بناء العضلات

[تكسير]

الصحف المصرية والعربية

بسم الله الرحمن الرحيم
كنت عايز من زمان أفتح موضوع هنا عن بناء العضلات , والحمد لله خت القرار , وححاول إن شاء الله أفيد الناس , اهلي وعشيرتي
ليه رياضة بناء العضلات ؟
لانها رياضة مملة وعايزة صبر , ولو سبتها أسبوع تعيد وكانك معملتش حاجة , وده حيسبب عقدة نفسية , أو تتجنن وتزود العيار وتصبح مدمنها , وام العيال حترقع بالصوت
لكن لو عندك صبر وفي نفس الوقت تراعي العشيرة , حتبقي نجم النجوم , شكل وقوة
لعبنا كورة وسلة وووووووو , جميل ما فيش مشاكل , بس الناس تحس من منظرك انك حشاش , رفيع ومقتم او طخين وبكرش , مع انك مكحرت نفسك جري ومشي , لأ كفاييييييييييييييييييييييييييييييييييياااااااااا

عايزين بقي شكل , ما هو الشكل مهم برضوا , بس يا حلو لازم يبقي شكل وقوة , لانه لو شكل بس حيبان , ضريب الكماويات بيبان , تحس انه منفوخ هوي , ولما تجربه تلاقيه فشنك , اما الواد الصح , تشوف عضلاته تموت لوحدك
تمام
أول حاجة اعرف انك حتغير مقاسك في اللبس بعدين , فا ما تزعلش لو في بنطلون او تشيرت عزيز عليك , لانك مش حتعرف تلبسه تاني
اعرف أنك حتكلف نفسك فلوس كثيرة في الاكل , فا وفر فلوسك إلي مضيعها علي الاونظة
اعرف انك لو اكلت أكله تعبانه حتفضل تعبان وولو اكلت اكله كبيرة حتكبر
أعرف انك بتبني جسم وقوة , فحاول انك ما تكونش شرير , علشان ربنا كبير وقادر
اعرف انك لو بصيت للأقوي منك حتحتقر نفسك فا ما تبصش , لان في الصالة حتلاقي ناس غاوية تعقدك , تبقي انت بترفع خمسة كيلوا بالعافية وهو بيرفع مية كيلو
وما تبصش للأقل منك لأنك حتتغر في روحك , وتكتفي
يبقي أبص لنفسي بس
الحديد عايز نفس طويل وصبر , والنتائج مش حتبقي بسرعة الريح , لأ حياخد وقت طويل , يعني اول نواية بلحة في الدراع ممكن تاخد 6 شهور
مش بالوقت الطويل والحديد التقيل , لأ لأ بالطريقة
الوقت مهم جدا
وطريقة اللعب برضوا
يعني ممكن تلعب ثلاث ساعات ولا ليهم لزمة , وممكن تشيل أوزان وتموتلك نمو العضلة , وممكن تلعب ساعة وتشيل أوزان خفيفة وتبقي ما شاء الله
ولكن اللعب الطويل والاوزان الثقيلة ليها وقتها
فانا ححاول احطلكم برنامج علي اعلي قدر من الأحترافية وباسهل أسلوب , وحتلاقوني مجاوب علي كل سؤال إن كان البداية حتبقي إزاي , واعمل إيه , والوقت , والاكل ,الراحة والنوم , وكل حاجة
حتي لو في إصابات برضوا حعمل إيه وإزاي , قبل التمرين وبعد التمرين , حتكلم بصراحة وربنا يعين
طبعا انا مش كوتش ولا حاجة , بس بمارس الرياضة دي علي إيد ناس محترفة , وتعبت جدا , وعملت اخطاء بالجملة , وإصابات بالكوم , فمتعلم بالغالي , ومازلت بمارس الرياضة دي , ووصلت فيها لمستوي حلو , مش هرقل يعني بس الحمد لله
لان القوة كانت اهم عندي من الإنتفاخ , فدي بتاخد وقت شوية
لان حتي في تمرين إي عضلة في تمرين للنفخ وفي تمرين للقوة , وممكن تعمل الأثنين مع بعض
طبعا ده حشرحه إن شاء الله في كل تمرينة وفي كل عضلة
بس كنت عايز أبتدي بسرعة كدة , العضلة لما بتلعب وبتشيل وزن مش معتاده عليه , بالبلدي كدة بتفهم انها لازم تشيل الوزن ده , فبتقوم متكسرة , وبعد ما تتكسر تلحم وتكبر اكثر من الاول , علشان هي فهمت انها لازم تشيل الوزن الجديد عليها ده , العضلة بتكبر في الراحة , او أثناء النوم , وكل مرة تشيل وزن اكبر , حتعمل نفس العملية , فحتحس بوجع خفيف في كل مرة , ده عادي , لكن وجع اول تمرينة حيبقي صعب شوية
ولو وقفت اللعب لفترة كبيرة , العضلة حتفهم انها مش حتشيل , تقوم تنام وتريح , ولما تيجي ترجع تشيل تاني حتحس انك مش قادر تشيل إلي كنت بتشيله قبل كدة , وتعيد من الاول , وكانك يا زيد ما غزيت
المهم
انا طولت انتظروا جديد الكوتش تكسير دماغ
إن شاء الله

 

[الفتى الطموح]

الله عليك يا عم تكسير موضوع حلو وجميل ومفيد بعيد عن السياسه ووجع البطن
انا الحد لله بتمرن شبه يوميا , عندنا فى الشغل صاله حديد بس الحق الواحد بيخلص شغل وبيكون وقع وندوز فمش بدخلها , انما بتمرن فى البيت عندى حديد ........

 

 

[MFaisal]

كمل يا ريس تكسير ونحن من وراءك

 

 

[NazeeH]

ياخسارة القطر عدى وفات معطلكش ..
وبالتوفيق والعضلات .

 

 

[استشارى]

انا معاك يا برنس
انا مشترك فى البودى ماسترز بس مش بروح كتير
بس الحق يعنى انا بموت فى الساونا والبخاروالجاكوزى ا لبعد التمرين خصوصا لو بلعب كتف او بنش
وبعدين انزل فى ميه تلج كده اووووووووف
بحس بانتعاش بعدها لا يوصف ودماغ يعنى بجد

فى سؤال على الماشى كده

العب بنش عالى الاول ولا مستوى الاول فى نفس التمرين

عاااااش يا وحش

 

 

[تكسير]

صباح الفل يا أصدقاء
اولا لازم نتكلم شوية قبل ما نبتدي نتكلم في العضلات والتمارين والراحة والغذاء وكل ده , حنتكلم بس ما تنسوش أني بتكلم عن تجربتي الشخصية , وما تنسوش اني مش مدرب ولا معي شهادة في المجال ده , فممكن اقول حاجة ماشية معاي ومش حتمشي مع غيري
المهم
في واحد رفيع عايز يضخم , وفي واحد طخين عايز يخسس , وفي شباب وفي كهول , فطبعا تمارين التنفيخ تختلف عن التخسيس , والاحمال للشباب مش حتبقي نفس مستوي الكهول والعواجيز , والنتائج برضوا حتختلف
وكمان عدد مرات التمرين في الاسبوع حتختلف , ما بين واحد وواحد , وكمان المكان إلي حتلعب فيه
في علي سبيل المثال , لما حتروح صالة حتلاقي كل الاجهزة , وممكن تلاقي كل الاجهزة بس العدد في الصالة كثير , فبدل ما تستني والوقت مهم جدا في التمارين حقولك طبعا علي تمارين بأشكال مختلفة تؤدي نفس الغرض , ولو بتلعب في البيت في حاجات لازم تشتريها , واوزان معينة برضوا , وفي حاجة مهمة قوي , انك حتحتاج واحد معاك يديك زقة , والزقة دي من اهم الاشياء في التمارين , العدة الاخيرة , وكمان كنوع من الامان , ما انت ممكن الحديد يقع عليك لحد ما تتخنق , ولو ما عندكش حد مش مشكلة , بس مش حنغامر في اوزان ما تقدرش تشلها لوحدك , وطبعا ده حيطول معاك في النتائج
طبعا في تمارين حتعملها لوحدها , يعني لو بتلعب كتف حيبقي كتف , لو بتلعب بنش حيبقي بنش , لو حتلعب رجلين يبقي رجلين بس , لو حتلعب ظهر وترابيس ومجانس , حيبقي كل تمرين لوحده
لكن في اوقات حتلعب تمرنتين مع بعض , كتف وبطن , بطن وورك وكدة يعني
وفي عضلات ما تتلعبش مع بعض , طبعا حنبقي نتكلم عليها
برضوا في حاجة مهمة قوي قوي قوي , وخصوصا للشباب إلي عندهم الإمكانية إنهم يشتركوا في صالات جيم , في فرق ياشباب , ما بين عضلة المكنة , وعضلة الحديد البلدي , يعني العضلة إلي حتكبر علي إيد جهاز مش حتبقي زي العضلة إلي حتكبر بالحديد اليدوي , وحاجة كمان مهمة قوي , أن مش لازم نلعب للعضلة ونعودها علي تمارين زي واحد أثنين ثلاثة كل مرة كل مرة , لازم تفاجئ العضلة بأسلوب مختلف , ليه العضلة ممكن تطلع خبيثة قوي , تقوم تتعود علي تمارين معينة , وتاخد راحتها , يعني اتعودت تلعب كتاف بالدبلز , تقوم العضلة كل مرة تلعب بالدمبلز تبقي مريحية ولا في دماغها , وتقول يا ربي ليه مش بتكبر العضلة وتتعب نفسك في التفكير وبعدين تتعقد وتقوم سايب اللعبة
لأ أديها تمرين مختلف للكتف انك مثلا حتلعب ببار أو بأستك( في أساتك بتتباع مطاطية ) او تلعب بكرسيين او بانبوبة بوتجاز المهم تغير في الأسلوب
واخي العزيز إلي بيسأل يلعب بنش عالي الاول
حرد عليك بسرعة بس أعتبروا اني لسي ما دخلتش في الشرح , يعني إكرامية علشان الحج إستشاري إلي منورنا
أولا في بنش عالي ومستوي وواطي , المستوي بيمرن العضلة كلها , العالي للجزء العلوي , الواطي للجزء السفلي من البنش , طبعا غير اللعب بالدمبلز , تفتيح وتجميع , وتشريخ وتشريح , وضم , فممكن تلعب الثلاثة وتفتح وتجمع , وومكن تلعب واحدة منهم وتفتح بس , وممكن تلعب بالدمبلز بس , ده حيعتمد علي البرنامج إلي ححطه هنا ليكم إن شاء الله
وخلي بالك فتحت إيدك علي البنش حتفرق جدا إن كان ضيق حيبقي لغرض وإن كان واسع حيبقي لغرض
لاننا حنوع التمارين بشكل شيق , يخدم وينجز , وما تملش ولا تزهق , وبشكل ذكي , يعني لو دخلت ولقيت الجهاز عليه ناس , حقولك تعمل التمرين نفسه بشكل تاني إزاي وكدة


طبعا برضوا إن شاء الله علي نوعيتين من اللعيبة , واحد يشيل ثقيل ويهنج بسرعة , وواحد يشيل أقل بس عنده أستعداد يشيل مدة اطول
وواحد يشيل كثير ولمدة طويلة , اه هو ده إلي احنا عايزينه , قوة وإحتمال , وكمان شكل
المهم
حبقي اتكلم في المداخلة إلي جاية إن شاء الله عن المعدات المطلوبة توافرها والضرورية
سلام عليكم

 

 

[تكسير]

نسيت العزيز نزيه باشا , في واحد في الصالة إلي بلعب فيها عنده 82 سنة وبيلعب , وكمان العزيز ضبش , أستعد يا ضبش علشان إن شاء الله نستفيد , بس خلي بالك إلي حقوله هنا أسرار ههههههه
الفتي الطموح مش حنساك وخصوصا أني عرفت انك عندك حديد في البيت فياريت تبقي تقولي عند إيه بالتفصيل وبالوزن
واخيرا بقي الدكتور المهندس العزيز جمال , حمد لله علي سلامتك يا بطل , وكمان الموضوع ده حيبقي فيه نصائح لشرب الماء وبكثافة وانت خبير في موضوع العلاج بالماء ممكن نبقي نستعين بك إن شاء الله

 

 

[NazeeH]

اقتباس المشاركة الأصلية كتبت بواسطة تكسير نسيت العزيز نزيه باشا , في واحد في الصالة إلي بلعب فيها عنده 82 سنة وبيلعب ,

ادعيلي بس إني أواظب على المشي ويبقى خير وبركة ..
مرة كنت ع البحر وشفت واحد خواجة بيجري .. نظرتي له كانت من تحت لفوق .. بداية من حذاء الجري.. للساق.. للبطن والعضلات .. ماشاء الله .. جسم شاب في التلاتينات ولما وصلت للوجه .. كانت المفاجاة .. ملامحة لاتقل عن رجل تجاوز السبعين بمراحل .. كنت عايز أضرب نفسي بالنار
وأنا اللي مكسل أجري

تمنياتي بالتوفيق الدائم وألف تحية على الموضوع المميز

 

 

[Jonathan]

برافو يا تكسير .. موضوع حلو و شيق و واضح فيه فعلا مجهودك الشخصي .. اللي انا حاكتبه هنا لا هو نقد و لا محاولة للتعديل على معلوماتك.. لكن عشان يبقى موضوعك بسيط و في نفس الوقت مبنى على خلفية علمية سليمة و يبقى مبحث يعتد بيه و لو المشاركة دي تضايقك .. تاكد انها حتكون الاخيرة في موضوعك.

في حاجتين تقدر تميز بيهم ما بين لاعب كمال الاجسام الهاوى و لاعب كمال الاجسام المحترف .. طبعا في ناس كتير حيجى في دماغها الجسم و ضخامته .. الكلام دة غلط.. الحاجتين دول بالترتيب هما:

1- إلمام اللاعب بالمعلومات الصحيحة عن التمرين

2- الاداء الصحيح للتمرين

انا حعقب بس على جزئية المعلومات عشان الحاجات دي بتفرق و تزود ثقتك في نفسك و ترفع من شانك امام الاخرين:

1- مافيش حاجة اسمها تمرينات التنفيخ لان التمارين مبتنفخش.. في نوعين من التمرينات :

- نوع اسمه تمرينات بناء الكتلة العضلية
- النوع التانى اسمه تمرينات التحديد العضلي

اداء تمرينات كمال الاجسام لا يشترط وجود شريك في التمرين و خاصة في مرحلة المبتدئين لان الحافز النفسي في المرحلة دى بيكون في ذروته بخلاف ان النتائج بتكون اسرع في الظهور .. الاعتماد على شريك من البداية سيصيبك بالياس لاحقا لانك حتكسل في غياب الشريك او حتمتنع عن اداء تمرينات معينة الا في وجوده.

2- استعمل الالفاظ العلمية السليمة من البداية في صالة التمرين .. متقولش حلعب بنش لان البنش دة جهاز .. قول حلعب صدر او شيست بردو ما تقولش ورك انما كوادرسيبس .

- متقولش حلعب دراع لازم تحدد يا بايسبس يا اما ترايسيبس .. التسمية السليمة بترفع من قيمتك في نظر الموجودين في الصالة و تزيد ثقتك في نفسك.

- متقولش عضلة المكنة و الحديد البلدي... التمرينات بتمارس بطريقتين.. التمرين بالاجهزة سواء كابل او غيره او تمرينات بالاوزان الحرة اللي هى تمارس بالبار و الدمبلز الفرق بين الاتنين ان الاجهزة بتحدد مجال الحركة السليم فتقدر تزود في الوزن انما الاوزان الحرة فانت بتوازن الحركة بنفسك معتمدا على عضلات التوازن و دى بتبقى اضعف عضلات في الجسم و اصغرها حجما عشان كدة بيفضل ان يكون الوزن في الحالة دى اخف الى حد ما و في كلا الحالات الاتنين ليهم اهميتهم في البناء العضلي
- متقولش بنش واطى في الصالة... اسمه بنش منحدر ..التمرين على البنش العال بيمرن الجزء العلوي من عضلة الصدر و يديها شكل حرف ال في .. التمرين على المستوى بيمرن الجزء الاوسط المستعرض من العضلة اما المنحدر بيمرن الجزء السفلي اسفل حلمة الصدر

3- مافيش حاجة اسمها العضلة حتطلع خبيثة او ممكن لاء... دى دينامكية طبيعية خلقها ربنا في جسم الانسان و هى التاقلم مع الظروف المتغيرة عشان كدة يفضل التنويع في اداء التمرين عشان جسمك مايتاقلمش مع نوع واحد و بالتالى مش حتحس بنتيجة ملموسة

4- اوعى تلعب بانبوبة بوتجاز او اي جسم غير محدد الوزن او الحجم .. شوال رز . كيس مسحوق و الكلام دة.. دة ممكن يشوه العضلات و تبقر كل ناحية في جسمك شكل


اخيرا باكرر ان الهدف من المشاركة دى مش التعديل على شخص .. لكن لمشاركة المعلومات .. و هى دى طبيعة الرياضة.. انها توحد الشعوب

 

 

[تكسير]

رجاء مسح المشاركة السابقة للفاضل Jonathan علشان اعرف اكمل , لأنها بتخل بالي كنت عاوز اسلسله واسهله
وهو حيعرف ليه انا طلبت كدة لما ابداء في السرد والشرح
وانا متوقف عن المشاركة في هذا الموضوع لحد ما يتم مسح المشاركة
أو سوف افتح موضوع |اخر وأكتب فيه من جديد وعلي نظافة
ويمكن للاخ العزيز فتح موضوع ليه موازي يشرح فيه إلأي هو عايزة وتكون إفادة للجميع

واعتذر للاخوة المتابعين , معلش حنستني شوية , أصل الموضوع نفس , ولو ما فيش النفس دي في الرياضة ددي مش حنعمل حاجة
لاننا لسي ما كتبناش حاجة وابتدينا نلاقي الكباتن يعدلوا قول وما تقولش , والمركب إلي فيها ريسين بتغرق