يعني أيه الإحساس بالأمان؟

[nash]

الصحف المصرية والعربية

أسمع كتير عبارات من نوعيه ...

أنا مش حاسس|ة بالأمان

هي الدنيا لسه فيها أمان

الله الإحساس بالأمان شيء جميل ..خيال فوق الوصف

الإحساس بالأمان سهل جدا بس اللي يفهم

ضربت في دماغي بجد ..وبقالي فترة طويله جدا ..بحاول افهم يعني ايه الإحساس بالامان ...

هل الأموال الطائله سبب للإحساس بالامان؟

هل العدد الكبير للاسرة الواحده ممكن تسبب إحساس بالأمان؟

هل نوعيه التعليم والترقي في الوظيفه سبب للإحساس بالامان ؟

طبعا أنا مش بتكلم عن الإحساس الروحي بالأمان عندما نكون في معيه الله ورحابه...فياريت ماندخلش موضوع الدين في المناقشه..لإن إن شاء الله كلنا بنصلي وبنقرأ القرآن ....

حد عارف يعني ايه الإحساس بالأمان؟

 

[ابتسامــة]

أعتقد يا ناش أنه لا يستطيع تعريف الإحساس بالأمان بدقة
إلا من فقده أو أوشك على فقده ...

يعني ... لما أقعد أتسمع لأحاديث الشغالات وهما في المطبخ مثلا
لا أستطيع إلا الإقرار بأني أفاجأ بأشياء زي واحدة صاحية الصبح
ومش عارفة هتفطر اولادها إيه ومنين ؟! هو ده الإحساس بعدم الأمان
بالنسبة لي مثلا أنا بصحى وأفكر هشرب أي نوع من النيسكافيه
فيعني لو ملقتش نيسكافيه في البيت أصلا مش هحس بعدم الأمان !

مثل آخر .... عائلة مستورة وتقع العمارة اللي ساكنين فيها
ومش ممكن بإمكانيتهم إللي كانت ستراهم ويحسبهم الآخرون أغنياء من التعفف
هذه الإمكانيات لا تسمح لهم بتأجير غرفة أو عشة حتى يبقى حتى لو لم يقع منزلهم
وكانت به شروخ مثلا إحساسهم طول الوقت بعدم الأمان يصبح مسيطر عليهم

لكن اللي عنده شقة حديثة ومدخراته لا تسمح له بتملك شاليه في الساحل الشمالي
مش ممكن يحس بعدم الأمان لمجرد انه مش قادر يجيب شاليه في المصيف ..

اللي عايش في دولة بوليسية وليس له سند أو يأوي إلى ركن شديد
ولا يملك إلا وظيفته ليربي منها أبنائه ويسد حاجاتهم الضرورية جدا فقط
حين يعبس في وجهه مديره يشعر بعدم الأمان ...

وقيسي على الأمثلة السابقة فتستطيعي أن تصلي لمشاعر فقدان الأمان
لتكتشفي أننا يجب أن نشكر الله كثيرا على إحساسنا الفعلي بالأمان ..

 

 

[مصري جدا]

الأخت العزيزه ناش
أخيرا قدرتي بموضوعك تشديني للرد
بس أنا مش معاكي بأننا نبعد الشعور الروحاني عن الموضوع ...لسبب بسيط أنه هو أساس الموضوع ....فلا فلوس ولا وظيفه ولا أولاد ممكن يحسسوا الواحد بالأمان .....
الأحساس بالأمان ما يجيش الا لما يكون الواحد مسنود وحاسس أن وراه دعم قوي ...وده مفيش حد ممكن يحققه الا بالقرب من الله
صحيح كلنا بنصلي وأنا واحد منكم ...بس مش معني كده أننا قريبين من الله ...وانا حتكلم عن نفسي
هما مرتين علي طول حياتي حسيت فيهم بالأحساس ده ..الأطمئنان والأمان ....رغم عدم أنقطاعي عن الصلاة أي فتره والحمد لله الا أنني في هذه الفترة كنت أحس بشعور مختلف أتمني أن أرجع له ...
خلاصة القول أن الأحساس بالأمان هو أن نكون في معيه الله سبحانه وتعالي ..ده رأي
وأسف لو كنت خرجت عما كنت تريديه من عدم الدخول الي المنطقة الروحانيه

 

 

[FINETOUCH]

والله انا حسيت بالامان عندما ارسل لى ربنا اولاد الحلال فى احداث كثيره عاصفه مرت بى
ومعظمها كانت مع اشخاص ليس عنهم اى ذره من الاخلاق او الضمير وكنت اقول لنفسى الحمد لله على نعمته التى لايعرفها هؤلاء الاشخاص ولا يجدون من حولهم ربع واحد من اولاد الحلال دولهمن
حب الناس للانسان نعمه لايعرفها الكثيروده طبعا من عند ربنا
كتير لما الواحد يكون متأزم من شخص اقعد اقول الحمد لله انى مش هوه ومش انا اللى عملت كده يقوم ايه بقى الواحد يحس براحه مش عارف هوة دة الاحساس بالامان ولا ايه وكدهوت

 

 

[مصرية]

ناش موضوعك حلو أوي أوي بس أظن الشعور بالأمان مش معنى مطلق يعني بتختلف من شخص لشخص وبيختلف من رجل لأمرأة.

يعني ممكن واحد يحس بالأمان لما يبقى معاه فلوس كتير وممكن تقلب معا بداء البخل.
وممكن واحد ميكونش معاه ولا مليم بس حاسس بالأمان لإن عنده أسرة بتحبه وبتخاف عليه.

بالنسبة لي الشعور بالأمان هي إني أحس إني اقدر أعتمد على حد لو ضاقت بيا الدنيا. طبعا أقصد حد بعد ربنا وعلشان كده لو الحد ده مكانش على مستوى المسئولية اللي متوقعاها منه بيكون موقفي سئ جدا على قدر ثقتي فيه/فيها على قدر صدمتي وانهيار الشعور بالأمان من وجود هذه الشخصية.

 

 

[nash]

والله يا إبتسامتي ...اللي فهمته أنها مسئله ممكن تكون ماديه وممكن اي حاجه تانيه...

أنا قست علي نفسي ...موضوع الغربه مثلا موضوع مرعب ...خصوصا المواقف الصعبه من مرض أو حوادث او اي كارثه .. علي فكرة حتي لو شيء صغير بيظهر وكأنه كارثه...والإحساس بالامان النفسي مفقود تماما ..

موضوع قله الماده في الظروف الطارئه كمان إحساس مرعب ...وبحس أني في رفاهيه بشكر رب العالمين عليها ...

الموضوع عندي نفسي بالدرجه الأولي ..

شخصيا مش قادرة أوصل لتوصيف دقيق لموضوع الإحساس بالامان

مع أني بحاول والله

 

 

[nash]

اقتباس المشاركة الأصلية كتبت بواسطة FINETOUCH والله انا حسيت بالامان عندما ارسل لى ربنا اولاد الحلال فى احداث كثيره عاصفه مرت بى ومعظمها كانت مع اشخاص ليس عنهم اى ذره من الاخلاق او الضمير وكنت اقول لنفسى الحمد لله على نعمته التى لايعرفها هؤلاء الاشخاص ولا يجدون من حولهم ربع واحد من اولاد الحلال دولهمن حب الناس للانسان نعمه لايعرفها الكثيروده طبعا من عند ربنا كتير لما الواحد يكون متأزم من شخص اقعد اقول الحمد لله انى مش هوه ومش انا اللى عملت كده يقوم ايه بقى الواحد يحس براحه مش عارف هوة دة الاحساس بالامان ولا ايه وكدهوت

أستاذي فاين تاتش

منورني والله ...

يعني افهم من مداخله حضرتك ان حب الناس ممكن يعطي إحساس بالامان؟

ولا الإحساس بالراحه هو مصدر الإحساس بالأمان؟

الغريب أننا إذا أردنا وضع تعريف للحزن او السعاده أو الغضب نستطيع بسهوله ...إشمعني تعريف الإحساس بالأمان مزرجن ؟

 

 

[Sonesta]

دعوه لموضوعي

ليالى المطاريد.,,,هل تعلم

حرام عليكى يا نااااااااااااش

أهو الموضوع ده بقا اللى حيجيبلى الخنقة بتاعة الموضوع اللى قبله

ليه بس كدا؟

ده موضوع تكتبى عنه؟

طيب اللى مفتقد الأمان فى كل محتويات الحياه يشارك هنا ويكتب إيه؟

قررت الإنتحار؟؟

 

 

[أحمد باشــا]

تشدو ام كلثوم بقصيدة للشاعر محمد إقبال تقول


إذا الإيمان ضاع فلا أمـــــــــان ولا دنيــا لمــن لــم يحــي دينــا

و من رضي الحياة بغير ديــــــــن فقد جعــل الفنــاء لهــا قرينـــــا


الأمان يحسه الإنسان عندما يجد من يسانده .... و ليس هناك غير الله نتوكل عليه

فلا شئ مضمون في هذه الدنيا .... المال و العزوة و السلطة كلها زائلة و الأيام دول

 

 

[Badroora]

الاحساس بالامان بقي صعب فى زمن اتفقد فيه الامان.
الامان بالنسبة لى يعنى الاطمئنان
يعنى الارتياح
يعنى الثقة
يعنى عارفه كل خطوة اخطوها هتوصلنى لفين
لكن هذه الايام لا اشعر بالامان اطلاقا