.
** فوق كل ده ، أنا هقولكم السر في إن الإدارة المالية في عدد كبير من الشركات الدخول فيها بالواسطة ( سـر بمليون جنيه للي مش محاسب) لإن ببساطة الإدارة المالية بتكون معقل الفساد والسرقة وتسريب الأموال لجيوب موظفيها وكبيرهم ، واللعب في الدفتر ، بدون علم أي من العاملين الآخرين ، وكمان ضرب فواتير المصروفات المضروبة ، وكمان معرفة حجم الثروة الحقيقي والإيرادات لصاحب الشركة من خلال الإدارة المالية ، لذا لازم اللي ييجي الشركة كمحاسب جديد يكون منهم فيهم وتبعهم ،
و أيضاً معظم مكاتب المحاسبة تعطي أعمال ودفاتر معينة للمحاسب اللي تحت التمرين اللي جاي بواسطة و متأمن عليه من أول أسبوع لكي يعمل عليها ، وهذه الدفاتر وتلك الأعمال المذكورة ممنوع على المحاسب اللي تحت التمرين وجاي من غير واسطة أن يقوم بالعمل عليها ((أقصد بذلك الأخير اللي هو هينطرد بعد فترة لما يخلص الغرض منه ويحس إنه مالوش عازة ومش مؤمن عليه )) ، لأن هذه الدفاتر الخاصة بشركة معينة تتناول أعمال تتعلق بتغيير أرقام البنود المذكورة بها لكي تصبح المنشأة خسرانة أو هامش ربحهها ضعيف ومتدفعش ضرايب كتير ، وديه فنيات يتعلمها اللي جاي مكتب محاسبة بالواسطة الجامدة فقط
** غير كدا لما بشتغل باخد أجازة بالعافية عشان الإمتحان ( أنا بذاكر حقوق لوحدي و رايح تالتة إن شاء الله ، مش عشان الشغل إنما أنا بحب العلم وبحب أعرف القانون و بصراحة هواااااية **ناس بتقول عليا مجنون** أنا عارف كويس إن مفيش شغل لخريج حقوق ، لكن زي ما قلت مش ده هدفي ديه هواية وحب للعلم ) ، يعني مثلاً في ناس مدمنة بانجو ، أنا مدمن عـلـم
كان نفسي أكون محاسب محترم ، وأشتغل في المجال اللي بحبه ، هل ده كتير ؟؟
المجال اللي عشانه أخدت 5 كورسات من مرتبي ، بطلوع الروح
المجال اللي إستحملت تعـسـف الدكاترة بسببه ( جلال صالح وكمال علي و يمن الحماقي ونصار وكمال درويش وعبد ربه ونبيل سليم ، اللي خريج تجارة عين شمس هيعرفهم )
في المقابل كان في سادة أجلاء ( حسين عيسى و هشام حسبو و عاطف العوام و عبد المنعم راضي و أولاده دينا راضي و إيهاب راضي ** توريث بس مش معقدين** و غيرهم لا تسعـفـني الذاكرة بأسمائهم )
الحمد لله ، اليومين اللي فاتوا بقى عندي قدرة ع الهجرة بإذن الله ( قدرة مادية ) ، الواحد يسند نفسه في المهجر لحد مايلاقي شغل في المهجر لمدة شهرين أو تلاتة بالكتير والفلوس اللي معايا للأسف مينفعش يتعمل بيها مشروع في مصر لعدة أسباب : أنا مش معايا صنعة ولا بفهم في أي صنعة ،، إيجارات المحلات تبدأ من ألفين جنيه ،، طب وهو فين النشاط اللي بيجيب ربح جامد ده عشان أدفع ألفين جنيه في الشهر إيجار ؟؟ ده لو محل في مكان تعبان ، أما في مكان حيوي يبقى 4 الاف فيما فوق ، وغالباً هيبقى سوبرماركت وهيطلع عينو على ما الناس تشتري من عندو ، مين الشاب اللي يقدر يتحمل كدا لفترة؟؟
درست ستين حاجة وسألت وإتشقلبت هنا وهنا لقيت إنه هيكون المشروع جايب مصاريفه وأنا لافف في ساقية وإن في ناس عملت زي ما كنت عايز أعمل بس دلوقتي منهم اللي خسر جزء كبير من رأس ماله و منهم اللي مديون ،، حاولت أعمل مشروع أنا بالفلوس و حد من أصدقائي ( كـذا واحد جربته ) يشاركني بالخبرة ،، لقيت نية الإستغلال و الإستحواذ مبيتة من قبل ما أبدأ حتى أعـوذ بالله ؟؟؟ ،
قلت آخد قرض من الصندوق الإجتماعي ، إكتشفت إنه لايفرق عن قرض البنوك في شيء و إن أحياناً بيطالب بأكتر من مستحقاته وذلك بعد نصائح ممن لهم مشاكل تعثر في أعمالهم بسببه والتفرقة في المعاملة بين المقـترضين ، والضمانات اللي لا يمكن شاب يقدر يوفرها إلا إذا أحد الأشخاص ضمنه عندهم
أسعار المحلات كمان التمليك بقت غريبة ، محل 40 ولا 60 متر بـ 350 ألف أو أكتر وكمان في شارع جواني مش حيوي في الهرم مثلاً ، طب ومين الشاب البسيط اللي متخرج من قريب ومعاه 350 ألف ، ولو محل ع الشارع ومساحته بالكتير 40 أو 50 متر ، كدة بنتكلم في 600 ألف فيما فوق حسب المنطقة ، وبعدين فين فلوس البضاعة بقى ؟ (( ماحدش يجيب لي سيرة فيصل اللي بنلاقي فيه ما بين كل محل ومحل تلاقي محل ، والطريق واقف وما بيمشيش واللي إتعود على محل معين صعب إنه يغيره .))
الواحد إتصدم و الله في كل حاجة ،، الرحمة من عندك يا رب
بعد كل ده وأقعد في مصر ؟؟؟ طب وبعدين ؟؟ بعد عشر سنين ؟؟ هيبقى وضعي إيه ؟؟ عمري بيجري بيا ؟
بصراحة لو كنت شايف إن هيكون لي وضع محترم في مصر ، أو الخليج (بعنصريته) ، ماكنتش فكرت في هجرة .
و أنا عندي 19 سنة وأنا طالب كان ليا قصة حب مع واحدة فرنسية من أصل جزائري وكانت هتكون سكتي للهجرة لفرنسا بإعتبارنا هنتجوز ،، كنا مع بعض في قمة الإحترام ، وكنت فعلاً بحبها قبل أي شيء ، لكن أنا وقتها حسيت إن ربنا إبتلاني بمصايب كتير في نفسي عشان الرسايل ع الموبايل والكلام ع النت والتخطيط للمقابلة ، وكانت مهووسة بيا لأنها كان نفسها تعرف واحد مصري ، قطعت علاقتي بيها عشان ربنا يرضى عني ، لأني حسيت إن ربنا غضب علي ، وعلى فكرة ، دي كانت أول مرة أعيش فيها قصة حب من طرفين ، وأنهيتها بنفسي نهاية شاقة ،، الحمد لله
السبب التاني اللي خلاني قطعت علاقتي بيها ، إني في الأول كنت عندي هـوس بالهجرة لأوروبا ( أنا بتكلم لما كان عندي 19 سنة ، يعني من 6 سنين ) لكن بعد كدة قولت ، طب مصر لو إجتهدت فيها هبقى حاجة كويسة برضه ، أهاجر فرنسا ليه ؟؟ لكن الظاهر كنت غلطان في النقطة دي ، بس برضو كدة ولا كدة كنت هقطع علاقتي بالبنت دي عشان ربنا يرضى عني ، وده الأهم من أي شيء
اللي مشجعني ع الهجرة كمان إن أنا من نعمة ربنا عليا إني أقنعت نفسي بإخراج فكرة الزواج من رأسي ، ويارب حتى ع الأربعين ، المهم أتجوز وأنا مرتاح مادياً تماماً ،، مش هقدر أتحمل إني أتجوز واحدة وأقولها معلش إستحملي مرة على مرة هتكرهني وتتمنى لو ماكنتش عرفتني ، رغم إنها ممكن تكون عارفة من الأول بالظروف ، بس الحياة علمتني إن ده ممكن أوي يحصل ،، وكمان الجواز هيمنعني أحقـق النجاح المادي والعملي اللي أنا بتمناه من ربنا سبحانه وتعالى ، وده عندي أهم من مليون عـروسة
عشان كدة بتمنى من ربنا إنه يوفقني في هجرتي ، يعني ما أنا لو كنت نجحت هنا مكنتش هفكر بصراحة في هجرة ، لكن بعد الفشل المتلاحق ده ، أنا أهاجر أحسن لي ،، كدة كدة ، الواحد واخد على البهدلة ، دا مش جديد عليا ،
كمان هناك في شغل كاجوال ،، يعني مش مكتبي ( أمن – بائع – كاشير ...) ،، لحد ما الواحد يخلص المعادلة ولا الزمالة و حتى لو مفيش في الأول ، في شغل تطوعي في المحاسبة – بدون أجر – عشان الواحد ياخد الخبرة الكندية وبعدها بإذن الله يشق طريقه وفي نفس الوقت في إعانة من الدولة ، محدش هـيـعايرني على شغلي ، دا الواحد كان مندوب و كان مش عاجب حـد ،
وكمان الحمد لله رب العالمين ، أنا مش متجوز ، يعني مش شايل مسئولية ، وماعنديش واحدة بموت عليها وعايز أكون نفسي بسرعة عشان ألحقها قبل ما تتخطف وإتغيرت بشهادة الجميع وبقيت ماليش في الحب والعشق نهااااائي ، أنا عملي بطريقة رخمة ، ودي نعمة وميزة ، أهاجر بقى براحـتي ، أنـجـح براحتي ، وعلى مهلي وتاتا تاتا ، ومش مستعجـل ،
هجرة كيبك هتاخد فترة إنتظار حوالي 3 سنين عشان الإجراءات ، والله أعلم ، نخبط هنا في أي حاجة مش هتفرق
آسف على الإطالة ، آسف لو كانت الفضفضة ضايقـتكم ، و زي ما قلت في البداية مش عايز حاجة خالص من حـد ،، أنا إستغنيت بفضل الله ،، أنا بس بحكي معاكم
عرفتوا ليه بقى التوقيع بتاعي اللي تحت ده أنا كاتب فيه الشعر الحزين ده ؟
يا عــينـي عـليـك يـا مـصري بـيـلـطـشـوك فـي كـل حـتـة
و بـتـدور عـلى الإحـتـرام ومش لاقـيه فـي أي حـتـة
" * أنا اللي ألفت الشعر ده على فكرة ، ربنا يـشهـد * "
إضافة جديدة (في الخباثة)
على فكرة بمناسبة الكلام عن Net Work مصرية في كندا وتأييد البعض وهجوم البعض الآخر عليها ، أنا هديكوا مثال ، وأنا في تالتة تجارة (أثناء الدراسة في الشتا وكانت المرة الوحيدة اللي أشتغل فيها لحد قبل الإمتحان بثلاث أسابيع) إشتغلت شهر واحد فقط مشرف نقل وتخزين ف مصنع ملابس في 6 أكتوبر عارفين العمال (الصنايعية والأسطوات) كانوا إيه ؟؟ هنود وصينيين ،
والتكت اللي كان على الملابس كانوا بيكتبوا عليه made in Egypt ، المهم ، كان المصنع مشاركة بين واحد مصري ومجموعة أجانب ، كانوا شارطين في العقد إن ميكونش الأسطوات مصريين (عشان ميروحش مكان تاني ويسيبهم بعد ما عرف أصول التفصيل الأوروبي والأسيوي الأمثل والأحدث والتصميمات كمان ، ولأن العامل الأجنبي غير مصرح له بالعمل إلا في المكان اللي جاي عليه في العقـد ) ولما كان الإدارة تقول إنها عايزة عامل (أو أكتر) كان العمال يعملوا إيه ؟؟؟
كل واحد من الهنود يكتب في ورقة صغيرة إسم حـد من معارفه في الهند ويرشحه عشان الوظيفة ، و بعدين يطبق الورقة كويس ويحطوا كل الورق اللي فيه أسامي المترشحين للوظيفة في صندوق كبير ويقفلوه ويفضلوا يقلبوا الصندوق ويلفـوه كذا مرة ، وبعدين يختاروا ورقة من خلال واحد يتفقوا عليه ، والإسم اللي ف الورقة دي يبقى هو المترشح للوظيفة ، والصينيين برضوا يتبعوا نفس الطريقة ويختاروا إسم يرشحوه ،، طب دلوقتي كدة في إسم واحد هندي مترشح وقصاده إسم واحد صيني مترشح ، إيه العمل ؟؟ يقوموا يعملوا قرعة بالعملة المعدنية ، وكانوا يختاروا حد مش منهم هما الإتنين ، يعني حد مصري ( العبد لله ) أقول للصيني إنت الصورة ، وأقول للهندي إنت الكتابة ، واللي يكسب القرعة هو اللي يطلع للإدارة يديها السي في بتاع الراجل اللي جماعته رشحته ، ولو مطلوب أكتر من عامل كانوا بيختاروا كذا ورقة ، أنا إشتركت في قرعة العملة المعدنية دي مرتين ، على فكرة الصينيين والهنود كانوا بيكرهوا بعـض ، وكان كل جماعة من الجماعتين تدافع عن مصالحها في مواجهة الأخرى دفاع مستميت ، وبالمناسبة ، مشرفين النقل والتخزين اللي من محافظة (...) كانوا بيكرهوا الجيزاويين (أنا منهم) و البشمهندس مدير الإدارة بتاعتي (إدارة النقل والتخزين) كان بيفضلني على ناس تانية عشان (لأننا جيران في الدقي وعارف إني مش مريض بالغيرة ومخي مش ضيق , وأنا الوحيد اللي كان بيروحني معاه في طريقه بعربيته ، حاول يدخلني الحسابات ومعـرفـش ) لـذا الجمييييييييع كانوا بيكرهوا العبد لله ، لكن علاقتي كانت كويسة ببعض الهنود لذا كانوا يصمموا على إختياري حكم في قرعة العملة المعدنية، المدة القصيرة دي عرفتني أهمية الـ Net work وكل واحد بيفضل يكون ضهره هو طائفته وعشيرته (في ناس بتكون متعصبة للطائفة والعشيرة وفي ناس معتدلة يعني إنتمائها للطائفة والعشيرة معتدل) ،
أقولكوا حاجة هندي Namista Badoo