شوربة العدس على طريقة فريده

[Farida]

الصحف المصرية والعربية

بما انى النهارده عامله عدس قلت انزل لكم طريقتى فى شوربه العدس المذهله و هى طبعا مأخوذه عن الست الوالده حفظها الله
المقادير :
- 2 كوب عدس اصفر (كيس على بعضه 500 جم)
- ملعقتين سمنه
- 4 حبات طماطم
- 2 بصله كبيره
- 2 حبات جزر
- بطاطسايه صغيره
- ملح و فلفل و كمون و بقدونس للتقديم
الطريقه :
يغسل العدس و يصفى و يوضع فى ماء يغطيه مع الخضروات كلها مقطعه لحد السوى نختبره لما الخضروات تستوى و تتهرى كمان مع العدس
- نصفى العدس انا ياخلطهم فى الخلاط و بعدين اصفيهم
- أقدح السمنه كويس و اصب فوقها العدس و اضيف الملح و الفلفل و الكمون و اضيف ماء حتى اصل للقوام المطلوب -بيبقى تخين شويه -
- لما يغلى شوبه اضيف البقدونس و اطفى
الشوربه ممكن اعمل منها اصناف اخرى
فتة العدس :
- عدد 2 رغيف محمصين و مقدار من شوربه العدس -بدون بقدونس- اشرب بيهم العيش
- ثم اعمل صلصله خل و توم (اقدح ملعقه سمنه و اضيف اليها ملعقتين توم مفروم و لما يصفر اضيف نصف كوب خل و ملح و فلفل ) و اضيفها على وش العيش المتشرب بالشوربه

عدس بالشعريه :
- احمر حفنة شعريه بالبركه كده فى ملعقة سمنه و اضيف لها كوبين شوربه عدس -بدون بقدونس - و انتظر شويه لما الشعريه تستوى و اغرفها فى الأطباق و تتاكل بارده

لا تنسوا البصل الأخضر مع العدس بيدى نتيجه هايله

 

[هاني مليجي]

تسلم ايديكي يا د. فريده
بجد نفسي فيها حالآ

 

 

[haya]

د.فريده ..تسلم إيدك بأحب انا شوربه العدس ديه جدا...

بس علشان انا انسانه محبه للمطبخ وباحب الكروته ....قصدي السرعة يعني

فبقشر الطماطم بعد ما احطها في الميه دقيقتين يعني ...وبعد كده ارجعها تاني من الخليط كله

وبعد كده بعد ما الخليط كله يستوي

فاضربه وهو جوه الحله بالمضرب اللي بيبقي موجود مع مفرمه البصل والتوم

بيخلي القوام رائع وبيفرم كل حاجه كويس جدا ومش بيحتاج تصفيه خصوصا بعد ما اكون شيلت قشر الطماطم ....

من باب توفير الوقت والمجهود والمواعين ..

 

 

[toota]

شوربة العدس دي عشقي الدائم...لسه عاملاها الاسبوع الي فات...


بس انا بعملها بدون خضار ولا طماطم...بالميه العاديه بس بضربها بالخلاط وبشوح لها بصلة تتحمر بعدها والسر في اضافة الكمون...بيخلي طعمها جنان...وطبعا بعمل منها الفتة العجيبة....اسمنت مسلح....بس ملهاش حل

 

 

[بندق]

طريقة توتا هى الأصلية لشوربة العدس .. لكن اضافة الخضار لها يعطيها نكهة وقيمة زائدة ويقلل من ضغطها على الجهاز الهضمى


انا شوفت الموضع ده أمس وحيث انه الجو بارد جدا كنت ناوى اعمل شوربة عدس .. بس نسيت بصراحة .. بس انا بأحط معها كوسة كمان وكرافس .. والباقى أدبل بصلة مكعبات فى قطعة زبدة وأصب عليها الشوربة المضروبة فى الخلاط (بس بدون طماطم) وأغليها ..

أدهن شرائح خبز فرنسى بزيت زيتون وثوم مضروبين فى الخلاط مع بعض وأحمصهم فى الفرن وأقدمه معهم .. بس .. بدل ما أعمل فتة .. ونغمس الشريحة مع الشوربة وعالبركة ..

 

 

[Farida]

بس انا فاكرة يا توتا كويس كنتى بتعمليها بشوربه فراخ اومواسير
طيب حد يعرف العدس الأباظى بمناسبة شوربه العدس ...العزيز فارو فى الواحه كان ذكره سابقا بس مش فاكره فى انهى موضوع

 

 

[toota]

اقتباس المشاركة الأصلية كتبت بواسطة Farida بس انا فاكرة يا توتا كويس كنتى بتعمليها بشوربه فراخ اومواسير طيب حد يعرف العدس الأباظى بمناسبة شوربه العدس ...العزيز فارو فى الواحه كان ذكره سابقا بس مش فاكره فى انهى موضوع

فعلا ممكن اعملها بكدة احيانا ,,,,,,ولو اني كتير بفضلها بالميه العادية

خصوصا بعد ما اكتشفت بالصدفة انهم بيبيعوا المواسير لأكل الكلاب

 

 

[Farida]

اقتباس المشاركة الأصلية كتبت بواسطة toota خصوصا بعد ما اكتشفت بالصدفة انهم بيبيعوا المواسير لأكل الكلاب

عادى جدا انا باموت فى شوربه المواسير حتى لو القرود بياكلوها ......طيب ما السمك بتاكله القطط عادى يا توتا المهم تسمى و انتى بتاكلى و خلى تكالك على ربنا

 

 

[بندق]

أى خدمة .. مشيت من الشغل الساعة 6.30 وقلت هأعمل شوربة عدس يعنى شوربة عدس .. بس اللى حصل انه رحت مشوار على ما وصلت البيت كانت 10.15 قلت برضه مفيش فايدة ..

دخلت المطبخ وأنا لابس بدلتى وكرافتتى .. وما خرجتش منه الا متغدى .. أو متعشى .. ممكن نقول متغشى أحسن لأنه ده كان أول أكل ليا من الصبح .. بس كانت رائعة (بالخضار .. ومضروبة فى حلتها على رأى أخواتنا) ..

العدس اللى عندى مش أحمر زى بتاع مصر .. اللى لقيته عدس أصفر باهت كده ما بياخدش ربع ساعة وبيستوى .. المفروض انى كنت شارى كيس نص كيلو بس طلع 750 جرام .. عملت نصه على أساس يكفى يومين .. طلع يكفى نص شهر لا مؤاخذة

الأكلة الجديدة الل هأعملها فيها شوفان عشان خاطر بدرية

 

 

[Farida]

للرفع بمناسبه انى حأتغدى شوربه عدس فى البرد ده