Arabic Discussion Forum with a Special Interest in Travel and Immigration

KANE · 13th November 2020, 07:50 PM

السلام عليكم ورحمة الله وبركاته

welcome back again

هبدأ موضوع يهم الناس كلها الآن

كيف استفيد بأكبر قدر من الكمبيوتر باستخدام البرامج الحرة

حرة لا تعني بالضرورة مجانية 100% - وكن اغلب الوقت العبارة صحيحة باستثناءات بسيطة-

ليه استخدم برمج حرة؟

وانا عندي فرصة المقرصن وببلاش!!

طيب هقول بغض النظر عن فكرة السرقة

فيه حالياً من فترة ليست بالقصيرة يمكن 3 او 4 سنوات ابتدت مشكلة خطيرة تظهر ،

الا وهي فايروس الفدية
ransamware

الفيرس ده 90% بكون في برامج الكراك الي بتكون مخصصة لقرصنة وفك حماية البرامج الأصلية

بيعمل ايه بيشفر كل بيانات وملفات حضرتك

يعني شغل السنين ممكن يضيع في لحظة واي بيانات او ملفات حرفياً بتضيح في لمح البصر

اعرف ناس كتير الفترة اللي فاتت شغلهم اتدمر حرفياً واترفدوا بسبب الفيرس ده

طبعاً هو بيسيبلك رساله انك تبعتله مبلغ من المال على حساب معين

بس مافيش ضمان ان بياناتك مكن ترجع

الحاجة التانية خصوصاً للي مسافر بره لو معاه لاب او هارد فه حجات مقرصنة واتقفش بتبقى واقعته سودا حرفياً

طيب ايه الحل

البرامج الحرة

وهي برامج لا تفرض قيود مثل قيود البرامج التجارية

هتقول هل البرامج الحرة كويسة زي البرامج التجارية

كتير من المتحمسين هيقولك آه طبعا -اوماااال بصوت الديب-

انا هقولك

فيه بعض البرامج تكافئها

وفيه بعضها اقل

وفيه بعضها احسن كمان

طيب الفكرة ان انت كمستخدم عادي تقريبا بتستخدم من 20-40 من قدرات البرامج اللي بفلوس

طيب ليه انا ما استغلش البرامج اللي ببلاش ومش هخسر كتير

كل اللي هكون محتاجة

1- اتعلم
2- اعرف عيوب - أو نواقص- البرامج الحرة واحاول اتعايش معاها

وهو ده محاولتنا في الموضوع ده

انتظرونا

حشيش · 14th November 2020, 09:03 PM

عوداً حميداً وفي إنتظار التفاصيل

KANE · 18th November 2020, 04:32 PM

اقتباس

المشاركة الأصلية كتبت بواسطة حشيش


	عوداً حميداً وفي إنتظار التفاصيل

KANE · 18th November 2020, 04:49 PM

نبدأ بنظام التشغيل

البرنامج اللي بيشغل "حتة الحديدة اللي اسمها كمبيوتر"

طبعاً كلنا متعودين على ويندوز

وهنا اقصد كلمة متعودين

طبعا ويندوز هو منجم ارباح مايكروسوفت

ومع ويندوز 10 ظهرت الخدعة اللي كانت مايكروسوفت بتلعب بيها - وافتكر اني حذرت هنا -وقت ظهور ويندوز 10 - من ان قرصنة النسخة دي هيكون صعب جداً

وقد كان

يعني لو عايز تشتغل بنسخة "مقرصنة " ويندوز 7 و 8.1 احسن ليك

طيب ننسى كل ده

لو قلتلك ان فيه نظام حر -هقولك كلمة حر دي معناها ايه- ومجاني وبديل لويندوز

هو لينكس

لينكس هو نظام بني ليحاكي نظام تشغيل يونكس

طيب لما هو رائع كده الناس ما بتستخدموش ليه ؟

اقولك ياصديقي لأن مافيش كلام كتير اوي عنه

واحنا متعودين على ويندوز

ازيدك من الشعر بيت

الموبيل الأندرويد اللي في ايد حضرتك
الأندرويد مبني على لينكس

طيب انا هفترض -والافتراض ده ماشي على الموضوع من اوله لأخره- انك مستخدم عادي مش محترف وعلى هذا الأساس هتكلم معاك

هل لينكس ليه عيوب؟

لو قلت لوحد من متحمسي لينكس الكلام ده هيقولك لأ

وانا بقول لك فيه عيبين

لو انت جيمرز

الألعاب على لينكس دعمها مش زي ويندوز وده لا يمنع انك تلعب على لينك ولكن التجربة بالقطع مش زي ويندوز

# الفوتوشوب او برامج ادوبي كلها
وان كان فيه بعض البدائل ولمن مش بنفس قوة برامج ادوبي للأسف

محتاج ايه ؟

شوية تدريب على النظام علشان تعرف الأساسيات - وكمستخدم عادي- مش هتطول عن من شهر ل 4 شهور استخدام

وتتعود على استخدامه

معوقات استخدامه؟

كثرة التوزيعات اللي بتجيب للمستخدم المحترف الصداع فما بالك بالمستخدم العادي

كثرة واجهات المستخدم ونفس كلام السطر السابق

من وجهة نظري هما دول اكبر معوق للينكس للمستخدم العادي

طيب ايه افضل توزيعات لينكس وافضل واجهاته -للمستخدم العادي-

هنقول...

KANE · 18th November 2020, 05:14 PM

يعني ايه توزيعة

باختصار شديد نظراً لأن لينكس من البرامج الحرة

يعني ايه حرة؟

ملاحظة :

يعني ان البرنامج متاح بالكود البرمجي بتاعه وما فيش عليه قيود وما فيش مانع ان اي حد عند تعديل يعدل على البرنامج الأصلي ويعمل نسخة جديدة طالما احتفظ بحق المبرمجين السابقين واشار اليهم

وده خلى كتير من الناس تاخد طرق مختلفه وتصدر نسخة خاصة بيهم

ودي اللي بنسميها توزيعة لينكس

طيب فيه توزيعات كتير؟

مش عايز اصدمك واقول مئات التوزيعات

طيب علشان ابسطهالك

فيه توزيعات رئيسية كبيرة وفيه توزيعات متفرعة كتير منها

هقولك هنا على التوزيعات الرئيسية -اللي تهم المستخدم العادي-

ديبيان Debian

ودي التوزيعة الأم اللي هتلاقي اغلب التوزيعات مشتقة منها

وهنا الميزة ان هتلاقي الخطوات نفسها تنطبق وبشكل كبير على نفس انسخ المختلفة

فيدورا Fedora

ودي مشتق منها نسخ زي ريدهات وسنتوس

وغالبا هنبعد عنها لأنها بتركز على البزنس ولكن ده لا يمنع من استخدم فيدورا كمستخدم عادي

ارش Arch
ودي نسخة لمحترفي لينكس او اللي فاهمين النظام ف انصحك برضه بعدم استخدامها

دي هي اغلب التوزيعات الرئيسية

ولو عايز تصدع دماغك بص هنا

https://en.wikipedia.org/wiki/Linux_distribution

هتلاقي رسمة لطيفة كده

ممكن تعرف مشتقات وتوزيعات لينكس ومين واخد من مين

طيب زي ما شفت انا برشح لسعادتك التوزيعات المبنية على ديبيان لأنها الأسهل على المستخدم المبتدئ والعادي

تنبيه :

علشان ماتتخضش من كثرة التوزيعات وتفتكر ان الفروق بينهم كبيرة

الحقيقة ان الفروق طفيفة

بالإضافة ان الإختلاف الوحيد الملحوظ في طريقة تركيب البرامج

ننتقل للواجهات ..

حشيش · 18th November 2020, 05:41 PM

شكراً كين على المعلومات القيمة - جزاك الله خيراً

أنا عندى خلفية لا بأس بها عن نظام لينكس لأن سيرفر المنتدى يعمل بهذا النظام لذلك أفهم لغة التكويد ونظام HTML لكن معرفش إزاى أغير نظام الويندوز اللى جاى جاهز على الديسك توب واللاب توب بالويندوز عليه لنظام لينكس وهل يجب مسح الويندوز قبل تسطيب اللينكس؟

وكمان إيه اللى حستفاده من تغيير الويندوز إلى لينكس لو كانت نسخة الويندوز عندى أصليه مش مضروبة؟

أنا أعرف إن الفيروسات تصيب نظام التشغيل بالويندوز أكثر بكثير من اللينكس ودى ميزة فى اللينكس لأنك مش حتحتاج تسطب برامج انتى فيرس على الجهاز - لكن هل فيه أى مزايا أخرى من إستبدال الويندوز باللينكس لو أوراقك سليمة ومش مقرصن الويندوز؟

KANE · 18th November 2020, 05:44 PM

الواجهات

هي الشكل اللي انت من خلاله بتستخدم نظام التشغيل

يعني ايه العبط ده؟

طبعاً لمستخدمس ويندوز اللي متعودين على واجهة واحدة -بتتغير بشكل طفيف- موجودة

لأ ياسيدي في لينكس كتيييييييير اوي

وده اللخبطة التانية اللي بيواجهها المستخدم العادي
بعد فخ التوزيعات

اختار انهي واجهة؟

هما كام واجهة يعني

https://en.wikipedia.org/wiki/Desktop_environment

ملاحظة :

الجدير بالذكر ان الواجهات هي هي على التوزيعات المختلفة

طيب علشان اوفر عليك الوقت --ممكن تجرب كل والواجهات وتشوف ايه اللي هترتاح ليه--

افضل الوجهات لو انت بتنقل من وبندوز

KDE Plasma

Cinnamon

Xfce

مش هتحس بالغربه اوي

وفيه واجهتين تلاته لطاف ممكن تتعود عليهم

Pantheon

Mate

Budgie

شخصيا ارشح لك KDE كبداية

KANE · 18th November 2020, 06:00 PM

ننتقل بقى للجزء الأهم بعد الرغي ده كله تنصحنا بأيه كتوزيعه ابدأ بيها حياتي اللينكساوية

1- Linux Mint

https://linuxmint.com/

وهتلاحظ ان النسخة موجودة بأكتر من واجهة

والمشهورة -اللي اكتر الناس بتستخدمها Cinnamon -

2- MX Linux

https://mxlinux.org/

بواجهة Xfce و KDE

3- Kubuntu

https://kubuntu.org/

ودي نسخة من ابنتو المشتقة من ديبيان

مع KDE

4- elementary OS

https://elementary.io/

ودي بواجهة

Pantheon

انيقة ولطيفة

طيب علشان تكون حياتك كويسة
وبدل ما تروح قالب لينكس علطول وتلاقي نفسك اتبهدلت وتلعني

اعمل التالي

جرب النظام الأول على جهاز وهمي باستخدام
https://www.virtualbox.org/
هتحتاج تفهم الأول ازي تظبط نظامك وتركب البرامج عليه
بعد ما تركب النظام اعرف بيتظبط ازاي بمجرد ما تكتب
things to do after installing (واكتب اسم التوزيعة اللي انت اخترتها)

بعد ما تحس انك بقيت تعرف تشتغل عليه

انسى ويندوز وعيش حياتك

KANE · 18th November 2020, 06:19 PM

اقتباس

المشاركة الأصلية كتبت بواسطة حشيش


	شكراً كين على المعلومات القيمة - جزاك الله خيراً أنا عندى خلفية لا بأس بها عن نظام لينكس لأن سيرفر المنتدى يعمل بهذا النظام لذلك أفهم لغة التكويد ونظام HTML لكن معرفش إزاى أغير نظام الويندوز اللى جاى جاهز على الديسك توب واللاب توب بالويندوز عليه لنظام لينكس وهل يجب مسح الويندوز قبل تسطيب اللينكس؟ وكمان إيه اللى حستفاده من تغيير الويندوز إلى لينكس لو كانت نسخة الويندوز عندى أصليه مش مضروبة؟ أنا أعرف إن الفيروسات تصيب نظام التشغيل بالويندوز أكثر بكثير من اللينكس ودى ميزة فى اللينكس لأنك مش حتحتاج تسطب برامج انتى فيرس على الجهاز - لكن هل فيه أى مزايا أخرى من إستبدال الويندوز باللينكس لو أوراقك سليمة ومش مقرصن الويندوز؟

خد القواعد دي يا عم حشيش

- مافيش نظام محصن من الفيروسات
- نظام لينكس اقل لأن انتشاره اقل بس في نفس الوقت فيه عوامل امان بتحميه
زي ماك -بالمناسبة ماك حول من نظامه لنظام اخو لينكيس اسمه BSD وعو يونيكس-
ماك استخدامه قليل فالهكرز مش بيبذلو مجهود كبير في اختراقه وده لا يمنع انه محصن

طيب لو انا عندي ويندوز مرخص خلاص مافيش مشكله ممكن تتابع معانا البرمج الحرة واللي بالمناسبة بتشتغل تقريباًُ على كل الأنظمة

الا لو انا عايز اجرب جايز يعجبني النظام

او عايز اهرب من تجسس مايكروسوفت على المستخدم العادي اللي ناقص تعد عليه انفاسه

لو انت مرتاح مع ويندوز خلاص

لكن باتكلم عن الناس اللب جابت او هتجيب جهاز جديد ومعندهاش فلوس تشتري نسخة ويندوز ومش عايزة قرصنة

اما عن تجربة النظام زي ماقلت قبل سؤالك
استخدم برناج virtualbox اللي بيخليك تجرب اي نظام قبل ما تخليه النظام الأساسي عندك

KANE · 18th November 2020, 06:35 PM

ممكن تتفرجوا على الفيديوهات دي

بتلخص الكلام اللي احنا قلناه

ولو بتفكر جدياً في لينكس جرب القنوات دي وخد فكرة

https://www.youtube.com/c/TheLinuxExperiment/videos

https://www.youtube.com/c/ChrisTitusTech/videos

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
في ذكر 25 يناير القبض على اشرف حمدي	شؤون مصر الداخلية	حشيش	1	2392	26th January 2021 07:57 PM
البدائل الحرة للبرامج	الكمبيوتر والإنترنت	Mafia	19	5900	13th November 2020 07:50 PM
خلاصة القول في تعديلات الدستور	توعية جماهيرية	حشيش	1	1599	5th February 2019 12:26 PM
من عين جمال عبد الناصر	تاريخ مصر	KANE	0	3703	3rd February 2019 07:29 PM
نزلة السمان - كنا هناك من اجلكم	شؤون مصر الداخلية	حشيش	3	1894	21st January 2019 05:37 PM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

الكمبيوتر والإنترنت

البدائل الحرة للبرامج