دة .. كان لازم نقف بكل قوة ضد التنازلات اللي بيقدمها النظام .. لان الحبل عالجرار ومش مستبعد أبدا إن التنازل الجاي هيبقى في ملف توطين الفلسطينيين في سيناء زي ما عمالين ينكشوا فيه من وقت للتاني .

قاوموا يا جماعة التفريط في الجزر لأن رسالة الناس دي واضحة .. الناس دي جاية تبيع إللي باقي من البلد دي وتلملها قرشين وتمشي .. مجهزين باسبورات وجنسيات تانية ووقت الجد هيخلعوا ويسيبوهالنا خرابة .

 

 

[arwa ahmed]

1897

 

 

[arwa ahmed]

حتى بالقمر الصناعي ياغلبي ياني

 

 

[م الغزالى]

محمد مدحت مصطفى :
الفأر الذي يلعب في عبي يقول:
(1) القضية الأساسية ليست في إثبات مصرية تيران وصنافير لأنها ثابته في جميع المحافل الدولية والوثائق والخرائط، لكن القضية الأساسية تكمن في أن الولايات المتحدة تفكر جديا في الإنسحاب من القوات الدولية في سيناء خاصة بعد العملية الإرهابية الأخيرة في موقع الصفا والتى راح ضحيتها 15 جندي وضابط مصري، وهو موقع قريب من نقطة مراقبة أمريكية قامت بعدها أمريكا بإخلاء هذه النقطة ونقطة أخرى، ومما يُذكر أن كندا سحبت قواتها فعلياً من سيناء، هذا الإنسحاب يعني إخلاء نقطة المراقبة الأمريكية على جزيرة تيران الواقعة في المنطقة ج ولطمأنة إسرائيل كان من الضروري تحويل مضيق العقبة من مضيق مصري إلى مضيق دولي مما يترتب عليه توقيع اتفاقية دولية جديدة ومن ثم كان لابد من دخول دولة ثانية تشارك مصر في هذا الخليج وطبعا كانت السعودية هي تلك الورقة
(2) فيما يخص ترسيم الحدود البحرية في البحر الأحمر قامت شركة إكسون موبيل أكبر شركة بترول في العالم باكتشاف بئر غاز في البحر الأحمر عام 2006 قبالة مدينة وجد السعودية أطلق عليه اسم الشعور وجاء ذلك التنقيب في سرية لأنه يقع داخل المياه المصرية وقريبا جدا من جزية شدوان على مدخل خليج السويس إلا أنه تم إغلاق البئر بعد إحتجاج مصر، أما قرار إعادة تحديد نقاط الارتكاز فإنه يؤثر على نقطتان فقط ادعت السعودية أنه تم تحديدهما بالخطأ أثناء المد البحري وليس أثناء الجزر ويترتب على هذا إخراج جزيرة شدوان من المياه الإقليمية المصرية ويتحول خليج السويس نفسه من خليج مصري إلى خليج دولي لأنه حاليا أى سفينة ترغب في عبور قناة السويس لابد لها من المرور أمام جزيرة شدوان
(3) أقول لكم أن الإتفاقية الجديدة لا تقل خطورة عن إتفاقية 1840م التي فرضتها الدول الكبرى على محمد علي باشا

 

 

[م الغزالى]

إحنا ما نعرفش حقيقة اللي حصل لجوليو، غير إنه اتعذب بشكل حيواني، اتعذب زي المصريين ما بيتعذبوا، على رأي والدته. وجايز إن عمرنا ما هنعرف مين اللي عذبه وقتله بالشكل الفظيع ده.

لكن اللي نعرفه إننا عايشين في لحظة من أسوأ لحظات تاريخنا الحديث، وإن حقوقنا وحرياتنا وحياتنا نفسها مهددة طول الوقت من قِبل الحكومة بتاعتنا.

اللي نعرفه، هو إن حكومتنا، وباسم الدفاع عن الأمن القومي، اعتدت على الأحرم الجامعية وقتلت طلبة جوا الجامعة مش برة بيتظاهروا.

اللي نعرفه هو إن حكومتنا، باسم الدفاع عن الأمن القومي، قفلت المجال العام، وصادرت العمل السياسي، ومنعت الناس من التعبير عن رأيهم بالخروج في مظاهرات سلمية، إلا لو كان غرض المظاهرات إعطاء تفويض للسيسي علشان يعمل اللي هو عايزه.

اللي نعرفه هو إن حكومتنا، باسم الدفاع عن الأمن القومي، بتحارب منظمات المجتمع المدني، وبتتهم العاملين فيها بالعمالة والخيانة وبإنهم بيسترزقوا من التمويل الأجنبي، بالرغم من إن الحكومة نفسها وتحديدًا الجيش، هي أكبر مستفيد من التمويل الأجنبي اللي ما حدش عارف عنه حاجة ولا نقدر نسأل عنه تلت التلاتة كام.

اللي نعرفه هو إن حكومتنا، باسم الدفاع عن الأمن القومي، قبضت على عشرات الآلاف من أعضاء الجماعات الإسلامية وحكمت على المئات منهم بالإعدام في محاكمات ما استغرقتش دقائق معدودة، محاكمات تعد ضربة قاصمة لنزاهة القضاء المصري ولثقة الناس فيه.

اللي نعرفه هو إن حكومتنا ، باسم الدفاع عن الأمن القومي، قبضت على مئات الصحافيين والكتاب والناشطين السياسيين وحكمت عليهم بسنين طويلة في السجن.

واللي نعرفه هو إن حكومتنا بعد كل ده فرطت في الأمن القومي وانتهكت الدستور لما تنازلت عن السيادة على جزيرتي تيران وصنافير من غير ما تعرض الأمر على البرلمان ومن غير ما تستفتي الشعب، صاحب البلد وصاحب السيادة الأصلي.

من مقال لخالد فهمى لقرأته كاملاً :
خواطر بالعامية: جوليو والجزيرتين والأمن القومي

 

 

[KANE]

Mohamed Ragab


امبارح طول اليوم بيتعملى منشن فى الوثائق اللى أخيراً وزارة الخارجية المصرية ومركز معلومات مجلس الوزراء أفرجوا عنهم عشان يثبتوا بالدليل الدامغ والبرهان الساطع سعودية تيران وصنافير.. الصحف القومية وبعض من الصحف الغير قومية نشروا الوثائق دى على اعتبار انهم جابوا الديب من ديله وخلاص كده أفحموا الشعب المصرى وضحكوا عليه بما لا يدع مجالاً للشك.. تعالوا نشوف إيه هى بالظبط الوثائق اللى الجهابذة فى الحكومة المصرية أعلنوا عنها..

الوثيقة الأولى..
جواب من وزير خارجية السعودية لوزير خارجية مصر سنة 1988 بيطالب فيه بتيران وصنافير.. طيب واحنا مالنا م يطالب زى م هو عايز.. ايه الوثيقة فى كده أساساً اللى تأكد أى حق للسعودية فى الجزيرتين؟..

الوثيقة الثانية..
مقال للبرادعى اتنشر سنة 1982 بيقول فيه إن جزيرتى تيران وصنافير تحت الإحتلال المصرى وتدعى السعودية ملكيتهم فى حين أن مضيق تيران الذى يقع بين شاطئ الجزيرة وشاطئ سيناء هو مياه إقليمية مصرية.. برضه إيه الوثيقة فى كده الراجل بيقول وتدعى السعودية ملكيتهم.. طب م تدعى زى م هى عايزه.. يا سيدى أنا بدعى إن برج إيفل بتاعنا.. ثم هو خلاص بقى البرادعى مرجعية وسند.. طيب ياريت برضه ناخد بكلامه عن حقوق الإنسان والتعذيب والإختفاء القسرى.

الوثيقة الثالثة
برقية من الملك عبد العزير آل سعود للوزير المفوض السعودى فى القاهرة سنة 1950.. احنا مالنا ملك بيكلم الوزير بتاعه يارب يقوله أى حاجة فى الدنيا.. ثم هى فين البرقية أساساً؟ فين نص البرقية؟.. لا والله مش موجودة دى اتبلغت شفهيا لعصمت عبد المجيد سنة 1988..

الوثيقة الرابعة
جواب من عصمت عبد المجيد سنة 1988 لعاطف صدقى رئيس الوزراء وقتها بيقول فيه "بلغنى من وزير خارجية السعودية كلام عن برقية اتبعت من عبد العزيز آل سعود لوزيره المفوض فى القاهرة سنة 1950".. فعاطف صدقى أساسا حفظ جواب عصمت عبد المجيد لما لقاه كلام فارغ.. اللى هو يعنى نعمل ايه لملك ووزيره.. لسه برضه بنسأل فين البرقيه دى أصلاً؟ ولو موجوده تلزمنا بإيه؟

الوثيقة الخامسة
برقية سرية من السفير الأمريكى فى القاهرة سنة 1950 للإدارة الأمريكية بيقول فيها إن تيران وصنافير سعوديتان.. أهلا وسهلا.. م يقول السفير الأمريكى اللى هو عايزه.. وبعدين برقية سرية وقعت فى ايدينا ازاى.. حد نازل المطار السرى؟.. كملوا معايه بس للآخر عشان تعرفوا وثائق العباقرة المفحمة بتقول إيه تانى..

الوثيقة السادسة
نص خطاب مندوب مصر الدائم فى الأمم المتحدة بتاريخ 27 مايو سنة 1967 بيتكلم فيه عن مسؤلية مصر فى الدفاع فقط عن تيران.. قال يعنى دفاع مش ملكية.. انتو بهايم يالاه.. طالما بندافع عن حاجة تبقى الحاجة دى بتاعتنا.. ثم إن فى نفس الإسبوع طلع عبد الناصر فى الفيديو اللى كلنا شفناه بيؤكد إن تيران مصرية وحرب 67 قامت بسبب إن تيران مصرية وغلق مصر لمضيق تيران ومات لنا شهداء ودم العسكرى المصرى ع الجزيرة ليوم الدين.. اللى مات شهيد بسبب الأرض دى مات ليــــــــــه؟ هل لأن بس كان بيحرسها للسعودية؟.. احنا كنا مشغلين جيشنا حراس لجزر سعودية؟!!.. أساسا بقى فين السعودية فى خطاب مندوب مصر؟ طب كلام المندوب وللا كلام عبد الناصر؟.

الوثيقة السابعة
مقال منشور فى النيويورك تايمز بتاريخ 19 يناير سنة 1982 مبعوت من مراسل الجريدة فى اسرائيل بيتكلم فيه عن مخاوف إسرائيل من عودة تيران لأصحابها السعوديين.. فهل احنا المفروض ناخد كلام مراسل أمريكى فى اسرائيل ونروح ندى الجزر للسعودية؟.. يعنى أنا كصحفى أكتب مقال أقول فيه إن مصر خايفة إن السودان تدى الخرطوم للصومال فالخرطوم كده خلاص بقت مدينة صومالية؟.. يعنى دى بالذمة وثيقة الحكومة المصرية تستخدمها عشان تبيع أو تتنازل عن أرضها؟

الوثيقة الثامنة
مبارك سنة 1990كتب ما يفيد إن مصر هتناقش موضوع تيران وصنافير.. يا سلام كده خلاص بقت الجزر سعودية؟!!.. طيب م مبارك نفسه سنة 2010 بعت خطاب للأمم المتحدة بيؤكد فيه على مصرية تيران وصنافير.. مبارك نفسه لسه عايش وممكن نسأله عن رأيه فى القصة دى.. ثم مبارك لو كان كتب فعلا سنة 1990 أى حاجة.. الراجل حكم بعدها 21 سنة ما سلمش تيران وصنافير ليه للسعودية؟

الوثيقة التاسعة
اتفاقية 1906 لا تفيد بأن تيران وصنافير مصريتان.. بس برضه حضرتك اتفاقية 1906 لم تفيد بأن تيران وصنافير سعوديتان لأن مكنش فيه حاجة اسمها سعودية أصلاً وقتها..

نلاحظ فى كل الوثائق دى إن كلها عبارة عن برقيات، خطابات، جوابات، مقالات وكان ممكن يبقى فيها سيلفى لمواطن سعودى ع الجزيرة لو كانوا اخترعوا السيلفى سنة 1950.. لكن مفيش وللا وثيقة عبارة عن إتفاقية أو معاهدة أو قرار أو قانون دولى أو ترسيم حدود بحرية .. فدى أساسا مش وثائق دى أى كلام فارغ من ناس متسربعة ومتلهوجة على بيع أرض مصر.. عيب ده لو تعرفوا العيب..
--
محمد رجب
12 ابريل 2016

 

 

[KANE]

 

 

[arwa ahmed]

الوثيقة الخامسة
برقية سرية من السفير الأمريكى فى القاهرة سنة 1950 للإدارة الأمريكية بيقول فيها إن تيران وصنافير سعوديتان.. أهلا وسهلا.. م يقول السفير الأمريكى اللى هو عايزه.. وبعدين برقية سرية وقعت فى ايدينا ازاى.. حد نازل المطار السرى؟.. كملوا معايه بس للآخر عشان تعرفوا وثائق العباقرة المفحمة بتقول إيه تانى..

تأسست السعودية عام 1932 فهل تعلم لم تأخرت 18 عاما كاملة عن المطالبة بالجزر.......
لان الجيش المصري هل تتخيلون ذلك قام عام 1949 و 1950 باطلاق النار على سفن يونانية وبريطانية واخرى من جنسيات مختلفة كانت في طريقها الى ايلات ومنعها من المرور خلال خليج تيران مستغلا ملكية مصر لمضيق ووقوعه في المياه المصرية طبقا لقانون الدولى....................... قبل ذلك لاحس ولا خبر
كانت المشكلة في وجود ايلات وان مصر بطبيعة ضربها في عمق التاريخ اقل اخلاصا من المشايخ الى صنعت على ايدى لورانس العرب للغرب......................................... هذه هي الحكاية

 

 

[م الغزالى]

وزير الدفاع الإسرائيلي: مصر تنازلت عن جزيرتي "تيران وصنافير" مقابل 16 مليار دولار

قال "موشية يعلون"، وزير الدفاع الإسرائيلي، إن إسرائيل وافقت على تنازل مصرعن السيطرة على الجزيرتين الاستراتيجيتين " تيران وصنافير" لصالح المملكة العربية السعودية.
وأضاف "يعلون" بحسب صحيفة "يديعوت أحرونوت" الإسرائيلية، أن مصر حصلت على 16 مليار دولار مساعدات من السعودية مقابل التنازل عن الجزيرتين.
وأضاف وزير الدفاع الإسرائيلي أن الولايات المتحدة كممثل عن القوة الدولية المنتشرة في شبه جزيرة سيناء، وافقت على انضمام السعودية لمحلق من معاهدة السلام بين مصر وإسرائيل، كما وافقت إسرائيل كذلك على السماح ببناء الجسر الذي يربط الجزيرتين إلى البر الرئيسي، كجزء من خطة سعودية لتنميتها، بحسب الصحيفة.
لمتابعة الخبر في موقع صحيفة يديعوت أحورنوت