السلام عليكم
انا تعبت جدا لغايه ماربنا كرمنى بفيزا لالمانيا للزياره مدتها 3 شهور و هقبكم عالخطوات و اى سوال انا هجتاوب باذن الله
اول حاجه و اهم حاجه و الى تعبتنى جدا كشف الحساب من البنك لانى عملت بتاع 12 كشف حساب لانهم كل شويه يطلبو انه يكون بتاريخ اخر اسبوع
اولا الصوره البيومتريه :: اتصورت لتاع 4 مرات و بيرفضوها فالاحسن تتصور فمركز التاشيره tls لانهم مش هيقبلو اى صوره الا منهم و لازم ماتكنش بتضحك فالصوره و لا اى علامه عالوجه و ناظر للامام و بدون تعبيرات و بتكون 3.5×3.5 و لازم يبان الاذن و تكون الوان طبيعيه يعنى مش سكانر او صوره من صوره و فالافضل تتصور هناك وال 8صور بيتكلف 42 جنيه
ثانيا : كتابه الابلكيشن كنت مهتمه بيه جدا جدا و اغلط و ارجع تانى و فالاخر اكتشفت انهم بياخدو بالاوراق المقدمه و بس الابلكيشنعباره عن بيانات الباسبور و نوع الفيزا
ثالتا : فالابلكيشن اكتب الى انت عاوزة و اهم حاجه نحتار malty inters و معناه انك تقدر تسافر مرتين او تلاته داخل مده التاشيره و كمان بتكتب عدد الايام الى هتقضيها هناك لكن فالاخر هما بيبصو للتامين الصحى و بيدوك التاشيره من بدايته لنهايته .
التامين الصحى : احسن شركه اليانز و فعلا بعد ماسالت لقيت شركه التكافل و بعض الشركات المصريه مالهاش مصداقيه زيها و كمان السعر متقارب بحوالى 350 جنيه للشهر و بيزيد لما بتقل المده و انا عملت التامين 3 شهور
اختيار الفيزا فالابلكيشن :بيبقي مكتوب نوع الفيزا زياره او سياحه و فالحالتين بتختار فيزا محليه ولا دوليه و دى مهمه جدا انك تختارالدوليه لانه لو محليه هيديك دخول لالمانيا فقط و مش هيديك الشنجن و دى الى احنا عاوزنها طبعا
اترفضت مرتين : الاولى السبب : انهم كاتبين انهم خايفين انى مش هرجع تانى و بالتالى سالت اعمل ايه فالاول اتعقدت لان مصاريف الفيزا كمان حوالى 1750 لا تسترد فحاله رفض الفيزا و المكتب بياخد حوالى 500 جنيه مش عارفه بيعملو ايه بس هو ده النظام و للرد عالرفض ترجمت قسيمه الجواز و شهادات ميلاد اولادى
السبب التانى اسمه الارتباط الاقتصادى و المادى : وده بتترجم فيه اى حاجه باسمك شثه عربيه مكتب شركه و بتترجم عند المعتمدين امكتوبين على موقع السفاره و معظمهم فالزمالك
الترجمه : دى مشكله لوحدها لانهم هيدوخوك و يلففوك و فالاخر مش هيقتنعو الا بالمترجم بتاعهم يعنى ترجمه السجل المدنى فالعباسيه و المختومه بختم النسر دى هيطلبو توثيقها و هتدفع عالشهاده الواحده 25 يوم او 500 جنيه و فالاخر بياخدوها من ضمن الاوراق وطبعا الاوراق بتتحط فملفك ولا ترد
الترجمه : اول نصيحه انه يكون مترجم السفاره و انسي توثيق الخارجيه و الكلام ده و هقلكم على حاجه حلوه المترجم بياخد اصول الشهادات و بيدبسها مع الترجمه و بيختم عليها من ورا وطبعا فالسفر هنحتاج الاوراق دى تانى فطلبت منه انه يدينى الاصول و ياخد الصور مع الترجمه وطبعا كنت قلقانه انهم يرفضو لكن قبلوهم الحمد لله و النصيحه التانيه اعملو نسخه تانيه من عند المترجم تفضل معاكو عشان لو احتاجتوها تلاقوها مترجمه و ساعتها المترجم خد عالشهاده 100 جنيه قسيمه جواز شهادات ميلاد و 150 عالعقود الى هى عقد الشقه بتاعتنا او التوكيلات وصرفت حوالى 2000 جنيه ترجمه بالنسخ الاحتياطيه الى معايا
فيزا السياحه : بدل ماتروح لشركه سياحه و ياخدو منك مبلغ عالفاضي ادخل على book.comو هتضطر تحجز فندق و تخلى الدفع عند الوصول ده ممكن ينفع فسفارات كتير بس المانيا ساعات بيطلبو انك تكون دافع فانت تقلهم انك لسه مش متاكد انك هتاخد الفيزا ولا لسه فيه اوراق عشان ادفع و لورخمو يبقي لازم تدفع ةو بتلاقي فنادق باقل من 80 يورو فالاسبوع
كشف الحساب ده بقي من الاوراق المهمه جدا و لازم يكون عندك حساب فالبنك مش اقل من 6 شهور و هقلك برده على طريقه حلوه اولا لازم يكون معاك عالاقل 50الف جنيه وو طبعا للموظفين في فيزا المرتب هتروح البنك و تقلهم عاوزة احط مبلغ فالحساب بتاعى و تحط ال 50 الف وطبعا كل شهر بينزل عليهم المرتب فتاريخ القبض و بكارت الفيزا تسحب و تحط اى مبلغ يعنى تعمل حركات سحب و ايداع لكن يوم طباعه كشف الحساب يكون عالاقب فالحساب 25 الف انا كان عندى 23 الف و عدت
وعشان ترتاح من ترجمه كشف الحساب هتملى الموظف اسمك زى ماهو فالباسبور و هتطلب طباعته بالنجليزى قبل ماتطبعه بيومين عشان بياخد موافقه فالبنك المركزى مش عارفه ليييييييييييييه
كمان في شهاده تحركات مكن مجمع التحرير لازم تجيبها و تكون موجهه لسفاره المانيا و بتتكلف 12 جنيه و يكون معاك صوره الباسبور طبعا بياخد اسبوعبن ل 20 يوم مع انهم بيقزلو بتطلع بعد اسبوع
السفر محتاج صبر و انا مسافره ان شاء الله شهر 1 ياريت اكون افادتكم
طبعا سمعت انى مدام اترفضت يبقي خلاص و ناس حاولو يهبطونى لكن انا مايأستش و كمان موظف فشركه سياحه قاللى ان تاشيره السياحه و الزياره بتترفض مدام مش تبع شركه سياحه و ده كلام كدب لان اتعرفت على ناس خدو التاشيره سياحه من اول مره بدون ماتحتاج شركه
اخيرا ادعولى ان ربنا ييسر لى طريقي و يحققلى الى انا بتمناه