كلامى للى نازل يوم 30 يونيو ...ايا كانت دوافعه و ايا كان فريقه و ايا كان سقف مطالبه .
كلامى للى نازل الشارع فعلا و مش هيتابع على الجزيرة أو الفيس و تويتر .
كلامى للى مشحون دلوقتى و لسه الأيام الجاية حتشهد شحن رهيب على الطرفين .
كلامى يمكن ميغيرش حاجة فى اللى هيحصل و يمكن لو فى كتير مؤمنين أو مصدقين نفس الكلام ... يمكن يغير .
كلامى لإقامة حجة و لإبراء ذمة فقط لا غير .
واحب اقول و بصراحة جدا انى نازل يوم 30 يونيو ان شاء الله و كان لى عمر .
- صديقى المعارض : متزعلش منى لو قولتلك انى مش رايح الاتحادية !
انا نازل التحرير عشان اقول ان اللى بيحصل فى البلد دا اسمه عك و ان العك دا لازم ينتهى .
و ينتهى ازاى ... فدى مسؤلية السلطة مش مسؤليتى و دى شغلانتهم مش شغلانتى ...
مرسى يصلح و يصدر قرارات فورية تهدى الشارع ..ماشى
مرسى يعلن نيته عن اجراء استفتاء ..ماشى
مرسى يعلن استقالته ... ماشى
تطور الأمور و مرسى يجبر على اى حاجة من اللى فوق ... ماشى برده !
قضيتى هنا مش مرسى ولا الجماعة ... قضيتى بلد و وطن و شعب و ثورة محققتش اى حاجة على الأرض لغاية
دلوقتى رغم كل ما قدمته من تضحيات .
متزعلش منى انا مش رايح الاتحادية .. لأنى متوقع انه هيحصل اشتباكات هناك .
هيبقى فى دم و فى ناس هتموت .
وانا مش هقابل ربنا و فى دم فى ايدى .
انا مش جبان و مش خايف من حد .. و لو جولنا التحرير فانا مش هجرى و مش همشى واللى فيها تجيبه .
صديقى المعارض : ارجوك متستعبطش !
انت عارف كويس زى ما انا عارف كويس ان اللى هينزلوا الاتحادية يدافعوا عن مرسى شباب زيهم زيك .
متستعبطش .. لا هما كفره ولا هما خونة ولا ليهم اى ايد فى اللى بيحصل فى البلد .
لا هما حرامية ولا هما اللى بيرسموا حاجة فى حاضر البلد دى ولا مستقبلها
لا مدوا ايديهم فى جيوبك و لا اخدوا منك مليم .
مشكلتى و مشكلتك مع مكتب الارشاد مش مع الناس دى .
دول زى عساكر االامن المركزى بالظبط .. بيسمعوا اللى بيتقالهم و خلاص .. كلهم ( احمد سبع الليل )
واحمد سبع الليل مش فى ايده حاجة
احمد سبع الليل مش فاهم حاجة
قالوله اعداء الوطن ... فبيعذب و يضرب اعداء الوطن .
الشاب الاخوانى اللى نازل الاتحادية ...قالوله نزولك دا عشان خاطر ربنا و عشان خاطر الاسلام و عشان خاطر
البلد !
هو طافح الكوتة زيك على فكرة ... مسروق و منهوب و مغبون و مظلوم و مقتول و مسحول و ضمن طائفة العبيد
اللى بتضمك و بتضمنى !
لا بقى محافظ ولا بقى نائب برلمان و لا بيزنسه كبر و لا بيسافر من صالة كبار الزوار
لا هو خيرت الشاطر ولا هو حسن مالك و لا هو العريان و لا هو البلتاجى ولا هو محمد بديع .
هو ملهوش دعوة على فكرة ..بس هما مسيطيرين عليه تماما و لاغين ادراكه و تفكيره تماما
مغيب ماشى .. قولى بقى ..مين اللى قالك أو فهمك ان المغيب دمه حلال ؟؟؟
اللى نازل الاتحادية دا .. انسان ..و مصرى... و عربى... و مسلم ... لا يحل لك دمه ولا ماله و لا عرضه .
هتقولى مانا لو مرحتش الاتحادية ...مفيش حاجة هتتغير !
وهنا اقولك انت غلطان !
لو الشعب دا نزل باعداد كبيرة فى كل الميادين زى ما حصل فى 25 يناير ...لو حصل شلل تام فى البلد
لازم هيحصل تغير و مش هتبقى محتاج تروح الاتحادية ولا تعوص ايدك دم .
صديقى المعارض : متستعبطش ...الدم حرام و المال حرام و العرض حرام .
لو جالك التحرير و حاول فض سلميتك بالقوة ..يبقى غصب عننا و احنا فى موقف الدفاع و لقد بلغت من لدنى عذرا
يبقى هنقف و ليقض الله أمرا كان مفعولا .
---------------------------------------------------------------------------------------------
عزيزى الموالى : انت طبعا هتكون على الناحية التانية ..
وانت طبعا بتدافع عن المشروع الاسلامى و عن الاسلام و عن الشرعية و عن البلد .
ماشى ..
انا هنا مش جاى اناقشك فى توجهاتك أو رؤيتك لأن الأمر انتهى و سبق السيف العزل .
لكن .. انا عاوزك انت كمان متستعبطش !
انت عارف كويس ان الغالبية العظمى من اللى نازل يوم 30 يونيو لا هما كفرة ولا هما اعداء الاسلام
انت عارف كويس ان اللى هيكون قصادك الناحية التانية .. شباب فقد اى امل فى اى اصلاح فى البلد دى
انت عارف كويس انهم بيدوروا على الحلم اللى ضايع
كل اللى طالبينه ابسط حقوقهم فى بلدهم .
كل اللى طالبينه كرامة و عدل و حق !
تغيير و حرية و عدالة اجتماعية .
انت عارف كويس ان مفيش حاجة فى البلد اتغيرت بعد سنة من حكم مرسى ..انا عارف ان عندك تبريرات و اعذار و اسباب كل دا
لكن فى النهاية فى واقع خرج الشباب دا ضد مبارك و استمرار نفس الواقع خرجهم ضد العسكر و بما انه نفس الواقع ...فهما نازلين ضد مرسى !
بيقولولك فلول و علمانيين و ملاحدة الخ الخ
مش هنكر انه اكيد فى ناس كارهة مرسى لمجرد انه منتمى لتيار معين او لجماعة معينة
ومش هنكر برده ان اكيد فى ناس نازلة و بتحلم بعودة العسكر أو مبارك فى ثوب جديد !
لكن انت عارف كويس ان دول مش اكتر من 1% من اللى نازلين .
الحزب الوطنى و رجاله ملهمش اتباع مؤمنين بفكر اساسا و كل اللى عندهم مأجورين
فحتى لو الفلول كلهم نزلوا مأجوريهم ... فالمأجور دا مش حلال دمه بالنسبالك
فقره و جهله و ظروف بنت ستين تييت اجبرته يبقى مأجور و يبقى مع اللى بيدفع و غير كدا مش هيقدر يعيش
فبرده متستعبطش !
الملحدين و اللادينين فى مصر نسبة برده لا تذكر و كلهم على بعض زى مشجعى الترسانة كدا ..يدوب يعملوا قهوة
فمتستعبطش !
الشباب الباقى بقى واللى قياداتك بتقول عليهم علمانيين و ليبرالين كدعوة لتفكيرهم و استحلال دمهم
لا هما كفرة و لا هما اعداء دين .
بيصلوا و بيصوموا و بيحجوا و بيزكوا و بيخافوا ياكلوا حرام .
لو بياكلوا حرام مكنوش نزلوا الشارع اساسا يقولوا كفاية كدا مش عارفين نعيش !
يمكن فى يوم مش بعيد انت كنت معاهم فى الشارع و فى الميادين
وانت شوفت بعينك انهم لا بتوع دعارة ولا بتوع شذوذ ولا عبدة شيطان .
عزيزى الموالى : الموضوع - كل الموضوع - خلاف سياسى
لا هو خلاف عقيدة ولا هو خلاف دين ولا هو خلاف مذهب .
دم الناس دى مش حلال ليك و هتتسئل عليه و وقتها لا هينفعك بديع و لا هينفعك مرسى و لا هينفعك حد .
الدم حرام و المال حرام و العرض حرام .
ألا بلغت ...اللهم فاشهد .
وليقض الله أمرا كان مفعولا .
آخر 10 مشاركات
21st June 2013, 01:00 AM
قبل 30 يونيو ...متستعبطش !!
العرض الشجري