هل تبني منتدى المطاريد الدعوة للمشاركة في يوم 27 مايو ؟

[اونست]

الصحف المصرية والعربية

طيب نعمل استفتاء ونقول فيه
هتنزل يوم 27 و لا مش هتنزل؟
ونوضح تحته كل المطالب
ونقول برضه النزول هيكون عبارة عن أيه؟
يعني مسيرات ولا تجمعات مليونية في الميادين ولا ميدان التحرير فقط؟
ولا حاجة تانية؟
وأيه الشعارات اللي هتترفع؟

 

 

[محمد علي عامر]

اقتباس المشاركة الأصلية كتبت بواسطة only you احنا نازلين ليه ؟؟ نازلين علشان مصر 1- نازلين علشان مبارك في شرم بيتعالج نفسي و شهدائنا مرميين على ابواب المستشفيات دمهم الطاهر بينزف 2- تقديم المجرمين و القتلة من الشرطة و أمن الدولة و القناصة اللي راح على ايديهم شباب و بنات زي الورد لسة موجودين مكانهم , لأ و بيترقوا كمان 3- علشان المحاكمات " الهزلية " للعادلي و الحرامية الكبار و التأجيلات عمال على بطال لحد ما زهقنا ( المحاكمات لاااااااااااااااااازم تكون علنيـــــــــــــة ) 4- علشان إلغاء المحاكمات العسكرية للشباب و المدنيين !! 5- إشراف قضائي على الشرطة و الأمن الوطني أو أمن الدولة يعني ,, مش فارقة الأسامي ( البيه مساعد وزير الداخلية بيقول القضاء ملوش كلمة علينا ) !! 6- حل المجالس المحلية علشان دي عصااااااااااابة بتنهش في البلد و في الثورة 7- عودة الأمن ,, الداخلية قاعدين في بيوتهم و بياخدوا مرتبااااااااااااات هنفضل لحد أمتى نحسس و نطبطب عليهم .. هما ميعرفوش ينزلوا بأحترامهم ولا لازم يضربوا و يشتموا و يبهدلوا الشعب 8- تطهير الإعلااااااااااااااااام دي مطالبنا و مطالب كل مصري بيحب مصر أي حد هيقول احنا نازلين علشان نعادي الجيش و المجلس العسكري كدااااااااااب أي حد هيقول نازلين علشان مجلس رئاسي كداااااااااااااااب أي حد هيقول نازلين علشان نلتف على الدستور و رأي الشعب كدااااااااااااب يوم الجمعة عايزين مظاهرة مليونية في التحرير و كل ميادين مصر تقول احنا هنا و ثورتنا موجودة من غير اعتصام ولا تعدي على حد لكن من حقنا ننزل نقول رأينا و نغضب علشان ثورتنا و علشان كرامتنا علشان منرجعش نقول كااااااان عندنا في يوم من الأيام ثورة و عشنالنا يومين !!

كلام سليم مية مية

يجب إستمرار جمع الغضب المليونية مع تحديد واضح للمطالب.

لا للإلتفاف على نتيجة الإستفتاء

لا لتأجيل الإنتخابات

كلها 3 شهور و تأتي حكومة منتخبة تكون سلطتها أعلى من سلطة المجلس العسكري.

وبالمناسبة لماذا نطلب من المجلس العسكري محاكمة مبارك و أعوانه؟ أليس الأقرب للصواب هو بقاؤهم في السجون إلى أن تأتي حكومة منتخبة تمثل الشعب تشرف على محاكمتهم؟؟

 

 

[clouds]

مع النزول يوم 27-05 علشان ده أقل حاجة نعملها للشهداء والجرحي لأن ما يتم الآن مجرد هزل أريد به جد
فلا حد اتحاكم بجد والبلطجية بتوع الشرطة بياخدوا براءة ومبارك بيتعالج علي حسابنا للحظة ديه من فلوسنا والجرحي والمصابين مش لاقيين حد يعالجهم سواء نفسي او بدني
كفاية قوي انك تشوف حد بيموت قدام عنيك وانت واقف تتفرج تقول عليك الدور ولا اييه وبعدين تحس بالخزي من نفسك انك رغم نزولك ما استشهدتش زي اللي استشهدوا وتحس اد اييه انك ماعرفتش تعمل حاجة
لما يلاقوا مبرر وثغرات في القانون علشان يبرروا الفلوس والثروات يبقي انت ماعملتش حاجة
لما سوزان هانم تتنازل عن الفلوس وكأنها الفلوس اللي ورثاها عن باباه بتاعها يبقي مافيش حاجة حصلت
لما تلم لزميلك فلوس علشان يتعالج بيها رغم انها المفروض مستورة معاه بس علشان حجم إصاباته وتكلفة علاجه هيعدي الستر اللي هوا فيه يبقي لازم تنزل يوم 27-05
انا مع رأي المنتدي وده مش إجبار لحد ده مجرد رأي

 

 

[أسامة الكباريتي]

والله انكم اتدلعتم ع الآخر!!!
حتى في الوطنية تريدون استفتاء!!!!!!!!!!!!!!
عمالين بيسرقوا الثورة بالتقسيط المريح ..

لأ طبعا اللي عمل البانر أبوس ايديه الاتنين
واللي حط البانر ابوس راسه ..

واللي مش عاجبه ..






.
يفضل في بيته ..

مستنيين ايه
لما يطلعلكم في عابدين ويقول لكم "فاتكم القطار .. فاتكم الجطار"
وبغمزة من عينه تلاقي شباب الثورة متعلقين في باب زويلة وباب الشعرية..

شايفين سوريا واليمن؟!!!!
يبقى ماتناومش
وانزلوا على بركة الله

 

 

[clouds]

الثورة ليست بحاجة لقوانين أومال هي اسمها ثورة ليه ما فيش حد يقولي القانون بيقول كذا بعد الثورة ما دام العالم اعترف بشرعية الثورة يبقي فيها قوانين ثورية لتنفيذ متطلبات الثورة ده مش نقعد نحايل علي القضاة انهم يحاكموا الفساد ويحطوا حد
انصاف الثورات مقابر للشعوب يا إما نتطهر نفسنا بجد وحق وحقييق يانروح كلنا ندفن نفسنا أحسن في مقابل دم كل شهيد ومصاب سال مننا
ثورة علي الفساد وثورة علي التسويف وثورة علي كل حاجة مش عايزة مصر تكون مصر من تاني
ثورة ثورة حتي النصر مش ده اللي كنا بنقوله حد يقولي هوا فين النصر اللي اتحقق
ماحدش يقولي ان لما مبارك مشي هوا ده كل النصر
النصر لا يتجزأ و لا يتفرق كله بيبقي كبشة واحدة كده علي بعض

 

 

[اونست]

اقتباس المشاركة الأصلية كتبت بواسطة أسامة الكباريتي والله انكم اتدلعتم ع الآخر!!! حتى في الوطنية تريدون استفتاء!!!!!!!!!!!!!! عمالين بيسرقوا الثورة بالتقسيط المريح ..

يا أستاذ أسامة أحنا ولا أدلعنا ولا حاجة
بس الموقف لسه مازال غامض
أصل المرة دي مش زي كل مليونية أو جمعة عادية في التحرير
انا مثلا بشوف تدوينات بتطالب بأسقاط المشير والمجلس العسكري وحكم مدني بدل العسكري وتحريض و لهجة مختلفة عن كل مرة و وعمل دستور جديد وتأجيل انتخابات البرلمان وأشياء مثل هذه
فهو خوف على البلد صدقني مش دلع
لو كانت مليونية عادية للضغط عل الجيش دي مش محتاجة استفتاء
بس الأمور لسه مازالت مش واضحة

بس الحمد لله اهو مبارك اتحال للجنايات والأمور هتبتدي توضح أكتر من هنا ليوم الجمعة

 

 

[Farida]

ادارة المنتدى و مالك المنتدى من الأول مع الثورة قلبا و قالبا و القورة يعنى التغيير و كنس الفساد و تنضيفه و بعدين لما نخلص من الفسده و اعوانهم نبقى نشوف شغلنا ........مافيش استفتاء على حاجه مفهومه ضمنيا و اللى متابع المنتدى من اول ثورة تونس يعرف التوجه العام ايه و يعرف احنا بنتكلم عن ايه ...........تحيه لواضع البانر و تحيه للمطاريد اعضاء و ادارة اللى تبنت موقف الثورة حتى فى بدايتها وقت لم تكن ملامح المرحله قد تشكلت بعد ........

 

 

[Tornado]

الثورة بتتسرق وبيتضحك علينا والحرامية بيتعاملوا معاملة الابرياء وحسني بيتدلع في شرم الشيخ وبيطلع لسانه لينا وبكره هنلاقيه راجعلنا وماسك البلد وبيقتل في الشعب زي اللي بيحصل في سوريا واليمن


اللي افتكر ان الثورة نجحت وخلصت يبقى يئما مش عاوز يشوف الحقيقة او للاسف مش فاهم معنى الثورة

اللي مش عاجبه مينزلش

 

 

[الغرييب]

أيوة .. هما الأخوة رجعونا هنا ليه للمربع صفر

وبدأنا ننقل مشاركات موضوع "ثورة 27 مايو" للموضوع هنا ليه ؟؟

أنا بتكلم عن حاجة محددة

أن كل الأطياف في مصر لم تتفق على يوم 27 مايو بسبب بعض المطالب

إذن تحديد الموقف من الدعوة لمثل هذا اليوم ، لابد أن تكون بإستفتاء بين الأعضاء ، مثلما فعلت صفحة "كلنا خالد سعيد" وكانت مبادرة جيدة لأن تحمل الصفحة رأي غالبية أعضائها وليس صاحب الصفحة فقط.

وعليه أنا توسمت ذلك في "منتدى المطاريد" ، وأستفسرت عن الأمر، أنه يفترض أن نتبني المواقف والدعوات بناء على الإستفتاءات.

مالنا دلوقتي بقا ومال ثورة 25 يناير وثورة تونس ، والأمور اللي عليها إجماع شعبي

هناك معارضين ليوم 27 مايو ؟؟

نعم .. هناك معارضين بسبب التفاوت في المطالب ، فياريت منتكلمش بلهجة أن الأمر أصبح من المسلمات ، ونتلفظ بألفاظ النيابة عن الشعب

من الأفضل تبني وجهة النظر العامة للمساعدة على التوافق بين الآراء المختلفة..

شكرا للجميع .. ودي كانت وجهة نظر شخصية

 

 

[متفائل]

أدا كمان سبب للنزول - مليارات موجودة في البلد وقاعدين يشحتوا من البنك الدولي والسعودية مين مسؤل عن التمميع ده لازم يكون فييه اجابة لازم يكون فيه وقفه

أين ذهبت 1236مليار جنيه ياحكومة؟
https://www.dostor.org/authors/11/57/11/may/24/43200
عندما تعلم بوجود أموالا سائلة قيمتها 1272مليار جنيه-وفق تقارير رسمية- تسرح وتمرح خارج وزارة المالية التي لاسلطان عليها..وأن تلك الأموال يتصرف فيها الوزراء والمحافظون ورؤساء الأحياء دون حسيب أو رقيب..فسوف تشد شعر رأسك..ثم عندما تعلم حسب أقوال الحكومة والمجلس الأعلي أن الاقتصاد المصري في خطر فإن السؤال سيكون:وماذا عن 1272 مليار جنيه التي يبعثرها المحافظون والوزراء والموجودة داخل الصناديق الخاصة ولماذا لاتضمها وزارة المالية الي الموازنة العامة؟.

في فبراير من العام الماضي قدم الجهاز المركزي للمحاسبات الي مجلس الشعب تقريره السنوي عن الصناديق الخاصة وذكر أن اجمالي الأموال الموجودة في تلك الصناديق (التي أمكن حصرها) قد تجاوزت مئات المليارات..وجري توزيع التقرير علي نواب المجلس ثم دخل الأدراج وأغلقوا عليه الا أشرف بدر الدين نائب الشعب الذي جمع وطرح وحسب كل الأرقام الواردة في تقرير المركزي للمحاسبات ووجدها 1272مليار جنيه ثم قدم استجوابه للمجلس مطالبا بنقل تلك الأموال الموجودة في الصناديق الخاصة الي وزارة المالية..وغني عن البيان هنا أن أذكرك بأن مجلس الشعب قد انتقل بعد المناقشة الصورية للاستجواب الي جدول الأعمال.

قامت الثورة وجري اقالة حكومة نظيف وأصبح لدينا وزير مالية جديد هو الدكتور سمير رضوان الذي أعطت تصريحاته أنه سيعيد توظيف أموال الخزانة العامة بشكل أمثل لصالح الشعب..وعندما تابعت تصريحات وزير المالية ووجدتها مشجعة بادرت بالحديث الي الوزير وناقشت معه ملف أموال الصناديق الخاصة ودعوته الي ضمها الي الخزانة العامة طالما اقتصادنا بهذه الحالة من السوء..ووجدت الوزير يطالبني بتقديم طلب أحدد فيه ما أريده علي أن أرفق معه الاستجواب السابق لصاحبه ووعدني د.سمير رضوان أنه سوف يبحث في مدي قانونية هذا المطلب.

بعد حواري مع وزير المالية التقيت نائب الاخوان صاحب الاستجواب السابق وقدم لي صورة كاملة من تقارير المركزي للمحاسبات عن الصناديق الخاصة وكذلك استجوابه الشهير وقد هالني حجم الفساد الذي حملته تلك التقارير وتساءلت:لماذا لم يذهب بها الملط وقتها الي جهات التحقيق لوقف نزيف هذا الفساد.

المهم قررت ألا يكون خطابي خاصا لوزير المالية وفي مكتبه بل وجدت أن مشاركة الرأي العام فيما جري هو الأفضل فأثرت قضية أموال الصناديق الخاصة في أكثر من برنامج بالفضائيات المصرية وبعض الصحف وكان هناك تواصلا من وزارة المالية التي وعدت بدراسة الموضوع الي أن كانت المفاجأة أمس الأول عندما أعلنت وزارة المالية أنها تدرس ضم أموال الصناديق الخاصة الي الخزانة العامة لكن المفاجأة الأشد وقعا علي رأسي كانت في تقدير وزارة المالية لأموال تلك الصناديق حيث أعلنت أنها في حدود 36مليار جنيها بينما تقرير المركزي للمحاسبات أكد أنها 1272 مليار جنيه..وسؤالي الآن:أين ذهب الفرق بين الرقمين وهو 1236مليار جنيه..أتوجه بالسؤال لوزير المالية وللمستشار جودت الملط..وياريت تدخل النيابة العامة وجهاز الكسب غير المشروع معنا في تلك القضية.

ملحوظة:بلغت جملة أموال الصندوق الخاص لوزارة الداخلية عن العام المالي الأخير فقط ملياري جنيه!!انتهت الملحوظة
" بيصرفوا 2 مليار في السنة ومع ذلك ميقدرش يمنع فتنة طائفية ولا يقبض على بلطجية انما يعرف كويس يقمع متظاهرين أو يلفق قضايا للناس ويوديهم محاكمات عسكرية"