شفت مين من المشاهير

[Mizo]

الصحف المصرية والعربية

الواحد شاف ناس كتير أوي من الفنانين الصراحه ، لكن أكبر حدث شفت فيه رؤساء وملوك العالم كان في شرم الشيخ فندق موفنبيك الجولف ، ومنهم اذكر بعض المواقف والمصادفات المضحكه أن حسين سالم صاحب الفندق كان بيكلم عمرو موسي (كان ايامها وزير الخارجيه) عشان يتوسط لأحد الموظفين العلاقات العامه في استخراج تاشيرة لندن..

الريس وحرمة لهم طلة في الحقيقه لا تستطيع الا ان تقف لتسلم عليهم (اكتشفت ان الريس مشهور جدا في الخارج لما الافواج السياحيه شافته وهاتك ياهتاف مستر بريزدنت)
جمال مبارك وعلاء مبارك ولاد عز في تعاملاتهم ولعيبة جولف..
الراجل وزير الدفاع بتاعنا من هيبته الحقيقه تخاف تبصله..
وزير الاسكان السابق محمد إبراهيم سليمان يعشق الإستكوزا والبرتقال الفريش..
ملك السعوديه عندما يسال احدهم أين( دورة المياه) ويجيب يدفع له 100 دولار..
مادلين البرايت قصيرة لدرجة مضحكة جداً...
زكريا عزمي ربنا يكفيكو الشر يبصلك تحس انك في المعتقل.. بس علي شاطيء عايدة بحدائق المنتزة اخره يعفر سيجار

اخر شخصيه فنيه في اجازتي اللي فاتت كان الدكتور علاء صادق في سيتي ستارز صباحاً..

واخر شخصيات عامه في نفس الاجازه كنت في حفله العيد الوطني لتركيا في شيراتون المنتزه وكنت سامع عن محافظنا الجديد(محافظ اسكندريه) وقابلته بجوارة سفير تركيا..

واخيرا رئيس مجلس الوزراء احمد نظيف في الفور سيزون سان ستيفانو واعتقد كان معاه شخصيه سياسة من ايطاليا..

 

 

[hoppa]

محمد منير فى حفلة فى الجامعة سنة 2003 بسسسسسسسسسس

 

 

[Farida]

بصوا بقه يا جماعه الموضوع ان كان فيه معرض فى قاعة المؤتمرات للمشاريع العلميه التطبيقيه الكلام ده كان من 15 سنه تقريبا و الريس زاره و كان بيقف يسأل كل واحد مننا سؤال... .و انا شوفته و سلمت عليه ووقف اتكلم معايا و استفهم منى على المشروع بتاعى ...و طلعت فى نشرة 6 بس على ما جهزت العائله كلها و اتصلت بهم نفر نفر و اتسمروا امام التليفزيون فى نشرة الساعه 9 كان كل اللى قبلى من زملائى ظهروا و انا لأ
طبعا اللى اخدت بالى منه شعره الأسود الفاحم المصبوغ و بشده
طبعا أحمد نظيف كا بيدرس لى فى الكليه كدكتور شاطر جدا و فاهم و بيوصل المعلومه بيسر و سهوله و طبعا طويل جدا و عنده احساس عالى بالتميز مش متواضع قوى يعنى و ان كان مش بيبخل بمعلومه ..............كمان أحمد درويش وزير التنميه الأداريه كان بيدرس لى انسان على خلق عالى و متواضع و محترم اول دكتور يدينا نمرة بيته علشان لو عايزين نسأله حاجه قبل الأمتحان - كان لسه الموبايل ما اخترعهوش -
شفت أسامه الباز ماشى فى الشارع عادى جدا ولا حراسه ولا نفر معاه انسان متواضع جدا و مبتسم - هو راح فين الراجل ده -

 

 

[HAMOUDI]

اقتباس المشاركة الأصلية كتبت بواسطة أحمد باشــا جميل جدا الموضوع ده انا بقى شفت كل الفنانين تقريبا القدام و بعض الجداد ...منهم من يسكن بجواري و آخرين قابلتهم بسبب طبيعة عملي و آخرين في مصايف او اماكن عامة.... لكن دول موش مهم المهم اني شفت عبد الناصر شخصيا 3 مرات من البلكونة كان بيركب سيارة مكشوفة و يمر امام منزلنا و شقيقي الأصعر كان يناديه بصوت عالي فيرفع رأسه و يشاور بكلتا يديه محييا و شفت السادات في استراحة القناطر و شفت جيهان السادات اكثر من مرة و سلمتني مرة جائزة و شفت كل عائلة عبد الناصر في ظروف عمل مختلفة و منهم زوجته الفاضلة مرة واحدة احسست فيها انها ام مصرية طيبة القلب القنبلة .... شفت مناحم بيجن يتجول في شارعنا بيسلم على البوابين و السياس ... و القصة كانت ان مصطفى خليل رئيس الوزراء وقتها نظم اجتماع بينهما في الأسكندرية وقت مباحثات السلام و كانت في فندق فلسطين بالمنتزة ... و عندما علم بيجن انهم سيجتمعون في فندق يحمل اسم فلسطين رفض .... فمصطفى خليل عاقبه بأن جعل الإجتماع في فندق سان جيوفاني الصغير جدا و يومها رأيت عمال الفندق يهجمون على السوق و يحملون اي شئ يجدونه من مواد غذائية و واحد بيوقع عالكميات .... و طبعا بيجن وصل بدري قبل ما يجهز الفندق لإستقباله فتجول على قدميه في الشوارع المحيطة و التي كانت خالية تماما من المارة فلا احد كان يستقبله ... و لكنه بكل برود اخذ يصافح البوابين و سياس الجراجات معرفهم بنفسه انه مناحم بيجن و هم مندهشون لا يعرفونه تماما و لا يفهمون ما يقول ..... برضه قابلت موشيه شاسون سفير اسرائيل السابق في مكتبي و قد اتى لعمل ما و رفضت العمل الذي كان المفروض لصالح شخص مصري ثم اتضح لي بعد مجيئه انه سائقه الخاص و من الأجانب شفت كرامنليس رئيس وزراء اليونان وقتها و كان يقود سيارته بنفسه في شوارع اثينا و طبعا لم اكن اعرفه فرأيت سائق التاكسي الذي اركبه يصيح اوو كرامنليس و لفظ اوو هو حرف التمييز ال باللغة اليونانية و يسبق الأسم للتفخيم فحسبت انه يحيى رئيس سواقين التاكسي مثلا فسألته من هذا ؟؟؟ فقال لي كرامنليس رئيس الوزراء و ايضا كنت اقف بطابور لدخول السوبر ماركت في جنيف و خرج رجل عجوز جدا هو و زوجته يجر امامه عربة المشتروات و يضع مشترواته بمساعدة زوجته في السيارة و وجدت الواقفين يصفقون له و هو يخجل منهم فسألت الواقفة امامي في الصف من يكون هذا فقالت لي انه مستشار سويسرا ... و هو منصب يعادل رئيس الجمهورية عندنا و قابلت " شخصية هامة " فلسطينية كنت احسبه مناضل بحق و وجدت كل اهتماماته بالفتيات و شرائط الأفلام اياها على فكره لسه حي احسن تفتكرو حد تاني و في ميونخ قابلت كل اعضاء منظمة الأوبيك وقتها و على رأسهم اليماني رئيس المنظمة و موفد السعودية آه افتكرت .... هههههههههه شفت حسني مبارك لما كان نائب السادات في مطار النزهة يوم عيد الجيش تقريبا و كنت في استعراض فريق الجودو بنادي سموحة

مناحم بيجن ده سبق ماحصلش ولاهايحصل لحد
حتى لو حد على نفس المستوى من نفس الدوله صعب انه يمشي على رجله الوقتى او حتى من احدى جمهوريات الموز

 

 

[Sonesta]

دعوه لموضوعي

ليالى المطاريد.,,,هل تعلم

لى قريب منتج فنى

وكان معزوم فى المريوطيه فى حفلة على حس محمد منير

وأخذنا معاه ويارينا ماروحنا

محمد منير اللى بأعشقه وطالعه بيه السماء سوقى جدا فى كلامه

وألفاظه بتحرج بجد ولا همه إن فى القاعده سيدات أو آنسات ولا أى حاجة

وعجووووووووووووز جدا جدا جدا وطويل جدا

البرفيم صاعق خرافة

الإكسسوارات كتيرة وجامدة ومالهاش لزمة

لكن اعمل ايه صوته وأغانيه بكلماتها وألحانها بشعه جدا

 

 

[حرررم بم بم]

شوفت بابانا حسني مبارك
كمال الجنزوري
صفوت الشريف
عاطف عبيد
مولانا الأكبر سيد طنطاوي


عمر الحريري شوفته في الشارع و سلمت عليه
شفيق جلال خارج من صيدليه و سلمت عليه و كان لابس الجلباب و الطاقية
فاروق فلوكس كان قاعد جنبي على كفاتيريا في الإسكندرية
طارق النهري ،، بارد جدا """""""""" في السجن حاليا
حسن حسين
القمر دنيا سمير غانم سلمت و إتكلمت معاها شويه
غاده عبد الرازق
وفاء عامر
بشرى
حمادة هلال ،،، عامل زي الطفل الصغير متهيألى أشيله بإيد واحده

و شوفت كل لاعبي الأهلي و الزمالك في 96 في الإستاد طبعاً

أفتكر و أقولكم تاني

 

 

[HAMOUDI]

نيجي للفنانين
اول حد شفته كان فى اختراع زمان اسمه مسرح المنوعات تقديم مذيع الله يرحمه اسمه على فايق زغلول كان صوته جميل مثل كل مذيعي الاذاعه وكان صوته قد ترك انطباع لدي عن ضخامته وكونت له صوره من وانا صغير بأنه انسان وقور يرتدي بدله كامله ونظاره وجسم رياضي ضخم حتى رأيته فى الجامعه تقريبا فى حجم احمد حلمي ويرتدي الكاجوال فى عام 1991
وكان تصورى ايضا عن هذا البرنامج انهم يكونون ديكورات ليقوموا بتمثيل المشاهد فوجدت ان الموضوع كله عباره عن شوية ميكروفونات ومحمد الدفراوي ( والذى فوجئت بأن شعره ابيض وكان ذلك فى عام 1991لانني كنت اراه فى المسلسلات ذو شعر بنى غامق فادركت م وقتها ان الدنيا كلها مكياج)وسامي المغاورى وبعض نجوم الصف الثاني

رأيت كذلك كل نجوم مسرحية طرائيعو
مدحت صالح ومحمد هنيدي وغادة عبد الرازق حنان ترك بالاضافه الى بعض نجوم الصف الثاني الذين كانوا متواجدين معهم


رأيت فرقة الجوع الكافربقيادة تامر حسني كنت فى احدى الحفلات وكان من ضمن فقراتها تاlر حسني وفرقته
كانوا بيرتدوا اشياء اخجل ان ارتديها وانا وحيد بمنزلى

فقد كان زيهم عباره عن

1)شبشب بلاستك بصباع استعمال ثالث او رابع او احتمال يكونوا لامينه فى الطريق من اى مقلب زباله
2)بنطلون بيجاما مثلما الذي كانت ترتديه زغلول فى بكيزة وزغلول
هذا ماكانوا يرتدونه وموحد بينهم
اما بخصوص الجزء العلوى فقد كان مختلف
واحد لابس فنله داخليه بحمالات واحد تانى فنله داخليه بنص كم واحد تالت مش عارف فنله والا تي شيرت مقطع .واحد رابع احتمال كبير قوى مايكونش لابس حاجه فى الجزء العلوى الا سلسله فقط واحتمال الهماس جاكت بيجاما ولكن مكوي
لسه للحديث بقيةان شاء الله .....

 

 

[Sonesta]

دعوه لموضوعي

ليالى المطاريد.,,,هل تعلم

نسيت أقولكوا على الباقى

محمود الجندى.....زى ماهو فى التليفزيون بس كان لابس اللبس إللى بيستضاف بيه

يعنى جلبيه وحاجة ملفوفة على راسه

وشوفت حسين الإمام فى بنك بالزمالك شكله صعب جدا على الحقيقة أوحش بكتيييير

وكان أليط جدا لدرجة على اللى هناك ولا بصولوا ولا بصه

وشوفت نبيل الحلفاوى هو ساكن فى المريوطيه وكان ساعتها عربيته جنبى فى إشارة

وشوفت واحد إسمه متولى الضو كان فى كل مسرحيات سمير غانم وكنت أعرفه معرفه

شخصيه عن طريق شركة إعلانات كنت أعمل بها وتوفى السنه اللى فاتت وعمره 38 سنه

وشوفت خيرية أحمد وفعلا شيك حدا وأحلى من التليفزيون

وزماااااااااااان
وأنا فى ثانوى شوفت وائل نور وشريهان
كانوا مأجرين المدرسه علشان يصوروا فيها لقطات من الفوازير

 

 

[أحمد باشــا]

اقتباس المشاركة الأصلية كتبت بواسطة hamoudi مناحم بيجن ده سبق ماحصلش ولاهايحصل لحد حتى لو حد على نفس المستوى من نفس الدوله صعب انه يمشي على رجله الوقتى او حتى من احدى جمهوريات الموز

عارف فعلا كلامك صحيح .... حتى في نفس الوقت السادات كان يفاجأ الجميع و يقود سيارته بنفسه من استراحة المعمورة ليذهب لنادي اسبورتنج و يفاجأ الناس وقتها ان السادات بينهم بدون أي حراسة .... حتى عبد الناصر الذي اختلط على فريدة الأمر بينه و بين ما حدث لأبو العربي في بورسعيد مع مبارك كان يسير في سيارة مكشوفة و لم يكن هناك نظام جنود الحراسة على الصفين المتبع حاليا ... و انا رأيت بنفسي ان من يقترب من السيارة التي كانت تسير بهدوء مادا يده يصافحه فعلا عبد الناصر و رأيت ايضا من قام بتسليمه خطاب او شكوى و مصور معروف اقترب جدا لتصويره و كانت الصورة معلقة على فترينة محله للتصوير لسنوات .... ربما حدث التغيير في نهاية عصر السادات بعد اتفاقية كامب ديفيد ... حيث ظهرت سيارات مشابهة لسيارة السادات للتمويه في المواكب و ظهر لأول مرة في مصر الحارس الشخصي ذو النظارة السوداء و سماعة الأذن الملاصق للرئيس دائما .... و تغيرت تماما الأجراءات الأمنية بعد حادث المنصة للآن

 

 

[Sonesta]

دعوه لموضوعي

ليالى المطاريد.,,,هل تعلم

حمودى بيه

موضوعك رائع وفكرته جديدة

أحييك