مطلوب مطربين وشعراء وملحنين وموزعين.

[VERDI]

السلام عليكم ورحمة الله،،،

أنا لا أشك ان في هذا الجمع الموجود في منتدى المطاريد كم كبير من المواهب، وأكثرها مدفونة، لكن للأسف في الغالب ظهور المواهب محتاج جو أغلبنا بيفتقده.

ده بالاضافة الى ان المواهب الظاهرة بتفتقر للي يقدمها للناس، بحيث انها تكتمل وتنضج كما ينبغي، لأن صعب نمو الموهبه بدون عرضها على الناس للاستمتاع المتبادل بين الموهوب والمتلقي بالعرض والتقييم أياً كان شكله اللي دايما بيشجع على المزيد من الإنتاج.

فكرت في طريقة ممكن نقهر بيها الظروف من خلال هذا الجمع المميز لإنتاج أعمال فنية وعرضها على الناس وأننا اللي نوصل ليهم بدون ما ننتظر اللي يرعى المواهب دي ويقدمها لأنه مابيحصلش الا نادراً جداً رأيت اننا ممكن نفكر و نحاول نقهر الصعوبات ونوصل لأهداف بعيدة وبإمكانياتنا المحدودة.

- لو حد بيحب يكتب أغاني، ازاي ممكن يوصل أغانيه للملحنين أو المطربين؟! صعب جداً وأعتقد مهما كان موهوب.

- لو حد بيحب أو شايف في نفسه انه ممكن يلحن، مين المطرب اللي ممكن يقبل انه يلحن له بدون ما يشوف أعمال ناجحة له قبل كده. صعب جداً.

- لو حد شايف ان صوته حلو وممكن يغني، هل سهل انه يوصل لمنتجين او ملحنين ومين اللي ممكن ينتج له بمجرد انه يسمعه، صعب جداً لانه فيه آلاف الأصوات اللي بتطارد الملحنين في كل مكان.

وهكذا ،،،،

أنا بقترح اننا ممكن نقوم بأعمال جماعية وعن بعد ونقدر نقدمها للناس ونوصل ليهم أينما كانوا ، واللي هايتميز هايوصل غصب عن كل الناس بدون واسطة، لكن بمجهوده الفردي من خلال العمل الجماعي.

الموضوع محتاج تنظيم وادارة جيدة فقط، ياريت اللي يقدر على الناحية دي يقدم نفسه، وانا برشح العزيز / حسام يوسف، لما له من خبرات شوفتها قبل كده في الادارة والتنظيم. أو حسب من يتم الاتفاق عليه.

ولتوضيح الفكرة أكتر،،،

الهدف مش هايكون هو عمل كبير يتحمل عبئه أي شخص ، لكن كل واحد هايقترح انه يشتغل في منطقة ما ويركز فيها وينتج أفضل ماعنده فيها على أساس انه محترف مش هاوي.

- يعني حد هيقدم نفسه على انه شاعراغاني، يكتب أغاني كأنه بيكتبها لأكبر المغنيين ويتركها في الموضوع

- حد تاني هايقدم نفسه على انه ملحن ، هيختار أي من الاشعار الموجودة في الموضوع، ويلحنها بصوته اللي غالبا مش هايكون حلو، ويسجلها على يوتيوب أو ملف صوتي ويحطه كمان في الموضوع

- حد تاني شايف انه صوته حلو هايقدم نفسه مغني ممكن ياخد أي لحن من الموجودين بالموضوع ويغنيه بصوته وكما لحنه الملحن ويسجله بصوته ويحمله على يوتيوب وبرضه يجيبه في الموضوع

- حد تاني هايقدم نفسه على انه موزع، هايختار أي لحن بصوت مغني معين لو أكتر من مغني غناه ويوزعه من خلال برامج التوزيع الحديثة اللي ممكن نعمل منها أي شيء.

- وأخيراً لو حد شايف انه ممكن يعمل اخراج فيديو للتسجيل النهائي، وحبذا لو كان بشكل احترافي وتصوير المغني نفسه.

لو وصلنا للمرحلة دي يبقى كده كل واحد من المشتركين في العمل قدر يفرض نفسه على الساحة ويوصل لكل الناس.

طبعا في المرحلة دي محدش هاينتظر مقابل أو أجر، بل على العكس ممكن ينتظر سرقة أعماله، لكن مش مهم، المهم انك أنتجت عمل جيد فعلاً وأصبحت قادر على الانتاج المتواصل وانك اكتشفت نفسك, ودي هي الميزة الكبيرة في الموضوع.

أنا حاسس ان الموضوع مش صعب، أتمنى انه يلقى القبول والتنفيذ، أنا بقدم مجرد مقترح، ولكم الرأي وأكيد التنفيذ إن حاز الاقتراح على القبول.

على الهامش، ممكن عمل نفس الشيء في مختلف المجالات، ممكن مجموعة من الرسامين والكاريكاتوريين والجرافيكيين يشتركوا في عمل معرض، مهما كان العدد ويتم تقسيم ايجار الصالة عليهم او لو مش مستعجلين ممكن يقدموا في وزارة الثقافة والوزارة بتوفر لهم صالة باتيليه القاهرة مجاناً وبكروت الدعوة.
وهكذا في أي مجال،،،

وبالتاكيد إدارة منتدى المطاريد ان وافقت هتكون الراعي الرسمي للأعمال دي حسب ما يتراءى لها.

ده مجرد إقترح،،،

بالغ تحياتي للجميع.

 

[only you]

تسلم افكارك يا فيردى فكره ممتازه فعلا ربنا يوفق الجميع

 

 

[VERDI]

اقتباس المشاركة الأصلية كتبت بواسطة only you تسلم افكارك يا فيردى فكره ممتازه فعلا ربنا يوفق الجميع

 

 

[VERDI]

حاجة زي دي أعتقد مش صعبة أبداً انها تتنفذ

 

 

[bond]

تسلم افكارك يا ريس
يعنى نحط البضاعة هنا فى التوبيك ولا ننقل على باب الادب؟

 

 

[VERDI]

اقتباس المشاركة الأصلية كتبت بواسطة bond تسلم افكارك يا ريس يعنى نحط البضاعة هنا فى التوبيك ولا ننقل على باب الادب؟

تسلم عزيزي بوند
أنا طبعا مش هايكون لي دور لو الموضوع ده نجح وبدأنا بانتاج فعلي، الأدوار كلها للمشاركين في الأعمال.
وان كنت أتمنى اني اقدر أساعد بأي شيء.
من رأيي إضافة الأعمال هنا لترويج الفكرة، واعتقد ممكن كمان إضافة الأعمال في الأبواب المخصصة ليها لأن الغرض مختلف.
وأسعدني تأييدك للفكرة.

 

 

[bond]

على فكرة فريق اجنده عمل حاجات مشابهه
ياريت نجرب فيها النشر

 

 

[VERDI]

اقتباس المشاركة الأصلية كتبت بواسطة bond على فكرة فريق اجنده عمل حاجات مشابهه ياريت نجرب فيها النشر

شكلك عايز توقعنا مع الفنانين الكبار يا عم بوند
انا شوفت أعمال فريق أجندة، طبعا روعة كلها بصوت فنان الجيل زوهيري باشا الجميل ، وكمان الأشعار هايلة.
لكن معمولة على ألحان قديمة ، وبالتالي مانقدرش نقول عليها احترافية
ياريت لو ممكن نعمل أعمال احترافية

انا بحمل برنامج تلحين، هاجربه لما انزله، لو كويس ممكن نشوف اذا ممكن نعتمد عليه

 

 

[VERDI]

زوهيري جه زوهيري جه

 

 

[حسام]

يا نهار أبيض؟
الله يكرمك يا عم فيردي على كلامك وظنك فى العبدلله
أنا معاك تماما فى الفكرة
وعايز أقول رأي بس خايف أحس أنى بوظت فكرتك وخرجت عنها
هقول
ولو مش عاجباك
كنسلها كأن لم تكن
الر|أى بيقول
علل
أفطن
فكرتك جميلة يا عم فيردي
عن تعاون أعضاء مطاريد فى أعمال فنية للى عنده مواهب كتابة أو تلحين أو أداء
طيب
ماتيجي نطلع لفوق أكتر وتبقى تعاون أعضاء المطاريد فى خلايا عمل مشترك عموما ؟
يعني
كل واحد عايز ينضم
يكتب هوة حاسس انه بيحب ايه وبيعرف فى ايه
وتبقى فيه لجنة تنظم توزيع الأعضاء فى الخلايا المختلفة
ونقد نوحد كل مجموعة من 3 أو 4 أو أيا كان العدد فى عمل معين
احنا مش هنعمل حاجة أكتر من مقترحات وتجميع لناس مع بعض
وهمة يعيشوا حياتهم بقى تماما
يعني لما تاخد فكرتك من تعاون فني
على تعاون فى مجال بيزنس زي التجارة الالكترونية أو غيره
مع تعاون فى مجال خيري
مع تعاون فى مجال أدبي
مع -----
مع------
مع -----
مع------
مع -----
مع------
مع -----
مع------
هتلاقي مجالات كتير
وخلايا كتير
وناس فى كل مجموعة
وممكن كل فترة نقيم شغلهم
ونحمسهم
ونشوف ايه اللى ناقصهم
أو لو طلبوا مقترحات حد فينا
ونثبت اننا تجمع بشري
مش كلمتين وتوبيك وتقييم ايجابي
وكل عام وأنتم بخير
ايه رأيك فى فكرتي؟
بايخة
كنسل
وخلينا فى التعاون الفني بس وبعتذر عن التشتيت لو حصل
أنا خلصت كلامي
وتحياتي بجد يا فيردي يا فنان