عندي مشكلة ومش عارف ليها حل

[Tornado]

الصحف المصرية والعربية

السلام عليكم

انا عندي مشكلة ومضايقاني ومكتشفتش كده الا مؤخرا اني عندي حساسية زيادة عن اللزوم لما اتعامل مع الاشخاص بمعنى اني مبقتش اعرف افرق بين امتى الشخص اللي قدامي بيتنطط عليا او اخد كلامه او حركته اهانة وامتى اعدي وماخدش موقف بجد تعبت كتير لحد اني حسيت اني مريض نفسي

انا زمان كنت طيب اوي وبعامل الناس بحسن نية بس من البلاوي اللي شوفتها وخصوصا لما اتغربت علشان الجامعة واختلطت بكل انواع الناس اتغيرت وبقيت العكس خالص وبقيت بشك ان الشخص اللي قدامي تعدى حدوده معايا ولازم اوقفه عند حده حتى لو اقرب حد ليا وباخد موقف دفاعي وممكن يتطور لو الشخص ده زودها (من وجهة نظري)

بجد تعبت ومعتش عارف ايه الحدود اللي المفروض اوقف الناس ساعتها عن حدها لما تتعداها مع اني عارف حدودي كويس في التعامل مع الناس وبحاول اتفادى اي شيء ممكن يخلي اللي قدامي يتضايق مني حتى لو مش غلط لاني مش بحب اضايق حد بس بمشكلتي دي ممكن اضايق اقرب الناس ليا

انا بجد تعبت ومش عارف هل انا بقيت معقد ولا مريض نفسي ولا طبيعي وتعبت بجد ومش عارف حل

انا ترددت كتير اكتب عن مشكلتي بس انا تعبت ولازم الاقي حل لاني مش عاوز ازعل حد ملوش ذنب مني

وانا اسف لو كنت زعلت حد قبل كده او ضايقت حد هنا بسبب المشكلة دي
انا اسف اني طولت عليكم بس انا كلي عشم انكم هتفيدوني

ارجوكم عاوز حل

 

[sincere]

اظن ده رد فعل طبيعي لخسائر الثقة عمياء
شك مستمر
بس الفترة الجاية أكيد هيكون التوازن و النضج مع الخبرة و الاحتكاك بالحلو و الوحش
ربنا يوفقك

 

 

[Doudy]

تورنادو زميلنا الفاضل
انت مش مريض ولا حاجة
دة بس احساسك من تجاربك مع ناس مش كويسة او ناس ليها مواقف وحشة معاك
بس اعتقد ان الحل انك :
اولا تبعد فكرة انك مريض او بقيت حساس زيادة عن تفكيرك خالص
ثانيا لما تشعر ان فيه حد بيتعامل معاك مش كويس اختبره فى موقفين تلاتة لو ثبت لحضرتك انه سيىء خلاص يبقى تتصرف معاه
و تاخد موقف منه و تبين له انك فهمته و متضايق منه
ما ينفعش تاخد موقف من حد من موقف واحد بس
يا رب اكون افادت حضرتك

 

 

[فرح فرحنا]

سلامات

خير يا تورنادو روق روق ,,

اعتقد ان الى مضايقك هو عدم وضوح الحد اللى يوضح لك الموقف بحيث تبني ردة فعلك عليه

و أكيد دا له أسبابه .. يمكن انتو الشباب الأمور عندكم متداخله جد على هزار - شخصي على عام - يعنى انا احيانا بشعر بدا ...

برأيي افضل شيء إنك تقعد مع نفسك

* وتضع حدود التعامل اللى تريحك بينك وبين من حولك ودي تقدر تجيبها من الدين - الاخلاق -العرف -التربيه

* تحدد نوعية المتعاملين معك وتضع تدريجاتهم .. فمثلا المعرفه غير الصداقه غير القرابه وهكذا

لما تحدد علاقاتك ودرجاتهم وحدودك مع نفسك لازم تكون واضح ايضا مع من حولك وتفهمهم طبعك
يعنى مثلا .. أنا انسانه مرحه وبحب الهزار .. لكن في حدود من يتعداها يكون تصرف غير مقبول
فعلشان ما حدش يخسرني .. لا يتعدى الحدود وهكذا

بالتدريج وبالممارسه صدقني حتخف حدتك وستجد نفسك أكثر راحه وانسيابيه في التعامل مع الآخرين

وبعدين اخي الكريم في حاجه اسمها عبادة التغافل .. يعنى انك تتغاضى شويه عن أخطاء من حولك وما تقعدش لهم على الواحده خاصة الناس العشِره واللى بتقدر تعرف انهم ذوي نوايا طيبه .. لكن لا يخلو أحدنا من عيب علشان الدنيا ما يتعكرش صفوها كل شويه وإلا الناس كلها حتلاقي نفسها علاقاتها مقطوعه

حياك الله ,,

 

 

[ana_3enady]

دعوه لموضوعي

RobertInole

واد يا تورنادو .. خليك باااااااااااااااااااااااااااااااااااارد

وطنش تعش تنتعش .. الى أن يثبت لك ان اللي أدامك تعدى حدوده .. ساعتها اديله ما ترحمهوش وبالأدب علشان ما يمسكش عليك غلطة

 

 

[Remooo]

تورنادو يابنى انا عايزة اقولك الحقيقة المرة
وهى ان 90% من كل اللى حوالينا...لا لمؤاخذة مش كل اللى حوالينا
90% من اللى بنثق فيهم وبنحبهم وقريبين مننا ولا ليهم اى لازمة
صدقنى بس بتبقى مسالة وقت عقبال ما تكتشف ده
وانت دلوقتى على التراك وهاتوصل قريب للمرحلة اللى من نفسك ولا ها يفرق معاك كل اللى انت بتقولة
ها تلاقى ردود فعلك تلقائيا متكافئة تماما مع اللى انت بتلاقيه من معاملة
وبالتالى مش هاتزعل من حد لانك ها تعرف تعامله زى ما بيعاملك
وقلبك ها يجمد وكل اللى بتقوله ده مش ها يبقاله وجود
بالمناسبة انت مقدم هجرة؟
لو لا فكر فيها ويبقى ادعيلى

 

 

[VERDI]

عايز اقول وجهة نظري


اولا عايز اسئل سؤال استنكاري
ليه مهتم بالناس وعايز تعرف ضروري اذا كان بيتطنط عليك ولا بيتعامل عادي!!
دي في حد ذاتها المشكلة, وده ناتج مش عن عدم الثقة في الناس, لا , ناتج عن عدم الثقة في النفس لو تسمحلي
لما تكون الثقة في النفس كبيرة ومش هامك رأي حد مش هيأثر فيك اي اسلوب تعامل
الحل, هو ان الشخص يحاول يكتشف نفسه ومميزاته وعيوبه,لما تتعرف على مميزاتك وعيوبك بالتحديد مش هايفرق معاك ان حد يلمح على عيب ما فيك.
التعرف على النفس اصعب بكتير من التعرف على الاخرين, ركز في تصرفاتك وشخصيتك وتعرف على نفسك لكن بدون نقد ذاتك, فقط تعرف على نفسك, حدد اين المميزات والعيوب, وازاي تدعم المميزات وتعالج العيوب
من المهم ان الشخص يعرف انه عادي جدا انه يكون به عيوب مهما بلغت, طالما بيعمل على اصلاحها فالعيوب دي مش عيب, ولو حد لمح على عيب موجود مهما كان العيب لابد من التعامل مع الموضوع ببساطة حتى ولو وصل الامر للاعتراف بالعيب, وبكده حتى ولو كان الشخص بيتطنط مش هايكون له مجال للتنطيط, وبكده بتفسد رغبته في مضايقتك
اما لو لمح على عيب غير موجود, خد الموضوع ببساطة برده وابتسم, لانك اولا عارف نفسك,
ثانيا لو كان الشخص يقصد الاهانة, هتبتسم وتعرف ان الشخص ده غير جدير بمعرفتك له وبالتالي مش هتشغل نفسك بيه,
وان يقصد النقد, انت محتاج تثبت ادام نفسك على الاقل انك مش كده, لو انت كده فعلا, يبقى الشخص ده خدمك انك تعرفت على نفسك اكتر.
الخلاصة:
تعرف على نفسك, مميزاتك وعيوبك, مش المفروض نزعل نهائي من النقد مهما كان قاسيا, اللي نزعل منه هو النقد بغرض الاهانة, والنوعيات دي من المفروض اننا نبتعد عنهم
مجرد وجهة نظر
تحياتي

 

 

[بنت شعنونة]

والله يا تورنادو
انا شايفة انه عامل تُعامل

يعني ايه
اللي قدامي بيعاملني كويس اشيله على راسي

بيتنطط عليا
يبقى حاجا من اتنين
يا اما هوا مش فارق معايا ف يبقى مسكين واتجاهله
يا اما الموقف او الشخص يستعدي الرد عليه وبالتالي لازم ترد على قدر الموقف

انما في العموم
انا من انصار مقولة
سوء الظن من حسن الفطن

 

 

[Tornado]

اقتباس المشاركة الأصلية كتبت بواسطة sincere اظن ده رد فعل طبيعي لخسائر الثقة عمياء شك مستمر بس الفترة الجاية أكيد هيكون التوازن و النضج مع الخبرة و الاحتكاك بالحلو و الوحش ربنا يوفقك

عندك حق فعلا هو بسبب لخسائر اللي شوفتها من اقرب الناس ليا

يا رب كل حاجة تتعدل
شكرا ليكي على شعورك الجميل

اقتباس المشاركة الأصلية كتبت بواسطة Doudy تورنادو زميلنا الفاضل انت مش مريض ولا حاجة دة بس احساسك من تجاربك مع ناس مش كويسة او ناس ليها مواقف وحشة معاك بس اعتقد ان الحل انك : اولا تبعد فكرة انك مريض او بقيت حساس زيادة عن تفكيرك خالص ثانيا لما تشعر ان فيه حد بيتعامل معاك مش كويس اختبره فى موقفين تلاتة لو ثبت لحضرتك انه سيىء خلاص يبقى تتصرف معاه و تاخد موقف منه و تبين له انك فهمته و متضايق منه ما ينفعش تاخد موقف من حد من موقف واحد بس يا رب اكون افادت حضرتك

كلامك مظبوط وانا بدأت فعلا اعمل كده بس المشكلة ان في ناس قربة جدا منك وواثقة في حسن نيتها بس اسلوبها بيضايق شوية
ربنا يصلح الاحوال وشكرا على نصيحتك واهتمامك

 

 

[Tornado]

اقتباس المشاركة الأصلية كتبت بواسطة فرح فرحنا سلامات خير يا تورنادو روق روق ,, اعتقد ان الى مضايقك هو عدم وضوح الحد اللى يوضح لك الموقف بحيث تبني ردة فعلك عليه و أكيد دا له أسبابه .. يمكن انتو الشباب الأمور عندكم متداخله جد على هزار - شخصي على عام - يعنى انا احيانا بشعر بدا ... برأيي افضل شيء إنك تقعد مع نفسك * وتضع حدود التعامل اللى تريحك بينك وبين من حولك ودي تقدر تجيبها من الدين - الاخلاق -العرف -التربيه * تحدد نوعية المتعاملين معك وتضع تدريجاتهم .. فمثلا المعرفه غير الصداقه غير القرابه وهكذا لما تحدد علاقاتك ودرجاتهم وحدودك مع نفسك لازم تكون واضح ايضا مع من حولك وتفهمهم طبعك يعنى مثلا .. أنا انسانه مرحه وبحب الهزار .. لكن في حدود من يتعداها يكون تصرف غير مقبول فعلشان ما حدش يخسرني .. لا يتعدى الحدود وهكذا بالتدريج وبالممارسه صدقني حتخف حدتك وستجد نفسك أكثر راحه وانسيابيه في التعامل مع الآخرين وبعدين اخي الكريم في حاجه اسمها عبادة التغافل .. يعنى انك تتغاضى شويه عن أخطاء من حولك وما تقعدش لهم على الواحده خاصة الناس العشِره واللى بتقدر تعرف انهم ذوي نوايا طيبه .. لكن لا يخلو أحدنا من عيب علشان الدنيا ما يتعكرش صفوها كل شويه وإلا الناس كلها حتلاقي نفسها علاقاتها مقطوعه حياك الله ,,

فعلا احنا الشباب بيكون عندنا خلط في حاجات كتير وده ناتج عن نقص الخبرة واللي بتزيد مع الوقت وبنفهم الدنيا

هو فعلا لازم ابدأ احط درجات وحدود للتعامل مع الناس وكمان نظرية التغاضي دي مفيدة وبحاول اعملها وربنا يوفقني واعرف اظبط الموضوع
حياكي الله وشكرا ليكي على نصائحك الغالية

اقتباس المشاركة الأصلية كتبت بواسطة ana_3enady واد يا تورنادو .. خليك باااااااااااااااااااااااااااااااااااارد وطنش تعش تنتعش .. الى أن يثبت لك ان اللي أدامك تعدى حدوده .. ساعتها اديله ما ترحمهوش وبالأدب علشان ما يمسكش عليك غلطة

احلى حاجة فيك يا تامر انك بتجيب من الاخر
بس حلو اسلوب الصياعة ده والصياعة ادب مش هز اكتاف الليمبي يا اخواتي
تسلم على النصيحة دي
خد دي